Pọ́n! Devizọnwatọ He Go Homẹ Jehovah Tọn Hùn Do
Pọ́n! Devizọnwatọ He Go Homẹ Jehovah Tọn Hùn Do
‘Pọ́n devizọnwatọ ṣie, mẹhe go homẹ ṣie hùn do.’—ISA. 42:1.
1. Etẹwẹ omẹ Jehovah tọn lẹ yin tulina nado wà titengbe dile Oflin to sisẹpọ, podọ etẹwutu?
DILE ojlẹ hùnwhẹ Oflin okú Klisti tọn to sisẹpọ, omẹ Jiwheyẹwhe tọn lẹ na wà dagbe nado hodo ayinamẹ apọsteli Paulu tọn nado ‘nọ pọ́n Jesu he yin dòdó po opodo yise mítọn tọn po hlan tlintlin.’ Paulu yidogọ dọmọ: “[Mì] sọ lẹn ewọ he doakọnna hodọdomẹgo ylandonọ lẹ tọn he hunkọ tọn pọ́n, na onú nikaa dikọna mì, na agbọ́ nikaa pé ayiha mìtọn.” (Heb. 12:2, 3) Sọwhiwhe yíyí do lẹnnupọndo gbẹzan nugbonọ-yinyin Klisti tọn, he dekọtọn do avọ́sinsan etọn mẹ ji na gọalọna Klistiani yiamisisadode lẹ po gbẹdohẹmẹtọ yetọn he yin lẹngbọ devo lẹ po nado to Jehovah sẹ̀n po nugbonọ-yinyin po zọnmii, podọ na ‘agbọ́ nikaa pé ayiha yetọn.’—Yijlẹdo Galatianu lẹ 6:9 go.
2. Etẹwẹ mí sọgan plọn sọn dọdai Isaia tọn he gando Ovi Jiwheyẹwhe tọn go lẹ mẹ?
2 Jehovah gbọdo yẹwhegán Isaia nado dọ dọdai susu, he gando Ovi etọn go tlọlọ. Dọdai ehelẹ na gọalọna mí nado ‘nọ pọ́n Klisti Jesu he yin dòdó po opodo yise mítọn tọn po hlan tlintlin.’ a Yé tá hinhọ́n do jẹhẹnu etọn lẹ, oyà he e ji, po lehe e yin zizedaga taidi Ahọlu podọ Mẹfligọtọ mítọn do po ji. Yé nasọ hẹn nukunnumọjẹnumẹ mítọn gando Oflin go pọnte dogọ, ehe na wá aimẹ to owhe ehe mẹ to jeudi 9 avril, to họyiyi owhè tọn godo.
Devizọnwatọ lọ Yin Yinyọnẹn
3, 4. (a) To owe Isaia tọn mẹ, etẹwẹ hogbe lọ ‘devizọnwatọ’ dlẹnalọdo? (b) Nawẹ Biblu tá hinhọ́n do Devizọnwatọ he yin nùdego to Isaia weta 42, 49, 50, 52, po 53 po mẹ ji gbọn?
3 Hogbe lọ “devi” kavi devizọnwatọ sọawuhia whlasusu to owe Isaia tọn mẹ. To whedelẹnu, e nọ dlẹnalọdo yẹwhegán Isaia lọsu tlọlọ. (Isa. 20:3; 44:26) To wefọ devo lẹ mẹ, e nọ dlẹnalọdo akọta Islaeli tọn blebu kavi Jakobu. (Isa. 41:8, 9; 44:1, 2, 21) Ṣigba etẹwẹ dogbọn dọdai ayidego tọn he gando Devizọnwatọ he sọawuhia to Isaia weta 42, 49, 50, 52, po 53 po mẹ go dali? Owe-wiwe Glẹki tọn lẹ tá hinhọ́n do Devizọnwatọ Jehovah tọn he yin zẹẹmẹ basina to weta enẹlẹ mẹ ji hezeheze. E jẹna ayidego dọ dopo to dọdai ehelẹ mẹ wẹ ahọluzọnwatọ Etiopianu he yin nùdego to owe Owalọ lẹ tọn mẹ lọ to hihia to whenuena gbigbọ deanana Filippi wẹndagbe-jlatọ lọ nado dọnsẹpọ ẹ. To whenuena ahọluzọnwatọ lọ ko hia adà Biblu tọn he mí wá yọnẹn to egbehe taidi Isaia 53:7, 8 godo, e kanse Filippi dọmọ: “Yẹn vẹ̀ we, Mẹnu tọn wẹ ehe yẹwhegán dọ he? Ewlọsu tọn, kavi omẹ devo tọn?” Filippi ma dọngbàn whẹpo do basi zẹẹmẹ na ẹn dọ Mẹssia, yèdọ Jesu hodọ wẹ Isaia te.—Owalọ 8:26-35.
