Be E Jẹ dọ Hiẹ Ni Nọ Tẹdo Nujlomẹ Towe Titi lẹ Go Ya?

YỌPỌVU awe to aihunda dopọ. Dopo gbì aihundanu he e yiwanna hugan sọn alọmẹ na omẹ diẹ bo dawhá dọ: “Ṣie wẹ!” Sọn ovu whenu gbọ́n wẹ gbẹtọvi mapenọ lẹ nọ do gbigbọ ṣejannabi tọn hia jẹ obá de mẹ. (Gẹn. 8:21; Lom. 3:23) Humọ, aihọn lọ blebu nọ na tuli gbigbọ ṣejannabi tọn. Nado dapana gbigbọ ehe, mí dona hoavùn sinsinyẹn sọta ayilinlẹn ṣejannabi tọn mítọn lẹ. Eyin mí ma wàmọ, mí sọgan hẹn mẹdevo lẹ dahli po awubibọ po bo hẹn haṣinṣan mítọn hẹ Jehovah gble.—Lom. 7:21-23.

To whenuena apọsteli Paulu to tudohomẹna mí nado lẹnnupọndo lehe nuyiwa mítọn lẹ nọ yinuwa do mẹdevo lẹ ji do, e dọmọ: “Onú lẹpo wẹ jẹ na mi, ṣigba onú lẹpo ma yin ale tọn gba: onú lẹpo wẹ jẹ na mi, ṣigba onú lẹpo ma hẹn omẹ dote.” Paulu sọ yidogọ dọmọ: “Mì doafọku mẹde [kavi hẹn mẹde dahli] blo.” (1 Kọl. 10:23, 32) Enẹwutu, to whẹho he gando nujlomẹ mẹdetiti tọn lẹ go mẹ, nuyọnẹnnu wẹ nado kanse míde dọ: ‘Eyin jijọho agun lọ tọn tin to owù mẹ, be n’nọ jo nuhe n’tindo jlọjẹ na delẹ do sọn ojlo mẹ wá ya? Be n’ko wleawufo nado hodo nunọwhinnusẹ́n Biblu tọn lẹ, eyin mọwiwà tlẹ vẹawu ya?’

To Whenue Mí to Nudide Basi Gando Agbasazọ́n Go

Mẹsusu nọ pọ́n nudide agbasazọ́n tọn hlan taidi nudide mẹdetiti tọn he ma dù mẹdevo lẹ sọmọ kavi ma tlẹ dù yé paali. Lẹnnupọndo apajlẹ dawe nusàtọ de tọn ji to tòpẹvi de mẹ to Amérique du Sud. Ewọ yin yinyọnẹn taidi akọhotọ podọ ahànnumunọ de. Ṣigba, na e to Biblu plọn hẹ Kunnudetọ Jehovah tọn lẹ wutu, e  yinukọn to gbigbọ-liho bo basi diọdo lẹ to gbẹzan etọn mẹ. (2 Kọl. 7:1) Whenuena e dọ dọ e jlo emi nado jẹ kunnude hẹ agun lọ ji, mẹho de yí zinzin do na tuli i nado lẹnnupọndo azọ́n he e nọ wà ji. Na ojlẹ de to tòpẹvi lọ mẹ, dawe lọ wẹ yin tọ́ntlọ́ngbọ́n to mẹhe nọ sà ahàn akú he yè yí leke do dà lẹ mẹ—yèdọ ahàn he nọ yin yiyizan to aliho voovo mẹ, ṣigba aṣa mẹhe nọ nọ̀ lẹdo lọ mẹ lẹ tọn wẹ nado nọ ṣaka ẹ po ahàn vivi lẹ po, podọ lẹndai tangan he wutu yé do nọ wàmọ wẹ nado nù in mú.

Dawe lọ mọnukunnujẹemẹ dọ eyin emi nọ dekunnu sọn whédegbè jẹ whédegbè ṣogan bo gbẹ́ to ahàn mọnkọtọn sà, enẹ na kọnmasin do agun lọ go bo nasọ hẹn haṣinṣan emitọn hẹ Jiwheyẹwhe gble. Dile etlẹ yindọ ewọ dona penukundo whẹndo daho de go, e doalọtena ahàn ehe sisà. Todin, e nọ sà onú flinflin lẹ nado sọgan penukundo whẹndo etọn go. Dawe ehe, asi etọn po awe to ovi yetọn atọ́n lẹ mẹ po ko yí baptẹm todin. Yé nọ yí zohunhun do lá wẹndagbe ahọluduta lọ tọn po awuvivo po.

