Dike Ohó Jesu Tọn lẹ Ni Nọ Yinuwado Pọndohlan Towe Ji
Dike Ohó Jesu Tọn lẹ Ni Nọ Yinuwado Pọndohlan Towe Ji
‘Mẹhe Jiwheyẹwhe dohlan wẹ dọ ohó Jiwheyẹwhe tọn lẹ.’—JOH. 3:34.
1, 2. Naegbọn mí sọgan dọ dọ Yẹwhehodidọ Osó ji tọn Jesu tọn yin zize sinai do “ohó Jiwheyẹwhe tọn” lẹ ji?
OHÓ he Jesu dọ to Yẹwhehodidọ Osó ji tọn etọn mẹ lẹ họakuẹ tlala hugan zannu akuẹgegenu depope he sọgan yin mimọ to aigba ji. Ehe ma dona paṣa mí na Jehovah wẹ Asisa nuhe Jesu dọ lẹ tọn. Biblu dọ gando Jesu go dọmọ: ‘Mẹhe Jiwheyẹwhe dohlan wẹ dọ ohó Jiwheyẹwhe tọn lẹ.’—Joh. 3:34-36.
2 Dile etlẹ yindọ Yẹwhehodidọ Osó ji tọn lọ sọgan ko yin didọ to nukunwhiwhe 20 gblamẹ, Jesu yihodọ whla 21 sọn owe voovo ṣinatọ̀n to Owe Wiwe Heblu tọn lẹ mẹ. Enẹwutu, hodidọ lọ yin zize sinai gligli do “ohó Jiwheyẹwhe tọn” lẹ ji. Todin, mì gbọ mí ni gbadopọnna lehe mí sọgan yí delẹ to nuplọnmẹ họakuẹ he yin mimọ to yẹwhehodidọ diyin Ovi yiwanna Jiwheyẹwhe tọn mẹ lẹ zan do.
‘Yì Gbọwhẹ hẹ Mẹmẹsunnu Towe Whẹ́’
3. To whenuena Jesu ko na avase devi etọn lẹ gando owù he tin to homẹgble mẹ go, ayinamẹ tẹwẹ e na?
3 Taidi Klistiani, mí nọ jaya bosọ nọ doafọna jijọho, na mí tindo gbigbọ wiwe Jiwheyẹwhe tọn, podọ adà sinsẹ́n gbigbọ enẹ tọn lẹ bẹ ayajẹ po jijọho po hẹn. (Gal. 5:22, 23) Na Jesu ma jlo dọ devi etọn lẹ ni hẹn jijọho po ayajẹ yetọn po bu wutu, e na yé avase gando kọdetọn vẹadi he homẹgbigble mapote nọ hẹnwa go. (Hia Matiu 5:21, 22.) E yidogọ dọmọ: “Enẹwutu eyin hiẹ hẹn nunina towe yì agbà kọ̀n, bosọ flin to finẹ dọ mẹmẹsunnu towe tindo nude do gowe: jo nunina towe dai to finẹ to agbà nukọn, bo yì . . . gbọwhẹ hẹ mẹmẹsunnu towe whẹ́; whenẹnu wẹ a ni wá bo na nunina towe.” —Mat. 5:23, 24.
4, 5. (a) “Nunina” tẹ hodọ wẹ Jesu te to kandai he tin to Matiu 5:23, 24 mẹ? (b) Nawẹ e yin nujọnu sọ nado gbọwhẹ hẹ mẹmẹsunnu he mí ṣinuwa do de?
4 “Nunina” he hodọ Jesu te wẹ avọ́nunina depope he yin hinhẹnwa tẹmpli mẹ to Jelusalẹm. Di apajlẹ, avọ́sinsan kanlin tọn lẹ yin nujọnu to whenẹnu na gbẹtọ lẹ nọ yí yé zan to sinsẹ̀n-bibasi yetọn hlan Jehovah mẹ. Ṣigba, Jesu zinnudo nuhe tlẹ sọ yin nujọnu hugan de ji—enẹ wẹ whẹgbigbọ hẹ mẹmẹsunnu he yè ṣinuwa do de whẹpo do basi nunina depope hlan Jiwheyẹwhe.
