Nọla Na Sinsẹ̀n-Bibasi Lalo!
Nọla Na Sinsẹ̀n-Bibasi Lalo!
“Mì tọ́nsọn ṣẹnṣẹn yetọn, bo nọla, [wẹ Jehovah dọ,] mì gàn do onú mawé go blo.”—2 KỌLINTINU LẸ 6:17.
1. Ninọmẹ gbigbọmẹ tọn tẹ mẹ wẹ gbẹtọ ahundoponọ susu tin te?
GBẸTỌ ahundoponọ susu ma yọ́n nugbo lọ gando Jiwheyẹwhe po sọgodo gbẹtọvi tọn po go. Na yé ma ko mọ gblọndo na nuhe to ahunmẹduna yé sinsinyẹn to gbigbọ-liho lẹ wutu, yé tin to bẹwlu po ayihaawe po mẹ. Livi susu ko lẹzun afanumẹ otangblo, hùnwhẹ, po nuwiwa he Mẹdatọ mítọn gbẹwanna lẹ po tọn. Vlavo, hiẹ tindo kọmẹnu po hẹnnumẹ lẹ po he yise to olọnzomẹ, Jiwheyẹwhe atọ̀n-to-dopomẹ, jọmaku alindọn tọn, kavi nuplọnmẹ lalo devo lẹ mẹ.
2. Etẹwẹ sinsẹ̀ngán lẹ ko wà, podọ etẹwẹ yin kọdetọn lọ?
2 Etẹwẹ zọ́n bọ zinvlu gbigbọmẹ tọn ehe do gbayipe sọmọ? E sọgan paṣa we, ṣigba sinsẹ̀n wẹ zọ́n—na taun tọn pipli sinsẹ̀n tọn po sinsẹ̀ngán lẹ po he ko ze nuplọnmẹ he jẹagọdo linlẹn Jiwheyẹwhe tọn lẹ daga. (Malku 7:7, 8) Taidi kọdetọn de, mẹsusu ko yin kiklọ nado lẹndọ yé to Jiwheyẹwhe nugbo lọ sẹ̀n, to whenuena e yindọ homẹhẹngblena ẹn wẹ yé te. Na nugbo tọn, sinsẹ̀n lalo wẹ hẹn ninọmẹ blawu ehe wá.
3. Mẹnu wẹ yin omẹ gángánsu lọ he nọ ze sinsẹ̀n lalo daga, podọ nawẹ Biblu basi zẹẹmẹ etọn gbọn?
3 Nudida mayinukundomọ de tin to godo na sinsẹ̀n lalo. To alọdindlẹndo e mẹ, apọsteli Paulu dọmọ: “Yẹwhe whenu he tọn ko tọ́nnukunna nuyọnẹn mẹhe ma yise lẹ tọn, na hinhọ́n wẹndagbe gigonọ Klisti tọn tọn, mẹhe yin apajlẹ Jiwheyẹwhe tọn, ma nado họnwun hlan yé.” (2 Kọlintinu lẹ 4:4) “Yẹwhe whenu he tọn” lọ ma yin mẹdevo zẹ̀ Satani Lẹgba go. Ewọ wẹ yin omẹ gángánsu lọ he nọ ze sinsẹ̀n lalo daga. “Satani lọsu nọ diọada zun angẹli hinhọ́n tọn,” wẹ Paulu wlan. “Enẹwutu e ma yin onú daho de eyin devizọnwatọ etọn lẹ ga yin mẹdiọadana di devizọnwatọ dodo tọn lẹ.” (2 Kọlintinu lẹ 11:14, 15) Satani nọ hẹn onú ylankan lẹ sọawuhia taidi dagbe bo nọ klọ gbẹtọ lẹ nado yí lalo lẹ sè.
4. Etẹwẹ Osẹ́n Jiwheyẹwhe tọn hlan Islaeli hohowhenu tọn dọ gando yẹwhegán lalonọ lẹ go?
4 Abajọ Biblu do gblewhẹdo sinsẹ̀n lalo po huhlọn po sọmọ! Di apajlẹ, Osẹ́n Mose tọn na avase omẹ dide Jiwheyẹwhe tọn lẹ tlọlọ sọta yẹwhegán lalonọ lẹ. Mẹdepope he ze nuplọnmẹ lalo lẹ po sinsẹ̀n-bibasi yẹwhe lalo lẹ tọn po daga dona ‘yin hùhù na e ko dọho lilẹ́ jẹla do Jehovah ji wutu.’ Islaelivi lẹ yin gbedena nado ‘de oylan lọ sẹ sọn gblagbla yetọn mẹ.’ (Deutelonomi 13:1-5) Mọwẹ, Jehovah nọ pọ́n sinsẹ̀n lalo hlan taidi oylan.—Ezekiẹli 13:3.
