Otàn Gbẹzan Tọn

Jehovah Dona Ojlo Ṣie Nado Lẹzun Mẹdehlan

Dile e yin didọ gbọn Sheila Winfield da Conceição dali

To gbèdopo, mẹdehlan he wá sọn Aflika de dọna mí dọ to fie emi to sinsẹ̀n te, mẹlẹpo wẹ nọ ylọ emi biọ họmẹ bo nọ dotoaina wẹndagbe Ahọluduta Jiwheyẹwhe tọn po sọwhiwhe po. ‘Lehe e na vivi na mi nado wazọ́n to aigba-denamẹ mọnkọtọn ji do sọ!’ wẹ n’lẹn. Hodọdopọ enẹ do ojlo lọ do ahun ṣie mẹ nado lẹzun mẹdehlan de, dile etlẹ yindọ owhe 13 poun wẹ n’tindo to whenẹnu.

ṢIGBA, jẹnukọnna hodọdopọ enẹ, e ko dẹn bọ whẹndo mítọn ko jẹ nuplọn ji gando Jehovah go. To afọnnu dopo to 1939, dẹpẹ awe he doaṣọ ganji húhúhọ̀n mítọn to Hemel Hempstead, to gbonu tòdaho Londres tọn, to Angleterre. Kunnudetọ Jehovah tọn lẹ wẹ. Owhe dopo poun wẹ yẹn tindo to whenẹnu, enẹwutu n’masọ flin dlapọn lọ ba. Nado lẹkọna yé, Mama dọna yé dọ Papa sọgan tindo ojlo, ṣigba e ma na ko gọ̀ kakajẹ ogàn ṣinẹnẹ whèjai tọn mẹ gba. Lehe e paṣa Mama do sọ to whenuena yé lẹkọwa to whèjai enẹ dopolọ! Otọ́ ṣie, Henry Winfield, kàn teninọ yetọn gando whẹho tonudidọ po akọta tọn lẹ po go sè yé whẹ́, enẹgodo e ylọ yé biọ họmẹ bo kẹalọyi plọnmẹ Biblu. E zindonukọn po awuyiya po jẹ baptẹm kọ̀n. To owhe delẹ godo, onọ̀ ṣie Kathleen lọsu jẹ nuplọn ji. E yí baptẹm to 1946.

To 1948, n’jẹ mahẹ gbesisọ tọn tindo ji to azọ́n yẹwhehodidọ wẹndagbe Ahọluduta Jiwheyẹwhe tọn mẹ. Yẹn mọ dọ n’na tindo nuhudo alọkọ-gàn de tọn nado sọgan nọ na linlin whenu he n’yizan to lizọnyizọn lọ mẹ tọn to aliho he sọgbe mẹ. Eyin mí ovi lẹ do jijọ dagbe hia, mí nọ saba mọ akuẹ penny ṣidopo (gànkuẹ de he nọtena nudi dọla ṣidopo CFA) yí taidi apòmẹkuẹ  to samedi lẹpo. N’jọ apòmẹkuẹ ṣie na nudi owhe awe nado họ̀ alọkọ-gàn he pọ̀kuẹ hugan to ojlẹ enẹ mẹ. Nalete, Ray he yin pẹvi pete to nọvisunnu ṣie awe lẹ mẹ, nọ biọ to Papa si to whepoponu nado na ẹn gànkuẹ penny atọ̀n tọn awe (gànkuẹ de he nọtena nudi dọla atọ̀n CFA), kakati nido yin penny ṣidopo tọn dopo gee. To gbèdopo, e to gànkuẹ awe lọ lẹ biọ vẹkuvẹku sọmọ bọ Papa gblehomẹ. Ray jẹ avivi ji bo dọ dọ ewọ tindo nuhudo gànkuẹ awe lọ lẹ tọn na aṣli de he tin to ewọ po Jehovah po ṣẹnṣẹn wutu. To godo mẹ, Ray basi zẹẹmẹ dọmọ: “Gànkuẹ penny atọ̀n tọn dopo nọ biọ apotin nunina tọn mẹ, bọ awetọ nọ yin yẹnlọsu tọn.” Dasin ayajẹ tọn wayi do Mama, bọ Papa yawu dín ṣẹ́ngi lọ mọ, podọ yẹn plọn sọn ehe mẹ dọ nujọnu wẹ e yin nado nọgodona azọ́n Ahọluduta lọ tọn to akuẹzinzan-liho.

