Be Ohó Jesu Tọn lẹ Nọ Yinuwado Odẹ̀ Towe lẹ Ji Ya?
Be Ohó Jesu Tọn lẹ Nọ Yinuwado Odẹ̀ Towe lẹ Ji Ya?
“Whenuena Jesu dotana ohó helẹ, avò vò gbẹtọ lẹ do nuplọnmẹ etọn go.”—MAT. 7:28.
1, 2. Naegbọn avò vò gbẹtọ lẹ do nuplọnmẹ Jesu tọn go?
MÍ DONA kẹalọyi ohó Jesu Klisti, Ovi detọ́n dopo akàn Jiwheyẹwhe tọn tọn lẹ bo yí yé do yizan mẹ. Na nugbo tọn, hodidọ etọn gbọnvo na gbẹtọ devo depope tọn. Abajọ avò vò gbẹtọ lẹ do nuhe e plọnmẹ to Yẹwhehodidọ Osó ji tọn etọn mẹ lẹ go!—Hia Matiu 7:28, 29.
2 Ovi Jehovah tọn ma plọnmẹ dile wekantọ he nọ ze nuplọnmẹ yetọn sinai do tamẹnuplọnmẹ gbẹtọvi mapenọ lẹ tọn ji lẹ nọ wà do. Klisti plọnmẹ taidi “mẹhe tindo aṣẹ” na nuhe e dọ lẹ wá sọn Jiwheyẹwhe dè. (Joh. 12:50) Enẹwutu, mì gbọ mí ni pọ́n lehe nuplọnmẹ Yẹwhehodidọ Osó ji tọn Jesu tọn devo lẹ dona yinuwado odẹ̀ mítọn lẹ ji do.
Ma Hodẹ̀ Dile Yẹnuwatọ lẹ Nọ Wà Do Gbede Blo
3. Basi bladopọ nuhe Jesu dọ to Matiu 6:5 mẹ tọn.
3 Odẹ̀ yin adà tangan sinsẹ̀n-bibasi nugbo tọn de, podọ mí dona nọ hodẹ̀ hlan Jehovah whẹwhẹ. Ṣigba mí dona dike ohó he Jesu dọ to Yẹwhehodidọ Osó ji tọn etọn mẹ lẹ ni yinuwado odẹ̀ mítọn lẹ ji. E dọmọ: ‘Whenuena hiẹ to dẹ̀ho, a di yẹnuwatọ lẹ blo: na yé yiwanna nado ṣite do hodẹ̀ to sinagọgu lẹ mẹ, podọ to alihoklan ji, na gbẹtọ lẹ nido mọ yé wutu. Nugbo wẹ yẹn dọ hlan mì, Yé ko mọ ale yetọn yí to gigọ́ mẹ.’—Mat. 6:5.
4-6. (a) Naegbọn Falesi lẹ yiwanna nado “ṣite do hodẹ̀ to sinagọgu mẹ, podọ to alihoklan [lẹ] ji”? (b) Nawẹ yẹnuwatọ enẹlẹ ‘ko mọ ale yetọn yí to gigọ́ mẹ’ gbọn?
4 To whenuena devi Jesu tọn lẹ to dẹ̀ho, yé ma dona hodo apajlẹ “yẹnuwatọ” lẹ tọn taidi Falesi dodo mẹdetiti tọn jlatọ lẹ, he nọ tẹnpọn nado klọ mẹdevo lẹ dọ yé yin mẹwiwe. (Mat. 23:13-32) Yẹnuwatọ enẹlẹ yiwanna nado “ṣite do hodẹ̀ to sinagọgu [lẹ] mẹ, podọ to alihoklan ji.” Etẹwutu? Na ‘gbẹtọ lẹ nido mọ yé.’ Aṣa Ju owhe kanweko tintan whenu tọn lẹ tọn wẹ e yin nado hodẹ̀ taidi pipli de to avọ́nunina mimẹ̀ lẹ whenu to tẹmpli mẹ (to nudi ogàn ṣinẹnẹ afọnnu tọn po ogàn atọ̀n whèmẹ tọn po mẹ). Tòmẹnu Jelusalẹm tọn susu nọ hodẹ̀ to pọmẹ hẹ sinsẹ̀n-basitọ hatọ devo lẹ to opá tẹmpli lọ tọn mẹ. To gbonu tòdaho enẹ tọn, Ju ahundoponọ lẹ nọ saba ṣite do hodẹ̀ whla awe to gbèdopo “to sinagọgu [lẹ] mẹ.”—Yijlẹdo Luku 18:11, 13 go.
