Nuagokun lẹ sọn Owe Osọhia Tọn Mẹ—II
Ohó Jehovah Tọn Tin to Ogbẹ̀
Nuagokun lẹ sọn Owe Osọhia Tọn Mẹ—II
ETẸWẸ to tepọn mẹhe nọ sẹ̀n Jehovah Jiwheyẹwhe po mẹhe ma nọ wàmọ lẹ po? Etẹwẹ to tepọn Satani po aovi etọn lẹ po? Dona tẹlẹ wẹ gbẹtọvi tonusetọ lẹ na duvivi etọn to Gandudu Owhe Fọtọ́n Klisti tọn whenu? Gblọndo kanbiọ ehelẹ po kanbiọ titengbe devo lẹ po tọn tin to Osọhia 13:1–22:21. a Weta ehelẹ bẹ numimọ 9 he gbọngodo to numimọ 16 he apọsteli Johanu mọ sẹpọ vivọnu owhe kanweko tintan W.M lẹ mẹ hẹn.
Johanu wlan dọmọ: “[Ayajẹnọ] wẹ ewọ he to hihia, podọ yé he to ohó dọdai he tọn sè, bosọ to nuhe yè wlan do e mẹ lẹ yí hẹn.” (Osọhia 1:3; 22:7) Eyin mí nọ hia owe Osọhia tọn bo nọ yí nuhe mí plọn lẹ do yizan mẹ, ehe sọgan whàn mí bo hẹn yise mítọn lodo to Jiwheyẹwhe po Ovi etọn, Jesu Klisti po mẹ bosọ hẹn mí tindo todido he diun na sọgodo. b—Heb. 4:12.
OGÒ ṢINAWE HOMẸGBLE JIWHEYẸWHE TỌN LẸ TỌN YIN TUNTUNJẸGBONU
Osọhia 11:18 dọmọ: ‘Homẹgble akọta lẹ, homẹgble Jiwheyẹwhe tọn sọ wá, po ojlẹ sisọ lọ po nado hù yé he to aihọn husudo lẹ.’ Nado do nuhewutu homẹgble Jiwheyẹwhe tọn wá hia, numimọ ṣinatọ̀ntọ lọ zinnudo nuwiwa ‘gbekanlin ylankan he tindo ota ṣinawe, azò ao’ lọ tọn ji.—Osọhia 13:1.
To numimọ ṣinẹnẹtọ mẹ, Johanu mọ “Lẹngbọvu de ṣite to osó Ziọni ji” bọ “gbẹtọ fọtọ́n [donu] kantọ̀nkonukunẹnẹ” tin po e po. “Ehelẹ wẹ yè fligọ sọn gbẹtọ lẹ mẹ.” (Osọhia 14:1, 4) Nulila angẹli tọn lẹ bọdego. To numimọ he bọdego mẹ, Johanu mọ “angẹli ṣinawe he tindo azọ̀nylankan . . . ṣinawe lẹ.” E họnwun dọ Jehovah lọsu wẹ degbena angẹli ehelẹ nado túntún “ogò [ṣinawe] homẹgble Jiwheyẹwhe tọn tọn lẹ” do adà voovo aihọn Satani tọn ji. Ogò lọ lẹ bẹ nulila po avase whẹdida tọn he Jiwheyẹwhe na hẹnṣẹ lẹ po hẹn. (Osọhia 15:1; 16:1) Numimọ awe ehelẹ basi zẹẹmẹ yinukọn dogọ gando whẹdida Ahọluduta lọ tọn lẹ he tindo kanṣiṣa hẹ dindọn atọ̀ntọ po kúnkún opẹ̀n ṣinawetọ tọn po go.—Osọhia 11:14, 15.
Gblọndo Na Kanbiọ Owe-Wiwe Tọn Lẹ:
13:8—Etẹwẹ ‘owe ogbẹ̀ tọn Lẹngbọvu lọ tọn’ nọtena? Ehe nọtena owe-hihá yẹhiadonu tọn he mẹ oyín mẹhe na dugán hẹ Jesu Klisti to Ahọluduta olọn tọn etọn mẹ lẹ tọn kẹdẹ tin te. E bẹ oyín Klistiani yiamisisadode he gbẹ́ pò to aigba ji bo tindo todido lọ nado nọgbẹ̀ to olọn mẹ lẹ tọn hẹn.
