Tindo Ayajẹ to Azọ́n Mẹhẹnzun Devi Tọn lọ Mẹ
Tindo Ayajẹ to Azọ́n Mẹhẹnzun Devi Tọn lọ Mẹ
“Enẹwutu mì yì, bo hẹn akọta lẹpo zun nuplọntọ.”—MAT. 28:19.
1-3. (a) Etẹwẹ nọ yin numọtolanmẹ mẹsusu tọn gando anadidena plọnmẹ Biblu go? (b) Kanbiọ tẹlẹ wẹ mí na gbadopọnna?
MẸMẸYỌNNU he to sinsẹ̀n to kándo he nọ dó Hindi-gbè de mẹ to États-Unis de dọmọ: “N’ko to nuplọn hẹ whẹndo he wá sọn Pakistan de na osẹ 11.” E yidogọ dọmọ: “Mí yawu lẹzun họntọn. Eyin n’flindọ whẹndo ehe na lẹkọyi Pakistan to madẹnmẹ, dasin nọ wayi do mi. E ma yin lehe n’na jẹdò yetọn do kẹdẹ wẹ nọ hẹn mi blawu gba, ṣigba eyin n’sọ flin ayajẹ he n’nọ tindo to whenue n’to nuplọn hẹ yé gando Jehovah go, nukun ṣie nọ hlá dasin.”
2 Taidi mẹmẹyọnnu ehe, be hiẹ lọsu ko tindo ayajẹ dile a to Biblu plọn hẹ mẹde pọ́n ya? Jesu po devi etọn owhe kanweko tintan tọn lẹ po mọ ayajẹ daho to azọ́n mẹhẹnzun devi tọn mẹ. To whenuena devi 70 he Jesu plọnazọ́n lẹ lẹkọ po linlin ayajẹ tọn de po, Jesu lọsu “jaya gbọn [gbigbọ wiwe] dali.” (Luku 10:17-21) Mọdopolọ to egbehe, ayajẹ mẹsusu tọn nọ gọfla to azọ́n mẹhẹnzun devi tọn mẹ. Di dohia, to 2007, wẹnlatọ azọ́n sinsinyẹn watọ ayajẹnọ lẹ deanana madozẹnzẹn plọnmẹ Biblu livi ṣidopo daa tọn to sunmẹsunmẹ!
3 Ṣigba, wẹnlatọ delẹ ma ko duvivi anadidena plọnmẹ Biblu de tọn pọ́n gba. Mẹdevo lẹ sọgan nọma ko deanana plọnmẹ Biblu dopo to owhe agọe tọn lẹ mẹ. Avùnnukundiọsọmẹnu tẹlẹ wẹ mí sọgan pehẹ dile mí to vivẹnudo nado deanana plọnmẹ Biblu de? Nawẹ mí sọgan duto avùnnukundiọsọmẹnu enẹlẹ ji gbọn? Podọ ale tẹlẹ wẹ mí nọ mọ to whenuena mí wà nuhe go mí pé lẹpo nado setonuna gbedide Jesu tọn he dọmọ: “Enẹwutu mì yì, bo hẹn akọta lẹpo zun nuplọntọ”?—Mat. 28:19.
Avùnnukundiọsọmẹnu He Sọgan Hò Ayajẹ Mítọn Yí Lẹ
4, 5. (a) Etẹwẹ nọ yin nuyiwa mẹsusu tọn gando wẹndagbe lọ go to awà delẹ ji? (b) Avùnnukundiọsọmẹnu tẹlẹ wẹ wẹnlatọ lẹ nọ pehẹ to fidevo lẹ?
4 To awà delẹ ji to aihọn lọ mẹ, gbẹtọ lẹ nọ to jejeji nado yí owe mítọn lẹ bosọ nọ jlo dọ mí ni plọn Biblu hẹ yé. Asu po asi po he wá sọn Australie bo to sinsẹ̀n na ojlẹ gli to Zambie de wlan dọmọ: “Nado dọ hójọhó, Zambie yin otò de he nọ de sinsẹ́n susu tọ́n. Kunnudide tòhomẹ-liho ji tọn nọ vivi taun! Gbẹtọ lẹ nọ dọnsẹpọ mí, podọ mẹdelẹ tlẹ nọ biọ zinjẹgbonu linlinnamẹwe mítọn lẹ tọn tangan delẹ.” To agọe, mẹmẹsunnu po mẹmẹyọnnu Zambie tọn lẹ po deanana plọnmẹ Biblu he lán to 200000 ji—yèdọ madozẹnzẹn hugan plọnmẹ Biblu dopo na wẹnlatọ dopo tọn.
