Apajlẹ Nugbonọ-Yinyin Tọn De
Apajlẹ Nugbonọ-Yinyin Tọn De
NELMA, he yin oda-blatọ de to Cruzeiro do Sul, Brésil, pehẹ whlepọn tenọgligo hinhẹn Klistiani tọn de to agọe. To whenuena singigọ gbà lẹdo etọn, Nelma mọ nunina avọ̀ tọn delẹ yí sọn dopo to ahisinọ etọn lẹ mẹ si. Whenuena e to avọ̀ lọ lẹ didẹ̀, e mọ akuẹ he sọha etọn sọzẹn hẹ dọla Amelika tọn 1 000 to apò ṣokoto delẹ tọn mẹ.
Akuẹ he Nelma mọ diblayi azọ́nkuẹ etọn na osun ṣinawe, podọ e tindo nuhudo etọn taun. Singigọ lọ ko hẹn ohọ̀ etọn gble, podọ otọ́ etọn po nọvi etọn lẹ po ko hẹn suhugan nutindo yetọn lẹ tọn bu. Akuẹ he e mọ lọ na fó ohọ̀ etọn jijlado bo nasọ pò na ẹn nado gọalọna hẹnnumẹ etọn lẹ. Ṣigba, ayihadawhẹnamẹnu Nelma tọn he yin pinplọn gbọn Biblu dali ma na ẹn dotẹnmẹ nado hẹn akuẹ lọ go gba.—Heblu lẹ 13:18.
E fọ́nzán yì azọ́nmẹ to wunkẹngbe whẹpo azọ́n-gàn na hò nado mọ nawe ajọwatọ he na ẹn avọ̀ lọ lẹ. Nelma dọnudo e na avọ̀ he yin nina ẹn lẹ bo yidogọ dọ emi ma sọgan hẹn nuhe emi mọ to yé mẹ go gba. Homẹhun nawe lọ taun nado mọ akuẹ lọ yí. Ewọ ko de akuẹ enẹ dovo nado suahọ azọ́nwatọ etọn lẹ. “E vẹawu taun nado mọ mẹhe yin nugbonọ,” wẹ nawe ajọwatọ lọ dọ.
Na nugbo tọn, mẹdelẹ sọgan lẹndọ nugbonọ-yinyin ma tindo ale vonọtaun de gba. Ṣogan, jẹhẹnu de wẹ e yin he mẹhe to vivẹnudo nado hẹn homẹ Jiwheyẹwhe nugbo lọ, Jehovah, tọn hùn lẹ nọ yí nukun nujọnu tọn do pọ́n. (Efesunu lẹ 4:25, 28) “Yẹn ma na penugo nado damlọn to zánmẹ eyin n’ma gọ̀ akuẹ lọ jo,” wẹ Nelma dọ.