Họgbigbá to Kọndopọ mẹ Nado Pà Jiwheyẹwhe

TO DOPO to Lopo Salomon tọn lẹ ji, gbẹtọ lẹ doayi Plitẹnhọ Ahọluduta tọn yọyọ Kunnudetọ Jehovah tọn lẹ tọn de go. Awhli de dọmọ: “To ṣọṣi mítọn mẹ, mí nọ basi hùnwhẹ susu nado jọ akuẹ pli. Mí nọ biọ to ṣọṣi-watọ lẹ si nado na akuẹ, ṣigba kakajẹ din mí ma ko tindo akuẹ he pé nado gbá ṣọṣi-họ̀ yọyọ de. Nawẹ mì Kunnudetọ lẹ nọ mọ akuẹ gbọn?” Kunnudetọ he e to hodọna lọ gblọn dọmọ: “Mí nọ sẹ̀n Jehovah taidi whẹndo lẹdo aihọn pé tọn de. Agun mítọn po mẹmẹsunnu mítọn lẹ po lẹdo aihọn pé wẹ na nuhe mí tindo nuhudo etọn na Plitẹnhọ Ahọluduta tọn yọyọ ehe. Jehovah ko plọn mí nado nọ wà nulẹpo to kọndopọ mẹ.”

Hiẹ sọgan mọ kọndopọ to Kunnudetọ Jehovah tọn lẹ ṣẹnṣẹn to nuyiwa yetọn lẹpo mẹ, ehe bẹ Plitẹnhọ Ahọluduta tọn fọtọ́n susu lẹ gbigbá hẹn. Pọninọ mọnkọtọn to azọ́n ehelẹ wiwà mẹ ma yin nuyọyọ gba. E ko tin to omẹ Jiwheyẹwhe tọn lẹ ṣẹnṣẹn sọn owhe fọtọ́n fọtọ́n lẹ die. Gbọnna?

Gbigbá Gòhọtúntún lọ po Tẹmpli lọ po Tọn

Akọta Islaeli tọn wẹ Jehovah tindo to linlẹn mẹ to whenuena e dọna Mose to owhe 3 500 die wayi dọmọ: “Gbọ yé ni basi fiwiwe de na mi.” (Eksọdusi 25:8) Gando yẹdide họgbigbá ehe tọn go, Jehovah yidogọ dọmọ; “Kẹdẹdi ehe n’dohia we lẹpo, ojlẹmọ gòhọtúntún lọ tọn, po ojlẹmọ núzinzan etọn lẹpo po tọn, yèdọ mọkẹdẹ wẹ mì na basi i do.” (Eksọdusi 25:9) Enẹgodo, Jehovah basi zẹẹmẹ gigọ́ gando yẹdide fiwiwe lọ, aṣọ́donu po núzinzan etọn lẹ po tọn go. (Eksọdusi 25:10–27:19) “Gòhọtúntún” kavi gòhọ ehe wẹ dona yin ahọ́nkan sinsẹ̀n-bibasi nugbo tọn na Islaelivi lẹpo.

Mí ma yọ́n omẹ nẹmu he wazọ́n to họgbigbá lọ mẹ, ṣigba Islaelivi lẹpo wẹ yin oylọ-basina nado nọgodona ẹn. Mose dọna yé dọmọ: “Mì yí avọnunina de sọn mì ṣẹnṣẹn hlan OKLUNỌ lọ: mẹdepope he yin ojlonọ ayiha tọn de gbọ e ni hẹn ẹn wá, avọnunina OKLUNỌ lọ tọn.” (Eksọdusi 35:4-9) Nawẹ Islaelivi lẹ yinuwa gbọn? Eksọdusi 36:3 dọmọ: “Yé sọ yí avọnunina lọ lẹpo sọn Mose si, he ovi Islaeli tọn lẹ lọ hẹnwa na azọ́n sinsẹ̀n fiwiwe lọ tọn tọn, nado yí do basi i. Yé sọ nọ hẹn avọnunina jlomẹ tọn lẹ dogọ wá e dè afọnnu afọnnu.”