5. Avase tẹlẹ wẹ mí dona setonuna to egbehe?
5 Jesu Klisti po apọsteli etọn lẹ po do numọtolanmẹ sinsinyẹn Jehovah tọn lẹ sọta sinsẹ̀n lalo hia. Jesu na avase devi etọn lẹ dọmọ: “Mì payi yẹwhegán lalonọ lẹ go, he to mì dè wá . . . to avọ̀ lẹngbọ lẹ tọn mẹ, ṣigba ohla nuwletọ lẹ wẹ yé to homẹ.” (Matiu 7:15; Malku 13:22, 23) Paulu wlan dọ “yè do homẹgble Jiwheyẹwhe tọn hia sọn olọn mẹ do jijọ-madi-Jiwheyẹwhe tọn [lẹpo] go, po mawadodo gbẹtọ tọn lẹpo po, mẹhe yí nugbo Jiwheyẹwhe tọn hẹn [kavi ze e whlá] to mawadodo mẹ lẹ.” (Lomunu lẹ 1:18) Lehe e yin dandannu dọ Klistiani nugbo lẹ ni setonuna avase ehelẹ bo dapana mẹdepope he nọ ze nugbo Jiwheyẹwhe tọn whlá kavi he nọ hẹn nuplọnmẹ lalo lẹ gbayipe do sọ!—1 Johanu 4:1.
Tọ́nsọn “Babilọni Daho” lọ Mẹ
6. Nawẹ “Babilọni Daho” lọ yin zẹẹmẹ-basina to Biblu mẹ gbọn?
6 Pọ́n lehe owe Osọhia tọn basi zẹẹmẹ sinsẹ̀n lalo tọn do to Biblu mẹ. E basi zẹẹmẹ etọn taidi ayọdetọ ahànnumunọ de he tindo huhlọn do ahọluduta susu po omẹ yetọn lẹ po ji. Yọnnu yẹhiadonu tọn ehe deayọ hẹ ahọlu susu bo nù ohùn sinsẹ̀n-basitọ nugbo Jiwheyẹwhe tọn lẹ tọn mú. (Osọhia 17:1, 2, 6, 18) E tindo yinkọ de he yin kinkàn do nukọn etọn he sọgbe hẹ walọyizan mawé he hiọawu etọn. Yinkọ lọ wẹ “Babilọni Daho, onọ̀ yọnnu ayọdetọ lẹ tọn, po osùnú aihọn tọn lẹ po.”—Osọhia 17:5.
7, 8. Nawẹ sinsẹ̀n lalo ko deayọ gbọn, podọ etẹwẹ yin kọdetọn lọ lẹ?
7 Zẹẹmẹ he Owe-wiwe basi gando Babilọni Daho lọ go sọgbe hẹ pipli sinsẹ̀n lalo aihọn tọn lẹpo ganji. Dile etlẹ yindọ sinsẹ̀n fọtọ́n susu he tin lẹ ma to pọninọ mẹ tlọlọ taidi pipli lẹdo aihọn pé tọn de, yé tindo kanṣiṣa pẹkipẹki to lẹndai po nuyiwa yetọn lẹ po mẹ. Dile e yin tenọna gbọn yọnnu ayọdetọ lọ dali to Osọhia mẹ do, sinsẹ̀n lalo tindo nuyiwadomẹji sinsinyẹn do gandudu lẹ ji. Taidi yọnnu de he ma yin nugbonọ na opà alọwle tọn etọn lẹ, sinsẹ̀n lalo ko deayọ gbọn alẹnùnù hẹ gandudu tonudidọ tọn debọdo-dego lẹ dali. “Mì yọnnu ayọdetọ lẹ, be mìwlẹ ma yọnẹn dọ họntọnjiji hẹ aihọn, okẹ̀n wẹ e yin to Jiwheyẹwhe dè?” wẹ devi Jakobu wlan. “Na mẹdepope he na yin họntọn aihọn tọn, kẹntọ Jiwheyẹwhe tọn wẹ.”—Jakobu 4:4.