13:11-13—Nawẹ gbekanlin ylankan he tindo azò awe lọ yinuwa taidi dlagọni de bo hẹn miyọ́n sọn olọn mẹ wá aigba ji gbọn? Nugbo lọ dọ gbekanlin ylankan he tindo azò awe lọ—yèdọ Huhlọn Aihọn tọn heyin Anglo-Amérique—nọ dọho taidi dlagọni dohia dọ e nọ dobunamẹ, nọ gbidikọnamẹ bo nọ wà danú nado hẹn gbẹtọ lẹ gánnugánnu nado kẹalọyi aṣẹpipa etọn. E hẹn miyọ́n sọn olọn mẹ wá aigba ji to enẹ mẹ dọ e nọ to nuyiwa taidi dọ e yin yẹwhegán nugbo de wẹ nkọ gbọn alọsọakọ́n dali dọ emi ko gbawhàn oylan tọn to wẹkẹ-whàn awe lẹ whenu to owhe kanweko 20tọ lọ mẹ bo ko sọ duto gandudu communiste ji.
16:17—Etẹwẹ “jiwhehomẹ” he ji ogò ṣinawetọ lọ yin kinkọ̀n do? “Jiwhehomẹ” kavi “jẹhọn, NW” lọ nọtena ayilinlẹn Satani tọn, yèdọ “gbigbọ [kavi ayilinlẹn apọ̀nmẹ tọn] he to azọ́nwa to dinvie to ovi tolivivẹ tọn lẹ mẹ.” Aihọn ylankan Satani tọn blebu wẹ nọ gbọ́n jẹhọn adínọ ehe.—Efe. 2:2.
Nuhe Mí Plọn sọn E Mẹ:
13:1-4, 18. ‘Gbekanlin ylankan’ he nọtena gandudu gbẹtọvi lẹ tọn “tọ́n sọn ohù mẹ,” enẹ wẹ sọn bẹplidopọ gbẹtọvi hunyanhunyannọ lẹ ṣẹnṣẹn. (Isa. 17:12, 13; Dan. 7:2-8, 17) Gbekanlin he Satani wleawuna bosọ na huhlọn ehe, tindo sọha lọ 666, he zinnudo obá he mẹ mape etọn yiaga jẹ ji. Nukunnumimọjẹ nuhe gbekanlin lọ nọtena mẹ nọ gọalọna mí ma nado litaina ẹn kavi sẹ̀n ẹn dile gbẹtọ lẹ nọ wà do to paa mẹ.—Joh. 12:31; 15:19.
13:16, 17. Mahopọnna nuhahun depope he mí sọgan pehẹ to nuwiwa egbesọegbesọ tọn lẹ mẹ taidi ‘nuhihọ kavi nusisà,’ mí dona tin to aṣeji ma nado dike gbekanlin lọ ni yinuwado gbẹzan mítọn ji. Alọkikẹyi ‘ohia gbekanlin ylankan lọ tọn do alọ mítọn mẹ kavi do nukọn mítọn’ na dohia dọ mí na dotẹnmẹ gbekanlin ylankan lọ nado deanana nuyiwa po nulẹnpọn mítọn po.
14:6, 7. Nulila angẹli lọ tọn plọn mí dọ mí dona lá wẹndagbe Ahọluduta Jiwheyẹwhe tọn he ko yin didoai lọ to niyaniya mẹ. Mí dona gọalọna mẹhe mí nọ plọn Biblu hẹ lẹ nado dibusi Jehovah Jiwheyẹwhe bo na ẹn gigo.
14:14-20. To whenuena “ojì aigba tọn,” enẹ wẹ bibẹpli mẹhe na yin whinwhlẹngán lẹ tọn, yin hinhẹnwa vivọnu, ojlẹ na sọ na angẹli lọ nado bẹ “ovẹn-sinsẹ́n he to aigba . . . do ahàndanu daho homẹgble Jiwheyẹwhe tọn tọn mẹ.” Ovẹn-sinsẹ́n enẹ—yèdọ aliho gandudu gblezọn gbẹtọvi lẹ tọn he Satani nọ yizan gọna “ohín” sinsẹ́n gbigble etọn lẹ tọn—na yin vivasudo kakadoi. Mí dona magbe ma nado dike ovẹn-sinsẹ́n aigba tọn enẹ ni bẹpla mí.
16:13-16. “Gbigbọ mawé” kavi ohó gbọdo mawé nọtena nujijla aovi lẹ tọn he nọ yin bibasi nado hẹn ẹn diun dọ tuntunjẹgbonu ogò ṣinawe homẹgble Jiwheyẹwhe tọn lẹ tọn ma yinuwado ahọlu aigba tọn lẹ ji gba, kakatimọ yin anadena nado diọnukunsọ Jehovah.—Mat. 24:42, 44.