5 Etẹwẹ mí sọgan plọn sọn nuhe Jesu dọ ehe mẹ? Nuplọnmẹ lọ wẹ yindọ haṣinṣan he mí tindo hẹ mẹdevo lẹ nọ yinuwado haṣinṣan mítọn hẹ Jehovah ji taun. (1 Joh. 4:20) Na nugbo tọn, avọ́nunina he nọ yin nina hlan Jiwheyẹwhe to hohowhenu lẹ yin nuvọ́ eyin mẹhe to nina yé lọ ma nọ yinuwa hẹ mẹdevo lẹ to aliho he sọgbe mẹ.—Hia Mika 6:6-8.
Mí Dona Do Whiwhẹ Hia
6, 7. Naegbọn e nọ biọ whiwhẹ nado vọ́ haṣinṣan he ko gble jlado hẹ mẹmẹsunnu he mí ṣinuwa do de?
6 Whẹgbigbọ hẹ mẹmẹsunnu he mí ṣinuwa do de sọgan whlé whiwhẹ mítọn pọ́n. Whiwhẹnọ lẹ ma nọ dọnnu kavi dowhẹgbe hẹ yisenọ hatọ lẹ nado dohia dọ owhẹ̀ yetọn wẹ whẹ́n. Enẹ na hẹn ninọmẹ lọ ylan dogọ—taidi ninọmẹ he wá aimẹ to Klistiani hohowhenu tọn lẹ ṣẹnṣẹn to Kọlinti. Gando nuhe jọ to ojlẹ enẹ mẹ go, apọsteli Paulu na ayinamẹ mẹhẹnlẹnnupọn tọn ehe dọmọ: “Onú gúgú gbidigbidi de wẹ e yin to mì mẹ, dọ mì tindo owhẹylọ lẹ mẹde po mẹde po. Etẹwutu mì ma nọ kuku gbọ yí guwhẹ̀? Etẹwutu mì ma nọ kuku gbọ yin mẹbibadu?”—1 Kọl. 6:7.
7 Jesu ma dọ dọ mí ni yì mẹmẹsunnu mítọn dè kiki nado hẹn ẹn họnwun na ẹn dọ owhẹ̀ mítọn wẹ whẹ́n bọ ewọ tọn gble. Yanwle mítọn dona yin nado vọ́ haṣinṣan he ko gble lọ jlado. Nado gbọwhẹ, mí dona dọ nuhe yin numọtolanmẹ mítọn taun sọn ahun mẹ. Mí sọ dona hẹn do ayiha mẹ dọ mí ko gbleawuna omẹ diẹ lọsu. Podọ eyin mí ko ṣinuwa do mẹlọ, mí dona whiwhẹ míde bo vẹvẹ.
“Eyin Nukun Towe Adusi Tọn Hẹn We Dahli”
8. Basi bladopọ nuhe Jesu dọ to Matiu 5:29, 30 mẹ tọn.
8 To Yẹwhehodidọ Osó ji tọn mẹ, Jesu na ayinamẹ yọ́n-na-yizan do walọ dagbe ji. E yọnẹn dọ awutugonu agbasa mape mítọn tọn lẹ sọgan yinuwado mí ji to aliho he ma sọgbe mẹ. Enẹwutu Jesu dọmọ: “Eyin nukun towe adusi tọn hẹn we dahli, sún in sẹ̀, bosọ de e sọn gowe: na e doale na we na dopo awutugonu towe tọn ni dọ̀n, hú na yè ni ze agbasa towe lẹpo pete dlan [Gẹhẹnna] mẹ. Eyin alọ towe adusi tọn sọ hẹn we dahli, sán ẹn sẹ̀, bo de e sọn dè we: na e doale na we na dopo awutugonu towe tọn ni dọ̀n, hú na yè ni ze agbasa towe lẹpo pete dlan [Gẹhẹnna] mẹ.”—Mat. 5:29, 30.
9. Nawẹ “nukun” kavi “alọ” mítọn sọgan hẹn mí “dahli” gbọn?
9 “Nukun” he go Jesu donù nọtena nugopipe lọ nado ze ayidonugo mítọn do nude ji, podọ “alọ” nọtena nuhe mí nọ yí alọ mítọn lẹ do wà. Eyin mí ma ṣọ́ míde, awutugonu ehelẹ sọgan hẹn mí “dahli” bọ mí na doalọtena ‘zọnlinzinzin hẹ Jiwheyẹwhe.’ (Gẹn. 5:22; 6:9) Enẹwutu, eyin mí yin whiwhlepọn nado vẹtolina Jehovah, mí dona ze afọdide nujikudo tọn bo sún nukun kavi sán alọ de sẹ̀ to yẹhiadonu-liho.