8 Kọndopọ sinsẹ̀n lalo po gandudu lẹ po tọn ehe ko dekọtọn do yajiji susu mẹ na gbẹtọvi lẹ. Weyọnẹntọ Aflikanu Xolela Mangcu he nọ gbadopọnna whẹho tonudidọ tọn lẹ dọ dọ “whenuho aihọn tọn gọ́ na apajlẹ mẹsusu hùhù dopọ tọn lẹ he wá sọn kọndopọ sinsẹ̀n po tonudidọ po tọn mẹ.” Linlinwe de dọ to agọe dọmọ: “Nudindọn he bẹ hùnsọndai po owù po hẹn hugan to egbehe lẹ . . . sinai do sinsẹ̀n ji.” Livi susu gbẹtọ lẹ tọn ko yin hùhù to avùn he sinsẹ̀n nọgodona lẹ mẹ. Babilọni Daho lọ tlẹ ko dohomẹkẹn devizọnwatọ nugbo Jiwheyẹwhe tọn lẹ bo hù yé, bosọ gbọnmọ dali nù ohùn yetọn mú to yẹhiadonu-liho.—Osọhia 18:24.
9. Nawẹ owe Osọhia tọn dohia dọ Jehovah gbẹwanna sinsẹ̀n lalo gbọn?
9 Mí mọ kunnudenu lọ hezeheze dọ Jehovah gbẹwanna sinsẹ̀n lalo to nuhe Biblu dọ dọ e na jọ do Babilọni Daho lọ go mẹ. Osọhia 17:16 dọmọ: “Azò ao he hiẹ mọ to ota na kanlin lọ, ehelẹ wẹ na gbẹwanna ayọdetọ lọ, bo na basi i matin hùwhẹ-homẹtọnọ, bosọ hẹn ẹn jẹmẹ́, yé na dù olàn etọn, bo nasọ yí miyọ́n do fiọ ẹ gbidigbidi.” Tintan whẹ́, gbekanlin daho de gbleawuna yọnnu lọ jẹ kúdonu bo dù olàn etọn. Enẹgodo, adà etọn he pò lẹpo yin fifiọ gbidigbidi. Mọdopolọ, gandudu aihọn tọn lẹ na ze afọdide mọnkọtọn sọta sinsẹ̀n lalo to madẹnmẹ. Jiwheyẹwhe na whàn yé nado wàmọ. (Osọhia 17:17) Babilọni Daho lọ, yèdọ ahọluigba aihọn sinsẹ̀n lalo tọn na yin vivasudo dandan. “Yè masọ to na mọ ẹn gbedegbede ba.”—Osọhia 18:21.
10. Nukun tẹwẹ mí dona nọ yí do pọ́n sinsẹ̀n lalo?
10 Nukun tẹwẹ sinsẹ̀n-basitọ nugbo lẹ dona nọ yí do pọ́n Babilọni Daho lọ? Biblu degbè to aliho he họnwun gblegede mẹ dọmọ: “Mì tọ́nsọn e mẹ, mì omẹ ṣie emi, dọ mì yin mahẹtọ to ylando etọn mẹ blo, dọ mì yí to azọ̀nylankan etọn mẹ blo.” (Osọhia 18:4) Mẹhe jlo nado yin whinwhlẹngán lẹ dona tọ́nsọn sinsẹ̀n lalo mẹ whẹpo whenu nido fẹ́. To whenuena Jesu Klisti tin to aigba ji, e dọ dọdai dọ to azán godo tọn lẹ mẹ, mẹsusu na sọalọakọ́n poun nado yin hodotọ etọn lẹ. (Matiu 24:3-5) E dọna omẹ mọnkọtọn lẹ dọmọ: “Yẹn ma yọ́n mì gbede, mì tọ́nsọn dè e, mì azọ́n ylankan wàtọ.” (Matiu 7:23) Jesu Klisti, Ahọlu he ko hẹ́ ofìn ji todin lọ ma tindo kanṣiṣa depope hẹ sinsẹ̀n lalo.
Nọla Na Sinsẹ̀n-Bibasi Lalo—Gbọnna?