4 To whenue Jesu tin to ovu, dawe dodonọ de he yin yiylọdọ Simeọni dọ to anademẹ gbigbọ wiwe tọn glọ dọ “ovi lọ Jesu” na lẹzun “hinhọ́n de na osọhia hlan Kosi lẹ,” kẹdẹdile Isaia 42:6 po 49:6 po dọ dọdai etọn do. (Luku 2:25-32) Humọ, Isaia 50:6-9 ko dọ dọdai gando nuyiwahẹmẹ winyandomẹ tọn he mẹ Jesu na jugbọn to ozán he mẹ e yin whẹdana te go. (Mat. 26:67; Luku 22:63) To Pẹntikọsti 33 W.M. godo, apọsteli Pita do Jesu hia hezeheze taidi “Devizọnwatọ” Jehovah tọn. (Isa. 52:13; 53:11; hia Owalọ lẹ 3:13, 26, NW. b) Etẹwẹ mí sọgan plọn sọn dọdai he gando Mẹssia go ehelẹ mẹ?
Jehovah Nọ Plọnazọ́n Devizọnwatọ Etọn
5. Azọ́nplọnmẹ nankọ wẹ Devizọnwatọ lọ mọyi?
5 Dopo to dọdai Isaia tọn lẹ mẹ he gando Devizọnwatọ Jiwheyẹwhe tọn go tá hinhọ́n do haṣinṣan pẹkipẹki he tin to Jehovah po Viplọnji etọn po ṣẹnṣẹn jẹnukọnna aigba ji wiwá etọn ji. (Hia Isaia 50:4-9.) Devizọnwatọ lọ lọsu dohia dọ Jehovah gbẹ́ pò to nuplọn ẹn, na e dọmọ: “E hùn otó ṣie, nado sè di nuyọnẹntọ tọn.” (Isaia 50:4) To ojlẹ enẹ lẹpo mẹ, Devizọnwatọ Jehovah tọn nọ dotoaina Otọ́ etọn bo plọnnu sọn e dè, bosọ lẹzun devi he nọ litai de. Lẹblanulọkẹyi vonọtaun nankọ die nado yin pinplọn gbọn Mẹdatọ wẹkẹ tọn lọ dali!
6. Nawẹ Devizọnwatọ lọ do taliai mlẹnmlẹn etọn na Otọ́ etọn hia gbọn?
6 To dọdai ehe mẹ, Devizọnwatọ lọ ylọ Otọ́ etọn dọ “Oklunọ Nupojipetọ Jehovah, NW.” Ehe dohia dọ Devizọnwatọ lọ ko plọn nugbo tangan he gando nupojipetọ-yinyin Jehovah tọn go. Nado do taliai mlẹnmlẹn etọn na Otọ́ etọn hia, e dọmọ: “[Oklunọ Nupojipetọ Jehovah, NW] ko hùn otó ṣie, yẹn masọ vẹtoli, mọ yẹn ma lẹgodo.” (Isa. 50:5) E “tin to [Jehovah] dè di azọ́nwatọgan de” to whenue wẹkẹ yinukundomọ lọ po gbẹtọvi lẹ po yin didá. “Azọ́nwatọgan” ehe “to ayajẹ whepoponu to nukọn [Jehovah tọn].” E dọmọ: “Yẹn [Ovi Jiwheyẹwhe tọn] to ayajẹ to fininọ aigba etọn tọn mẹ; bọ homẹhunhun ṣie sọ tin to ovi gbẹtọ tọn lẹ dè.”—Howh. 8:22-31.
