Daniel po Kalti Akọ́nnu Tọn Etọn Po

JESU gblewhẹdo sinsẹ̀ngán dodonọ-jlatọ lẹ na yé gblehomẹ to whenuena yé mọ bọ yọpọ sunnu lẹ to Jiwheyẹwhe pà to gbangba. Po gbesisọ po, Jesu kanse yé dọmọ: “Mìwlẹ ma ko hia gbede, dọ, Sọn onù yọpọvu lẹ tọn mẹ, podọ sọn ovi he to anọ́nù lẹ tọn mẹ wẹ hiẹ ko hẹn pipà sọgbe te?”—Matiu 21:15, 16.

Daniel owhe ṣidopo mẹvi, he to awukọndopọ hẹ agun Russie-gbè tọn de to Allemagne, na kunnudenu dọ yọpọvu lẹ gbẹ́ pò to Jehovah pà to egbehe. To pọmẹ hẹ onọ̀ etọn po mẹdaho etọn yọnnu po, e yì plidopọ Kunnudetọ Jehovah tọn lẹ tọn de to Duisburg. Tintan niyẹn bọ yé yì plidopọ daho mọnkọtọn de tẹnmẹ. Nuhe yé mọ lẹpo wẹ di nuyọyọ na yé: yèdọ hotẹli, sọha daho plidopọ-watọ lẹ tọn, aisinsin whii na azán atọ̀n, baptẹm yíyí, gọna nupinpọn-do-plọnnu. Nawẹ Daniel yinuwa gbọn? Walọyizan etọn jẹna pipà taun.

To kọlilẹ wá whé godo, to lundi he bọdo plidopọ lọ go tlolo, Daniel yawu fọ́n nado yì wehọmẹ yọpọvu lẹ tọn. Ṣigba, nude gbẹ́ pò to awu etọn go. Enẹ wẹ kalti akọ́nnu tọn he do e hia taidi plidopọ yitọ de! Onọ̀ etọn dọna ẹn dọ: “Plidopọ ko fó be. A sọgan de kalti akọ́nnu tọn towe todin.” Ṣigba Daniel dọmọ: “N’jlo dọ mẹlẹpo ni yọ́n fie n’yì gọna nuhe n’plọn to dọ́n.” Enẹwutu, e dó kalti akọ́nnu tọn lọ po awagundido po to azán lọ blebu ji to wehọmẹ. To whenuena mẹplọntọ etọn kanhose e gando kalti lọ go, e basi zẹẹmẹ tito-to-whinnu plidopọ lọ tọn na ẹn.

Gbọn mọwiwà dali, Daniel hodo apajlẹ yọpọ sunnu po yọnnu po fọtọ́n susu lẹ tọn he ko pagigona Jehovah to gbangba to owhe kanweko lẹ gblamẹ.