Hagbẹ Yọyọ Hagbẹ Anademẹtọ Tọn Lẹ
Hagbẹ Yọyọ Hagbẹ Anademẹtọ Tọn Lẹ
TO AFỌNNU mercredi 24 août 2005 tọn, whẹndo Bẹtẹli États-Unis po Canada po tọn lẹpo sè nulila ojlofọndotenamẹ tọn de to pọmẹ gbọn video gblamẹ. Bẹsọn 1er septembre 2005, hagbẹ yọyọ awe—Geoffrey W. Jackson po Anthony Morris III po—na yin yiyidogọna Hagbẹ Anademẹtọ Kunnudetọ Jehovah tọn lẹ tọn.
Mẹmẹsunnu Jackson jẹ gbehosọnalitọ basi ji to février 1971 to Tasmanie, lopo Australie tọn ji. To juin 1974, e wlealọ hẹ Jeanette (Jenny). To ojlẹ vude godo, yé yin dide taidi gbehosọnalitọ titengbe. Sọn 1979 jẹ 2003, yé wà sinsẹ̀nzọn taidi mẹdehlan to otò Tuvalu, Samoa po Fiji po tọn mẹ—lopo Hùwaji Pacifique tọn lẹ. Whenuena yé tin to lopo lẹ ji, Mẹmẹsunnu po Mẹmẹyọnnu Jackson po sọ yí adà titengbe de wà to azọ́n lẹdogbedevomẹ owe sinai do Biblu ji lẹ tọn mẹ. Bẹsọn 1992, mẹmẹsunnu Jackson wadevizọn to Wedegbẹ́ Alahọ Samoa tọn mẹ, podọ bẹsọn 1996, to Wedegbẹ́ Alahọ Fiji tọn mẹ. To avril 2003, ewọ po Jenny po lẹzun hagbẹ whẹndo Bẹtẹli États-Unis tọn tọn bo jẹ azọ́nwa ji to Azọ́nwatẹn Sinsẹ̀nzọn Lẹdogbedevomẹ tọn. Madẹnmẹ to enẹgodo, Mẹmẹsunnu Jackson wá yin dide taidi alọgọtọ de na Wedegbẹ́ Mẹpinplọn tọn Hagbẹ Anademẹtọ lọ tọn.
Mẹmẹsunnu Morris biọ sinsẹ̀nzọn gbehosọnalitọ tọn mẹ to 1971 to États-Unis. To osun décembre owhe enẹ tọn mẹ, e wlealọ hẹ Susan, bọ yé zindonukọn to gbehosọnalitọ bibasi mẹ na nudi owhe ẹnẹ whẹpo Jesse, visunnu yetọn tintan do yin jiji. To godo mẹ, yé ji visunnu devo, Paul. Mẹmẹsunnu Morris gọ̀ sinsẹ̀nzọn whenu-gigọ tọn bẹjẹeji to 1979 taidi gbehosọnalitọ whepoponu tọn. Asi etọn kọnawudopọ hẹ ẹ to whenuena visunnu yetọn lẹ jẹ wehọmẹ yì ji. Whẹndo lọ sẹ̀n to fihe nuhudo sù te to Lopo Rhode tọn ji podọ to Caroline du Nord to États-Unis. To Caroline du Nord, Mẹmẹsunnu Morris wà sinsẹ̀nzọn taidi nugopọntọ lẹdo tọn tẹnmẹpọnnamẹtọ, podọ visunnu etọn lẹ biọ sinsẹ̀nzọn gbehosọnalitọ whepoponu tọn mẹ. Jesse po Paul po yin oylọ-basina yì alahọ États-Unis tọn mẹ to whenuena dopodopo yetọn tindo owhe 19. To ojlẹ dopolọ mẹ, Mẹmẹsunnu Morris bẹ azọ́n nugopọntọ lẹdo tọn jẹeji. Enẹgodo, to 2002 ewọ po Susan po yin oylọ-basina wá Bẹtẹli, bo bẹ azọ́ndenamẹ yetọn yọyọ jẹeji to 1er août. Mẹmẹsunnu Morris wazọ́n to Azọ́nwatẹn Sinsẹ̀nzọn tọn to Patterson podọ to godo mẹ taidi alọgọtọ to Wedegbẹ́ Sinsẹ̀nzọn tọn Hagbẹ Anademẹtọ lọ tọn mẹ.
To yidogọ mẹ na hagbẹ awe yọyọ ehelẹ, Hagbẹ Anademẹtọ lọ bẹ C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; po D. Sydlik po hẹn. Mẹhe tin to Hagbẹ Anademẹtọ lọ mẹ lẹpo wẹ yin Klistiani yiamisisadode lẹ.