E ma dẹn bọ azọ́nwanu he yin nina lọ lẹ sù taun, ganṣo gbẹtọ lọ lẹ gbẹ́ to hinhẹnwa dogọ. Alọnuzọ́nwatọ he to azọ́n lọ wà lẹ wá dọna Mose to godo mẹ dọmọ: “Gbẹtọ lẹ lọ hẹnwa sù gbau na sinsẹ̀n azọ́n lọ tọn, he OKLUNỌ lọ degbena nado basi.” Enẹwutu, Mose de gbeta de tọ́n dọmọ: “Yè sọ dike sunnu kavi yọnnu basi azọ́n depope na avọnunina fiwiwe lọ tọn dogọ blo.” Etẹwẹ yin kọdetọn lọ? “Nuwànu yé ko tindo lọ pé na azọ́n lọ lẹpo nado basi i, bosọ [sù] gbau.”—Eksọdusi 36:4-7.

 Na alọtútlú Islaelivi lẹ tọn wutu, gòhọtúntún lọ yin gbigbá fó to owhe dopo gblamẹ. (Eksọdusi 19:1; 40:1, 2) Gbọn godoninọna sinsẹ̀n-bibasi nugbo lọ dali, omẹ Jiwheyẹwhe tọn lẹ gbògbéna Jehovah. (Howhinwhẹn lẹ 3:9) To nukọn mẹ yé sọ wá bẹ azọ́n họgbigbá tọn daho hugan de jẹeji. Podọ whladopo dogọ, mẹhe jlo lẹpo sọgan tindo mahẹ to e mẹ, vlavo yé yọ́n ohọ̀ gbá kavi lala.

Diblayi owhe 500 to gòhọtúntún lọ gbigbá godo, Islaelivi lẹ bẹ tẹmpli Jelusalẹm tọn gbigbá jẹeji. (1 Ahọlu lẹ 6:1) Ehe na yin ohọ̀ whanpẹnọ zannu po owhlẹ titli po tọn de he na nọ̀ aimẹ dẹn. (1 Ahọlu lẹ 5:17, 18) Jehovah do yẹdide tẹmpli lọ tọn hia Davidi ‘to gbọdo glọ.’ (1 Otannugbo lẹ 28:11-19) Ṣigba visunnu Davidi tọn Sọlọmọni wẹ e de nado deanana azọ́n họgbigbá lọ tọn. (1 Otannugbo lẹ 22:6-10) Davidi yí ahun lẹpo do nọgodona tito lọ. E wleawuna zannu, dòtin, po azọ́nwanu devo lẹ po bosọ na sika po fataka susu po sọn nutindo etọn titi mẹ. E sọ na tuli Islaelivi hatọ etọn lẹ nado tlúalọ, bo kanse yé dọmọ: “Mẹnu wẹ na po ojlo po nado gọ́ alọ etọn to egbé hlan OKLUNỌ?” Nawẹ gbẹtọ lẹ yinuwa gbọn?—1 Otannugbo lẹ 29:1-5.

To ojlẹ he mẹ Sọlọmọni bẹ azọ́n tẹmpli lọ tọn jẹeji, tọnu fọtọ́n susu sika po fataka po tọn wẹ ko tin to aimẹ. Gànvẹẹ po gànyuu po sù sọmọ bọ mẹde ma sọgan jlẹ. (1 Otannugbo lẹ 22:14-16) Po godonọnamẹ Jehovah tọn po gọna alọgọ Islaelivi lẹpo tọn, azọ́n lọ yin tadona to owhe ṣinawe-daa poun gblamẹ.—1 Ahọlu lẹ 6:1, 37, 38.