5 Ṣigba to fidevo lẹ, e sọgan vẹawuna wẹnlatọ lẹ nado do owe gbonu bo deanana plọnmẹ Biblu lẹ to gbesisọ mẹ. Etẹwutu? Na gbẹtọ lẹ ma nọ saba tin to whégbè to whenuena wẹnlatọ lẹ dla yé pọ́n, kavi mẹhe tin to whégbè lẹ sọgan nọma tindo ojlo to sinsẹ̀n mẹ. Yé sọgan ko yin pinplọn whẹ́n to whẹndo he ma tin to sinsẹ̀n depope mẹ lẹ mẹ kavi yẹnuwiwa sinsẹ̀n lalo tọn sọgan ko zọ́n bọ yé gbẹwanna sinsẹ̀n. Sinsẹ̀ngán lẹ ko hẹn agbọ́pé mẹsusu bosọ hẹn apọṣi yé to gbigbọ-liho. (Mat. 9:36) Abajọ, omẹ mọnkọtọn lẹ ma nọ tindo ojlo nado dọhodo Biblu ji hẹ mẹdepope.
6. Numọtolanmẹ nugomape tọn tẹlẹ wẹ mẹdelẹ sọgan nọ diahi hẹ?
6 Wẹnlatọ nugbonọ delẹ nọ pehẹ avùnnukundiọsọmẹnu devo he sọgan hò ayajẹ yetọn yí. Dile yé tlẹ ko yin zohunhunnọ to azọ́n mẹhẹnzun devi tọn lọ mẹ to ojlẹ de mẹ wayi, azọ̀n kavi yọnhowhe ko zọ́n bọ yé ma sọgan sọ wà nususu todin ba. Sọ lẹnnupọndo numọtolanmẹ nugomape tọn he mí nọ tindo ji. Di apajlẹ, be hiẹ nọ lẹndọ a ma penugo nado deanana plọnmẹ Biblu de ya? Hiẹ sọgan tindo numọtolanmẹ Mose tọn nkọ to whenue Jehovah deazọ́nna ẹn nado yì dọhona Falo. Mose dọmọ: “A OKLUNỌ, yẹn ma didẹ́, e ma yin sọn dinvie, kavi sọn whenuena hiẹ . . . dọho hlan devi towe.” (Eks. 4:10) Numọtolanmẹ nugomape tọn nọ zọ́n bọ mí nọ dibu dọ mí na gboawupo. Mí sọgan nọ hanú dọ e na vẹawuna nuplọntọ de nado lẹzun devi na mí ma yin mẹplọntọ he pegan wutu. Na mí ma jlo na tindo numimọ mọnkọtọn wutu, dotẹnmẹ hundote lọ nado deanana oplọn de nọ gbọ mí go. Nawẹ mí sọgan duto avùnnukundiọsọmẹnu he go mí ṣẹṣẹ donù ehelẹ ji gbọn?
Wleawuna Ahun Towe
7. Etẹwẹ nọ duahunmẹna Jesu hugan to lizọnyizọn etọn mẹ?
7 Onú tintan he mí dona wà wẹ nado wleawuna ahun mítọn. Jesu dọmọ: “Sọn onú ayiha gege tọn mẹ wẹ onù nọ dọ.” (Luku 6:45) Dagbemẹninọ mẹdevo lẹ tọn wẹ nọ duahunmẹna Jesu hugan to lizọnyizọn etọn mẹ. Di apajlẹ, to whenuena e doayi ninọmẹ blawu gbigbọmẹ tọn he mẹ Juvi hatọ etọn lẹ tin te go, “e wàlẹblanu na yé.” E dọna devi etọn lẹ dọmọ: “Ojijẹ sù nugbo . . . Enẹwutu mì hodẹ̀ hlan Oklunọ ojijẹ tọn, na e ni do azọ́nwatọ lẹ hlan ojijẹ etọn mẹ.”—Mat. 9:36-38.
8. (a) Etẹ ji wẹ mí na wà dagbe nado lẹnnupọndo? (b) Etẹwẹ mí sọgan plọn sọn nuhe Biblu plọntọ de dọ mẹ?