To Whenue Mí to Nudide Basi Gando Mẹhe Mí Na Dogbẹ́ hẹ lẹ Go

Be gbẹdido hẹ mayisenọ lẹ yin nudide mẹdetiti tọn de poun wẹ, kavi nunọwhinnusẹ́n Biblu tọn lẹ gandego? Mẹmẹyọnnu de jlo na yì hùnwhẹ de tẹnmẹ po sunnu jọja mayisenọ de po. Dile etlẹ yindọ yè dọ owù he e bẹhẹn lẹ na ẹn, e mọdọ jlọjẹ emitọn wẹ nado wà nuhe emi jlo bo hodo sunnu lọ yì nugbo. E ma dẹn to whenuena yé jẹ dọ́n bọ yè do amlọn-masin ahàn mẹ na ẹn nù. E wá fọ́n to ganhiho susu godo bo mọdọ dẹpẹ he ylọ ede dọ họntọn etọn lọ ko zanhẹ ẹ.—Yijlẹdo Gẹnẹsisi 34:2 go.

Nugbo wẹ dọ gbẹdido hẹ mayisenọ lẹ sọgan nọma hẹn nugbajẹmẹji enẹ nkọ wá to whepoponu. Etomọṣo Biblu na avase dọmọ: “Ewọ he to zọnlinzin hẹ nuyọnẹntọ na yọnnuin: ṣigba ogbẹ́ nulunọ lẹ tọn na sudo.” (Howh. 13:20) Nado dọ hójọhó, ogbẹ́ ylankan dido nọ hẹn nugbajẹmẹji wá! “Omẹ zinzin ko mọ oylan donukọn, bo yí ede whlá,” wẹ Howhinwhẹn lẹ 22:3 dọ, “ṣigba wunvinọ lẹ juwayi, yè sọ sayahẹ yé.” Mẹhe mí nọ dogbẹ́ hẹ lẹ sọgan yinuwado mí ji podọ do haṣinṣan mítọn hẹ Jiwheyẹwhe ji.—1 Kọl. 15:33; Jak. 4:4.

To Whenue Mí to Nudide Basi Gando Aṣọ́dido po Nusisọ́ po Go

Aṣọ́ nọ to didiọ to whepoponu. Ṣigba, nunọwhinnusẹ́n Biblu tọn lẹ do aṣọ́dido po nusisọ́ po ji ma nọ diọ gbede. Paulu dotuhomẹna yọnnu Klistiani lẹ nado “nọ yí avọ̀ jlẹmẹjlẹmẹ do doaṣọ́na yede, po winyan [kavi jlẹkajininọ] po po whiwhẹ po”—yèdọ nunọwhinnusẹ́n he sunnu lẹ lọsu dona hodo. (1 Tim. 2:9) Paulu ma to osẹ́n hẹngogo tọn do gando nusisọ́ go gba, mọjanwẹ e ma to didọ dọ nudopolọ wẹ  Klistiani lẹpo dona yiwanna dandan do niyẹn. E na ayinamẹ gando aṣọ́dido he to jlẹkaji, he ma na hẹn mẹde nado to kikla go.

Mí dona kanse míde dọ: ‘Eyin n’nọ tẹkudeji dọ jlọjẹ ṣie wẹ nado sọnú to aliho he nọ dọ̀n ayidonugo he ma jẹ wá dee ji mẹ, be n’sọgan sọalọakọ́n dọ nusisọ́ ṣie to jlẹkaji ya? Be aliho he mẹ n’nọ sọnú te nọ hẹn gbẹtọ lẹ tindo ayihaawe gando mẹhe nkọ n’yin po nujinọtedo walọ dagbe tọn he n’nọ hodo lẹ po go ya?’ Mí “ma [na] hẹn mẹde dahli” to whẹho ehe mẹ eyin mí ma nọ ‘pọ́n nuhe yin mítọn kẹdẹ go, ṣigba nọ pọ́n nuhe yin mẹdevo lẹ tọn go ga.’—2 Kọl. 6:3; Flp. 2:4.