“Ohọ̀ Jiwheyẹwhe Tọn”

Gòhọtúntún lọ po tẹmpli lọ po nọ yin yiylọ dọ “ohọ̀ Jiwheyẹwhe tọn.” (Whẹdatọ 18:31; 2 Otannugbo lẹ 24:7) Jehovah ma ko tindo nuhudo fibẹtado owhé de tọn pọ́n gbede. (Isaia 66:1) E wleawu ohọ̀ enẹlẹ tọn na ale gbẹtọvi lẹ tọn. Na nugbo tọn, to klandowiwe tẹmpli lọ tọn whenu, Sọlọmọni kanse dọmọ: “Be Jiwheyẹwhe to walọ nugbo mẹ na nọ̀ aigba go? Doayi e go, olọn po olọn olọn lẹ tọn po ma sọgan hẹn we; whè sọ na ohọ̀ he ehe yẹn ko do!”—1 Ahọlu lẹ 8:27.

Jehovah dọ gbọn yẹwhegán etọn Isaia gblamẹ dọmọ: “Ohọ̀ odẹ̀ tọn wẹ yè na nọ ylọ ohọ̀ ṣie dọ na gbẹtọ lẹpo.” (Isaia 56:7) Avọ́sinsan po odẹ̀ he nọ yin hihò to tẹmpli lọ mẹ lẹ po, gọna hùnwhẹ he nọ yin bibasi to finẹ lẹ, nọ hùn dotẹnmẹ  dote na gbẹtọ budisi Jiwheyẹwhe tọ́ lẹ—vlavo yé yin Juvi kavi lala—nado dọnsẹpọ Jiwheyẹwhe nugbo lọ pẹkipẹki. Yé nọ mọ họntọnjihẹmẹ po hihọ́-basinamẹ Jehovah tọn po yí gbọn sinsẹ̀n-bibasi to ohọ̀ ehe mẹ dali. Odẹ̀ he Sọlọmọni hò to klandowiwe tẹmpli lọ tọn whenu zinnudo nugbo ehe ji. Hiẹ sọgan hia hogbe mẹwhinwhàn tọn he e dọhlan Jiwheyẹwhe lẹ to 1 Ahọlu lẹ 8:22-53 po 2 Otannugbo lẹ 6:12-42 po mẹ.

Ohọ̀ hohowhenu tọn he yin Jiwheyẹwhe nugbo lọ tọn enẹ ko yin vivasudo sọn ojlẹ dindẹn die, ṣigba Ohó Jiwheyẹwhe tọn dlẹnalọdo ojlẹ de to whenuena gbẹtọ akọta lẹpo tọn na yin bibẹpli nado basi sinsẹ̀n hlan Jehovah to tẹmpli gbigbọmẹ tọn he klo tlala hugan de mẹ. (Isaia 2:2) Avọ́sinsan pipé Ovi dopo akàn Jiwheyẹwhe tọn, he yin tenọna gbọn avọ́sinsan kanlin tọn he nọ yin nina to tẹmpli lọ mẹ lẹ dali, wẹ na yin aliho lọ nado dọnsẹpọ Jehovah. (Johanu 14:6; Heblu lẹ 7:27; 9:12) Kunnudetọ Jehovah tọn lẹ to Jiwheyẹwhe sẹ̀n todin to aliho he yiaga hugan enẹ mẹ, podọ yé sọ to alọgọna mẹsusu devo lẹ nado wàmọ ga.

Tito Họgbigbá Egbezangbe Tọn Lẹ

Lẹdo aihọn pé, Kunnudetọ Jehovah tọn lẹ to Jiwheyẹwhe nugbo lọ sẹ̀n. Yé wleawuna “akọta huhlọnnọ” de, he tòmẹnu etọn lẹ fọ́n bo to jijideji. (Isaia 60:22) Nọtẹn tangan he mẹ Kunnudetọ Jehovah tọn lẹ nọ pli te wẹ Plitẹnhọ Ahọluduta tọn. a Fọtọ́n susu ohọ̀ ehelẹ tọn wẹ to yinyin yiyizan to alọnu, podọ nuhudo gbẹ́ tin na fọtọ́n susu devo lẹ.