10, 11. Etẹwẹ sọgan gọalọna mí nado dapana fẹnnuwiwa zanhẹmẹ tọn?
10 Nawẹ mí sọgan deanana nukun mítọn ma nado gbọṣi onú mawé lẹ ji gbọn? Dawe budisi Jiwheyẹwhe tọ́ lọ, Job dọmọ: “Yẹn basi alẹnu de hẹ nukun ṣie lẹ; nawẹ yẹn na pọ́n yọpọ yọnnu do?” (Job 31:1) Job tindo asi etọn bosọ magbe ma nado tùnafọ osẹ́n walọ dagbe tọn Jiwheyẹwhe tọn lẹ ji. Enẹ dona yin gbemima mílọsu tọn vlavo mí ko wlealọ kavi yin tlẹnnọ. Nado dapana fẹnnuwiwa zanhẹmẹ tọn, mí dona dike gbigbọ wiwe Jiwheyẹwhe tọn—yèdọ huhlọn he nọ gọalọna mẹhe yiwanna Jiwheyẹwhe lẹ nado do mawazẹjlẹgo hia—ni deanana mí.—Gal. 5:22-25.
11 Nado dapana fẹnnuwiwa zanhẹmẹ tọn, mí dona kanse míde dọ, ‘Be yẹn nọ dike nukun ṣie ni fọnjlodotena mi nado hia nudọnamẹ mawé lẹ kavi pọ́n yé to televiziọn kavi Internet ji ya?’ Mì gbọ mí nisọ flin nuhe devi Jakobu dọ lẹ dọmọ: “Omẹ dopodopo wẹ yè whlepọn, whenuena yè gbọn wantuntun etọn titi dali dọ̀n ẹn yì, bọ yè sọ doyẹklọ ẹ. Whenẹnu, wantuntun, whenuena e mọhò, e ji ylando: podọ ylando, whenuena yè basi i pó, e ji okú.” (Jak. 1:14, 15) Na nugbo tọn, eyin mẹhe ko klan ede do wiwe na Jiwheyẹwhe de ‘to omẹ vijinu awetọnọ de pọ́n’ po linlẹn mawé lẹ po to ayiha mẹ, e dona basi vọjlado lẹ to niyaniya mẹ taidi dọ e jlo na sún nukun etọn sẹ̀ bo ze e dlan wẹ nkọ.—Hia Matiu 5:27, 28.
12. Ayinamẹ Paulu tọn tẹwẹ sọgan gọalọna mí nado hoavùn sọta ojlo mawé lẹ?
12 Mí dona magbe sinsinyẹn nado gbọṣi wiweji to walọyizan-liho na alọ mítọn lẹ yiyizan to aliho agọ̀ mẹ sọgan sisẹ́ mí nado tùnafọ nujinọtedo walọ dagbe tọn Jehovah tọn lẹ ji. Enẹwutu mí dona hodo ayinamẹ Paulu tọn he dọmọ: “Mì . . . hẹn awutugonu mìtọn he tin to aihọn mẹ lẹ kú, galilọ, mawé, wantuntun, ojlo ylankan, po nukunkẹn po, heyin boṣiọ-sinsẹ̀n.” (Kọl. 3:5) Hogbe lọ nado hẹn “kú” zinnudo afọdide nujikudo tọn he dona yin zize nado hoavùn sọta ojlo mawé agbasalan tọn lẹ ji.
13, 14. Naegbọn e yin nujọnu nado dapana linlẹn po nuyiwa mawé lẹ po?
13 Mẹde sọgan yigbe dọ doto lẹ ni sán afọ kavi awà etọn sẹ̀ na e nido nọgbẹ̀. Nukun po alọ po ‘zizedlan’ to yẹhiadonu-liho yin nujọnu nado dapana linlẹn po nuyiwa mawé he sọgan zọ́n bọ mí na hẹn nukundagbe Jiwheyẹwhe tọn bu lẹ po. Aliho dopo akàn he mẹ mí sọgan dapana vasudo mavọmavọ he Gẹhẹnna nọtena te wẹ nado hẹn wiwejininọ mítọn go to apọ̀nmẹ, walọyizan-liho podọ to gbigbọ-liho.