5 To whenuena e yindọ suhugan gbẹtọ lẹ tọn ma nọ tin to yakẹ tẹmpli lọ kavi sinagọgu de tọn nado hodẹ̀ dile e yin nùdego do wayi, yé sọgan hodẹ̀ to fidepope he yé tin te to ojlẹ enẹlẹ mẹ. Mẹdelẹ nọ wà nulẹpo nado hẹn ẹn diun dọ yé tin “to alihoklan” lẹ ji to whenuena ogàn odẹ̀ tọn enẹlẹ hò. Yé jlo dọ mẹhe to aliklan enẹlẹ ji gbọn lẹ ni “mọ yé.” Yẹnuwatọ dodo mẹdetiti tọn jlatọ lẹ nọ ‘hodẹ̀ gaa’ nado hẹn awuji mẹhe to yé mọ lẹ. (Luku 20:47) Míwlẹ ma dona yinuwa to aliho enẹ mẹ.
6 Jesu dọ dọ yẹnuwatọ ehelẹ ‘ko mọ ale yetọn yí to gigọ́ mẹ.’ Yé nọ jlo dọ gbẹtọ lẹ ni doyẹyigona yé bo pà yé—podọ ale he yé na mọyi lẹpo niyẹn na Jehovah ma na na gblọndo odẹ̀ yẹnuwiwa tọn yetọn lẹ. To alọ devo mẹ, Jiwheyẹwhe na na gblọndo odẹ̀ hodotọ nugbo Klisti tọn lẹ tọn dile Jesu dọ bọdego do.
7. Etẹwẹ ayinamẹ lọ nado hodẹ̀ to “abò” mítọn mẹ zẹẹmẹdo?
7 ‘Ṣigba hiẹ, whenuena hiẹ to dẹ̀ho, biọ abò towe mẹ, whenuena hiẹ sú ohọ̀n towe, hodẹ̀ hlan Otọ́ towe he nọ mọnú to nuglọ, Otọ́ towe he nọ mọnú to nuglọ, na suahọ etọn we.’ (Mat. 6:6) Tudohomẹnamẹ Jesu tọn nado biọ abò mẹ bo suhọ̀n whẹpo do hodẹ̀ ma dohia dọ mẹde ma sọgan nọ nukọnna agun to odẹ̀ mẹ gba. Ayinamẹ ehe yin nina nado dohia dọ odẹ̀ gbangba tọn he nọ yin hihò nado sọgan dọ̀n ayidonugo mẹdevo lẹ tọn wá mẹhe to dẹ̀ho lọ ji bo mọ pipà yí sọn yé si ma sọgbe. Mí dona hẹn ehe do ayiha mẹ eyin mí tindo lẹblanulọkẹyi lọ nado nọ nukọnna omẹ Jiwheyẹwhe tọn lẹ to odẹ̀ gbangba tọn mẹ. Mì gbọ mí nisọ lẹnnupọndo ayinamẹ devo lẹ he Jesu na gando dẹ̀hiho go ji.
8. Sọgbe hẹ Matiu 6:7, aṣa dẹ̀hiho tọn he ma sọgbe tẹwẹ mí dona dapana?
8 “Ṣigba to whenuena mì to dẹ̀ho, mì zan dọvọdọ vọ́tọ di Kosi lẹ blo; na yé lẹndọ yè na sè yetọn na ohó susu didọ yetọn.” (Mat. 6:7) Tofi, Jesu donù aṣa dẹ̀hiho tọn he ma sọgbe de go—enẹ wẹ dọvọdọ bibasi. E ma to didọ dọ mí ma dona vọ́ ovẹvivẹ ahundopo tọn lẹ po hogbe pẹdido tọn lẹ po dọ to odẹ̀ mítọn mẹ gbede gba. To jipa Gẹtsemani tọn mẹ to ozán he jẹnukọnna okú Jesu tọn, e yí hogbe “dopolọ” lẹ zan to odẹ̀ mẹ.—Malku 14:32-39.
9, 10. Linlẹn tẹ mẹ wẹ mí ma dona hodẹ̀ dọvọdọ tọn lẹ te?
