‘Wá Bo Hodo Mi’
‘Wá Bo Hodo Mi’
“Eyin mẹde [jlo na] hodo mi, gbọ e ni mọ́n ede, bosọ ze [yatin] etọn egbesọ, bo hodo mi.”—LUKU 9:23.
1, 2. (a) Oylọ owanyinọ tẹwẹ Jesu basina mẹlẹpo? (b) Etẹwẹ yin nuyiwa towe gando oylọ-basinamẹ Jesu tọn go?
SẸPỌ vivọnu lizọnyizọn Jesu tọn, e to kunnude to Pelea, yèdọ agbegbe de to Jọdani godo, to agewaji whèzẹtẹn Jude tọn. Dẹpẹ de dọnsẹpọ ẹ bo kàn nuhe e na wà nado mọ ogbẹ̀ madopodo sè e. To whenuena Jesu mọdọ dẹpẹ lọ nọ yìn Osẹ́n Mose tọn nugbonugbo, e basi oylọ vonọtaun de na ẹn. E dọmọ: “Yì, bo sà nudepope he hiẹ tindo, bo yí na wamọnọ lẹ, hiẹ nasọ tindo adọkunnu to olọn mẹ: bo wá, . . . bo hodo mi.” (Malku 10:21) Lẹnnupọndo ehe ji—yèdọ oylọ-basinamẹ de nado hodo Jesu, Ovi detọ́n dopo akàn Jiwheyẹwhe Gigogán lọ tọn!
2 Dẹpẹ enẹ gbẹ́ oylọ-basinamẹ lọ, ṣigba mẹdevo lẹ kẹalọyi. Jesu ko dọna Filipi jẹnukọn dọmọ: “Hodo mi.” (Joh. 1:43) Filipi kẹalọyi oylọ-basinamẹ lọ bo lẹzun apọsteli to godo mẹ. Jesu basi oylọ dopolọ na Matiu, podọ ewọ lọsu kẹalọyi. (Mat. 9:9; 10:2-4) Na nugbo tọn, Jesu basi oylọ dopolọ na mẹhe yiwanna dodowiwa lẹpo to whenuena e dọmọ: “Eyin mẹde [jlo na] hodo mi, gbọ e ni mọ́n ede, bosọ ze [yatin] etọn egbesọ, bo hodo mi.” (Luku 9:23) Enẹwutu, mẹdepope wẹ sọgan lẹzun hodotọ Jesu tọn eyin e jlo nugbonugbo. Be enẹ jlo we ya? Suhugan mítọn wẹ ko kẹalọyi oylọ-basinamẹ owanyinọ Jesu tọn enẹ, podọ mí nọ basi oylọ dopolọ na mẹdevo lẹ to lizọnyizọn kunnudegbe tọn mẹ.
3. Etẹwẹ mí sọgan wà ma nado buali sọn Jesu godo?
3 Ṣigba e blawu dọ, mẹhe ko do ojlo hia to nugbo Biblu tọn mẹ delẹ ma zindonukọn to nupinplọn mẹ. Kakatimọ, yé gbọjọ bo “dùdú kọnyinai” kavi buali to godo mẹ sọn Jesu godo. (Heb. 2:1) Etẹwẹ mí sọgan wà ma nado jai jẹ omọ̀ mọnkọtọn mẹ? E na yọ́n nado nọ kanse míde dọ: ‘Naegbọn n’do de nado hodo Jesu to bẹjẹeji? Etẹwẹ e zẹẹmẹdo nado hodo Jesu?’ Eyin mí hẹn gblọndo kanbiọ awe enẹlẹ tọn do ayiha mẹ, enẹ na zọ́n bọ mí na hẹn gbemima mítọn lodo nado gbọṣi ali ogbẹ̀ tọn he mí ko de lọ ji. Enẹ nasọ gọalọna mí nado na tuli mẹdevo lẹ na yé nido hodo Jesu.
Naegbọn Mí Dona Nọ Hodo Jesu?
