Ṣiọdidi Klistiani Tọn Dona Tindo Yẹyi, Tin to Jlẹkaji Bosọ Hẹn Homẹ Jiwheyẹwhe Tọn Hùn

GBẸTỌ lẹ to avigbè do to filẹpo. Mẹhe to awubla mẹ lẹ do aluẹmẹ-vọ̀ yuu bo to yede lì-kọ́ mapote. Wedutọ lẹ to wefọ̀ de sọgbe hẹ húnhiho he to núdọ. Ṣogan, mẹdevo lẹ to núdù bosọ to aglinjẹ. Vude to yé mẹ mlọ́n kọmẹ, na yé ko nù atàn po bia he to aimẹ vọnu po mú wutu. Hùnwhẹ tẹ whenu wẹ onú ehelẹ to jijọ te? To adà aihọn lọ tọn delẹ mẹ, onú ehelẹ nọ dohiagona ṣiọhumẹ, fie gbẹtọ susu nọ plido nado dọ e zun whedenu na mẹhe kú lọ.

Kunnudetọ Jehovah tọn susu nọ nọ̀ lẹdo he mẹ hẹnnumẹ po kọmẹnu lẹ po nọ tẹdo otangblo lẹ go bosọ nọ dibuna mẹhe kú lẹ taun te. Livi susu gbẹtọ lẹ tọn wẹ yise dọ eyin mẹde kú, e nọ lẹzun gbigbọ de he sọgan gọalọ kavi gbleawuna mẹhe to ogbẹ̀ lẹ. Nuyise ehe tindo kanṣiṣa pẹkipẹki hẹ aṣa ṣiọdidi tọn susu. Na nugbo tọn, jọwamọnu wẹ e yin nado viavi eyin mẹde kú. To nujijọ delẹ whenu, Jesu po devi etọn lẹ po blawu na yé hẹn mẹyiwanna yetọn lẹ bu to okú mẹ wutu. (Joh. 11:33-35, 38; Owalọ 8:2; 9:39) Ṣigba, yé ma blawu zẹjlẹgo dile e gbayipe to ojlẹ yetọn mẹ do. (Luku 23:27, 28; 1 Tẹs. 4:13) Etẹwutu? Whẹwhinwhẹ́n dopo wẹ yindọ yé yọ́n nugbo lọ gando oṣiọ lẹ go.

Biblu dọ hezeheze dọmọ: “Mẹhe to ogbẹ̀ yọnẹn dọ emi na kú; ṣigba oṣiọ lẹ ma yọ́n nude . . . Owanyi yetọn ga, po wangbẹnamẹ yetọn po, po homẹkẹn yetọn po, e sudo to dinvie . . . Azọ́n ma tin, linlẹn ma tin, zinzan ma tin, kavi nuyọnẹn to kutomẹ [yọdò paa gbẹtọvi lẹ tọn] fie hiẹ jei.” (Yẹwh. 9:5, 6, 10) Wefọ Biblu tọn he yin gbigbọdo ehelẹ dohia hezeheze dọ eyin mẹde kú, e masọ nọ yọ́n nude ba. E ma sọgan lẹnnupọn, tindo numọtolanmẹ, dọho hẹ mẹde kavi mọnukunnujẹ nudepope mẹ ba. Nawẹ nukunnumimọjẹ nugbo titengbe Biblu tọn ehe mẹ dona yinuwado ṣiọdidi Klistiani lẹ tọn ji gbọn?

“Mì Gàn do Onú Mawé go Blo”

Mahopọnna akọ̀ kavi aṣa lẹdo he mẹ Kunnudetọ Jehovah tọn lẹ wá sọn tọn, yé nọ dapana aṣa depope he tindo kanṣiṣa hẹ nuyise lọ dọ oṣiọ lẹ gbẹ́ yọ́n nuhe to jijọ bo sọgan yinuwado mẹhe to ogbẹ̀ lẹ ji. Zándidlọ, agọ́ pligidi to ṣiọdidi godo, agọ́ hoho, oyẹsu fifọna oṣiọ gọna asuhọ̀-ninọ po aṣa he lẹdo e lẹ po yin delẹ to aṣa mawé he Jiwheyẹwhe gbẹwanna lẹ mẹ na yé tindo kanṣiṣa hẹ nuplọnmẹ aovi lẹ tọn he ma sinai do Biblu ji lọ dọ alindọn kavi gbigbọ ma nọ kú. (Ezek. 18:4) Klistiani nugbo lẹ “ma sọgan yin mimátọ tafo [Jehovah] tọn, po tafo aovi lẹ tọn po gba,” enẹwutu yé ma nọ doalọ to aṣa ehelẹ mẹ. (1 Kọl. 10:21) Yé nọ setonuna gbedide lọ dọ: “Mì . . . nọla, mì gàn do onú mawé go blo.” (2 Kọl. 6:17) Ṣigba, e ma nọ bọawu nado setonuna gbedide ehe to whelẹponu.