11. Etẹwẹ mí dona wà nado nọla na sinsẹ̀n-bibasi lalo?
11 Klistiani nugbo lẹ nọ nọla na sinsẹ̀n-bibasi lalo, bo nọ gbẹ́ sinsẹ̀n-nuplọnmẹ lalo lẹ dai. Ehe zẹẹmẹdo dọ mí ma nọ dotoai kavi pọ́n tito-to-whinnu sinsẹ̀n tọn lẹ to ladio po televiziọn po ji bo masọ nọ hia owe sinsẹ̀n tọn he nọ hẹn lalo lẹ gbayipe gando Jiwheyẹwhe po Ohó etọn po go lẹ gba. (Psalm 119:37) Mí sọ nọ gbọn nuyọnẹn dali dapana mahẹ tintindo to nuwiwa pọmẹ tọn gọna ayidedai he yin godonọna gbọn pipli depope he tindo kanṣiṣa hẹ sinsẹ̀n lalo dali lẹ mẹ. Humọ, mí ma nọ nọgodona sinsẹ̀n lalo to aliho depope mẹ. (1 Kọlintinu lẹ 10:21) Afọdide mọnkọtọn lẹ zize nọ basi hihọ́na mí na mẹde nikaa “yí yinyọnẹn po oklọ tata po do bẹ [mí], gbọn otanhoho gbẹtọ tọn dali, gbọn jọgbe aihọn tọn mẹ, ehe ma dile Klisti tọn te.”—Kọlọsinu lẹ 2:8.
12. Nawẹ mẹde sọgan sánkanna haṣinṣan lẹpo hẹ pipli sinsẹ̀n lalo tọn lẹ gbọn?
12 Etẹwẹ lo eyin yinkọ mẹhe jlo na lẹzun dopo to Kunnudetọ Jehovah tọn lẹ mẹ de tọn gbẹ́ tin to kandai mẹ taidi hagbẹ sinsẹ̀n lalo tọn de? To suhugan ninọmẹ lẹ tọn mẹ, wekanhlanmẹ gbẹ́mẹ-tintọ́nsọn tọn de nọ do kunnudenu hia dọ mẹde masọ jlo nado yin pinpọnhlan taidi hagbẹ sinsẹ̀n lalo de tọn ba. Na taun tọn, nujọnu wẹ e yin dọ mẹlọ ni ze afọdide nujikudo tọn nado dapana yinyin hinhẹnflu gbọn sinsẹ̀n-bibasi lalo dali. Nuyiwa mẹhe jlo na lẹzun Kunnudetọ de tọn lẹ dona hẹn ẹn họnwun hezeheze na pipli sinsẹ̀n tọn lọ po ayidonugotọ paa lẹ po dọ e ko sánkanna haṣinṣan etọn hẹ sinsẹ̀n enẹ.
13. Ayinamẹ tẹwẹ Biblu na gando nuhudo lọ nado nọla na sinsẹ̀n-bibasi lalo go?
13 “Mì yin omẹ yè yí gbemasọ do dopokle dopọ po mayisenọ lẹ po blo,” wẹ apọsteli Paulu wlan. “Na pọninọ tẹwẹ dodo tindo po mawadodo po? Kọndopọ tẹwẹ hinhọ́n tindo po zinvlu po? Hiha tẹwẹ Klisti tindo po Beliali po? Kavi mimá tẹwẹ ewọ he yise tindo po mayisenọ po? Vivẹ tẹwẹ fiwiwe Jiwheyẹwhe tọn tindo po boṣiọ lẹ po? . . . Enẹwutu wẹ [Jehovah] dọmọ, mì tọ́nsọn ṣẹnṣẹn yetọn, bo nọla, mì gando onú mawé go blo.” (2 Kọlintinu lẹ 6:14-17) Mí nọ setonuna hogbe ehelẹ gbọn laninọ na sinsẹ̀n-bibasi lalo dali. Be ayinamẹ Paulu tọn biọ dọ mí nisọ dapana sinsẹ̀n-basitọ lalo lẹ ga wẹ ya?
“Mì Nọ Zinzọnlin to Nuyọnẹn Mẹ”
14. Be mí dona dapana mẹhe nọ doalọ to sinsẹ̀n-bibasi lalo mẹ lẹ mlẹnmlẹn wẹ ya? Basi zẹẹmẹ.
14 Be sinsẹ̀n-basitọ nugbo lẹ dona dapana mẹhe nọ doalọ to sinsẹ̀n-bibasi lalo mẹ lẹ mlẹnmlẹn wẹ ya? Be mí dona họ̀nna mẹhe ma kẹalọyi nuyise mítọn lẹ petepete wẹ ya? Lala wẹ gblọndo lọ. Gbedide awetọ he klo hugan lọ dọmọ: “Hiẹ, na yiwanna kọmẹnu towe di dewe.” (Matiu 22:39) Na jide tọn, mí nọ do owanyi hia kọmẹnu mítọn lẹ to whenuena mí má wẹndagbe Ahọluduta lọ tọn hẹ yé. Mí sọ nọ do owanyi mítọn hia yé to whenuena mí plọn Biblu hẹ yé bo hẹn yé tunwun nuhudo lọ go nado nọla na sinsẹ̀n-bibasi lalo.