4, 5. Naegbọn Jesu do pegan taidi Nukọntọ?
4 Yẹwhegán Jẹlemia dọmọ: “OKLUNỌ E, yẹn yọnẹn dọ aliho gbẹtọ tọn ma tin to ewọ lọsu mẹ gba: e ma tin to mẹhe to zọnlinzin mẹ nado do afọdide etọn lẹ gba.” (Jẹl. 10:23) Whenuho ko dohia dọ nugbo wẹ hogbe Jẹlemia tọn enẹlẹ yin. E họnwun hezeheze dọ gbẹtọvi mapenọ lẹ ma sọgan dugán do yedelẹ ji po kọdetọn dagbe po. Mí kẹalọyi oylọ-basinamẹ Jesu tọn nado hodo e, na mí mọdọ ewọ wẹ pegan nado yin Nukọntọ mítọn hugan gbẹtọvi depope. Mì gbọ mí ni lẹnnupọndo aliho he mẹ Jesu pegan te delẹ ji.
5 Tintan, Jesu yin dide taidi Mẹssia Nukọntọ lọ gbọn Jehovah lọsu dali. Be mẹdevo sọ tin hugan Mẹdatọ mítọn he sọgan de Nukọntọ de na mí ya? Awetọ, Jesu tindo jẹhẹnu he dọnmẹdogo he mí sọgan wleawuna lẹ. (Hia Isaia 11:2, 3.) E yin apajlẹ pipé de na mí. (1 Pita 2:21) Atọ̀ntọ, Jesu nọ vẹawu hodotọ etọn lẹ tlala, dile e dohia do to whenuena e ze ogbẹ̀ etọn jo do ota yetọn mẹ. (Hia Johanu 10:14, 15.) Podọ e nọ do ede hia taidi lẹngbọhọtọ he nọ vẹawumẹ de dile e to anadena mí biọ gbẹzan ayajẹ tọn de mẹ todin he na dekọtọn do sọgodo mavọmavọ gigonọ de mẹ. (Joh. 10:10, 11; Osọhia 7:16, 17) Na whẹwhinwhẹ́n ehe po devo lẹ po wutu, nudide dagbe wẹ mí basi to whenuena mí de nado hodo Jesu. Ṣigba, etẹwẹ Jesu hihodo bẹhẹn?
6. Etẹwẹ Jesu hihodo bẹhẹn?
6 Hodotọ Klisti tọn yinyin bẹ nususu hẹn hugan nado ylọ míde dọ Klistiani poun. Nudi gbẹtọ liva awe wẹ sọalọakọ́n nado yin Klistiani to egbehe, ṣigba nuyiwa yetọn lẹ do yé hia taidi “azọ́n ylankan watọ.” (Hia Matiu 7:21-23.) Eyin gbẹtọ lẹ do ojlo hia to oylọ-basinamẹ lọ nado hodo Jesu mẹ, mí nọ basi zẹẹmẹ na yé dọ Klistiani nugbo lẹ nọ hẹn gbẹzan yetọn blebu sọgbe hẹ apajlẹ po nuplọnmẹ etọn lẹ po bosọ nọ wàmọ egbesọegbesọ. Di dohia, mì gbọ mí ni gbadopọnna nuhe mí yọnẹn gando Jesu go delẹ.
Hodo Apajlẹ Nuyọnẹn Jesu Tọn
7, 8. (a) Etẹwẹ nuyọnẹn yin, podọ naegbọn Jesu do tindo nuyọnẹn taun? (b) Nawẹ Jesu do nuyọnẹn hia gbọn, podọ nawẹ mí sọgan hodo apajlẹ etọn gbọn?