14 Na mí dugu ylando po mape po tọn wutu, e nọ biọ vivẹnudido nado gbọṣi wiweji to walọyizan-liho. Paulu dọmọ: “Yẹn to nutun bo to awugblena agbasa ṣie, bosọ to hinhẹn ẹn wá taliai mẹ; dọ to nudepope mẹ, whenuena yẹn ko dọyẹwheho hlan mẹdevo lẹ, na yẹnlọsu nikaa yin gbigbẹdai.” (1 Kọl. 9:27) Enẹwutu, mì gbọ mí ni magbe nado hodo ayinamẹ he Jesu na do walọ dagbe ji lẹ bo ma yinuwa to aliho de mẹ he na dohia dọ mí ma yọ́n pinpẹn avọ́sinsan ofligọ etọn tọn gbede blo.—Mat. 20:28; Heb. 6:4-6.
‘Mì Nọ Nanumẹ’
15, 16. (a) Nawẹ Jesu ze apajlẹ gbigbọ nunamẹ tọn dai gbọn? (b) Etẹwẹ ohó Jesu tọn he tin to Luku 6:38 mẹ zẹẹmẹdo?
15 Ohó Jesu tọn lẹ po apajlẹ dagbe etọn po gọalọna mí nado wleawuna gbigbọ nunamẹ tọn. E do gbigbọ ehe hia to whenuena e yigbe nado wá aigba ji bo hẹn ale wá na gbẹtọvi mapenọ lẹ. (Hia 2 Kọlintinu lẹ 8:9.) Jesu desọn ojlo mẹ bo jo gigo olọn mẹ tọn do nado lẹzun gbẹtọ bosọ ze ogbẹ̀ etọn jo do ota gbẹtọvi ylandonọ lẹ tọn mẹ, he delẹ to yé mẹ na wá mọ ale olọn mẹ tọn yí taidi whédutọgbẹ́ Ahọluduta lọ tọn lẹ. (Lom. 8:16, 17) Podọ ayihaawe ma tin dọ Jesu na tuli gbigbọ alọtútlú tọn to whenuena e dọmọ:
16 ‘Mì nọ nanumẹ, yè nasọ na mì; ojlẹ dagbedagbe, zindodò, he yè whàn dopọ, he gọfla, wẹ yè na jlẹ do akọ̀n mìtọn. Na ojlẹ dopo he mì do jlẹ, wẹ yè nasọ yí do jlẹ hlan mì.’ (Luku 6:38) ‘Nujijlẹ do akọ̀n’ dlẹnalọdo aṣa de he nusàtọ delẹ tindo to hohowhenu nado kọ̀n nuhe ahisinọ de họ̀ do awugbó etọn he e yẹ́n do basi apò de mẹ nado hẹn nuhe yin hihọ̀ lọ yì whé. Mọdopolọ, gbigbọ alọtútlú tọn mítọn sọgan zọ́n bọ mí na mọ ojlẹ dagbe mọnkọtọn yí vlavo to whenuena mí tin to nuhudo mẹ.—Yẹwh. 11:2.
17. Nawẹ Jehovah ze apajlẹ dagbe hugan dai na mí gando nunamẹ go gbọn, podọ nunamẹ alọpa tẹwẹ sọgan hẹn ayajẹ wá na mí?
17 Jehovah yiwanna mẹhe nọ nanumẹ po homẹhunhun po lẹ bosọ nọ suahọ yé. Ewọ lọsu wẹ ze apajlẹ dagbe hugan lọ dai to adà ehe mẹ gbọn Ovi detọ́n dopo akàn etọn nina mí dali “na mẹdepope he yí i sè ma nado dọ̀n, ṣigba e nido tindo ogbẹ̀ madopodo.” (Joh. 3:16) Paulu wlan dọmọ: “Ewọ he húnhún jinukun gege, nasọ gbẹ̀n gege ga. Omẹ dopodopo dile e lẹn to ayiha etọn mẹ do, mọ wẹ mì ni gbọ e ni na do; e yin po hùnhlún po blo, kavi huhlọn do hẹn basi tọn blo: na Jiwheyẹwhe yiwanna nunamẹtọ homẹhunnọ.” (2 Kọl. 9:6, 7) Matin ayihaawe, whenu, huhlọn po nutindo agbasa tọn mítọn lẹ po yiyizan nado nọgodona sinsẹ̀n-bibasi nugbo lọ na hẹn ayajẹ po ale susugege po wá na mí.—Hia Howhinwhẹn lẹ 19:17; Luku 16:9.