Kunnudetọ Jehovah tọn lẹ nọ “yin ojlonọ” kavi ze yedelẹ jo sọn ojlo mẹ wá nado gbá Plitẹnhọ Ahọluduta tọn he nuhudo etọn tin lẹ. (Psalm 110:3) Ṣigba, Kunnudetọ lẹdo lọ tọn lẹ ma nọ saba yọ́n azọ́n họgbigbá tọn ganji, podọ delẹ to otò he to jideji tindo lẹ mẹ nọ tin to ohẹ́n klókló mẹ. To 1999 Hagbẹ Anademẹtọ Kunnudetọ Jehovah tọn lẹ tọn ze tito Plitẹnhọ Ahọluduta tọn gbigbá tọn de dai nado sọgan duto aliglọnnamẹnu enẹlẹ ji. Gbọn tito ehe gblamẹ, Kunnudetọ he yọ́n ohọ̀ gbá ganji lẹ ko zingbejizọnlin yì fidindẹn lẹ nado plọnazọ́n mẹmẹsunnu po mẹmẹyọnnu yetọn lẹ po nado sọgan gbá Plitẹnhọ Ahọluduta tọn lẹ. Enẹgodo, mẹhe mọ azọ́nplọnmẹ yí lọ lẹ ko zindonukọn to azọ́n họgbigbá tọn mẹ to lẹdo yetọn mẹ. Kọdetọn tẹwẹ vivẹnudido vonọtaun ehe ko hẹnwa?

To février 2006, Kunnudetọ Jehovah tọn he tin to otò wamọnọ tọn mẹ lẹ ko mọ bọ Plitẹnhọ Ahọluduta tọn yọyọ he lán to 13 000 ji lẹ yin gbigbá. Pọ́n nuhe delẹ to mẹhe to Plitẹnhọ Ahọluduta tọn yọyọ lọ lẹ yizan lẹ mẹ dọ.

“To madozẹnzẹn mẹ, gbẹtọ 160 wẹ nọ wá opli agun lọ tọn lẹ. To opli tintan he yin bibasi to whenuena Plitẹnhọ Ahọluduta tọn yọyọ lọ yin gbigbá godo, sọha lọ yiaga jẹ 200. Todin, to osun ṣidopo godo, yé ko yì 230. E họnwun dọ Jehovah to didona gbigbá ohọ̀ he to jlẹkaji ṣigba he yọn-na-yizan ehelẹ tọn.”—Nugopọntọ lẹdo tọn de to Équateur.

“Na owhe susu gbẹtọ lẹ nọ kanse mí dọ, ‘Whetẹnu wẹ mì na wá gbá Plitẹnhọ Ahọluduta tọn de taidi dehe mí nọ mọ to owe mìtọn lẹ mẹ?’ Mí dopẹna Jehovah dọ, mí ko tindo nọtẹn sinsẹ̀n-bibasi tọn he jẹaṣọ́ de todin lo. To dai, agbànhọ mẹmẹsunnu de tọn mẹ wẹ mí nọ basi opli lẹ te po madozẹnzẹn pliwatọ 30 tọn po. To opli tintan he mí basi to Plitẹnhọ Ahọluduta tọn yọyọ lọ mẹ, gbẹtọ 110 wẹ wá.”—Agun de to Ouganda.

 “Mẹmẹyọnnu gbehosọnalitọ whepoponu tọn awe na linlin dọ sọn whenue gbọ́n Plitẹnhọ Ahọluduta tọn lọ yin gbigbá, azọ́nwiwa to aigba-denamẹ lọ ji nọ hẹn ayajẹ wá dogọ. Gbẹtọ lẹ nọ tindo ojlo nado dotoai to lizọnyizọn họndekọn-jẹ-họndekọn tọn mẹ podọ to yẹwhehodidọ mayin aṣa tọn whenu. Mẹmẹyọnnu ehelẹ to anadena plọnmẹ Biblu 17 todin, podọ susu Biblu plọntọ ehelẹ tọn nọ wá opli lẹ.”—Wekantẹn alahọ Lopo Salomon tọn.