9 E ma sọgbe nado nọ hodẹ̀ dọvọdọ tọn dile “Kosi lẹ” nọ wà do. Yé nọ vọ́ ohó vọ́tọ he yé hẹn do tamẹ lẹ dọ pludopludo. Ale tẹwẹ e hẹnwa na Baali-sẹ̀ntọ lẹ to whenuena yé to yẹwhe lalo yetọn vẹ̀ ‘sọn afọnnu kakajẹ whèmẹ, dọmọ, Baali E, siọ mí’? (1 Ahọ. 18:26) Livi susu gbẹtọ lẹ tọn to egbehe nọ hodẹ̀ gaa dọvọdọ tọn lẹ po linlẹn lọ po dọ “yè na sè yetọn.” Ṣigba Jesu gọalọna mí nado mọnukunnujẹemẹ dọ “ohó susu didọ” to odẹ̀ gaa po dọvọdọ tọn lẹ po mẹ yin nuvọ́ to nukun Jehovah tọn mẹ. Jesu yidogọ dọmọ:
10 “Enẹwutu mì di yé blo: na Otọ́ mìtọn yọ́n nuhe mì tindo nuwhèdo na, whẹpo mì do biọ ẹ.” (Mat. 6:8) Sinsẹ̀ngán Ju susu nọ hodẹ̀ gaa taidi Kosi lẹ. Odẹ̀ ahundopo tọn he bẹ pipà, pẹdido, po ovẹvivẹ po hẹn yin adà tangan sinsẹ̀n-bibasi nugbo tọn de. (Flp. 4:6) Etomọṣo, e ma sọgbe nado to nudopolọ vọdọ pludopludo taidi dọ Jiwheyẹwhe na wọn nuhe mí ko dọna ẹn lẹ eyin mí ma vọ́ yé dọ wẹ nkọ. Eyin mí to dẹ̀ho, mí dona flindọ Mẹhe mí to hodọna lọ ‘yọ́n nuhe mí tindo nuhudo etọn lẹ whẹpo mí tlẹ do biọ ẹ.’
11. Etẹwẹ mí dona hẹn do ayiha mẹ to whenuena mí tindo lẹblanulọkẹyi lọ nado nọ nukọnna pipli de to odẹ̀ mẹ?
11 Nuhe Jesu dọ gando odẹ̀ he ma sọgbe go lẹ dona flin mí dọ Jiwheyẹwhe ma yiwanna hogbe gboogbo po ohó vọ́tọ lẹ po yiyizan to odẹ̀ mẹ. Mí sọ dona yọnẹn dọ odẹ̀ gbangba tọn lẹ ma yin dotẹnmẹ hundote nado hẹn awuji mẹhe to odẹ̀ mítọn dotó lẹ. Mọdopolọ odẹ̀ lọ ma dona dite zẹjlẹgo sọmọ bọ gbẹtọ lẹ na to linlẹn to ohò yede tọn mẹ dọ whetẹnu wẹ mí na wá dọ “Niṣẹ” taun. Dotẹnmẹ hundote odẹ̀ tọn yiyizan nado basi nulila kavi na ayinamẹ mẹplidopọ lẹ sọ jẹagọdo ohó he Jesu dọ to Yẹwhehodidọ Osó ji tọn mẹ lẹ.
Jesu Plọn Mí Lehe Mí Na Nọ Hodẹ̀ Do
12. Etẹwẹ obiọ lọ ‘na oyín towe ni yin kinklandowiwe’ zẹẹmẹdo?
12 Gbọnvona dọ Jesu na avase sọta lẹblanulọkẹyi odẹ̀ tọn yiyizan to aliho he ma sọgbe mẹ, e sọ plọn devi etọn lẹ lehe yé na hodẹ̀ do. (Hia Matiu 6:9-13.) Jesu ma ze odẹ̀ apajlẹ tọn lọ dai na e nido yin pinplọn do tamẹ bo nọ yin vivọdọ pludopludo gba. Kakatimọ, odẹ̀ enẹ yin apajlẹ de na mí nado hodo to whenuena mí to dẹ̀ho. Di dohia, Jesu ze Jiwheyẹwhe do otẹn tintan mẹ po hogbe bẹjẹeji odẹ̀ lọ tọn lẹ po dọmọ: “Otọ́ mítọn he tin to olọn mẹ, hihiọ wẹ oyín towe [kavi na oyín towe ni yin kinklandowiwe].” (Mat. 6:9) Po gbesisọ po, mí nọ ylọ Jehovah dọ “Otọ́ mítọn” na ewọ wẹ Mẹdatọ mítọn, he tin “to olọn” he dẹn tlala do aigba. (Deut. 32:6; 2 Otan. 6:21; Owalọ 17:24, 28) Hogbe lọ “mítọn” he yin yiyizan dona flin mí dọ yisenọ hatọ mítọn lẹ lọsu tindo haṣinṣan pẹkipẹki de hẹ Jiwheyẹwhe. ‘Na oyín towe ni yin kinklandowiwe’ yin obiọ de dọ Jehovah ni yinuwa nado klan oyín ede tọn do wiwe gbọn vlẹko he ko yin kinkọndo oyín lọ go sọn atẹṣiṣi Edẹni mẹ tọn whenu gbọ́n didesẹ dali. Nado na gblọndo odẹ̀ enẹ tọn, Jehovah na de danuwiwa sẹ̀ sọn aigba ji bo gbọnmọ dali klan oyín ede tọn do wiwe.—Ezek. 36:23.
