“Nado Ze Oyín Jehovah Tọn Daga”

GBẸTỌ lẹ lẹdo aihọn pé nọ yọ́n pinpẹn Atọ̀họ̀-Nuhihọ́ Lọ Tọn po Réveillez-vous! po tọn na nudọnamẹ gbigbọmẹ tọn po nuplọnmẹ họakuẹ he yé nọ bẹhẹn lẹ po. Wehiatọ dopo kàn wekanhlanmẹ he bọdego ehe sọn France nado do ehe hia:

“Yẹn yin yọnnu jọja de, he wá sọn Aflika, bọ yẹn ma yì wehọmẹ susu. E ma ko dẹn bọ yẹn jẹ linlinnamẹwe mìtọn lẹ hia ji. Na hosọ lọ lẹ nọ dọ̀n mi wutu, yẹn wá to nujọnu-yinyin wehihia tọn mọ todin. Yẹn dopẹ́ na mì, wehihia ehe gọalọna mi nado yọ́n hogbe lẹ dogọ, podọ yẹn sọgan kàn wekanhlanmẹ de matin weṣikan susu.

“E paṣa mi nado mọ dọ mì nọ dọhodo hosọ voovo lẹ ji he gando gbẹtọ, planẹti mítọn, po Mẹdatọ lọ po go. Hosọ ehelẹ nọ họnwun sọmọ bọ yé nọ hẹnmẹ tin to jejeji nado hia yé. Mẹdevo de masọ tin he tindo nugopipe lọ nado plọn gbẹtọ wunmẹ lẹpo to ojlẹ dopolọ mẹ domọ gba.

Yẹn sọ yin nuyiwadeji to whenuena yẹn mọnukunnujẹemẹ dọ ehe lẹpo ma nọ yin wiwà na ale akuẹ tọn wutu gba ṣigba nado ze oyín Jehovah tọn daga. Yẹn yọnẹn dọ mì tindo alọkẹyi ewọ tọn, bọ yẹn sọ dopẹ́ na mì susu. Mì zindonukọn nado to huhlọn mọyi sọn Mẹdatọ lọ dè nado nọ plọnnumẹ.”

Kunnudetọ Jehovah tọn lẹ to azọ́n Biblu pinplọnmẹ tọn yetọn wà to alọnu to aigba 235 ji. Atọ̀họ̀-Nuhihọ́ Lọ Tọn nọ yin zinzinjẹgbonu to ogbè 148 mẹ bọ Réveillez-vous! tin to ogbè 87 mẹ. Linlinnamẹwe ehelẹ ma nọ yin zinzinjẹgbonu nado hẹn gigo wá na gbẹtọvi depope gba. Ayinamẹ sinai do Biblu ji po nudọnamẹ he sọgbe hẹ ojlẹ mítọn he nọ yin mimọ to e mẹ lẹ po nọ yin awuwlena nado gbògbéna Mẹdatọ lọ, he dọmọ: “Yẹn wẹ [Jehovah] . . . he plọn we na ale.” (Isaia 48:17) Na hiẹ ni mọaleyi gbọn Owe Wiwe hihia to gbesisọmẹ dali po alọgọ owe sinai do Biblu ji ehelẹ tọn po.