To ojlẹ enẹ mẹ, Papa basi tito nado sẹtẹn yì fie nuhudo wẹnlatọ Ahọluduta lọ tọn sù te. To 1949, e sà ogle etọn po tọkẹ́n satẹn etọn po bo jẹ gbehosọnalitọ basi ji, taidi lizọnyizọnwatọ whenu-gigọ́ Kunnudetọ Jehovah tọn lẹ tọn de. Yẹn yí baptẹm to 24 septembre 1950, taidi yẹhiadonu klandowiwe ṣie hlan Jehovah tọn. Bẹsọn whenẹnu sọyi, to gbọjẹ wehọmẹ tọn lẹ whenu, yẹn nọ doalọ to gbehosọnalitọ gbọjẹ-whenu (kavi alọgọtọ) tọn mẹ, bo nọ yí ganhiho 100 zan to lizọnyizọn lọ mẹ to osun dopodopo mẹ. Ṣigba bẹjẹeji poun wẹ enẹ yin. To madẹnmẹ, ojlo vẹkuvẹku de fọndote to ahun ṣie mẹ nado wà susu dogọ to sinsẹ̀n-bibasi wiwe-ṣeke lọ hinhẹn gbayipe mẹ.

Ojlo Ṣie Nado Lẹzun Mẹdehlan

To 1951, Papa yin azọ́ndena hlan Bideford, to Agewaji Devon tọn. Ojlẹ vude to whenuena mí jẹ finẹ godo, mẹdehlan he to sinsẹ̀n to Aflika lọ dla agun mítọn pọ́n, dile n’ko donù e go do to aga. To enẹgodo, ojlo ṣie nado lẹzun mẹdehlan nọ yinuwado nudide ṣie lẹpo ji. To wehọmẹ, mẹplọntọ ṣie lẹ yọ́n yanwle ṣie podọ yé wà nuhe go yé pé lẹpo nado hẹn mi gbọjọ, po linlẹn lọ po dọ n’na doafọna agbasazọ́n de. Ṣigba, to gbeegbe n’fó wehọmẹ, to whenuena n’yì fie mẹplọntọ lẹ nọ nọ̀ nado dọnudo yé bo dọ e yì whedenu na yé, dopo to yé mẹ dọna mi dọmọ: “Alọ towe die! Hiẹ dopo kẹdẹ wẹ yin wehọmẹvi he yọ́n nuhe dín a te taun to gbẹzan towe mẹ. Odẹ̀ mítọn wẹ yindọ a ni jẹ yanwle towe kọ̀n.”

Tlolo to enẹgodo, n’dín agbasazọ́n whenu-gli tọn de, bo bẹ azọ́n gbehosọnalitọ whepoponu tọn jẹeji to 1^er décembre 1955. To godo mẹ, Mama po nọvisunnu ṣie lẹ po lẹzun gbehosọnalitọ ga. Enẹwutu na owhe susu, mímẹpo wẹ tin to sinsẹ̀nzọn whenu-gigọ́ tọn mẹ to whẹndo lọ mẹ.

Yì Irelande

To owhe dopo godo, n’mọ oylọ-basinamẹ de yí nado yì sẹ̀n to Irelande. Ehe yin afọdide dopo dogọ hlan yanwle ṣie nado lẹzun mẹdehlan de. To février 1957, to pọmẹ hẹ gbehosọnalitọ jọja awe devo lẹ, yèdọ June Napier po Beryl Barker po, n’yì Cork, to hùwaji Irelande tọn.