8 Dile mí to mahẹ tindo to azọ́n mẹhẹnzun devi tọn lọ mẹ, mí na wà dagbe nado lẹnnupọn sisosiso do ayajẹ he mí nọ mọ to whenuena mẹde de whenu dovo nado plọn Biblu hẹ mí ji. Sọ lẹnnupọndo mẹhe mí na dukosọ hẹ to lizọnyizọn lọ mẹ lẹ po lehe yé na mọaleyi sọn owẹ̀n he mí to lilá lọ mẹ do po ji. Yọnnu de kanwehlan alahọ otò he mẹ e nọ nọ̀ tọn dọmọ: “N’jlo na dọna mì dọ n’yọ́n pinpẹn Kunnudetọ he nọ wá plọnnu mi to owhé ṣie gbè lẹ tọn. N’yọnẹn dọ n’na ko nọ hẹn homẹgble yé to whedelẹnu na n’nọ kàn kanbiọ susu sè yé bo nọ saba yí whenu yetọn susu. Ṣigba yé ma nọ gblehomẹ, podọ yé nọ to jejeji nado má nuhe yé ko plọn lẹ hẹ mi. N’dopẹna Jehovah po Jesu po dọ n’yọ́n omẹ ehelẹ.”
9. Etẹ ji wẹ Jesu ze ayidonugo do, podọ nawẹ mí sọgan hodo apajlẹ etọn gbọn?
9 Nugbo wẹ dọ e ma yin mẹlẹpo wẹ kẹalọyi nuplọnmẹ Jesu tọn lẹ. (Mat. 23:37) Mẹdelẹ hodo e na ojlẹ de, ṣigba jẹagọdo nuplọnmẹ etọn lẹ to godo mẹ bo “masọ zọ̀n hẹ ẹ ba.” (Joh. 6:66) Etomọṣo, Jesu ma dike nuyiwa mẹdelẹ tọn ni hẹn ẹn tindo numọtolanmẹ lọ dọ owẹ̀n he lá e te ma yin nujọnu gba. Mahopọnna dọ suhugan okún he e dó lẹ tọn ma de sinsẹ́n tọ́n, Jesu ze ayidonugo etọn do dagbe he wà e te ji. E mọdọ ojlẹ ko sọ na gbingbẹ̀n podọ homẹ etọn hùn tlala nado gọalọ to azọ́n jibẹwawhé tọn enẹ mẹ. (Hia Johanu 4:35, 36.) Kakati nado ze ayidonugo do fie ma de sinsẹ́n tọ́n lẹ ji, be mílọsu sọgan pọnnukọnhlan jideji he aigba-denamẹ mítọn sọgan hẹnwa to nukọn mẹ lẹ ya? Mì gbọ mí ni gbadopọnna lehe mí sọgan tindo pọndohlan dagbe mọnkọtọn do.
Nọ Dó po Linlẹn lọ po Nado Gbẹ̀n
10, 11. Etẹwẹ hiẹ sọgan wà ma nado hẹn ayajẹ towe bu to lizọnyizọn lọ mẹ?
10 Glesi de nọ donú po linlẹn lọ po nado gbẹ̀n. Mọdopolọ, mí dona nọ dọyẹwheho po linlẹn lọ po nado bẹ plọnmẹ Biblu lẹ jẹeji. Etẹwẹ lo, eyin hiẹ nọ tindo mahẹ to lizọnyizọn lọ mẹ to gbesisọ mẹ ṣigba bo ma nọ mọ mẹsusu to whégbè kavi ma nọ penugo nado mọ yé to gọyìpọn lẹ whenu? Ehe sọgan hẹn we jẹflumẹ. Be agbọ́ na pé we na lizọnyizọn họndekọn jẹ họndekọn tọn lọ wẹ ya? Paali! Na mẹsusu, lizọnyizọn họndekọn jẹ họndekọn tọn mẹ wẹ yé sè wẹndagbe lọ te whla tintan.
11 Ṣigba ma nado hẹn ayajẹ towe bu, be hiẹ sọgan hẹn aliho yẹwhehodidọ tọn towe gblodeji vlavo nado tẹ́n aliho mẹdọnsẹpọ tọn devo lẹ pọ́n nado sọgan jẹ gbẹtọ lẹ dè ya? Di apajlẹ, be hiẹ ko tẹnpọn nado dekunnuna gbẹtọ lẹ to tòhomẹ-liho ji kavi to azọ́nwatẹn yetọn lẹ pọ́n ya? Be hiẹ sọgan dọyẹwheho na gbẹtọ lẹ gbọn alokan yiyizan dali kavi nọ yí sọha alokan mẹhe hiẹ lá owẹ̀n Ahọluduta lọ tọn na lẹ tọn nado sọgan nọ ylọ yé ya? Eyin hiẹ nọ sinyẹnlin bo nọ diọalọ to lizọnyizọn towe mẹ, hiẹ na mọ mẹhe na dotoaina owẹ̀n Ahọluduta lọ tọn lẹ bọ enẹ na hẹn ayajẹ wá na we.
