Wekanhlanmẹ de Dohlan Noa

“NOA vivẹ, yẹn ko hia otàn towe whlasusu to Biblu mẹ podọ lehe hiẹ gbá aki de he whlẹn whẹndo towe po hiẹ lọsu po gán to Osingigọ lọ whenu do.”

Mọwẹ wekanhlanmẹ viyọnnu owhe 15-mẹvi he nọ yin Minnamaria tọn bẹjẹeji do. E ze wekanhlanmẹ ehe jo to agbàwhinwhlẹn wekinkan tọn heyin bibasi na wehọmẹvi owhe 14 jẹ 21 mẹvi lẹ tọn whenu. Agbàwhinwhlẹn lọ yin awuwlena gbọn azọ́nwhe posu Finlande tọn, Ogbẹ́ Mẹplọntọ Ogbè Finlande tọn lẹ tọn, po Pipli He Nọ Wleawuna Nuplọnwema Ogbè Finlande tọn po dali. Wehọmẹvi lọ lẹ dona wlan wekanhlanmẹ de sinai do owe de ji. E sọgan yin wiwlan hlan mẹhe kàn owe lọ kavi hlan mẹhe yin alọdlẹndo to owe lọ mẹ de. Mẹplọntọ lọ lẹ de wekanhlanmẹ he hugan 1 400 sọn owe he wehọmẹvi yetọn lẹ kàn mẹ bo yí yé dohlan pipli he penukundo agbàwhinwhlẹn lọ go. Pipli lọ wá de wekanhlanmẹ he yí otẹn tintan, enẹgodo yé de ao devo he yí otẹn awetọ, bosọ de ao devo he yí otẹn atọ̀ntọ. Homẹ Minnamaria tọn hùn dọ wekanhlanmẹ etọn yin dopo to dehe yí otẹn atọ̀ntọ lọ lẹ mẹ.

Naegbọn Minnamaria, wehọmẹvi aflanmẹ de, wlan wekanhlanmẹ etọn dohlan Noa, dawe de he nọgbẹ̀ to nudi owhe 5 000 die wayi? E dọmọ: “Biblu wẹ yin onú tintan he wá ayiha ṣie mẹ. Yẹn jẹakọhẹ mẹhe yin nùdego to Biblu mẹ lẹ taun. Yẹn ko hia nususu gando yé go sọmọ bọ yẹn nọ pọ́n yé hlan taidi mẹhe pò to ogbẹ̀ lẹ. Yẹn de Noa na gbẹzan etọn fọnjlodotenamẹ taun bosọ gbọnvo tlala na ṣie.”

Minnamaria dotana wekanhlanmẹ etọn hlan Noa dọmọ: “Hiẹ gbẹ́ yin apajlẹ yise po tonusise po tọn de. Gbẹzan towe nọ na tuli mẹhe hia Biblu lẹpo nado yinuwa po yise po.”

Wekanhlanmẹ jọja Biblu hiatọ ehe tọn dohia hezeheze dọ Biblu “tin to ogbẹ̀, [bo] dohuhlọn” do gbẹtọ lẹ, yèdọ jọja po mẹho po ji.—Heblu lẹ 4:12.