Sinsẹ̀nzọn kunnudegbe tọn ma bọawu to Irelande na nukundiọsọmẹ Ṣọṣi Katoliki Lomu tọn  wutu. Mí plọn nado nọ dín fie mí sọgan họ̀n gbọn to owhé daho kavi lẹdo owhé susu tọn de mẹ, eyin e wá biọ nado họnyi to ajiji mẹ. Mí nọ ze kẹkẹ-afọ tọn mítọn lẹ whlá do olá, ṣigba gbẹtọ lẹ nọ saba mọ yé bo nọ sán kẹkẹfọ lọ lẹ kavi de jẹhọn sọn yé mẹ.

To gbèdopo he yẹn po Beryl po basi dlapọn yì lẹdo owhé susu tọn de mẹ, yọpọvu delẹ nọpọ́ bo jẹ zùnzùn mí ji bosọ to zannudlando mí. Enẹwutu mí biọ nusatẹn de, sẹpọ owhé mẹde tọn, fie yè nọ sà yìnnọsìn te. Gbẹtọgun de jẹ pipli ji to gbonu. Na Beryl yiwanna yìnnọsìn wutu, e nù kọfo awe kavi atọ̀n dẹẹdẹ, po linlẹn lọ po dọ gbẹtọgun lọ na gbàdo. Ṣigba yé ma sẹtẹn. Enẹgodo, yẹwhenọ jọja de biọ nusatẹn lọ. Na e yí mí do mọ jonọ wutu, e dọ dọ homẹ emitọn na hùn nado hẹn mí disa gbọ̀n lẹdo lọ mẹ. Nalete, to tintan whenu, e plan mí yì ohọ̀ devo mẹ to owhé lọ gbè, bọ mí sinai whii dile e to odẹ̀ godo tọn hò na dawe yọnhonọ he to kúdonu de. Enẹgodo, mí tọ́nsọn owhé lọ gbè po yẹwhenọ lọ po. To whenuena gbẹtọgun lọ lẹ mọ bọ mí to hodọ hẹ yẹwhenọ lọ, yé gbàdo.

Yì Giliadi

To 1958, Plidopọ Akọjọpli Ojlo sọn Olọn mẹ Wá tọn dona yin bibasi to New York. Papa to linlẹn nado yì, podọ yẹnlọsu jlo nado yì ga, ṣigba n’ma tindo akuẹ. Ojlẹ enẹ mẹ wẹ onọ̀-daho ṣie kú te to ajiji mẹ bo jo akuẹ 100 livres (nudi 144 000F CFA) dai na mi. Húnkuẹ yìyì po gigọ̀ po tọn na plidopọ lọ yin 96 livres, enẹwutu n’họ̀ tike ṣie to afọdopolọji.

Ojlẹ vude to enẹgodo, afọzedaitọ de sọn alahọ Kunnudetọ Jehovah tọn lẹ tọn Grande-Bretagne tọn mẹ wá dla mí pọ́n bo basi oylọna gbehosọnalitọ titengbe he jlo na yì plidopọ lọ lẹpo nado ze yinkọ dai na azọ́nplọnmẹ mẹdehlan tọn to Wehọmẹ Biblu Pinplọn Watchtower Giliadi tọn. E vẹawu na mi nado yise! E ze alọdowemẹwe na mẹlẹpo adavo yẹn ṣo na owhe ṣie whè gbau wutu. N’biọ to e si nado yí mi dogọ yé, bo basi zẹẹmẹ dọ n’ko jo otò ṣie do bo ko to sinsẹ̀n diblayin taidi mẹdehlan de. To whenuena e mọ gbemima ṣie, e ze alọdowemẹwe dopo na mi. N’hodẹ̀ vivẹvivẹ nado yin oylọ-basina. Gblọndo lọ wá to madẹnmẹ, bọ yẹn yin oylọ-basina yì Giliadi.