Nọ Duto Ojlo Matindo Ji
12. Etẹwẹ mí sọgan wà eyin e taidi dọ mẹsusu ma nọ do ojlo hia to aigba-denamẹ mítọn ji?
12 Etẹwẹ lo eyin susu mẹhe tin to aigba-denamẹ mìtọn ji lẹ tọn ma nọ tindo ojlo to sinsẹ̀n mẹ? Be hiẹ sọgan nọ diọalọ, na nuzedonukọnnamẹ towe nido fọ́n ojlo hosetọ towe lẹ tọn dote ya? Apọsteli Paulu kanwehlan yisenọ hatọ he tin to Kọlinti lẹ dọmọ: “Hlan Ju lẹ yẹn lẹ́ dee zun Ju de, . . . hlan yé he tin matin osẹ́n lẹ, taidi matin osẹ́n, [dile etlẹ yindọ yẹn] ma tin matin osẹ́n hlan Jiwheyẹwhe.” Etẹwẹ yin yanwle Paulu tọn? “Yè yí mi do basi onú popo hlan gbẹtọ lẹpo,” wẹ e dọ, “na yẹn nido gbọn onú popo mẹ whlẹn pẹvide gán.” (1 Kọl. 9:20-22) Be mílọsu sọgan mọ hosọ he na fọnjlodotena gbẹtọ lẹ to aigba-denamẹ mítọn ji lẹ ya? Susu mẹhe ma tin to sinsẹ̀n de mẹ lẹ tọn wẹ nọ jlo na hẹn gbẹzan whẹndo tọn yetọn pọnte dogọ. Sọgodo yetọn sọgan sọ to ahunmẹduna yé. Be mí sọgan ze wẹndagbe Ahọluduta lọ tọn donukọnna omẹ ehelẹ to aliho he na fọnjlodotena yé de mẹ ya?
13, 14. Nawẹ mí sọgan hẹn ayajẹ he mí nọ mọ to azọ́n mẹhẹnzun devi tọn lọ mẹ jideji gbọn?
13 Wẹnlatọ susu wẹ ko hẹn ayajẹ yetọn jideji to azọ́n mẹhẹnzun devi tọn lọ mẹ, etlẹ yin to fie e taidi dọ mẹsusu ma nọ do ojlo hia te lẹ. Gbọnna? Yé nọ plọn jonọgbè. Asu po asi po he tin to owhe 60 yetọn lẹ mẹ de doayi e go dọ fọtọ́n susu wehọmẹvi Chine-nu lẹ tọn wẹ nọ nọ̀ aigba-denamẹ agun yetọn tọn ji to pọmẹ hẹ whẹndo yetọn lẹ. Asu lọ dọmọ: “Enẹwutu, mí yin tulina nado plọn Chine-gbè. Mahopọnna dọ ehe biọ dọ mí ni nọ yí ojlẹ susu zan to azán dopodopo gbè nado nọ plọn ogbè lọ, ehe dekọtọn do plọnmẹ Biblu susu mẹ hẹ Chine-nu he tin to lẹdo mítọn mẹ lẹ.”
14 Eyin hiẹ ma tlẹ penugo nado plọn jonọgbè, hiẹ sọgan yí alọnuwe lọ Une bonne nouvelle pour des gens de toutes nations zan to aliho dagbe mẹ eyin hiẹ dukosọ hẹ mẹhe nọ dó ogbè devo lẹ. Hiẹ sọgan sọ nọ hẹn owe he tin to ogbè mẹhe a nọ dukosọ hẹ to aigba-denamẹ towe ji lẹ tọn mẹ. Nugbo wẹ dọ, e nọ biọ whenu susu po vivẹnudido po nado sọgan dọho hẹ mẹhe wá sọn ogbè po aṣa devo po mẹ lẹ. Ṣigba, flin nunọwhinnusẹ́n he tin to Ohó Jiwheyẹwhe tọn mẹ dọmọ: “Ewọ he húnhún jinukun gege, nasọ gbẹ̀n gege ga.”—2 Kọl. 9:6.