7. Etẹwẹ dohia dọ Devizọnwatọ lọ deji dọ Otọ́ etọn na nọgodona ẹn to whlepọn etọn lẹ whenu?
7 Azọ́nplọnmẹ he Devizọnwatọ lọ mọyi ehe po owanyi he e tindo na gbẹtọvi lẹ po gọalọna ẹn to whenuena e wá aigba ji bo pehẹ nukundiọsọmẹ sinsinyẹn. E nọ hùnhomẹ to ojlo Otọ́ etọn tọn wiwà mẹ, etlẹ yin to homẹkẹn vẹadi glọ. (Ps. 40:8; Mat. 26:42; Joh. 6:38) To whlepọn he mẹ Jesu jugbọn to aigba ji lẹpo whenu, e deji dọ Otọ́ etọn na kẹalọyi i bo nasọ nọgodona ẹn. Dile e yin didọdai to Isaia mẹ do, Jesu sọgan dọ po nujikudo po dọmọ: “Mẹhe suwhẹna mi sẹpọ: mẹnu wẹ wọhẹ mi? . . . Dayi e go, OKLUNỌ Jiwheyẹwhe na gọalọna mi.” (Isa. 50:8, 9) Matin ayihaawe, Jehovah gọalọna Devizọnwatọ nugbonọ etọn to lizọnyizọn etọn blebu whenu to aigba ji, dile dọdai Isaia tọn devo dohia do.
Lizọnyizọn Devizọnwatọ lọ Tọn to Aigba Ji
8. Etẹwẹ dohia dọ Jesu wẹ “mẹvivẹ” Jehovah tọn, dile e yin didọdai to Isaia 42:1 mẹ do?
8 Kandai Biblu tọn dọ nuhe jọ to whenuena Jesu yí baptẹm to 29 W.M. dọmọ: “Gbigbọ [wiwe] sọ jẹte . . . do e ji, ogbè de sọ sọn olọn mẹ wá, dọmọ, Hiẹ wẹ Ovi yiwanna ṣie; hiẹ mẹ yẹn yin homẹhunnọ [te] tlala.” (Luku 3:21, 22) Jehovah gbọnmọ dali do “mẹvivẹ” etọn he yin nùdego to dọdai Isaia tọn mẹ hia to aliho he họnwun mẹ. (Hia Isaia 42:1-7.) To lizọnyizọn aigba ji tọn Jesu tọn whenu, e hẹn dọdai ehe di to aliho ayidego tọn de mẹ. To kandai Wẹndagbe tọn etọn mẹ, Matiu yihodọ sọn Isaia 42:1-4 mẹ bo yí i zan na Jesu.—Mat. 12:15-21.
9, 10. (a) Nawẹ Jesu hẹn Isaia 42:3 di to lizọnyizọn etọn whenu gbọn? (b) Nawẹ Klisti “hẹn whẹdida [dodo] wá” to whenuena e tin to aigba ji gbọn, podọ whetẹnu wẹ e “ze whẹdida dai to aihọn mẹ”?
9 Sinsẹ̀ngán Ju lẹ tọn nọ yí nukun pẹvi do pọ́n gbẹtọ paa he tin to ṣẹnṣẹn yetọn lẹ. (Joh. 7:47-49) Sinsẹ̀ngán lẹ nọ yinuwa hẹ omẹ ehelẹ to aliho kanyinylan tọn mẹ sọmọ bọ yé sọgan yin yiyijlẹdo “ofán gbigbà” kavi “sékàn he to azọ̀ti” bo ko pọ́ ṣiṣi lẹ go. Ṣigba, Jesu do awuvẹmẹ hia wamọnọ lẹ po mẹhe to yaji lẹ po. (Mat. 9:35, 36) E basi oylọ owanyinọ de na omẹ mọnkọtọn lẹ dọmọ: “Mì wá dè e, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì.” (Mat. 11:28) Humọ, Jesu “hẹn whẹdida [dodo] wá” gbọn nujinọtedo Jehovah tọn he gando dagbe po oylan po go lẹ pinplọnmẹ dali. (Isa. 42:3) E sọ dohia dọ Osẹ́n Jiwheyẹwhe tọn nọ biọ dọ mẹde ni yí lẹnpọn dagbe po lẹblanu po zan. (Mat. 23:23) Jesu sọ do whẹdida dodo hia gbọn yẹwhehodidọ na adọkunnọ po wamọnọ lẹ po matin nuvẹun dali.—Mat. 11:5; Luku 18:18-23.