13. (a) Nawẹ obiọ lọ dọ “ahọludu towe ni wá” na yin hinhẹndi gbọn? (b) Etẹwẹ ojlo Jiwheyẹwhe tọn wiwà to aigba ji na bẹhẹn?
13 “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Mat. 6:10) To kọndopọ mẹ hẹ obiọ he yin bibasi to odẹ̀ apajlẹ tọn ehe mẹ, mí dona flindọ ‘ahọluduta’ lọ wẹ gandudu Mẹssia tọn olọn mẹ tọn he tin to alọmẹ na Klisti po “mẹwiwe” he yin finfọnsọnku nado kọnawudopọ hẹ ẹ lẹ po. (Dan. 7:13, 14, 18; Isa. 9:6, 7) Dẹ̀hiho dọ ahọluduta enẹ ni “wá” yin obiọ de dọ Ahọluduta Jiwheyẹwhe tọn ni wá sukúndona gbẹtọvi depope he jẹagọdo gandudu olọn mẹ tọn enẹ. Enẹ na jọ to madẹnmẹ, bo na jla aimẹ do na paladisi aigba ji tọn de, fie dodo, jijọho, po dagbemẹninọ po na gbayipe te. (Ps. 72:1-15; Dan. 2:44; 2 Pita 3:13) Ojlo Jehovah tọn ko to yinyin wiwà to olọn mẹ, podọ bibiọ dọ e ni yin wiwà to aigba ji yin ovẹvivẹ de dọ Jiwheyẹwhe ni hẹn lẹndai etọn na aigba mítọn di, ehe bẹ mẹhe diọnukunsọ ẹ to egbehe lẹ didesẹ dile e wà do to hohowhenu hẹn.—Hia Psalm 83:1, 2, 13-18.
14. Naegbọn e do sọgbe nado nọ biọ ‘núdùdù mítọn egbehe tọn’?
14 ‘Na núdùdù mítọn egbehe tọn mí to egbé.’ (Mat. 6:11; Luku 11:3) To whenuena mí biọ ehe to odẹ̀ mẹ, mí to bibiọ Jiwheyẹwhe dọ e ni na mí núdùdù mítọn ‘egbehe tọn’ mí. Ehe dohia dọ mí yise dọ Jehovah tindo nugopipe lọ nado penukundo nuhudo egbesọegbesọ tọn mítọn lẹ go. Yanwle odẹ̀ ehe tọn ma yin nado biọ lankan. Obiọ lọ nado mọ nuhudo egbesọ tọn mítọn yí sọgan flin mí gbedide he Jiwheyẹwhe na Islaelivi lẹ dọ mẹdopodopo ni nọ ṣinyan manna “azán dopo tọn egbesọegbesọ.”—Eks. 16:4.
15. Etẹwẹ obiọ lọ, “jo ahọ́ mítọn lẹ na mí, dile mí ko jona ahọ́tọnọ mítọn lẹ do” zẹẹmẹdo?
15 Obiọ he bọdego to odẹ̀ apajlẹ tọn lọ mẹ lẹ́ ayidonugo mítọn hlan nuhe mí dona wà de ji. Jesu dọmọ: “Jo ahọ́ mítọn lẹ na mí, dile mí ko jona ahọ́tọnọ mítọn lẹ do.” (Mat. 6:12) Owe Wẹndagbe Luku tọn dohia dọ “ahọ́” ehelẹ nọtena “ylando.” (Luku 11:4) Mí sọgan donukun dọ Jehovah na jona mí kiki eyin mí “ko jona” mẹhe ṣinuwa do mí lẹ. (Hia Matiu 6:14, 15.) Mí dona jona mẹdevo lẹ sọn ahun mẹ wá.—Efe. 4:32; Kọl. 3:13.