To Aflika podọ to fidevo lẹ, mẹsusu yise dọ tọgbo he ko kú lẹ na gblehomẹ eyin yè ma de oyẹsu delẹ. Awugbopo nado hodo aṣa ehelẹ nọ yin pinpọnhlan taidi nuhe sọgan hẹn nugbajẹmẹji wá lẹdo lọ blebu ji. Na susu omẹ Jehovah tọn lẹ tọn nọ gbẹ́ nado doalọ to nuwiwa ṣiọdidi tọn he ma sọgbe hẹ Owe-wiwe lẹ mẹ wutu, mẹhe nọ nọ̀ lẹdo dopolọ mẹ hẹ yé lẹ gọna hẹnnumẹ yetọn lẹ nọ mọhodọdo yé go, zun yé bo nọ yinuwa hẹ yé taidi mẹhe  gble do whé. Yé ko sawhẹdokọna mẹdelẹ taidi atẹṣitọ podọ mẹhe ma nọ na sisi mẹkuku lẹ. To whedelẹnu, mayisenọ lẹ nọ hò ṣiọdidi Klistiani lẹ tọn yí. Enẹwutu, nawẹ mí sọgan dapana nudindọn hẹ mẹhe nọ tẹdo aṣa ṣiọdidi tọn he Jiwheyẹwhe gbẹwanna lẹ go gbọn? Hú popolẹpo, etẹwẹ mí sọgan wà nado nọla na aṣa mawé po nuyiwa he sọgan hẹn haṣinṣan mítọn hẹ Jehovah gble lẹ po?

Do Teninọ Towe Hia Hezeheze

To awà delẹ ji, hẹnnu mẹho lẹ po mẹhe ma yin hagbẹ whẹndo lọ tọn tlọlọ lẹ po wẹ nọ magbe lehe mẹhe kú lọ na yin didi do tọn. Klistiani nugbo de dona hẹn ẹn họnwun na hẹnnumẹ etọn lẹ dọ Kunnudetọ Jehovah tọn lẹ wẹ na penukundo ṣiọdidi emitọn go sọgbe hẹ nunọwhinnusẹ́n Biblu tọn lẹ. (2 Kọl. 6:14-16) Nudepope he na jọ to ṣiọdidi Klistiani de tọn tẹnmẹ ma dona dotukla ayihadawhẹnamẹnu yisenọ hatọ lẹ tọn kavi hẹn mẹhe yọ́n nuyise po nuplọnmẹ mítọn lẹ gando oṣiọ lẹ go po dahli.

To whenuena e yin bibiọ to afọzedaitọ agun Klistiani tọn de si nado deanana ṣiọdidi de, mẹho agun tọn lẹ sọgan na ayinamẹ he jẹ mẹhe to aluẹmẹ lọ lẹ bo nọgodona yé, na tito lọ lẹpo nido tin to kọndopọ mẹ hẹ anademẹ Owe-wiwe tọn lẹ. Eyin mẹhe ma yin Kunnudetọ delẹ jlo na hẹn aṣa mawé lẹ biọ nuwiwa lọ mẹ, e jẹ dọ mí ni gbẹ́ po nujikudo po bo basi zẹẹmẹ teninọ Klistiani tọn mítọn tọn po adọgbigbo po to aliho he jọmẹ bosọ do sisi hia mẹ. (1 Pita 3:15) Ṣigba etẹwẹ lo eyin hẹnnumẹ mayisenọ lẹ gbẹ́ tẹkudeji nado hẹn aṣa mawé lẹ biọ nuwiwa lọ mẹ? To whenẹnu, hagbẹ whẹndo lọ tọn he yin Klistiani lẹ sọgan basi dide nado deta sọn nuwiwa ṣiọdidi tọn lọ mẹ. (1 Kọl. 10:20) Eyin ehe jọ, hodidọ ṣiọdidi tọn kleun de sọgan yin didọ to Plitẹnhọ Ahọluduta tọn he tin to lẹdo lọ mẹ de mẹ kavi to nọtẹn he jẹ devo de na mẹhe okú mẹyiwanna lọ tọn hẹn awubla wá na nugbonugbo lẹ nido mọ ‘homẹmimiọn Owe-wiwe tọn’ yí. (Lom. 15:4) Dile etlẹ yindọ oṣiọ lọ ma tin to finẹ, hodidọ mọnkọtọn yin alọkẹyi mlẹnmlẹn bo nasọ tindo yẹyi. (Deut. 34:5, 6, 8) To whenuena mayisenọ lẹ dádo nuwiwa lọ mẹ to aliho agọ̀ mẹ, enẹ sọgan yidogọna ayimajai po awubla mẹhe to aluẹmẹ lẹ tọn po, etomọṣo mí sọgan yin homẹmiọnna na mí yọnẹn dọ Jiwheyẹwhe he nọ na ‘huhlọn he hugan jọwamọ tọn’ ma na nọma doayi gbemima mítọn nado wà nuhe sọgbe go.—2 Kọl. 4:7.