10 Isaia sọ dọ dọdai dọ “mẹvivẹ” Jehovah tọn na “ze whẹdida [dodo] dai to aihọn mẹ.” (Isa. 42:4) E na wà ehe to madẹnmẹ to whenuena e na và ahọluduta tonudidọ tọn lẹpo sudo bo diọtẹnna yé po gandudu dodo tọn etọn po taidi Ahọlu Ahọluduta Mẹssia tọn. Ewọ na hẹn aihọn yọyọ de wá, fie “dodo nọ nọ̀.”—2 Pita 3:13; Dan. 2:44.
“Hinhọ́n” po “Alẹnu” de Po
11. Linlẹn tẹ mẹ wẹ Jesu yin ‘hinhọ́n akọta lẹ tọn’ te to owhe kanweko tintan whenu, podọ nawẹ e yinmọ to egbehe gbọn?
11 To hẹndi Isaia 42:6 tọn mẹ, Jesu do ede hia taidi “hinhọ́n kosi [kavi akọta] lẹ tọn de” nugbonugbo. To lizọnyizọn aigba ji tọn etọn whenu, Ju lẹ wẹ e hẹn hinhọ́n gbigbọmẹ tọn wá na jẹnukọn. (Mat. 15:24; Owalọ 3:26) Ṣigba Jesu dọmọ: “Yẹn wẹ hinhọ́n aihọn tọn.” (Joh. 8:12) Jesu lẹzun hinhọ́n de na Ju lẹ podọ na akọta lẹ, e ma yin na e hẹn nukunmọjẹnumẹ gbigbọmẹ tọn wá kẹdẹ wutu wẹ gba, ṣigba e sọ yí ogbẹ̀ pipé gbẹtọvi tọn etọn do sanvọ́ taidi Ofligọ na gbẹtọvi lẹpo. (Mat. 20:28) To fọnsọnku etọn godo, e deazọ́nna devi etọn lẹ nado dọyẹwheho “jẹ opodo aigba tọn.” (Owalọ 1:8) To lizọnyizọn Paulu po Balnaba po tọn whenu, yé yihodọ sọn dọdai Isaia tọn de mẹ gando ‘hinhọ́n akọta lẹ tọn’ go, bo yí i zan na azọ́n yẹwhehodidọ tọn he yé to wiwà to mẹhe mayin Ju lẹ ṣẹnṣẹn. (Owalọ 13:46-48; yijlẹdo Isaia 49:6 go.) Azọ́n enẹ gbẹ́ pò to nukọnzindo dile mẹmẹsunnu yiamisisadode Jesu tọn he tin to aigba ji lẹ po gbẹdohẹmẹtọ yetọn lẹ po to hinhọ́n gbigbọmẹ tọn lọ hẹn gbayipe bo to alọgọna gbẹtọ lẹ nado tindo yise to Jesu, yèdọ ‘hinhọ́n akọta lẹ tọn’ lọ mẹ.
12. Nawẹ Jehovah ze Devizọnwatọ etọn jo taidi “alẹnu gbẹtọ lẹ tọn” gbọn?
12 To dọdai enẹ dopolọ mẹ, Jehovah dọna Devizọnwatọ vivẹ etọn dọmọ: “Yẹn . . . na yí we whlá, bo yí we do basi alẹnu gbẹtọ lẹ tọn.” (Isa. 42:6) Satani wà nuhe go e pé lẹpo nado hù Jesu bo glọnalina ẹn nado hẹn lizọnyizọn aigba ji tọn etọn di, ṣigba Jehovah whlá ẹ kaka ojlẹ okú etọn tọn do sọ. (Mat. 2:13; Joh. 7:30) Enẹgodo, Jehovah fọ́n Jesu sọnku bo ze e jo taidi “alẹnu” kavi opagbe de na mẹhe tin to aigba ji lẹ. Opagbe vonọtaun enẹ namẹ jide dọ taidi ‘hinhọ́n akọta lẹ tọn,’ Devizọnwatọ nugbonọ Jiwheyẹwhe tọn na zindonukọn nado to gbẹtọ lẹ desọn zinvlu gbigbọmẹ tọn mẹ.—Hia Isaia 49:8, 9. c
13. To lizọnyizọn aigba ji tọn Jesu tọn whenu, nawẹ e whlẹn “mẹhe sinai to zinvlu mẹ lẹ” gbọn, podọ nawẹ e gbẹ́ pò to mọwà gbọn?