“Sinsẹ̀ngán he nọ nọ̀ lẹdo lọ mẹ de dọ dọ Plitẹnhọ Ahọluduta tọn yọyọ lọ yidogọna yẹyi okọ́ lọ mẹ blebu tọn podọ mẹhe to lẹdo lọ mẹ lẹ nọ doawagun to e mẹ. Susu aligbọntọ lẹ tọn wẹ nọ na pipà gando whanpẹ plitẹnhọ lọ tọn go. Ehe nọ hùn dotẹnmẹ dagbe dote na mẹmẹsunnu lẹ nado dekunnu. Mẹsusu dogọ wẹ jlo na yọnẹn gando mẹmẹsunnu-yinyin lẹdo aihọn pé tọn mítọn go. Susu mẹhe ko gọ̀n opli na owhe lẹ ko yin whinwhàn nado vọ́ gbẹdido yetọn bẹjẹeji whladopo dogọ.”—Wekantẹn alahọ Myanmar tọn.

“Mẹmẹyọnnu de basi oylọna dawe jlodotọ de wá họ̀gbátẹn he to okọ́ etọn mẹ. To godo mẹ dawe lọ dọmọ: ‘Linlẹn ṣie wẹ yindọ azọ́nwatọ lọ lẹ ma na dike ma biọ filọ. E paṣa mi dọ, Kunnudetọ lọ lẹ dọnudo mi po homẹdagbe po. Sunnu po yọnnu po to azọ́n sinsinyẹn wà matin whenu hẹngu. Kọndopọ po gbigbọ ayajẹ tọn po tin to ṣẹnṣẹn yetọn.’ Dawe lọ kẹalọyi plọnmẹ Biblu de bo jẹ opli lẹ yì ji. E dọ to godo mẹ dọmọ: ‘Linlẹn ṣie ko diọ. Todin he yẹn ko mọ Jiwheyẹwhe n’ma na jo e do ba.’ ”—Wekantẹn alahọ Colombie tọn.

 Alọgọ Mítọn Yin Nujọnu

Plitẹnhọ Ahọluduta tọn lẹ gbigbá yin adà tangan sinsẹ̀nzọn wiwe mítọn tọn de. Aliho he mẹ Kunnudetọ Jehovah tọn lẹ lẹdo aihọn pé ko nọgodona azọ́n enẹ—to akuẹzinzan-liho podọ to aliho devo lẹ mẹ te—jẹna pipà taun. Ṣigba, mí dona nọ flindọ, adà sinsẹ̀nzọn wiwe mítọn tọn devo lẹ sọ yin nujọnu ga. Sọn ojlẹ de mẹ jẹ devo mẹ, Klistiani lẹ nọ jiya nugbajẹmẹji jọwamọ lẹ tọn bo nọ tindo nuhudo alọgọ tọn. Zinjẹgbonu owe sinai do Biblu ji lẹ tọn nọ yí adà tangan de wà to godoninọna sinsẹ̀nzọn wiwe lọ mẹ. Suhugan mítọn wẹ ko mọ lehe linlinnamẹwe kavi owe sinai do Biblu ji he yin didogbonu na ahunjijlọnọ de sọgan tindo huhlọn sọ. Humọ, onú titengbe wẹ e sọ yin nado nọgodona mẹdehlan lẹ po mẹdevo lẹ po to sinsẹ̀nzọn vonọtaun whenu-gigọ́ tọn mẹ. Klistiani he yí yede do sanvọ́ ehelẹ nọ yí adà tangan de wà to hẹngblo azọ́n yẹwhehodidọ tọn mẹ to azán godo tọn ehelẹ mẹ.