Basi Kandai

Eyin mẹde basi kandai anademẹ he na yin hihodo to tito ṣiọdidi tọn etọn whenu lẹ tọn, hodidọ hẹ hẹnnumẹ he ma yin Kunnudetọ lẹ nọ bọawu na e yọnbasi dọ yé ni na sisi ojlo mẹkuku lọ tọn. Delẹ to onú titengbe he dona yin kinkàndai lẹ mẹ wẹ lehe ṣiọdidi lọ na yin anadena do, whenue mẹlọ na yin didi, po mẹhe tindo jlọjẹ nado basi tito bo deanana  ṣiọdidi lọ lẹ po. (Gẹn. 50:5) Dehe tlẹ sọ yọ́n hugan wẹ kandai he mẹlọ po mẹdevo lẹ po doalọ e mẹ. Mẹhe nọ yí wuntuntun po nuyọnẹn he sinai do Biblu ji po do basi titona sọgodo lẹ yọnẹn dọ yé ma dona nọte kakajẹ whenue yé ko poyọnho kúṣọkúṣọ kavi to kúdonu whẹpo do lẹnnupọndo afọdide titengbe ehe ji gba.—Howh. 22:3; Yẹwh. 9:12.

Mẹdelẹ nọ dibu nado basi kandai mọnkọtọn. Ṣigba, mọwiwà nọ dohia dọ Klistiani de whèwhín bosọ to mẹdevo lẹ tọn hòpọn. (Flp. 2:4) E na yọ́n hugan dọ mí ni didẹ whẹho ehelẹ na míde to gbẹwhenu mítọn kakati nado jo tito ehelẹ do kọ̀ji na hagbẹ whẹndo tọn he tin to aluẹmẹ lẹ he sọgan yin kọgbidina nado doalọ to aṣa mawé he mẹ mí ma tindo yise te kavi kẹalọyi lẹ mẹ.

Hẹn Tito Ṣiọdidi lọ Tọn Do Jlẹkaji

To otò Aflika tọn susu mẹ, mẹsusu wẹ yise dọ tọgbo he ko kú lẹ na gblehomẹ eyin yè ma wá agọ́ pligidi to ṣiọdidi de godo. Mẹdevo lẹ nọ yí dotẹnmẹ hundote ṣiọdidi tọn lẹ zan nado ‘jla’ yindidi po adọkun yetọn po. (1 Joh. 2:16) Vivẹnu susu nọ yin dido podọ whenu po nutindo susu po nọ yin zinzan nado basi tito ṣiọdidi he gbẹtọ lẹ nọ pọnhlan taidi ṣiọdidi “dagbe” de tọn. Nado dọ̀n gbẹtọ lẹ wá hùnwhẹ ṣiọdidi tọn yetọn, mẹsusu nọ tlẹ́ yẹdide mẹhe kú lọ tọn do nọtẹn voovo lẹ bo nọ gbọnmọ dali to ṣiọdidi lọ jlá. Yé nọ basi yẹdide mẹhe kú lọ tọn do awù lẹ go bo nọ má yé na mẹhe tin to aluẹmẹ lẹ. Yé nọ họ̀ ṣiọpotin akuẹgegenu tọn he pẹnzin lẹ nado hẹn awuji nupọntọ lẹ. To otò Aflika tọn de mẹ, mẹdelẹ tlẹ nọ basi ṣiọpotin he taidi mọto, agahun, tọjihun po mọmọ po nado jlá adọkun po yindidi po. Oṣiọ lọ sọgan yin zize sọn apotin mẹ bo yin titẹdo akanma vonọtaun he yin aṣọ́dona taun de ji. Eyin yọnnu wẹ mẹhe kú lọ, yé sọgan do tewu wewe alọwle tọn na ẹn bo yí aṣọ́donu akuẹgegenu tọn lẹ po ojẹ́ lẹ po do doaṣọ́na ẹn. Be e sọgbe nugbonugbo dọ omẹ Jiwheyẹwhe tọn lẹ ni doalọ to aṣa mọnkọtọn lẹ mẹ ya?