Agun lọ Blebu Wẹ Dona Dovivẹnu
15, 16. (a) Naegbọn azọ́n mẹhẹnzun devi tọn lọ nọ biọ vivẹnudido agun lọ blebu tọn? (b) Adà tẹwẹ mẹhomẹ lẹ nọ yiwà?
15 Ṣigba, vivẹnudido mẹdopo gee tọn ma sọgan hẹn gbẹtọ lẹ zun devi. Kakatimọ, agun lọ blebu wẹ dona dovivẹnu. Naegbọn e do yinmọ? Jesu dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” (Joh. 13:35) Podọ sọn nugbo de mẹ, to whenuena Biblu plọntọ lẹ yì opli agun tọn lẹ, owanyi he yé nọ mọ to ṣẹnṣẹn mítọn nọ yinuwado yé ji. Biblu plọntọ de dọmọ: “N’nọ duvivi opli lẹ yìyì tọn tlala. Omẹ lọ lẹ jọmẹ taun!” Jesu dọ dọ hẹnnumẹ jọnun mẹhe na lẹzun hodotọ emitọn lẹ tọn na diọnukunsọ yé. (Hia Matiu 10:35-37.) Etomọṣo, e dopagbe dọ yé na mọ susugege “mẹmẹsunnu lẹ, mẹmẹyọnnu lẹ, onọ̀ lẹ, ovi lẹ” tọn to agun lọ mẹ.—Malku 10:30.
16 Mẹmẹsunnu po mẹmẹyọnnu mítọn mẹhomẹ lẹ po nọ yí adà titengbe de wà to nukọnyiyi Biblu plọntọ lẹ tọn mẹ. To aliho tẹ mẹ? Eyin mẹhomẹ delẹ ma tlẹ penugo nado deanana plọnmẹ Biblu de na yede, gblọndo mẹjlọdote tọn yetọn lẹ to opli agun tọn lẹ ji nọ hẹn yise mẹhe sè gblọndo yetọn lẹpo tọn lodo. Numimọ susu he yé tindo “to aliho dodo tọn ji” nọ doyẹyigona agun lọ bo nọ dọ̀n ahunjijlọnọ lẹ wá titobasinanu Jiwheyẹwhe tọn mẹ.—Howh. 16:31.
Lehe Mí Sọgan Duto Obu Ji Do
17. Etẹwẹ mí sọgan wà nado dapana numọtolanmẹ nugomape tọn?
17 Eyin hiẹ ka nọ tindo numọtolanmẹ nugomape tọn lo? Flindọ Jehovah na gbigbọ wiwe etọn Mose bosọ wleawu azọ́nwatọgbẹ́ de tọn na ẹn, yèdọ nọvisunnu etọn Aalọn, nado gọalọna ẹn. (Eks. 4:10-17) Jesu dopagbe dọ gbigbọ Jiwheyẹwhe tọn na nọgodona azọ́n kunnudide tọn mítọn. (Owalọ 1:8) Humọ, Jesu do azọ́nwatọ lẹ hlan awe awe nado dọyẹwheho. (Luku 10:1) Enẹwutu, eyin e nọ vẹawuna we nado deanana plọnmẹ Biblu de, dín alọgọ gbigbọ Jiwheyẹwhe tọn to odẹ̀ mẹ na e nido na we nuyọnẹn. Enẹgodo, basi tito nado tọ́nyi kunnudegbe hẹ mẹhe sọgan na we jide bọ numimọ etọn na gọalọna we de. Eyin hiẹ flindọ mẹhe ma diyin lẹ wẹ Jehovah nọ de—yèdọ “onú madogán aihọn tọn lẹ”—nado hẹn azọ́n vonọtaun ehe di, enẹ na hẹn yise towe lodo.—1 Kọl. 1:26-29.
18. Nawẹ mí sọgan duto obu awugbopo tọn ji gbọn?
18 Nawẹ mí sọgan duto obu awugbopo tọn ji gbọn? Mí na wà dagbe nado flindọ azọ́n mẹhẹnzun devi tọn ma taidi núdùdù de didà he, eyin e na vivi kavi lala, nọ pò to nudàtọ lọ kẹdẹ si gba. Kakatimọ, azọ́n gbẹtọ lẹ hinhẹn zun devi tọn bẹ e whè gbau omẹ voovo atọ̀n hẹn. Jehovah wẹ nọ yí adà titengbe hugan lọ wà gbọn nuplọntọ lẹ dindọn wá ede dè dali. (Joh. 6:44) Míwlẹ po mẹdevo lẹ po to agun lọ mẹ nọ wà nuhe go mí pé lẹpo nado yí azọ́nyinyọnẹn mẹpinplọn tọn do gọalọna nuplọntọ lọ nado zindonukọn. (Hia 2 Timoti 2:15.) Podọ nuplọntọ lọ dona yinuwa sọgbe hẹ nuhe plọn e te. (Mat. 7:24-27) Eyin mẹde doalọtena Biblu pinplọn, enẹ sọgan hẹn mí jẹflumẹ. Todido mítọn wẹ yindọ Biblu plọntọ lẹ ni basi nudide he sọgbe lọ, ṣigba mẹdopodopo wẹ dona “dọho ede tọn hlan Jiwheyẹwhe.”—Lom. 14:12.