13 To kọndopọ mẹ hẹ opagbe ehe, Devizọnwatọ vivẹ Jehovah tọn na “hùn nukun na nukuntọ́nnọ lẹ,” “hẹn gàntọ lẹ tọ́n sọn ogànwhé,” bo whlẹn “mẹhe sinai to zinvlu mẹ lẹ.” (Isa. 42:7) Jesu wà ehe to lizọnyizọn aigba ji tọn etọn whenu gbọn nuplọnmẹ sinsẹ̀n lalo tọn lẹ didegbà podọ gbọn wẹndagbe Ahọluduta lọ tọn lilá dali. (Mat. 15:3; Luku 8:1) E whlẹn Ju he wá lẹzun devi etọn lẹ sọn kanlinmọgbenu gbigbọmẹ tọn mẹ. (Joh. 8:31, 32) Mọdopolọ, Jesu whlẹn livi susu mẹhe ma yin Ju lẹ tọn to gbigbọ-liho. E degbena hodotọ etọn lẹ nado “yì, bo hẹn akọta lẹpo zun nuplọntọ,” bosọ dopagbe dọ emi na tin hẹ yé “kakajẹ opodo aihọn tọn.” (Mat. 28:19, 20) Klisti Jesu to anadena azọ́n yẹwhehodidọ lẹdo aihọn pé tọn lọ sọn olọn mẹ.
Jehovah Ze ‘Devizọnwatọ’ Etọn Daga
14, 15. Naegbọn Jehovah do ze Devizọnwatọ etọn daga, podọ nawẹ e wàmọ gbọn?
14 To dọdai devo he gando Devizọnwatọ etọn Mẹssia go mẹ, Jehovah dọmọ: “Doayi e go, devi ṣie na yí nuyọnẹn do zọnhẹ omẹ; yè na ze e daga, yè na jlayinna ẹn, e nasọ yì oji susu.” (Isa. 52:13) Na Ovi Jiwheyẹwhe tọn gbọn nugbonọ-yinyin dali litaina nupojipetọ-yinyin Etọn bosọ yin nugbonọ to whlepọn sinsinyẹn glọ wutu, Jehovah ze e daga.
15 Apọsteli Pita wlan gando Jesu go dọmọ: “Mẹhe biọ olọn mẹ bosọ tin to adusilọ Jiwheyẹwhe tọn mẹ; angẹli lẹ, mẹgboogbo lẹ, po huhlọn lẹ po wẹ yè hẹn yin mẹmẹglọ hlan ẹn.” (1 Pita 3:22) Mọdopolọ, apọsteli Paulu wlan dọmọ: “E whiwhẹ ede, bosọ lẹzun tonusetọ kakajẹ okú, yèdọ okú [yatin, NW] tọn. Enẹwutu Jiwheyẹwhe ze e do oji aga ga, bosọ na oyín de ewọ he hú oyín lẹpo; dọ to oyín Jesu tọn mẹ kligonu lẹpo nido nọ jẹklo, yé he tin to olọn mẹ lẹ tọn, yé he tin to aigba lẹ tọn, po yé he tin to aigba sabọ lẹ tọn po. Podọ na odẹ́ lẹpo ni nọ yigbe dọ, Jesu Klisti wẹ Oklunọ, hlan gigo Jiwheyẹwhe Otọ́ tọn.”—Flp. 2:8-11.
16. Nawẹ Jesu “yì oji susu” to 1914 gbọn, podọ etẹwẹ e wadotana sọn whenẹnu gbọ́n?
16 To 1914, Jehovah tlẹ sọ ze Jesu daga dogọ. “E . . . yì oji susu” to whenuena Jehovah ze e do ofìn ji taidi Ahọlu Ahọluduta Mẹssia tọn. (Ps. 2:6; Dan. 7:13, 14) Sọn whenẹnu gbọ́n, Klisti ko “to ahọludu to ṣẹnṣẹn kẹntọ [etọn] lẹ tọn.” (Ps. 110:2) Onú tintan he e yiwà wẹ yindọ, e duahọlu kavi gbawhàn Satani po aovi etọn lẹ po tọn, bo yàn yé wá agblò aigba tọn mẹ. (Osọhia 12:7-12) Enẹgodo, taidi Kilusi Daho lọ, Klisti whlẹn pipotọ mẹmẹsunnu yiamisisadode etọn lẹ tọn he tin to aigba ji sọn nuyiwadomẹji “Babilọni daho” lọ tọn glọ. (Osọhia 18:2; Isa. 44:28) E to anadena azọ́n yẹwhehodidọ lẹdo aihọn pé tọn lọ he ko hẹn bibẹpli mẹmẹsunnu gbigbọmẹ tọn etọn “he pò” lẹ po livi susu “lẹngbọ devo” lẹ, yèdọ gbẹdohẹmẹtọ nugbonọ “lẹngbọpa pẹvi” lọ tọn lẹ po yọnbasi todin.—Osọhia 12:17; Joh. 10:16; Luku 12:32.