16:21. Ojlẹ vude jẹnukọnna vivọnu aihọn ehe tọn, nulila whẹdida Jehovah tọn lẹ tọn sọta aihọn ylankan Satani tọn sọgan bẹ hodidọ sinsinyẹn gando whẹdida Jiwheyẹwhe tọn lẹ go hẹn, ehe osin-agó sọgan ko nọtena. Ṣogan, suhugan gbẹtọ lẹ tọn na gbẹ́ to nùzan do Jiwheyẹwhe go janwẹ.
AHỌLU AWHÀNGBATỌ LỌ TO GANDU
“Babilọni Daho” lọ, yèdọ ahọluigba aihọn tọn he yin sinsẹ̀n lalo tọn, yin adà hiọawu aihọn ylankan Satani tọn de. Numimọ 11tọ do e hia taidi “ayọdetọ daho” de—yèdọ yọnnu gblewanọ—he “sinai to kanlin wlanwlan vẹẹ de ji.” Owe-wiwe dohia dọ “azò ao” kanlin he ji e hẹ́ lọ lọsu tọn wẹ na và ẹ sudo gbidigbidi. (Osọhia 17:1, 3, 5, 16) Numimọ he bọdego lẹ yí ayọdetọ lọ jlẹdo “tòdaho” de go bo lá aijijẹ etọn bosọ basi oylọ niyaniya tọn de na omẹ Jiwheyẹwhe tọn lẹ nado “tọ́n sọn e mẹ.” Mẹsusu wẹ blawu na aijijẹ tòdaho enẹ tọn. Ṣigba ayajijẹ tin to olọn mẹ na “alọwle Lẹngbọvu lọ tọn” wutu. (Osọhia 18:4, 9, 10, 15-19; 19:7) To numimọ 13tọ mẹ, mẹhe hẹ́ “osọ́ wewe de” ji tọ́nyi nado funawhàn hẹ akọta lẹ. E và aihọn ylankan Satani tọn sudo.—Osọhia 19:11-16.
Etẹwẹ dogbọn “odàn hoho lọ, he yin Lẹgba, Satani” dali? Whetẹnu wẹ e na yin dindọn “dlan miyọ́n hihla” mẹ? Ehe yin dopo to nuhe ji numimọ 14tọ lọ dọhodo lẹ mẹ. (Osọhia 20:2, 10) Numimọ awe godo tọn lẹ do lehe ogbẹ̀ na te do to Owhe Fọtọ́n lọ whenu hia. Dile “osọhia” lọ to vivọnu wá, Johanu mọ ‘otọ̀ osin ogbẹ̀ tọn he to sisà gbọn ṣẹnṣẹn tòhomẹ-liho lọ tọn,’ po oylọ-basinamẹ jiawu de po hlan ‘mẹdepope he nugbla to hùhù.’—Osọhia 1:1; 22:1, 2, 17.
Gblọndo Na Kanbiọ Owe-Wiwe Tọn Lẹ:
17:16; 18:9, 10—Naegbọn “ahọlu aigba tọn lẹ” blawu na yọnnu ayọdetọ lọ he yelọsu vasudo? Yé blawu kiki na ṣejannabi yetọn wutu. To vasudo Babilọni Daho lọ tọn godo, e wá họnwun na ahọlu aigba tọn lẹ hezeheze dọ yé tindo nuhudo etọn. Babilọni Daho lọ wẹ nọ do nuyiwa kọgbidinamẹ tọn yetọn lẹ hia taidi nuhe sọgbe. E sọ nọ gọalọna yé nado dọ̀n jọja lẹ biọ awhàn mẹ. Humọ, e nọ yí adà titengbe de wà nado hẹn gbẹtọ lẹ litaina aṣẹpatọ lẹ.
19:12—Naegbọn Jesu kẹdẹ wẹ yọ́n oyín he yin didona ẹn lọ? E taidi dọ oyín ehe nọtena otẹn po lẹblanulọkẹyi lẹ po, taidi dehe yin nùdego to Isaia 9:6 mẹ lẹ he Jesu duvivi etọn to azán Oklunọ tọn gbè. Mẹdevo de ma yọ́n oyín ehe adavo ewọ lọsu, na lẹblanulọkẹyi ehelẹ yin vonọtaun podọ ewọ kẹdẹ wẹ sọgan mọnukunnujẹ nuhe e zẹẹmẹdo mẹ nado tin to otẹn he yiaga mọnkọtọn mẹ. Etomọṣo, Jesu má lẹblanulọkẹyi ehelẹ hẹ hagbẹ asiyọyọ etọn tọn lẹ bo ‘wlan oyín yọyọ enẹ do yé go’ to yẹhiadonu-liho.—Osọhia 3:12.