“A Kún Opẹ̀n de to Nukọn Towe Blo”
18. Etẹwẹ na zọ́n bọ mí ma na mọ “ale de” yí sọn Otọ́ olọn mẹ tọn mítọn dè?
18 “Mì payi dọ mì wà dodo mìtọn to gbẹtọ nukọn, nado yin mimọ gbọn yé dè blo; eyin mọ mìwlẹ ma tindo ale de to Otọ́ mìtọn he tin to olọn mẹ dè gba.” (Mat. 6:1) To whenuena Jesu to hogbe lọ ‘dodowiwa’ yizan, e to alọdlẹndo walọyizan he tin to kọndopọ mẹ hẹ ojlo Jiwheyẹwhe tọn. E ma to didọ dọ nuyiwa jijọ-di-Jiwheyẹwhe tọn lẹ ma dona yin wiwà to gbangba gbede, na e ko biọ to devi etọn lẹ si nado dike “hinhọ́n [yetọn] ni họnwun to gbẹtọ lẹ nukọn.” (Mat. 5:14-16) Ṣigba mí ma na mọ “ale de” yí sọn Otọ́ olọn mẹ tọn mítọn dè eyin mí nọ wà onú lẹ “nado [sọgan] yin mimọ” gbọn gbẹtọ lẹ dali bo hẹn awuji yé. Eyin mí tindo mẹwhinwhàn mọnkọtọn lẹ, mí ma na tindo haṣinṣan pẹkipẹki de hẹ Jiwheyẹwhe kavi duvivi dona mavọmavọ lẹ tọn to gandudu Ahọluduta etọn tọn glọ.
19, 20. (a) Etẹ dọ wẹ Jesu te to whenuena e dọ dọ mí ma dona “kún opẹ̀n” to whenue mí to ‘nunina lẹblanu tọn lẹ’ basi? (b) Etẹwẹ e zẹẹmẹdo ma nado dike amiyọnlọ ni yọ́n nuhe adusilọ to wiwà?
19 Eyin mí tindo pọndohlan he sọgbe, mí na hodo ayinamẹ Jesu tọn he dọmọ: ‘Enẹwutu whenuena hiẹ basi nunina lẹblanu tọn towe, a kún opẹ̀n de to nukọn towe blo, dile yẹnuwatọ lẹ nọ wà do to sinagọgu mẹ, podọ to alihogbó ji na yé nido do gigo sọn gbẹtọ lẹ dè. Nugbo wẹ yẹn dọ hlan mì dọ, Yé ko mọ ale yetọn yí to gigọ́ mẹ.’ (Mat. 6:2) ‘Nunina lẹblanu tọn lẹ’ nọ yin bibasi nado gọalọna wamọnọ lẹ. (Hia Isaia 58:6, 7.) Jesu po apọsteli etọn lẹ po tindo apotin nunina tọn de he lẹndai etọn yin nado gọalọna wamọnọ lẹ. (Joh. 12:5-8; 13:29) To whenuena e yindọ mẹhe to onú na wamọnọ lẹ ma nọ kún opẹ̀n to paa mẹ whẹpo do nanumẹ, e họnwun dọ Jesu to hodọ to yẹhiadonu-liho to whenuena e dọ dọ mí ma dona “kún opẹ̀n de” to nukọn mítọn whẹpo do basi ‘nunina lẹblanu tọn lẹ.’ Mí ma dona jla nuhe mí namẹ dile Falesi lẹ nọ wà do. Jesu ylọ yé dọ yẹnuwatọ na yé nọ jla nunina lẹblanu tọn he yé basi lẹ “to sinagọgu mẹ, podọ to alihogbó ji.” Yẹnuwatọ enẹlẹ ‘ko mọ ale yetọn yí to gigọ́ mẹ.’ Pipà gbẹtọ lẹ tọn podọ vlavo otẹn daho he mẹ yé nọ sin to labbi nukundeji lẹ pá to sinagọgu mẹ wẹ ale he yé na mọyi lẹpo, na Jehovah ma to nude na na yé. (Mat. 23:6) Ṣigba, nawẹ devi Klisti tọn lẹ dona nọ yinuwa gbọn? Jesu na yé ayinamẹ de, he sọ yọ́n-na-yizan na mílọsu to egbehe dọmọ:
20 ‘Ṣigba whenuena hiẹ to nunina lẹblanu tọn lẹ basi, a dike amiyọnlọ towe yọ́n nuhe adusilọ towe to wiwà blo: na nunina lẹblanu tọn towe lẹ ni tin nuglọ: Otọ́ towe he nọ mọnú to nuglọ, na suahọ etọn we.’ (Mat. 6:3, 4) To paa mẹ, alọ mítọn awe lẹ wẹ mí do nọ wazọ́n. Enẹwutu, ayinamẹ lọ ma nado dike amiyọnlọ ni yọ́n nuhe adusilọ to wiwà zẹẹmẹdo dọ mí ma dona jla nuyiwa homẹdagbe tọn mítọn na mẹhe tlẹ sẹpọ mí taun dile amiyọnlọ sẹpọ adusilọ do.