Klistiani he whèwhín lẹ yọnẹn dọ nuyọnẹnnu wẹ e yin nado dapana wazẹjlẹgo he mẹhe ma yọ́n kavi ma tlẹ nọ ylọ nunọwhinnusẹ́n Jiwheyẹwhe tọn lẹ dọ nude nọ dohia. Mí yọnẹn dọ aṣa po nuwiwa he ma tin to jlẹkaji bo masọ sọgbe hẹ Owe-wiwe enẹlẹ po ‘ma wá sọn Jiwheyẹwhe dè gba, ṣigba sọn  aihọn he to jujujei lọ dè.’ (1 Joh. 2:15-17) Mí dona họ́ míde taun ma nado joawuna gbigbọ agbàwhinwhlẹn aihọn tọn he nọ biọ dọ yè ni tẹnpọn nado zẹ̀ mẹdevo lẹ go. (Gal. 5:26) Numimọ lẹ dohia dọ eyin obu na oṣiọ lẹ doadọ̀do to lẹdo de mẹ, nuwiwa ṣiọdidi tọn lẹ nọ saba gbloada taun bo nọ vẹawu nado deanana bosọ nọ zọ́n bọ nuwiwa lọ lẹ nọ yawu zẹ̀pá. Sisi nina oṣiọ lẹ sọgan yinuwado mayisenọ lẹ ji sọmọ bọ yé na jẹ walọ mawé lẹ zan ji. To ṣiọdidi mọnkọtọn lẹ tẹnmẹ, gbẹtọ lẹ sọgan nọ to avivi mapote po awubla po, nọ gbò oṣiọ lọ fán bo nọ dọhona ẹn taidi dọ e gbẹ́ pò to ogbẹ̀ wẹ nkọ bosọ nọ bẹ akuẹ po nudevo lẹ po do ṣiọpotin lọ mẹ. Eyin onú ehelẹ jọ to ṣiọdidi Klistiani de tọn tẹnmẹ, ehe na hẹn vlẹko daho wá Jehovah po omẹ etọn lẹ po ji.—1 Pita 1:14-16.

Matin ayihaawe, nugbo lọ yinyọnẹn gando oṣiọ lẹ go na na mí adọgbigbo bọ mí ma na hẹn walọ mawé aihọn tọn depope biọ tito ṣiọdidi tọn mítọn lẹ mẹ. (Efe. 4:17-19) Dile etlẹ yindọ Jesu wẹ yin mẹhe klo bosọ diyin hugan, ṣiọdidi etọn nọ jlẹkaji bo ma dọ̀n ayidonugo zẹjlẹgo. (Joh. 19:40-42) Ṣiọdidi mọnkọtọn ma yin winyannu na mẹhe tindo “ayiha Klisti tọn” lẹ. (1 Kọl. 2:16) Na nugbo tọn, ṣiọdidi Klistiani tọn hinhẹn do jlẹkaji yin aliho dagbe hugan lọ nado dapana onú mawé he ma sọgbe hẹ Owe-wiwe lẹ, podọ nado hẹn ninọmẹ lọ do yẹyi ji bo sọgbe na mẹhe yiwanna Jiwheyẹwhe lẹ.

Be Mí Dona Wà Agọ́ to Ṣiọdidi Godo Wẹ Ya?