19:14—Mẹnu lẹ wẹ na funawhàn hẹ Jesu to Amagẹdọni? Angẹli lẹ po mẹyiamisisadode he gbawhàn bo ko mọ ale olọn mẹ tọn yetọn yí lẹ po tin to ‘awhànpa olọn tọn lẹ’ mẹ, he na kọnawudopọ hẹ Jesu to awhàn Jiwheyẹwhe tọn fùnfùn mẹ.—Mat. 25:31, 32; Osọhia 2:26, 27.
20:11-15—Oyín mẹnu lẹ tọn wẹ yin winwlan do “owe [kavi owe-hihá] ogbẹ̀ tọn mẹ”? Owe-hihá ehe wẹ bẹ oyín mẹhe na mọ ogbẹ̀ madopodo yí lẹpo tọn hẹn—yèdọ Klistiani yiamisisadode lẹ, gbẹtọ susugege lẹ, po devizọnwatọ nugbonọ Jiwheyẹwhe tọn he na mọ “fọnsọnku dodonọ lẹ tọn” yí po. (Owalọ 24:15; Osọhia 2:10; 7:9) Oyín mẹhe na gọwá ogbẹ̀ to ‘fọnsọnku mawadodonọ lẹ tọn’ whenu lẹ tọn na yin winwlan do ‘owe-hihá ogbẹ̀ tọn mẹ kiki eyin yé yinuwa sọgbe hẹ ‘nuhe yin winwlan do owe-hihá’ nudọnamẹ tọn he na yin hùnhùn to Owhe Fọtọ́n lọ whenu mẹ lẹ. Ṣigba, yinkọ lẹ sọgan yin súnsún sẹ̀ sọn owe lọ mẹ. Oyín mẹyiamisisadode lẹ tọn na gbọṣi e mẹ kakadoi to whenue yé hẹn nugbonọ-yinyin yetọn go kakajẹ okú. (Osọhia 3:5) Oyín mẹhe na nọgbẹ̀ kakadoi to aigba ji lẹ tọn na gbọṣi e mẹ kakadoi to whenuena yé ko jugbọn whlepọn godo tọn mẹ to vivọnu owhe fọtọ́n lọ tọn.—Osọhia 20:7, 8.
Nuhe Mí Plọn sọn E Mẹ:
17:3, 5, 7, 16. “Nuyọnẹn he sọn aga” gọalọna mí nado mọnukunnujẹ “nudabla yọnnu lọ tọn . . . po kanlin [wlanwlan vẹẹ] he ze e jei tọn po” mẹ. (Jak. 3:17) Gbekanlin ylankan yẹhiadonu tọn ehe yin yinyọnẹn jẹnukọn taidi Alẹnu Akọta lẹ tọn bo wá yin yinyọnẹn to godo mẹ taidi Plidopọ Akọta lẹ tọn. Be nudabla he yin gòhùnna ehe ma whàn mí nado yí zohunhun do lá wẹndagbe Ahọluduta Jiwheyẹwhe tọn po azán whẹdida Jehovah tọn po ya?
21:1-6. Mí sọgan deji mlẹnmlẹn dọ opagbe dona he mí na duvivi etọn to gandudu Ahọluduta lọ tọn glọ lẹ tọn na mọ hẹndi dandan. Etẹwutu? Na Biblu dlẹnalọdo opagbe ehelẹ dọmọ: “Yé ko yin hinhẹndi!”—Osọhia 21:6, NW.
22:1, 17. “Otọ̀ osin ogbẹ̀ tọn” nọtena awuwledainanu Jehovah tọn lẹ nado whlẹn gbẹtọvi tonusetọ lẹ sọn ylando po okú po si. Osin ehe tin-to-aimẹ jẹ obá de mẹ todin. Gbọnvona alọkikẹyi oylọ-basinamẹ lọ nado wá “yí osin ogbẹ̀ tọn lọ vọnu” po pinpẹn-nutọn-yinyọnẹn po, mì gbọ mí nisọ yí zohunhun do basi oylọ lọ na mẹdevo lẹ ga!
[Nudọnamẹ odò tọn]
a Nado mọ nudọnamẹ gigọ́ do Osọhia 1:1–12:17 ji, pọ́n “Nuagokun lẹ sọn Owe Osọhia Tọn Mẹ—I” to Atọ̀họ̀-Nuhihọ́ Lọ Tọn 15 janvier 2009 mẹ.
b Nado gbadopọnna wefọ debọdo-dego owe Osọhia tọn lẹ, pọ́n Osọhia—Hẹndi Pete Etọn Sẹpọ!
[Yẹdide to weda 5]
Dona jiawu nankọ lẹ die gbẹtọvi tonusetọ lẹ na duvivi etọn to gandudu Ahọluduta lọ tọn glọ!