21. Etẹwẹ ahọsumẹ Mẹlọ ‘he nọ mọnú to nuglọ’ tọn bẹhẹn?
21 Eyin mí ma nọ doawagun gando nuhe mí na mẹdevo lẹ go, ‘nunina lẹblanu tọn’ mítọn lẹ na tin to nuglọ. Podọ Otọ́ mítọn ‘he nọ mọnú to nuglọ’ na suahọ mí. Otọ́ mítọn he nọ nọ̀ olọn mẹ tin “to nuglọ” to linlẹn lọ mẹ dọ mí ma sọgan yí nukun mítọn lẹ do mọ ẹn. (Joh. 1:18) Ahọsumẹ Jehovah he nọ “mọnú to nuglọ” tọn bẹ haṣinṣan pẹkipẹki de tintindo hẹ ẹ, jona ylando mítọn lẹ tọn po ogbẹ̀ madopodo he mí na duvivi etọn po hẹn. (Howh. 3:32; Joh. 17:3; Efe. 1:7) Lehe dona ehelẹ pọnte tlala hú pipà he mí sọgan mọyi sọn gbẹtọ lẹ dè do sọ!
Nuplọnmẹ Họakuẹ He Mí Dona Wlebòna Lẹ
22, 23. Naegbọn mí dona wlebòna ohó Jesu tọn lẹ?
22 Na nugbo tọn, Yẹwhehodidọ Osó ji tọn lọ bẹ nuplọnmẹ gbigbọmẹ tọn họakuẹ susu hẹn. Matin ayihaawe, nuplọnmẹ ehelẹ sọgan na mí ayajẹ etlẹ yin to aihọn hunyanhunyan tọn ehe mẹ. Mọwẹ, mí na tindo ayajẹ eyin mí wlebòna ohó Jesu tọn lẹ bo dike yé ni yinuwado pọndohlan mítọn po gbẹzan mítọn po ji.
23 Mẹdepope he “sè” bosọ “basi” nuhe Jesu plọnmẹ lẹ na yin didona. (Hia Matiu 7:24, 25.) Enẹwutu, mì gbọ mí ni magbe nado hodo ayinamẹ Jesu tọn lẹ. Mí nasọ mọ nususu plọn dogọ to Yẹwhehodidọ Osó ji tọn lọ mẹ to hosọ he bọdego mẹ.
Nawẹ Hiẹ Na Na Gblọndo Gbọn?
• Naegbọn e yin nujọnu nado gbọwhẹ hẹ mẹmẹsunnu he mí ṣinuwa do de?
• Etẹwẹ mí sọgan wà ma nado dike ‘nukun mítọn adusi tọn’ ni hẹn mí dahli?
• Etẹwẹ dona yin pọndohlan mítọn gando nunamẹ go?
[Kanbiọ Oplọn tọn lẹ]
[Yẹdide to weda 11]
Lehe e yọ́n nado “gbọwhẹ” hẹ yisenọ hatọ he mí ṣinuwa do de do sọ!
[Yẹdide to weda 12, 13]
Jehovah nọ dona mẹhe nọ nanumẹ po homẹhunhun po lẹ