15. Etẹwẹ e zẹẹmẹdo ‘ma nado yin aihọn tọn’?
15 Dile etlẹ yindọ mí nọ lá wẹndagbe lọ na kọmẹnu mítọn lẹ, mí “ma yin aihọn tọn” na hodotọ Jesu tọn lẹ wẹ mí wutu. (Johanu 15:19) Tofi hogbe lọ “aihọn” dlẹnalọdo ogbẹ́ gbẹtọvi he jẹla sọn Jiwheyẹwhe dè lẹ tọn. (Efesunu lẹ 4:17-19; 1 Johanu 5:19) Mí nọ nọla na aihọn to linlẹn lọ mẹ dọ mí nọ dapana jijọ, hodidọ, po walọyizan he Jehovah gbẹwanna lẹ po. (1 Johanu 2:15-17) Humọ, to kọndopọ mẹ hẹ nunọwhinnusẹ́n lọ dọ “ogbẹ́ ylankan nọ hẹn walọ dagbe gble,” mí nọ dapana họntọnjiji pẹkipẹki hẹ mẹhe ma nọ hodo nujinọtedo Klistiani tọn lẹ. (1 Kọlintinu lẹ 15:33) Ma nado yin aihọn tọn zẹẹmẹdo nado gbọṣi “madodiho sọn aihọn dè.” (Jakobu 1:27) Enẹwutu, laninọ na aihọn ma zẹẹmẹdo dọ mí nọ klan míde mlẹnmlẹn sọn mẹdevo lẹ go to agbasa-liho gba.—Johanu 17:15, 16; 1 Kọlintinu lẹ 5:9, 10.
16, 17. Nawẹ Klistiani lẹ dona nọ yinuwa hẹ mẹhe ma yọ́n nugbo Biblu tọn lẹ gbọn?
16 Eyin mọ wẹ, nawẹ mí dona nọ yinuwa hẹ mẹhe ma yọ́n nugbo Biblu tọn lẹ gbọn? Paulu kanwehlan agun he tin to Kọlọsi dọmọ: “Mì nọ zinzọnlin to nuyọnẹn mẹ hlan yé he tin to gbonu lẹ, na mì nisọ nọ basi ofligọ ojlẹ tọn. Mì gbọ hogbe mìtọn ni tin po ojọmiọn po to whepoponu, ehe ojẹ̀ pé, na mìwlẹ nido yọ́n le mì na nọ gblọnhona gbẹtọ lẹ dopodopo do.” (Kọlọsinu lẹ 4:5, 6) Apọsteli Pita wlan dọmọ: “Mì ni nọ klan [Klisti] Oklunọ do wiwe to ayiha mìtọn mẹ: mì sọ nọ wleawu whepoponu nado yigbena omẹ popo to walọmimiọn po osi po mẹ, he to dodinna linlẹn todido tọn he tin to mì mẹ lẹ.” (1 Pita 3:15) Paulu na ayinamẹ Klistiani lẹ “ma nado dọho gbigble do mẹde go, ma nado yin jlẹwàtọ, adavo omẹ dẹẹdẹ, he na nọ do walọmimiọn hia omẹ popo.”—Titu 3:2.
17 Taidi Kunnudetọ Jehovah tọn lẹ, mí nọ dapana fifiẹ kavi goyiyi to nuyiwa mítọn hẹ mẹdevo lẹ mẹ. Na nugbo tọn, mí ma nọ yí hogbe mẹdèpo tọn lẹ zan nado dlẹnalọdo hagbẹ sinsẹ̀n devo lẹ tọn gba. Kakatimọ, mí nọ yí zinzin zan, eyin whétọ, kọmẹnu, kavi azọ́nwatọgbẹ́ de ma tlẹ jọmẹ kavi nọ yí hogbe mẹzunzun tọn lẹ zan.—Kọlọsinu lẹ 4:6; 2 Timoti 2:24.