7 Jesu do jẹhẹnu ayidego tọn susu hia, ṣigba mí na zinnudo ẹnẹ ji: nuyọnẹn etọn, whiwhẹ etọn, zohunhun etọn po owanyi etọn po. Jẹnukọn whẹ́, mì gbọ mí ni lẹnnupọndo nuyọnẹn etọn ji—yèdọ nugopipe etọn nado yí oyọnẹn po nukunnumọjẹnumẹ po zan to aliho dagbe mẹ. Apọsteli Paulu wlan dọmọ: “[Jesu,] mẹhe mẹ yè yí adọkunnu nuyọnẹn tọn po zinzin lẹpo po tọn whlá do.” (Kọl. 2:3) Fie wẹ Jesu hẹn nuyọnẹn mọnkọtọn sọn? Ewọ lọsu dọmọ: “Le Otọ́ ṣie plọn mi do, wẹ yẹn to onú helẹ dọ.” (Joh. 8:28) Jehovah dè wẹ nuyọnẹn etọn wá sọn, abajọ aliho he mẹ Jesu yí lẹnpọn dagbe zan te ma do paṣa mí.
8 Di apajlẹ, Jesu yin lẹnpọn dagbenọ to aliho he mẹ e zan gbẹzan etọn te to aigba ji. E de nado zan gbẹzan he bọawu gbọn ayidonugo zizedo onú dopo gee ji dali: enẹ wẹ ojlo Jiwheyẹwhe tọn wiwà. E gbọn nuyọnẹn dali yí whenu po huhlọn etọn po zan nado ze Ahọluduta lọ do otẹn tintan mẹ. Mí nọ hodo apajlẹ Jesu tọn eyin mí tẹnpọn nado ze ‘nukun do fidopo’ bo gbọnmọ dali dapana agbàn didona mídelẹ po numadinu he nọ yí huhlọn po ayidonugo mítọn lẹ po. (Mat. 6:22) Klistiani susu ko dovivẹnu nado hẹn gbẹzan yetọn bọawu na yé nido sọgan yí whenu susu zan to lizọnyizọn lọ mẹ. Mẹdelẹ ko penugo nado biọ sinsẹ̀nzọn gbehosọnalitọ tọn mẹ. Eyin hiẹ tin to omẹ enẹlẹ mẹ, be a jẹna pipà taun. ‘Ahọluduta Jiwheyẹwhe tọn dindin whẹ́’ nọ hẹn ayajẹ po pekọ daho po wá.—Mat. 6:33.
Yin Whiwhẹnọ Taidi Jesu
9, 10. Nawẹ Jesu do whiwhẹ etọn hia gbọn?
9 Jẹhẹnu Jesu tọn awetọ he mí na gbadopọnna wẹ whiwhẹ etọn. Eyin gbẹtọvi mapenọ lẹ mọ otẹn aṣẹpipa tọn de yí, yé nọ saba jẹ yede mẹ mọ ji. Lehe Jesu gbọnvo do sọ! Mahopọnna otẹn vonọtaun he e tindo to lẹndai Jiwheyẹwhe tọn lẹ hinhẹndi mẹ, Jesu ma yigo to aliho depope mẹ, etlẹ yin ṣinun-ṣinun de. Podọ mí yin tulina nado hodo apajlẹ etọn to mọwiwà mẹ. Apọsteli Paulu wlan dọmọ: “Mì gbọ ayiha he tin to Klisti Jesu mẹ ni tin to mì mẹ ga. Mẹhe, tintin to ohia Jiwheyẹwhe tọn mẹ, ma lẹn ẹn na ale nado sọzẹn hẹ Jiwheyẹwhe gba: ṣigba e klọ́n gigo etọn dai, e yí ojlẹmọ afanumẹ tọn de na ede, yè sọ basi i to apajlẹ gbẹtọ lẹ tọn mẹ.” (Flp. 2:5-7) Etẹwẹ enẹ bẹhẹn?