Mẹhe gọalọ to tẹmpli lọ gbigbá mẹ lẹ jaya tlala. (1 Otannugbo lẹ 29:9) Mọdopolọ to egbehe, godoninọna sinsẹ̀n-bibasi nugbo lọ gbọn nunina mítọn lẹ gblamẹ nọ hẹn ayajẹ wá na mí. (Owalọ lẹ 20:35) Mí nọ tindo ayajẹ mọnkọtọn to whenuena mí ze nunina mítọn lẹ do apotin he yin awuwlena na Akuẹ-bẹpli Plitẹnhọ Ahọluduta tọn lẹ mẹ podọ to whenuena mí basi nunina na azọ́n lẹdo aihọn pé tọn lọ, bo gbọnmọ dali nọgodona tito devo he tindo kanṣiṣa hẹ yẹwhehodidọ wẹndagbe Ahọluduta lọ tọn lẹ. To aliho jiawu de mẹ, Kunnudetọ Jehovah tọn lẹ tin to kọndopọ mẹ to sinsẹ̀n-bibasi nugbo mẹ to egbehe. Na mímẹpo ni gọ́ na ayajẹ he nọ wá sọn godoninọna sinsẹ̀n-bibasi enẹ mẹ!

[Nudọnamẹ Odò Tọn]

[Apotin/Yẹdide to weda 20, 21]

ALIHO HE MẸ MẸDELẸ DE NADO NANÚ TE LẸ

NUNINA LẸ NA AZỌ́N LẸDO AIHỌN PÉ TỌN

Mẹsusu nọ de, kavi klan akuẹ sọha de dovo he yé nọ yí do apotin nunina tọn he go yè kàn “Nunina lẹ Na Azọ́n Lẹdo Aihọn Pé Tọn—Matiu 24:14” do lẹ mẹ.

To osun dopodopo mẹ, agun lẹ nọ do akuẹ ehelẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Akuẹ he yin nina sọn ojlo mẹ wá lẹ sọgan sọ yin didohlan Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483 tlọlọ, kavi hlan wekantẹn alahọ Kunnudetọ Jehovah tọn lẹ tọn he nọ penukundo otò mìtọn go. Akuẹyiwema he yin didohlan gbọn adlẹsi he tin to aga lọ gblamẹ lẹ dona yin awuwlena do “Watch Tower” tamẹ. Aṣọ́donu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de dona hodo nunina ehelẹ bo dohia dọ nunina tlọlọ lẹ wẹ yé yin.

TITO NUNINA HE SINAI DO NINỌMẸ JI TỌN

Akuẹ sọgan yin nina Watch Tower to tito vonọtaun de glọ nado yin yiyizan lẹdo aihọn pé. Ṣigba eyin nunamẹtọ lọ gọ̀ nunina lọ biọ, e na yin gigọjo hlan ẹn. Na nudọnamẹ dogọ, jaale kanwe hlan Wekantẹn Akuẹbẹhẹntọ tọn gbọn adlẹsi he tin to aga lọ yiyizan dali.

TITO NUNAMẸ HOMẸDAGBE TỌN

Gbọnvona nunina akuẹ tọn tlọlọ lẹ, nunina wunmẹ devo lẹ tin ga na alemọyi sinsẹ̀nzọn lẹdo aihọn pé Ahọluduta lọ tọn. Ehelẹ wẹ:

Alọgọ Owù-Nujijọ Tọn: Watch Tower sọgan yin nina alemọyi nunina alọgọ owù-nujijọ gbẹzan tọn kavi tito gbọjẹ gaa/agbasazọ́n jijodo tọn de.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, kandai akuẹsẹdo tọn lẹ, kavi akuẹ gbọjẹ gaa mẹdopodopo tọn lẹ sọgan yin zizedo kandai ogú mimá tọn mẹ kavi sọgan yin súsú lẹkọ to okú godo hlan Watch Tower, to kọndopọmẹ hẹ nubiọtomẹsi akuẹsẹdotẹn lẹdo lọ tọn lẹ.

Kandai Akuẹ Ajọ́ Tọn lẹ po Ale Ajọ́ Tọn lẹ Po: Kandai akuẹ ajọ́ tọn lẹ po ale ajọ́ tọn lẹ po sọgan yin nina Watch Tower taidi nunina tlọlọ de.