Ale Tẹlẹ Wẹ E Nọ Hẹnwa?
19-21. (a) Ale tẹlẹ wẹ mí nọ mọ sọn anadidena plọnmẹ Biblu lẹ mẹ? (b) Nukun tẹwẹ Jehovah nọ yí do pọ́n mẹhe nọ tindo mahẹ to azọ́n yẹwhehodidọ tọn lọ mẹ lẹpo?
19 Anadidena plọnmẹ Biblu nọ gọalọna mí nado ze Ahọluduta lọ do otẹn tintan mẹ. E sọ nọ zín nugbo Ohó Jiwheyẹwhe tọn do ayiha po ahun mítọn po mẹ sisosiso. To aliho tẹ mẹ? Gbehosọnalitọ de he nọ yin Barak dọmọ: “Anadidena plọnmẹ Biblu na whàn we nado lẹzun Ohó Jiwheyẹwhe tọn plọntọ dagbe. N’mọdọ n’dona tindo nujikudo he dolido whẹpo do sọgan pegan nado plọn mẹdevo ganji.”
20 Eyin hiẹ ma ko to anadena plọnmẹ Biblu de, be enẹ dohia dọ sinsẹ̀n-bibasi towe ma họakuẹ to nukun Jiwheyẹwhe tọn mẹ wẹ ya? Paali! Jehovah nọ yọ́n pinpẹn vivẹnu he mí nọ do nado hẹn pipà wá na ẹn tọn taun. Mẹhe nọ tindo mahẹ to azọ́n yẹwhehodidọ tọn lọ mẹ lẹpo wẹ yin “azọ́nyiwahẹmẹtọ dopọ hẹ Jiwheyẹwhe.” Ṣigba, anadidena plọnmẹ Biblu nọ hẹn ayajẹ susu wá na mí dile mí to mimọ bọ Jiwheyẹwhe to jideji hẹnwa. (1 Kọl. 3:6, 9) Gbehosọnalitọ de he nọ yin Amy dọ dọ, “Eyin hiẹ mọ bọ Biblu plọntọ de to nukọnzindo, ayajẹ towe na gọfla bọ hiẹ na dopẹna Jehovah dọ e yí we zan nado na omẹ enẹ nunina jiawu de—yèdọ lẹblanulọkẹyi lọ nado yọ́n Jehovah bo mọ ogbẹ̀ madopodo yí.”
21 Eyin mí nọ wà nuhe go mí pé lẹpo nado bẹ plọnmẹ Biblu lẹ jẹeji bo nọ deanana yé, enẹ na gọalọ mí nado na ayidonugo sinsẹ̀n-bibasi Jiwheyẹwhe tọn todin podọ e nasọ hẹn todido mítọn nado luntọ́n biọ aihọn yọyọ lọ mẹ lodo. Po godonọnamẹ Jehovah tọn po, mílọsu sọgan gọalọ nado whlẹn mẹhe nọ dotoaina mí lẹ gán. (Hia 1 Timoti 4:16.) Lehe enẹ na hẹn ayajẹ wá do sọ!
Be Hiẹ Flin Ya?
• Avùnnukundiọsọmẹnu tẹlẹ wẹ sọgan glọnalina mẹdelẹ nado deanana plọnmẹ Biblu?
• Etẹwẹ mí sọgan wà eyin e taidi dọ mẹsusu ma nọ do ojlo hia to aigba-denamẹ mítọn ji?
• Ale tẹlẹ wẹ mí nọ mọ sọn anadidena plọnmẹ Biblu mẹ?
[Kanbiọ Oplọn tọn lẹ]
[Yẹdide to weda 9]
Be hiẹ nọ hẹn aliho yẹwhehodidọ tọn towe gblodeji nado sọgan dín ahunjijlọnọ lẹ mọ ya?