10 Jesu duvivi lẹblanulọkẹyi vonọtaun de tọn nado nọ̀ Otọ́ etọn olọn mẹ tọn dè, ṣigba e desọn ojlo mẹ bo “klọ́n gigo etọn dai.” Ogbẹ̀ etọn yin tẹndiọna do vidọ̀ awhli Ju de tọn mẹ, fie e na nọ̀ na osun ṣinẹnẹ whẹpo do yin jiji taidi viyẹyẹ pẹnyẹn-pẹnyẹn de to whédo whlẹpatọ wamọnọ de tọn mẹ. To owhé Josẹfu tọn gbè, Jesu jẹ zọnlinzin ji, lẹzun ovivu de, bosọ whẹ́n zun jọja aflanmẹ de. E ma tindo ylando depope. Ṣogan, to jọja whenu etọn blebu, e litaina mẹjitọ etọn he yin mapenọ lẹ. (Luku 2:51, 52) Whiwhẹ ayidego tọn nankọ die!
11. Aliho tẹlẹ mẹ wẹ mí sọgan hodo apajlẹ whiwhẹ Jesu tọn te?
11 Mí nọ hodo apajlẹ whiwhẹ Jesu tọn eyin mí desọn ojlo mẹ bo kẹalọyi azọ́ndenamẹ he sọgan taidi nuhe demẹpò lẹ. Di apajlẹ, pọ́n azọ́ndenamẹ mítọn nado lá wẹndagbe lọ. Azọ́n enẹ sọgan taidi nuhe demẹpò, titengbe eyin gbẹtọ lẹ ma do ojlo hia, ṣàn mí ko kavi ylanhùn do mí go. Ṣigba, eyin mí sinyẹnlin to azọ́n yẹwhehodidọ lọ tọn mẹ, mí nọ gọalọna mẹdevo lẹ nado kẹalọyi oylọ-basinamẹ Jesu tọn nado hodo e. Gbọnmọ dali, mí nọ gọalọ nado whlẹn gbẹtọ lẹ. (Hia 2 Timoti 4:1-5.) Apajlẹ devo sọ wẹ nukunpipedo Plitẹnhọ Ahọluduta tọn mítọn go. Enẹ sọgan biọ ogbó lẹ kinkọ̀n, ayiziza kavi afọdaitẹn lẹ kiklọ́—ehe lẹpo wẹ biọ whiwhẹ! Etomọṣo, mí yọnẹn dọ nukunpipedo Plitẹnhọ Ahọluduta tọn mítọn go—yèdọ nọtẹn sinsẹ̀n-bibasi wiwe ṣeke tọn he tin to lẹdo mítọn mẹ—yin apadewhe sinsẹ̀nzọn wiwe mítọn tọn. Eyin mí nọ desọn ojlo mẹ nado wà azọ́n he taidi nuhe demẹpò lẹ, enẹ na dohia dọ mí tindo whiwhẹ bo gbọnmọ dali to afọ̀domẹ Klisti tọn hodo.
Yin Zohunhunnọ Taidi Jesu
12, 13. (a) Nawẹ Jesu do zohunhun hia gbọn, podọ etẹwẹ whàn ẹn? (b) Etẹwẹ na whàn mí nado yin zohunhunnọ to lizọnyizọn lọ mẹ?
12 Lẹnnupọndo zohunhun he Jesu tindo to lizọnyizọn lọ mẹ ji. Nususu wẹ e wà to whenuena e tin aigba ji. To ovu whenu etọn, e na ko wazọ́n hẹ otọ́ mẹgopọntọ etọn Josẹfu taidi whlẹpatọ de. To lizọnyizọn Jesu tọn whenu, e wà azọ́njiawu susu, bo tlẹ hẹnazọ̀ngbọna awutunọ lẹ bosọ fọ́n oṣiọ lẹ. Ṣigba, azọ́n tangan etọn wẹ nado lá wẹndagbe lọ bo plọnnu mẹhe jlo na dotoaina ẹn lẹ. (Mat. 4:23) Taidi hodotọ etọn lẹ, mílọsu tindo azọ́n dopolọ nado wà. Nawẹ mí sọgan hodo apajlẹ etọn gbọn? Dopo to aliho he mẹ mí sọgan wàmọ te lẹ mẹ wẹ nado tindo mẹwhinwhàn Jesu tọn nkọ.