To Whenue Mí to Nudide Basi Gando Whẹho Ajọwiwa Tọn lẹ Go

To whenuena nuhahun sinsinyẹn lẹ fọndote gando nuyiwa he ma sọgbe kavi mẹhodu tọn lẹ go to agun Kọlinti tọn mẹ, Paulu wlan dọmọ: “Etẹwutu mì ma nọ kuku gbọ yí guwhẹ̀? Etẹwutu mì ma nọ kuku gbọ yin mẹbibadu?” Paulu na ayinamẹ Klistiani lẹ nado gbọ bo jo whẹho he fọ́n lọ do kakati nado plan mẹmẹsunnu yetọn yì owhẹ̀ nukọn. (1 Kọl. 6:1-7) Mẹmẹsunnu de hodo ayinamẹ ehe to États-Unis. Nukunnumamọjẹnumẹ de fọ́n to ewọ po mẹmẹsunnu he yí i do azọ́nmẹ po ṣẹnṣẹn gando azọ́nkuẹ he yin dùdù do e go. Mẹmẹsunnu awe lọ lẹ hodo anademẹ Owe-wiwe tọn bo dọhodopọ whlasusu do whẹho lọ ji, ṣigba yé ma wá gbèta de kọ̀n. To godo mẹ, yé ze whẹho lọ yì “agun” nukọn he mẹho Klistiani lẹ nọtena.—Mat. 18:15-17.

E blawu dọ whẹho lọ ma yin didọgbò janwẹ. To dẹ̀hiho whlasusu godo, mẹmẹsunnu he yè yí do azọ́nmẹ lọ basi dide nado jo suhugan akuẹ he e dọ dọ mẹmẹsunnu diẹ dù do emi do. Etẹwutu? E dọ to godo mẹ dọmọ, “Nuhahun ehe to ayajẹ po whenu họakuẹ he n’dona yizan to nuwiwa gbigbọmẹ tọn lẹ mẹ po hòyí sọn asie.” To nudide ehe bibasi godo, mẹmẹsunnu lọ mọdọ ayajẹ etọn to gigọwa bọ Jehovah sọ to didona sinsẹ̀nzọn etọn.

Etlẹ Yin to Onú Pẹvi lẹ Mẹ

Eyin mí ma nọ tẹdo nujlomẹ mẹdetiti tọn mítọn lẹ go, mí na mọaleyi etlẹ yin to onú pẹvi lẹ mẹ. To azán tintan plidopọ agbegbe de tọn, asu po asi po gbehosọnalitọ de yawu wá domẹwhenu bo dín tẹnmẹ do fie yé jlo na sinai do. Dile tito-to-whinnu lọ bẹjẹeji, whẹndo daho he tindo ovi susu de zọ̀n plaplaji biọ gbẹtọgun he ko to aisinsin to aihundatẹn daho lọ mẹ. To whenuena asu po asi po lọ doayi e go dọ whẹndo lọ to aisintẹn he na pé yé dín, yé omẹ awe lẹ fọ́n bo jo otẹn yetọn do na yé. Ehe hẹn ẹn yọnbasi na whẹndo lọ blebu nado sinai dopọ. Azán vude to plidopọ lọ godo, asu po asi po gbehosọnalitọ lọ mọ wekanhlanmẹ nudọdomẹ tọn de yí sọn whẹndo lọ si. Wekanhlanmẹ lọ dohia dọ e vẹna whẹndo lọ dọ yé gbọwhenu wá plidopọ lọ. Ṣigba numọtolanmẹ ehe lẹzun ayajẹ po pinpẹn-nutọn-yinyọnẹn po tọn na homẹdagbe he asu po asi po lọ dohia yé wutu.

To whedepopenu he e yọnbasi, mì gbọ mí ni yí jlọjẹ mítọn lẹ do sanvọ́ do ota mẹdevo lẹ tọn mẹ. Owanyi he “ma nọ dín onú etọn titi” didohia na gọalọna mí nado hẹn jijọho go to agun lọ mẹ podọ hẹ kọmẹnu mítọn lẹ. (1 Kọl. 13:5) Ṣigba hú popolẹpo, e na gọalọna mí nado hẹn haṣinṣan dagbe he mí tindo hẹ Jehovah go.

[Yẹdide to weda 20]

Be hiẹ sọgan miyọnnukundo nujlomẹ mẹdetiti tọn towe lẹ to whẹho aṣọ́dido tọn mẹ ya?

[Yẹdide to weda 20, 21]

Be hiẹ sọgan jo otẹn towe do na mẹmẹsunnu towe lẹ ya?