Po ayajẹ daho po, n’yì klasi 33tọ Giliadi tọn, to pọmẹ hẹ gbehosọnalitọ 81 devo lẹ sọn otò voovo 14 mẹ. Bleun dopo wẹ osun atọ́n nupinplọn tọn lọ lẹ juwayi. Sẹpọ vivọnu nupinplọn lọ tọn, Mẹmẹsunnu Nathan H. Knorr ze hodidọ mẹwhinwhàn ganhiho ẹnẹ tọn de donukọnna mí. E na tuli mẹhe sọgan gbọ̀tlẹn lẹ nado wàmọ. (1 Kọlintinu lẹ 7:37, 38) Ṣigba na mẹhe to linlẹn nado wlealọ to gbèdopo lẹ, e na mí ayinamẹ nado basi todohukanji nubiọtomẹsi mítọn lẹ tọn he mí to nukundo sọn alọwlemẹ he na sọgbe hẹ mí de si. Po enẹ po, eyin mẹde wá do ojlo hia to mí mẹ janwẹ, mí sọgan lẹnnupọndo mẹlọ ji to dodonu nubiọtomẹsi enẹlẹ tọn ji.

Nuhe nubiọtomẹsi ṣie gando asu sọgodo tọn de go bẹhẹn lẹ die: E dona yin mẹdehlan taidi  yẹnlọsu bo yiwanna Jehovah, bo yọ́n nugbo Biblu tọn hugan mi, bo wọnji vijiji go kakajẹ Amagẹdọni nado sọgan zindonukọn to sinsẹ̀nzọn whenu-gigọ́ tọn mẹ; e sọ dona sè Glẹnsigbe ganji, bo wà mẹho na mi. Alọgọnamẹnu daho wẹ todohukanji ehe yin na mi, dile yẹn ko wleawufo nado yin azọ́ndena hlan otò dindẹn de mẹ to owhe 20 mẹvi-yinyin mẹ.

Yì Brésil

Mí yí gbedewema mítọn to dimanche 2 août 1959, bo mọ nudọnamẹ yí gando azọ́ndenamẹ mítọn lẹ go. Yẹn yin azọ́ndena yì Brésil to pọmẹ hẹ Vehanouch Yazedjian, Sarah Greco, Ray po Inger Hatfield po, Sonia Springate, gọna Doreen Hines. Homẹhun mí tlala. Linlẹn ṣie wẹ yindọ zungbo, odàn, lọbatín, po Indianu lẹ po kẹdẹ wẹ n’na yì mọ to dọ́n. Ṣigba, nupaṣamẹ nankọ die to whenuena n’jẹ finẹ! Kakati nido yin zungbo Amazone tọn, Rio de Janeiro wẹ n’mọ, yèdọ tòdaho whanpẹnọ he hunnukun de he yin tatọ́-tònọ otò lọ tọn to whenẹnu.

Avùnnukundiọsọmẹ he mí pannukọn tlolo wẹ nado plọn Portugal-gbè. To osun tintan mẹ, mí nọ plọn ogbè lọ na ganhiho 11 to azán lẹpo ji. To whenuena n’ko dọyẹwheho to tòdaho Rio tọn mẹ, bo yí ojlẹ kleun de zan to wekantẹn alahọ Kunnudetọ Jehovah tọn lẹ tọn he tin to finẹ mẹ godo, n’yin didohlan owhé mẹdehlan tọn de gbè to Piracicaba, to Ayimatẹn São Paulo tọn mẹ, podọ to enẹgodo yì owhé mẹdehlan tọn devo gbè to Porto Alegre, to Ayimatẹn Rio Grande do Sul tọn mẹ.