13 Hú popolẹpo, owanyi he Jesu tindo na Jiwheyẹwhe wẹ whàn ẹn nado dọyẹwheho bo plọnmẹ. Ṣigba, Jesu sọ yiwanna nugbo he e plọnmẹ lẹ. Nugbo enẹlẹ taidi adọkunnu họakuẹ de na ẹn, podọ e nọ to jejeji nado má ẹn hẹ mẹdevo lẹ. Mọdopolọ, taidi mẹplọntọ lẹ, mílọsu nọ tindo numọtolanmẹ mọnkọtọn. Lẹnnupọndo nugbo họakuẹ he mí plọn to Ohó Jiwheyẹwhe tọn mẹ lẹ ji! Mí yọ́n whẹho nupojipetọ-yinyin tọn lọ bosọ yọ́n lehe e na yin dididẹ gbọn. Mí mọnukunnujẹ nuhe Owe-wiwe plọnmẹ gando ninọmẹ oṣiọ lẹ tọn go mẹ ganji gọna dona he aihọn yọyọ Jiwheyẹwhe tọn na hẹnwa lẹ. Vlavo mí ṣẹṣẹ plọn nugbo enẹlẹ wẹ kavi e ko dẹn, nuhọakuẹ-yinyin yetọn ma nọ depò gbede. Mahopọnna ojlẹ he mẹ mí plọn nugbo mọnkọtọn lẹ te, adọkunnu họakuẹ de wẹ yé yin. (Hia Matiu 13:52.) Gbọn zohunhun ahundopo tọn yíyí do dọyẹwheho dali, mí nọ do owanyi he mí tindo na nuhe Jehovah ko plọn mí lẹ hia mẹdevo lẹ.
14. Nawẹ mí sọgan hodo aliho he mẹ Jesu plọnmẹ te gbọn?
14 Sọ doayi aliho he mẹ Jesu plọnmẹ te go. E nọ dọ̀n ayidonugo hosetọ etọn lẹ tọn wá Owe-wiwe ji whẹwhẹ. Eyin e jlo na zinnudo nuagokun titengbe de ji, e nọ saba yí hogbe ehelẹ zan dọmọ: “Yè ko wlanwe etọn dọ.” (Mat. 4:4; 21:13) To hodidọ etọn he yin kinkàndai lẹ mẹ, e yihodọ tlọlọ kavi dlẹnalọdo nuhe hugan madoawe Owe-wiwe Heblu tọn lẹ tọn. Taidi Jesu, mí nọ yí Biblu zan taun to lizọnyizọn mítọn mẹ bo nọ tẹnpọn nado hia Owe-wiwe to whedepopenu he e yọnbasi. Gbọnmọ dali, mí nọ gọalọna ahunjijlọnọ lẹ nado mọ na yede dọ nuhe Jiwheyẹwhe dọ lẹ plọnmẹ wẹ mí te, e ma yin linlẹn mítọn titi gba. Lehe homẹ mítọn nọ hùn to whenuena mẹde yigbe nado hia nuhe Biblu dọ bo dọho hẹ mí do nuhọakuẹ-yinyin Ohó Jiwheyẹwhe tọn po zẹẹmẹ etọn lẹ po ji do sọ! Podọ to whenuena omẹ mọnkọtọn lẹ kẹalọyi oylọ-basinamẹ lọ nado hodo Jesu, ayajẹ mítọn nọ gọfla.
Jesu Hihodo Nọ Biọ dọ Mí Ni Yiwanna Mẹdevo Lẹ
15. Etẹwẹ yin dopo to jẹhẹnu ayidego tọn Jesu tọn lẹ mẹ, podọ nawẹ nulinlẹnpọn do e ji sọgan yinuwado mí ji gbọn?
15 Jẹhẹnu Jesu tọn he ji mí na dọhodo gbọngodo wẹ miọnhomẹnamẹ hugan popolẹpo—yèdọ owanyi etọn na gbẹtọvi lẹ. Apọsteli Paulu wlan dọmọ: “Owanyi [Klisti] tọn to huhlọnna mí.” (2 Kọl. 5:14) Eyin mí nọ lẹnnupọndo owanyi he Jesu tindo na gbẹtọvi lẹpo, podọ na dopodopo mítọn ji, enẹ na yinuwado mí ji bọ mí na yin whinwhàn nado hodo apajlẹ etọn.