To ṣiọdidi godo, e sọgan yin aṣa hẹnnumẹ, kọmẹnu po mẹdevo lẹ po tọn nado wà agọ́ bo dúwe dile húnhiho lẹ to núdọ po awhá po. Ahànnumu po fẹnnuwiwa po nọ saba zọnpọ hẹ agọ́ ehelẹ. Mẹdelẹ nọ dọ dọ aglinjijẹ mọnkọtọn nọ de awubla lọ pò. Mẹdevo lẹ nọ mọdọ aṣa yetọn wẹ e yin poun. Ṣigba, mẹsusu yise dọ agọ́ ehelẹ wiwà yin dandannu de nado gbògbéna mẹkuku lọ podọ nado gọalọna alindọn etọn nado tọ́nyi bo kọnawudopọ hẹ tọgbo etọn lẹ.

Klistiani nugbo lẹ nọ mọdọ nuyọnẹnnu wẹ e yin nado hodo tudohomẹnamẹ Owe-wiwe tọn he dọmọ: “Awubla pọnte hú nukiko; na gbọn nukunmẹ yinylọ́n mẹ yè hẹn ayiha jẹgangan.” (Yẹwh. 7:3) Humọ, yé yọnẹn dọ nulinlẹnpọndo todido fọnsọnku tọn po nugbo lọ dọ ogbẹ̀ whègli po ji nọ hẹn ale wá. Na nugbo tọn, na mẹhe tindo haṣinṣan pẹkipẹki hẹ Jehovah lẹ, ‘okúzán pọnte hú gbeegbe yè ji yé.’ (Yẹwh. 7:1) Enẹwutu, Klistiani nugbo lẹ ma nọ basi tito ṣiọdidi agọ́ pligidi tọn kavi yì hùnwhẹ mọnkọtọn lẹ tẹnmẹ na yé yọnẹn dọ yé tindo kanṣiṣa hẹ nuyise afinyọnnuwiwa tọn lẹ po fẹnnuwiwa po. Awukinkọndopọ hẹ agọ́dutọ lẹ na dohia dọ mí ma tindo sisi na Jiwheyẹwhe bo ma nọ hò ayihadawhẹnamẹnu yisenọ hatọ mítọn lẹ tọn pọ́n.

Gbọ Mẹdevo lẹ Ni Mọdọ Mí Gbọnvo

Lehe mí dopẹ́ do sọ dọ mí yọ́n ninọmẹ oṣiọ lẹ tọn bo ma nọ dibu dile mẹhe tin to zinvlu gbigbọmẹ tọn mẹ lẹ nọ wà do! (Joh. 8:32) Taidi “ovi hinhọ́n tọn lẹ,” mí nọ do awubla mítọn hia do jlẹkaji to aliho de mẹ he dohia dọ mí tindo nukunnumọjẹnumẹ gbigbọmẹ tọn, na todido dejidego fọnsọnku tọn nọ miọnhomẹna mí. (Efe. 5:8; Joh. 5:28, 29) Todido mọnkọtọn na gọalọna mí ma nado blawu zẹjlẹgo dile mẹhe “ma tindo todido” lẹ nọ saba wà do. (1 Tẹs. 4:13) E na na mí adọgbigbo nado nọgodona sinsẹ̀n-bibasi wiwe-ṣeke, bo ma joawuna obu gbẹtọ tọn.—1 Pita 3:13, 14.

Titẹdo nunọwhinnusẹ́n Biblu tọn lẹ go po nugbonọ-yinyin po na hẹn ẹn yọnbasi na gbẹtọ lẹ nado mọ ‘vogbingbọn he tin to mẹhe to Jiwheyẹwhe sẹ̀n po mẹhe ma to sinsẹ̀n ẹn lẹ po ṣẹnṣẹn.’ (Mal. 3:18) Gbèdopo, okú ma na tin ba. (Osọhia 21:4) Dile mí to tenọpọn hẹndi opagbe jiawu ehe tọn, na Jehovah ni mọ mí taidi mẹhe ma do dihó bo ma do apà bosọ to olá mlẹnmlẹn na aihọn po aṣa etọn he ma nọ doyẹyigona Jiwheyẹwhe lẹ po.—2 Pita 3:14.

[Yẹdide to weda 30]

Nuyọnẹnnu wẹ e yin nado basi kandai lehe mí jlo dọ tito ṣiọdidi tọn mítọn ni yin anadena do tọn

[Yẹdide to weda 31]

Ṣiọdidi Klistiani lẹ tọn dona tin to jlẹkaji bo tindo yẹyi