Enẹgodo, to bẹjẹeji 1963 tọn, n’mọ oylọ-basinamẹ de yí nado wá wazọ́n to Azọ́nwatẹn Lẹdogbedevomẹ tọn to alahọ mẹ. Floriano Ignez da Conceição, he plọn mí Portugal-gbè to whenuena mí wá tlolo, wẹ to nukunpedo azọ́nwatẹn lọ go to ojlẹ enẹ mẹ. E mọ nugbo to 1944, to whenuena sọha Kunnudetọ lẹ tọn ma hugan 300 to Brésil, podọ e ko yì klasi 22tọ Giliadi tọn. Gbèdopo to osun delẹ godo, Mẹmẹsunnu Conceição dọna mi nado nọte pẹẹde to whèmẹ na e jlo na mọ mi na ohó de wutu. Tlolo whẹ́, ahun ṣie gbàdo. Kavi n’ko ṣì nude wà wẹ? To whenuena ogàn núdùdù whenu tọn dọnú to godo mẹ, n’kàn nuhe e jlo na dọna mi sè e. E yí kanbiọ de do gblọnna mi dọmọ, “Be a na dà mi ya?” Obu jẹ ji e. N’biọ whenu nado lẹnnupọn na ojlẹ de bo họ̀nwezun yì núdùtẹn.

E ma yin Floriano wẹ yin mẹmẹsunnu tintan he do ojlo hia to yẹn mẹ gba. Ṣigba, kakajẹ whenẹnu, mẹdepope ma ko jẹ nubiọtomẹsi ṣie lẹ kọ̀n taidi alọwlemẹ he sọgbe de. N’yọnẹn dọ todohukanji ṣie gọalọna mi ma nado ṣì nudide basi. Todin, whẹho lọ gbọnvo. Floriano jẹ nubiọtomẹsi ṣie lẹpo kọ̀n! Enẹwutu, mí wlealọ to 15 mai 1965.

Pipehẹ Avùnnukundiọsọmẹ Awutu Tọn

Yẹn po Floriano po duvivi ayajẹ tọn taun to alọwle mítọn mẹ, mahopọnna avùnnukundiọsọmẹ he mí pehẹ lẹ. Dopo to avùnnukundiọsọmẹ ehelẹ mẹ wẹ nuhahun agbasalilo Floriano tọn lẹ, ehe bẹjẹeji ojlẹ vude jẹnukọnna alọwle mítọn. To owhe delẹ die wayi, azọ̀n de bẹpla afuje etọn amiyọnwhé tọn, bọ nuyiwadomẹji lọ lẹ wá zọ́n bọ e jẹ awufiẹsa susu mọ ji. Taidi kọdetọn de, mí tlọ́n Bẹtẹli bo yin azọ́ndena taidi gbehosọnalitọ titengbe to tòdaho Teresópolis tọn mẹ to lẹdo osónọ Ayimatẹn Rio de Janeiro tọn mẹ. Linlẹn mítọn wẹ yindọ ninọmẹ aimẹ tọn finẹ tọn na gọalọna ẹn nado gọ̀ jẹgangan.

Humọ, to décembre 1965, n’sè dọ onọ̀ ṣie to azọ̀n agbasa wiwọ̀ tọn jẹ sinsinyẹn. Mí nọ kanwehlan mídelẹ whẹwhẹ, ṣigba e ko yì owhe ṣinawe bọ n’masọ mọ onọ̀ ṣie ba. Enẹwutu, e sú húnkuẹ na mí nado wá pọ́n ẹn to Angleterre. Azọ́n mẹzizẹ tọn yin wiwà na Mama, ṣigba doto lẹ ma penugo nado de azọ̀n lọ sẹ̀. Dile etlẹ yindọ e to azọ̀njẹ sinsinyẹn bo ma sọgan fọ́n sọn azọ̀nzan ji, e gbẹ́ hẹn ojlo etọn go nado nọ tindo mahẹ to azọ́n yẹwhehodidọ tọn mẹ. E tindo zomọ wezinzin tọn de to abò etọn mẹ nado sọgan nọ dọho bọ mẹdevo na nọ kàn na ẹn. E sọ nọ dọyẹwheho na mẹhe wá dla ẹ pọ́n lẹ to kleun mẹ. E kú to 27 novembre 1966. To osun enẹ dopolọ mẹ, e na linlin ganhiho ao tọn to sinsẹ̀nzọn kunnudegbe tọn mẹ! Papa zindonukọn po nugbonọ-yinyin po to sinsẹ̀nzọn gbehosọnalitọ tọn mẹ kakajẹ okú etọn whenu to 1979.