16, 17. Aliho tẹlẹ mẹ wẹ Jesu do owanyi etọn hia mẹdevo lẹ te?
16 Nawẹ Jesu do owanyi hia mẹdevo lẹ gbọn? Ojlo he e tindo nado ze ogbẹ̀ etọn jo do ota gbẹtọvi lẹ tọn mẹ wẹ do owanyi etọn he klo hugan hia. (Joh. 15:13) Ṣigba, to lizọnyizọn etọn whenu, Jesu sọ do owanyi hia to aliho devo lẹ mẹ. Di apajlẹ, e vẹawu mẹhe to yaji lẹ. To whenuena e mọ Malia po mẹhe tin to e dè lẹ po to avivi na Lazalọsi kú wutu, onú yetọn biọ lanmẹ na ẹn taun. Dile etlẹ yindọ Jesu na fọ́n Lazalọsi to madẹnmẹ, nujijọ lọ yinuwadeji sọmọ bọ e “viavi.”—Joh. 11:32-35.
17 To bẹjẹeji lizọnyizọn Jesu tọn, pòtọnọ de wá e dè bo dọmọ: “Eyin hiẹ jlo, hiẹ sọgan hẹn mi zun wiwe.” Nawẹ Jesu yinuwa gbọn? Kandai lọ dọ dọ “lẹblanu . . . whàn ẹn.” Enẹgodo e wà nuhe vẹawu nado yise de. “E dlẹnalọ etọn jẹgbonu bo do e go, bosọ dọ hlan ẹn, dọmọ, Yẹn jlo, hiẹ ni zun wiwe. Afọdoponẹji opò klọ́n yì sọn e go, e sọ zun wiwe.” To Osẹ́n Mose tọn glọ, pòtọnọ lẹ nọ yin mawenọ, podọ Jesu sọgan nọma doalọ dawe ehe go ṣogan bo gbọazọ̀nna ẹn. Ṣigba, to whenuena Jesu hẹnazọ̀ngbọna pòtọnọ lọ, e dike dawe lọ ni duvivi numọtolanmẹ alọdomẹgo tọn, vlavo whla tintan to owhe susu godo. Awuvẹmẹ sisosiso nankọ die!—Malku 1:40-42.
18. Nawẹ mí sọgan nọ vẹawu mẹdevo lẹ gbọn?
18 Taidi hodotọ Klisti tọn lẹ, eyin bibiọ to mí si nado nọ do owanyi hia. To 1 Pita 3:8 mẹ, mí yin tudohomẹna nado nọ “kọ̀n homẹ dai” kavi vẹawu mẹdevo lẹ. E sọgan nọma bọawu nado mọnukunnujẹ numọtolanmẹ yisenọ hatọ he to oyà azọ̀n jẹmagbọ kavi apọṣimẹ sinsinyẹn de tọn ji lẹ tọn mẹ—titengbe eyin mí ma ko tindo numimọ awufiẹsa mọnkọtọn tọn pọ́n. Ṣigba, Jesu vẹawu mẹhe to azọ̀njẹ lẹ dile etlẹ yindọ ewọ lọsu ma jẹazọ̀n pọ́n. Nawẹ mí sọgan do awuvẹmẹ mọnkọtọn hia gbọn? Mí sọgan wàmọ eyin mí yí sọwhiwhe do dotoaina mẹhe to yaji lẹ to whenuena yé hùn ahun yetọn bo to numọtolanmẹ yetọn lẹ dọna mí. Mí sọgan kanse míde dọ, ‘Eyin yẹn wẹ tin to ninọmẹ yetọn mẹ, etẹwẹ na yin numọtolanmẹ ṣie?’ Eyin mí nọ dovivẹnu nado mọnukunnujẹ numọtolanmẹ mẹdevo lẹ tọn mẹ, mí na penugo ganji nado “miọnhomẹna ayi mawhiwhẹnọ lẹ.” (1 Tẹs. 5:14) Gbọnmọ dali, mí na to afọdòmẹ Jesu tọn hodo.