Ohọ̀ po Aigba Po: Ohọ̀ po aigba po he sọgan yin sisà sọgan yin nina vlavo gbọn nunina tlọlọ de bibasi dali kavi, na nuhe dù aigba fininọ lẹ, gbọn hinhẹn ohọ̀ po aigba de po dote na nunamẹtọ lọ na gbẹwhenu etọn dali. Dọna alahọ otò towe tọn whẹpo do basi nunina ohọ̀ po aigba po tọn depope.

Nunina Whemẹwhemẹ Tọn: Nunina whemẹwhemẹ tọn yin tito de to ehe mẹ mẹde nọ na akuẹ azọ́nwatẹn tangan he Kunnudetọ Jehovah tọn lẹ nọ yizan de. To ehe mẹ, nunamẹtọ lọ kavi mẹhe yin dide gbọn nunamẹtọ lọ dali, nọ yí akuẹ tangan de to owhe dopodopo mẹ na pipotọ gbẹzan etọn tọn. Nunamẹtọ lọ nọ mọ ale takuẹ didepo tọn de yí to owhe he mẹ nunina whemẹwhemẹ tọn lọ yin didoai te.

Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan Watch Tower gbọn kandai sọgbe hẹ osẹ́n de bibasi dali, kavi yinkọ Watch Tower tọn sọgan yin kinkàndai taidi mẹhe na dugu nunina lẹ tọn. Nunina he yin bibasi do titobasinanu sinsẹ̀n tọn de tamẹ sọgan de takuẹ he nọ yin bibiọ delẹ pò.

Dile hogbe lọ “tito nunamẹ homẹdagbe tọn” dohia do, nunina wunmẹ ehelẹ nọ biọ tito bibasi delẹ to adà nunamẹtọ lọ tọn mẹ. Nado gọalọna mẹhe to jijlo nado hẹn azọ́n lẹdo aihọn pé Kunnudetọ Jehovah tọn lẹ tọn mọaleyi sọn wunmẹ tito nunamẹ homẹdagbe tọn delẹ mẹ, alọnuwe de ko yin awuwlena to Espagne-gbè po Glẹnsigbe po mẹ he hosọ etọn yin Charitable Planning to Benefit Kingdom Service Worldwide [Tito Nunamẹ Homẹdagbe Tọn Na Alemọyi Sinsẹ̀nzọn Ahọluduta Tọn Lẹdo Aihọn Pé]. Alọnuwe lọ yin kinkàn nado na nudọnamẹ lẹ dogbọn aliho voovo he mẹ nunina lẹ sọgan yin bibasi te vlavo todin kavi gbọn ogú jijodai to okú godo dali. To alọnuwe lọ hihia po hodọdopọ hẹ ayinamẹtọ osẹ́n po takuẹ po tọn yetọn titi po godo, mẹsusu ko penugo nado nọgodona nuwiwa sinsẹ̀n tọn po kọgbọ hẹnwanamẹ tọn Kunnudetọ Jehovah tọn lẹ tọn po lẹdo aihọn pé bo de takuẹ he nọ yin bibiọ lẹ pò taun to mọwiwà mẹ. Alọnuwe ehe sọgan yin mimọyi gbọn vọkan dopo bibiọ sọn Wekantẹn Tito Nunamẹ Homẹdagbe tọn dè tlọlọ dali.

Na nudọnamẹ dogọ, hiẹ sọgan dọnsẹpọ Wekantẹn Tito Nunamẹ Homẹdagbe tọn, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò mìtọn go.

Wekantẹn Tito Nunamẹ Homẹdagbe Tọn

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Alokan: (845) 306-0707

[Yẹdide to weda 18]

Vivẹnudido pọmẹ tọn mítọn lẹ nọ hẹn ẹn yọnbasi nado gbá Plitẹnhọ Ahọluduta tọn whanpẹnọ lẹ lẹdo aihọn pé

Plitẹnhọ Ahọluduta tọn yọyọ de to Ghana