To okú Mama tọn godo, yẹn po Floriano po lẹkọyi Brésil, fie mí gbẹ́ pò to sinsẹ̀n te kakajẹ din to Ayimatẹn Rio de Janeiro tọn mẹ. To tintan  whenu, azọ́n nugopọntọ lẹdo tọn yin didena mí to tatọ́-tònọ ayimatẹn lọ tọn mẹ, ṣigba ayajẹ ehe ma dẹn-to-aimẹ na Floriano sọ bẹ awutu sinsinyẹn whladopo dogọ. Enẹwutu mí lẹkọyi Teresópolis taidi gbehosọnalitọ titengbe.

To 1974, doto lẹ wá de afuje amiyọnwhé tọn Floriano tọn sẹ̀ to whenuena e ko jiya awufiẹsa nukunpedomẹgo tọn na owhe susu godo. To ojlẹ enẹ mẹ, e masọ sọgan wadevizọn taidi nugopọntọ azinponọ kavi gbehosọnalitọ titengbe ba, ṣigba e nọ penugo nado deanana plọnmẹ Biblu lẹ hẹ mẹhe nọ wá dla ẹ pọ́n to dotowhé lẹ—dopo to yé mẹ wẹ Bob, Amelikanu he tin to gbọjẹ whenu gaa tọn mẹ de he e plọnnu hẹ to Glẹnsigbe mẹ. Bob kẹalọyi nugbo bo yin bibaptizi to godo mẹ. Vudevude Floriano gọ̀ jẹgangan bo to devizọnwa sọn whenẹnu gbọ́n taidi gbehosọnalitọ whepoponu tọn de.

Jehovah Ko Dona Lizọnyizọn Ṣie

To owhe lẹ gblamẹ, yẹn ko zindonukọn taidi gbehosọnalitọ titengbe, podọ Jehovah ko dona lizọnyizọn ṣie. To Teresópolis, n’tindo lẹblanulọkẹyi jiawu lọ nado gọalọna gbẹtọ hugan 60 nado klan gbẹzan yetọn do wiwe hlan Jehovah. Dopo to yé mẹ wẹ nawe de he nọ yin Jupira, mẹhe n’sọ plọn wehihia. To nukọn mẹ, n’plọnnu hẹ ovi etọn mẹho ṣinatọ̀n. Taidi kọdetọn de, Jupira po hagbẹ whẹndo etọn tọn hugan 20 po to Jehovah sẹ̀n po zohunhun po todin. Mẹdopo yin mẹho agun tọn, omẹ atọ̀n yin devizọnwatọ lizọnyizọnwiwa tọn, podọ awe yin gbehosọnalitọ.

N’ko plọn nado nọ hẹn pọndohlan dagbe go gando yọnbasi lọ go nado plọn nugbo lọ gbẹtọ lẹ. To gbèdopo, n’to Biblu plọn hẹ yọnnu jọja de he nọ yin Alzemira to whenuena asu etọn, Antônio sìn-adán na mi nado de avún daho awe do ji e eyin n’ma tọ́nsọn owhé yetọn gbè plaun. To enẹgodo, vlavo wẹ n’nọ sọnukunmọ Alzemira kakajẹ whenue n’wá kànayiha to nudi owhe ṣinawe godo nado biọgbè Antônio nado sọgan plọnnu hẹ asi etọn whladopo dogọ. Ṣogan, e gbẹ́ na mi gbidigbidi ma nado dọho na ẹn gando Biblu go. Ṣigba, to gbèdopo he jikun to jijà, n’basi oylọna Antônio nado tindo mahẹ to oplọn lọ mẹ. N’wá mọ dọ nuhahun etọn wẹ yindọ e ma yọnwehia. Sọn ojlẹ enẹ mẹ, Floriano po mẹdevo lẹ po plọnnu hẹ ẹ bo plọn ẹn wehihia. To egbehe Alzemira po Antônio po ko yí baptẹm. E nọ gọalọ taun to agun lọ mẹ, bo nọ hodo jọja susu to lizọnyizọn lọ mẹ.