17. Etẹwẹ dogbapọnnanu he mí basi todin do dọdai Isaia tọn he gando ‘devizọnwatọ’ lọ go ji plọn mí?
17 Matin ayihaawe, dọdai ayidego tọn he tin to owe Isaia tọn mẹ ehelẹ pinplọn ko yidogọna pinpẹn-nutọn-yinyọnẹn mítọn na Ahọlu po Mẹfligọtọ mítọn po, yèdọ Klisti Jesu. Taidi ovi de, tonusise etọn to lizọnyizọn aigba ji tọn etọn whenu do nuplọnmẹ he e mọyi sọn Otọ́ etọn dè whẹpo do wá aigba ji hia. E ko do ede hia taidi ‘hinhọ́n akọta lẹ tọn’ gbọn lizọnyizọn he e wà to aigba ji po anadidena azọ́n yẹwhehodidọ tọn lọ kakajẹ egbehe po dali. Dile mí na mọ to hosọ he bọdego mẹ do, dọdai devo he gando Devizọnwatọ Mẹssia lọ go dohia dọ e na jiya bo ze ogbẹ̀ etọn jo do ota mítọn mẹ, yèdọ whẹho he mí dona yí sọwhiwhe do ‘lẹn pọ́n’ lẹ dile Oflin okú etọn tọn to sisẹpọ.—Heb. 12:2, 3.
[Nudọnamẹ odò tọn]
a Hiẹ sọgan mọ dọdai ehelẹ to Isaia 42:1-7; 49:1-12; 50:4-9; po 52:13–53:12 po mẹ.
b Owalọ lẹ 3:13, 26, (NW): “Jiwheyẹwhe Ablaham tọn, Isaki tọn, po Jakọbu tọn po, Jiwheyẹwhe tọgbo mítọn lẹ tọn wẹ ko pagigona Devizọnwatọ etọn, yèdọ Jesu, mẹhe mìwlẹ lọsu zejo bo mọ́n to Pilati nukọn, to whenue e basi dide nado tún in dote. Hlan mìwlẹ whẹ́ wẹ Jiwheyẹwhe do Devizọnwatọ etọn hlan, to whenue e ko ze e daga godo, nado dona mì gbọn didiọ dopodopo mìtọn sọn walọ ylankan mìtọn lẹ mẹ dali.”
c Na nudọnamẹ gigọ́ do dọdai Isaia 49:1-12 tọn ji, pọ́n owe lọ Dọdai Isaia Tọn—Hinhọ́n de na Gbẹtọvi Lẹpo II, weda 136-145.
Dogbapọn
• Mẹnu wẹ yin ‘devizọnwatọ’ he yin nùdego to dọdai Isaia tọn lẹ mẹ, podọ nawẹ mí wagbọn do yọnẹn?
• Azọ́nplọnmẹ tẹwẹ Devizọnwatọ lọ mọyi sọn Jehovah dè?
• Nawẹ Jesu yin ‘hinhọ́n akọta lẹ tọn’ gbọn?
• Nawẹ Devizọnwatọ lọ yin zizedaga gbọn?
[Kanbiọ Oplọn tọn lẹ]
[Yẹdide to weda 21]
Filippi do mẹhe ‘devizọnwatọ’ he yin nùdego to Isaia mẹ lọ yin hia hezeheze taidi Jesu, Mẹssia lọ
[Yẹdide to weda 23]
Taidi Devizọnwatọ vivẹ Jehovah tọn, Jesu do awuvẹmẹ hia wamọnọ lẹ po mẹhe to yaji lẹ po
[Yẹdide to weda 24]
Jesu yin zizedaga gbọn Otọ́ etọn dali bo yin zizedo ofìn ji taidi Ahọlu Ahọluduta Mẹssia tọn