16. Nawẹ mí dona mọnukunnujẹ obiọ lọ lẹ, “a dọ̀n mí do whlepọn mẹ blo” po “whlẹn mí sọn [mẹylankan lọ] si” po mẹ gbọn?
16 “A dọ̀n mí do whlepọn mẹ blo, ṣigba whlẹn mí sọn [mẹylankan lọ] si.” (Mat. 6:13) Nawẹ mí sọgan mọnukunnujẹ obiọ awe he yin nùdego to odẹ̀ apajlẹ tọn Jesu tọn ehelẹ mẹ gbọn? Onú dopo họnwun: Jehovah ma nọ whlé mí pọ́n nado waylando. (Hia Jakobu 1:13.) Satani—‘mẹylankan lọ’—wẹ ‘Mẹwhlepọntọ’ akonka lọ. (Mat. 4:3) Ṣigba, Biblu nọ dlẹnalọdo Jiwheyẹwhe taidi mẹhe wà onú delẹ he ewọ jotẹnna poun nado jọ. (Luti 1:20, 21; Yẹwh. 11:5) Enẹwutu, “a dọ̀n mí do whlepọn mẹ blo,” yin ovẹvivẹ de dọ Jehovah ni ma dike mí ni jogbe to whenuena mí yin whiwhlepọn nado vẹtolina ẹn. To tadona mẹ, “whlẹn mí sọn [mẹylankan lọ] si” yin obiọ de dọ Jehovah ni ma dike Satani ni duto mí ji blo. Podọ mí sọgan deji dọ ‘Jiwheyẹwhe ma na dike mí ni yin whiwhlepọn hú ehe mí sọgan hẹn.’—Hia 1 Kọlintinu lẹ 10:13.
‘Mì Nọ Biọ, Mì Nọ Dín bo Nọ Húhúhọ̀n’
17, 18. Etẹwẹ e zẹẹmẹdo nado ‘nọ biọ, nọ dín bo nọ húhúhọ̀n’?
17 Apọsteli Paulu dotuhomẹna yisenọ hatọ lẹ dọmọ: “[Mì] yí tenọgli do gbọṣi odẹ̀ mẹ.” (Lom. 12:12) Jesu lọsu zinnudo onú mọnkọtọn ji to whenuena e dọmọ: ‘Mì nọ biọ, yè na na mì; mì nọ dín, mì na mọ, mì nọ húhúhọ̀n, yè nasọ hùn in hlan mì. Na mẹdepope he to bibiọ nọ mọyi; mẹhe sọ to dindin nọ mọ; podọ hlan mẹhe to ohọ̀n húhú, yè na hùn hlan ẹn.’ (Mat. 7:7, 8) Nuhe sọgbe wẹ e yin nado ‘nọ biọ’ nudepope he tin to kọndopọ mẹ hẹ ojlo Jiwheyẹwhe tọn. Sọgbe hẹ nuhe Jesu dọ, apọsteli Johanu wlan dọmọ: “Ehe sọ wẹ tudido he mí tindo to [Jiwheyẹwhe] mẹ, dọ, eyin mí biọ nudepope kẹdẹdi ojlo etọn, e sè mítọn.”—1 Joh. 5:14.
18 Ayinamẹ Jesu tọn ‘nado nọ biọ bo nọ dín’ dohia dọ mí dona nọ hodẹ̀ vẹkuvẹku matin nuṣikọ. Nujọnu wẹ e sọ yin dọ mí ni ‘nọ húhúhọ̀n’ nado sọgan dugu Ahọluduta lọ tọn bo mọ dona, ale, po ahọsumẹ etọn lẹ po yí. Ṣigba be mí sọgan deji dọ Jiwheyẹwhe na sè odẹ̀ mítọn lẹ ya? Mọwẹ, mí sọgan deji eyin mí yin nugbonọ na Jehovah, na Jesu dọmọ: ‘Mẹdepope he to bibiọ nọ mọyi; mẹhe sọ to dindin nọ mọ; podọ hlan mẹhe to ohọ̀n húhú, yè na hùn hlan ẹn.’ Numimọ susu he devizọnwatọ Jehovah tọn lẹ nọ tindo dohia dọ Jiwheyẹwhe wẹ ‘Mẹhe nọ sè odẹ̀’ nugbonugbo.—Ps. 65:2.
19, 20. Sọgbe hẹ nuhe Jesu dọ to Matiu 7:9-11 mẹ, nawẹ Jehovah taidi otọ́ owanyinọ de gbọn?