Vude poun wẹ ehelẹ yin to numimọ susu he mí tindo to hugan owhe 20 he mí yizan to Teresópolis lẹ whenu. To bẹjẹeji 1988 tọn, mí mọ azọ́ndenamẹ yọyọ de yí—yì tòdaho Niterói tọn mẹ, fie mí wadevizọn te na owhe atọ́n he bọdego lẹ whẹpo do sẹtẹn yì Santo Aleixo. To enẹgodo, mí yin tẹnsẹna yì Agun Japuíba tọn mẹ to ṣẹnṣẹn ayimatẹn lọ tọn bo ko sọ tindo lẹblanulọkẹyi nado do Agun Ribeira tọn ai.

Gbẹzan He Bọawu Bosọ Hẹn Ale Wá De

Dile owhe lẹ to yìyì, yẹn po Floriano po ko tindo lẹblanulọkẹyi lọ nado gọalọna gbẹtọ hugan 300 nado klan gbẹzan yetọn do wiwe hlan Jehovah. To alọnu din, delẹ to yé mẹ to devizọnwa to alahọ mẹ, podọ mẹdevo lẹ yin gbehosọnalitọ, mẹho agun tọn, po devizọnwatọ lizọnyizọnwiwa tọn lẹ po. Lehe n’dopẹ́ do sọ dọ Jiwheyẹwhe ko gbọn gbigbọ wiwe etọn gblamẹ yí mí zan nado gọalọna gbẹtọ susu sọmọ!—Malku 10:29, 30.

Nugbo wẹ dọ Floriano ko pehẹ nuhahun agbasalilo tọn sinsinyẹn lẹ. Mahopọnna ninọmẹ etọn, e hẹn tenọgli, ayajẹ, po jidide etọn to Jehovah mẹ po go. E nọ saba dọmọ: “E ma yin gbẹzan he ma bẹ nuhahun hẹn wẹ nọ hẹn ayajẹ wá to egbehe gba. Pipehẹ nuhahun lẹ po alọgọ Jehovah tọn po wẹ nọ hẹn ayajẹ wá.”—Psalm 34:19.

To 2003, n’bẹ nútitẹ̀ do nukunzìn ṣie amiyọnwhé tọn mẹ. Azọ́n mẹzizẹ tọn yin wiwà na mi, bọ nukun ṣie yin tẹndiọna po devo he yin awuwlena de po, ehe dona nọ yin súnsúnsún whlasusu to azán dopodopo ji. Mahopọnna ehe, Jehovah ko na mi huhlọn nado zindonukọn to sinsẹ̀nzọn etọn mẹ taidi gbehosọnalitọ titengbe de.

Na nuhe dù agbasanu lẹ, n’ko hẹn gbẹzan ṣie bọawu. Ṣogan, Jehovah ko dona mi to azọ́ndenamẹ ṣie mẹ bo ko hẹn mi yin adọkunnọ to gbigbọ-liho. Hodidọ mẹmẹyọnnu mẹdehlan he wá sọn Aflika lọ tọn sọgbe taun nado basi zẹẹmẹ azọ́ndenamẹ mítọn tọn to Brésil. Na nugbo tọn, Jehovah ko dona ojlo ṣie nado lẹzun mẹdehlan!

[Yẹdide to weda 9]

Po whẹndo ṣie po, to 1953

Kunnudide to Irelande, to 1957

[Yẹdide to weda 10]

To pọmẹ hẹ mẹdehlan hatọ lẹ to Brésil, to 1959. Sọn amiyọnwhé yì adusiwhé: Yẹn, Inger Hatfield, Doreen Hines, po Sonia Springate po

Po asu ṣie po