“Hẹn Ohia Ohó Tọn He Pegan lọ Go Gligli”
18. Ninọmẹ blawu tẹ mẹ wẹ mẹhe lẹkọyi sinsẹ̀n-bibasi lalo kọ̀n lẹ nọ mọ yede te?
18 Lehe e na blawu sọ dọ mẹde ni lẹkọyi sinsẹ̀n-bibasi lalo kọ̀n to nugbo Biblu tọn lẹ pinplọn godo! Biblu basi zẹẹmẹ nugbajẹmẹji he mẹ mọwiwà nọ dekọtọn do lẹ tọn to whenuena e dọmọ: “Eyin ehe godo yé ko họ̀ngán sọn dihó aihọn tọn mẹ, gbọn oyọnẹn Jesu Klisti Oklunọ Whlẹngantọ tọn dali, eyin yé sọ vọ́ yede zepla do e mẹ, bọ yè sọ gbawhàn yetọn, godo mẹ yetọn ylan to yé dè hú nukọn tọn. . . . E ko jọ hlan yé kẹdẹdi howhinwhẹn nugbo nẹ, Avún sọ gọ̀ do oslú etọn titi kọ̀n; podọ ohànsi he ko lawu sọ gọ̀ do gbọ̀nbublu etọn mẹ to ababa mẹ.”—2 Pita 2:20-22.
19. Naegbọn e do yin dandannu nado họ́ mídelẹ sọta nudepope he sọgan ze gbigbọnọ-yinyin mítọn do owù mẹ?
19 Mí dona họ́ mídelẹ sọta nudepope he sọgan ze gbigbọnọ-yinyin mítọn do owù mẹ. Owù lọ lẹ sù nugbo! Apọsteli Paulu na avase dọmọ: “Gbigbọ ko dọ dodo dọ, to ojlẹ godo tọn lẹ mẹ mẹdelẹ na jai sọn yise mẹ, bo nasọ na otó gbigbọ oklọ, po oplọn aovi tọn po.” (1 Timoti 4:1) Mí to gbẹnọ to “ojlẹ godo tọn lẹ” mẹ. Mẹhe ma nọla na sinsẹ̀n-bibasi lalo lẹ sọgan lẹzun mẹhe “yè na nọ do yigọyigọ na, bọ yè na yí jẹhọn oplọn tọn lẹpo do nọ hẹn dánpe, gbọn oklọ gbẹtọ tọn dali, po nuyọnẹn bublu tọn po, gbọn ehe mẹ yé nọ tọwu do nuglọ na oklọ.”—Efesunu lẹ 4:13, 14.
20. Nawẹ mí sọgan basi hihọ́na mídelẹ sọta nuyiwadomẹji ylankan sinsẹ̀n lalo tọn gbọn?
20 Nawẹ mí sọgan basi hihọ́na mídelẹ sọta nuyiwadomẹji ylankan sinsẹ̀n lalo tọn gbọn? Lẹnnupọndo nuhe Jehovah ko wleawuna lẹpo ji. Mí tindo Ohó Jiwheyẹwhe tọn, Biblu. (2 Timoti 3:16, 17) Jehovah ko sọ wleawudaina núdùdù gbigbọmẹ tọn susugege gbọn “afanumẹ nugbonọ, nuyọnẹntọ” lọ gblamẹ. (Matiu 24:45) Dile mí to nukọnyi to nugbo lọ mẹ, be e ma jẹ dọ mí ni wleawuna ojlo na ‘núdùdù sinsinyẹn he yin yé he tindo owhe susu to ota lẹ tọn’ gọna ojlo lọ nado nọ pli dopọ to fie mí nọ plọn nugbo gbigbọmẹ tọn lẹ te ya? (Heblu lẹ 5:13, 14; Psalm 26:8) Mì gbọ mí ni magbe nado yí awuwledainanu Jehovah tọn lẹ zan to gigọ́ mẹ nado sọgan “hẹn ohia ohó tọn he pegan [he mí ko sè] lọ go gligli.” (2 Timoti 1:13) Gbọnmọ dali mí na nọla na sinsẹ̀n-bibasi lalo.
Etẹwẹ Hiẹ Ko Plọn?
• Etẹwẹ yin “Babilọni Daho” lọ?
• Etẹwẹ mí dona wà nado nọla na sinsẹ̀n-bibasi lalo?
• Owù tẹlẹ wẹ mí dona dapana gando gbigbọnọ-yinyin mítọn go?
[Kanbiọ Oplọn Tọn Lẹ]
[Yẹdide to weda 28]
Be hiẹ yọ́n nuhewutu “Babilọni Daho” lọ yin didohia taidi yọnnu ayọdetọ de ya?
[Yẹdide to weda 29]
“Babilọni Daho” lọ na yin vivasudo dandan
[Yẹdide to weda 31]
Mí nọ do “walọmimiọn po osi po” hia mẹhe ma kẹalọyi nuyise mítọn lẹ