19. Aliho tẹlẹ mẹ wẹ apajlẹ Jesu tọn nọ yinuwado mí ji te?
19 Lehe ohó po nuyiwa Jesu Klisti tọn lẹ po gọ́ na nuplọnmẹ họakuẹ lẹ do sọ! Lehe mí plọnnu gando ewọ go sọ, mọ wẹ mí na jlo nado hodo apajlẹ etọn dogọ do—podọ mọ wẹ mí nasọ jlo nado gọalọna mẹdevo lẹ nado wà nudopolọ do niyẹn. Eyin whẹho lọ yinmọ, mì gbọ mí ni wà nuhe go mí pé lẹpo nado mọ ayajẹ to Ahọlu Mẹssia lọ hihodo mẹ—todin podọ kakadoidoi!
Be Hiẹ Sọgan Na Gblọndo Ya?
• Taidi Jesu, nawẹ mí sọgan do míde hia di nuyọnẹntọ gbọn?
• Aliho tẹlẹ mẹ wẹ mí sọgan do whiwhẹ hia te?
• Nawẹ mí sọgan yin zohunhunnọ to lizọnyizọn lọ mẹ gbọn?
• Na nuhe dù owanyi didohia mẹdevo lẹ, aliho tẹlẹ mẹ wẹ mí sọgan hodo apajlẹ Jesu tọn te?
[Kanbiọ Oplọn tọn lẹ]
[Apotin/Yẹdide to weda 5]
OWE DE HE NỌ GỌALỌNA MÍ NADO HODO APAJLẸ KLISTI TỌN
To plidopọ agbegbe 2007 tọn whenu, owe weda 192 tọn de he hosọ etọn yin “Viens, suis-moi” yin didetọn. Owe ehe yin awuwlena nado gọalọna Klistiani lẹ na yé nido sọgan ze ayidonugo do Jesu ji, titengbe jẹhẹnu po nuyiwa etọn lẹ po. To weta awe homẹbibiọ tọn lẹ godo, adà tintan owe lọ tọn basi bladopọ kleun de do jẹhẹnu ayidego tọn Jesu tọn lẹ ji—yèdọ whiwhẹ etọn, adọgbigbo etọn, nuyọnẹn etọn, tonusise etọn po akọndonanu etọn po.
To enẹgodo, e dọhodo azọ́n Jesu tọn lẹ ji taidi mẹplọntọ po yẹwhehodọtọ wẹndagbe lọ tọn po, gọna aliho delẹ he mẹ e do owanyi daho etọn hia te. Nudọnamẹ he na gọalọna Klistiani lẹ nado hodo apajlẹ Jesu tọn yin awuwlena to owe lọ blebu mẹ.
Mí deji dọ owe ehe na whàn mímẹpo nado gbeje míde pọ́n bo kanse míde dọmọ: ‘Be yẹn to Jesu hodo nugbonugbo ya? Nawẹ yẹn sọgan hodo e pẹkipẹki dogọ gbọn?’ Owe lọ nasọ gọalọna ‘mẹhe tindo ahunjijlọ he jẹna ogbẹ̀ madopodo lẹpo’ nado lẹzun hodotọ Klisti tọn.—Owalọ 13:48.
[Yẹdide to weda 4]
Jesu yigbe nado wá aigba ji bo yin jiji taidi viyẹyẹ de. Jẹhẹnu tẹwẹ enẹ biọ to e si?
[Yẹdide to weda 6]
Etẹwẹ na whàn mí nado yin zohunhunnọ to lizọnyizọn lọ mẹ?