19 Jesu yí Jiwheyẹwhe jlẹdo otọ́ owanyinọ he nọ na onú dagbe ovi etọn lẹ go. Yí nukun homẹ tọn do pọ́n dọ hiẹ tin to Yẹwhehodidọ Osó ji tọn lọ tẹnmẹ bo sè whenuena Jesu dọmọ: “Gbẹtọ tẹwẹ tin sọn mì mẹ, mẹhe eyin visunnu etọn na biọ akla dopo e, be ewọ na yí zannu de na ẹn? Kavi eyin e na biọ whèvi de, be ewọ na yí odàn de na ẹn? Be eyin mìwlẹ yinyin mẹylankan yọ́n le yè nọ na nunina dagbe ovi mìtọn lẹ do, nẹmunẹmu wẹ Otọ́ mìtọn he tin to olọn mẹ ma na yí onú dagbe na yé mẹhe biọ ẹ lẹ?”—Mat. 7:9-11.
20 Dile etlẹ yindọ otọ́ he tin to aigba ji de yin yiyijlẹdo “mẹylankan” go na e dugu ylando tọn wutu, e nọ yiwanna ovi etọn to jọwamọ-liho. E ma na klọ ovi etọn, ṣigba e na tẹnpọn nado na ẹn “nunina dagbe.” Mọdopolọ, Otọ́ owanyinọ olọn mẹ tọn mítọn nọ na mí “onú dagbe” lẹ taidi gbigbọ wiwe etọn. (Luku 11:13) Ehe sọgan na mí huhlọn nado wadevizọn to aliho he sọgbe mẹ na Jehovah, mẹhe nọ wleawuna “nunina dagbedagbe po nunina he sọgbe lẹpo po.”—Jak. 1:17.
To Alemọyi sọn Ohó Jesu Tọn lẹ mẹ Zọnmii
21, 22. Naegbọn Yẹwhehodidọ Osó ji tọn lọ do jẹna ayidego, podọ etẹwẹ yin numọtolanmẹ towe gando ohó Jesu tọn ehelẹ go?
21 Na nugbo tọn, Yẹwhehodidọ Osó ji tọn lọ wẹ hodidọ he whànmẹ hugan to whenuho gbẹtọvi tọn mẹ. Hodidọ lọ jẹna ayidego na e họnwun bo bẹ nuplọnmẹ gbigbọmẹ tọn lẹ hẹn. Dile hosọ ehe po dehe wayi lẹ po dohia do, mí sọgan mọ ale susu yí sọn hodidọ ehe mẹ eyin mí nọ yí ayinamẹ he e bẹhẹn lẹ do yizan mẹ. Ohó Jesu tọn ehelẹ sọgan hẹn gbẹzan mítọn pọnte todin bosọ hẹn mí tindo todido na sọgodo dagbe de.
22 To hosọ oplọn tọn ehelẹ mẹ, nuhọakuẹ gbigbọmẹ tọn vude poun wẹ mí gbadopọnna sọn Yẹwhehodidọ Osó ji tọn Jesu tọn mẹ. Abajọ “avò vò” mẹhe sè hodidọ etọn lẹ do nuplọnmẹ etọn go. (Mat. 7:28) Matin ayihaawe, numọtolanmẹ he mílọsu na tindo niyẹn eyin mí yí nuplọnmẹ họakuẹ Mẹplọntọ Daho lọ, Jesu Klisti tọn lẹ do gọ́ ayiha po ahun mítọn lẹ po mẹ.
Etẹwẹ Yin Gblọndo Towe Lẹ?
• Etẹwẹ Jesu dọ gando odẹ̀ yẹnuwiwa tọn lẹ go?
• Naegbọn mí ma dona nọ dọ dọvọdọ vọ́tọ lẹ to whenuena mí to dẹ̀ho?
• Obiọ tẹlẹ wẹ odẹ̀ apajlẹ tọn Jesu tọn bẹhẹn?
• Nawẹ mí sọgan ‘nọ biọ, nọ dín bo nọ húhúhọ̀n gbọn’?
[Kanbiọ Oplọn tọn lẹ]
[Yẹdide to weda 15]
Jesu gblewhẹdo yẹnuwatọ he nọ hodẹ̀ kiki na gbẹtọ lẹ nido mọ yé bo sè nuhe dọ yé te lẹ wutu
[Yẹdide to weda 17]
Be a yọ́n nuhewutu e do sọgbe nado nọ biọ núdùdù egbesọ tọn mítọn to odẹ̀ mẹ ya?