Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Naegbọn e yin nujọnu dọ mí ni hẹn tenọgli Klistiani tọn mítọn go?

Tenọgligo hinhẹn nọ dohia dọ mí desọn owanyi mẹ do litaina gandudu Jehovah tọn, podọ mí nọ gbọnmọ dali dohia dọ Satani yin lalonọ. Na tenọgli yin dodonu he ji Jiwheyẹwhe nọ dawhẹna mí do wutu, dandannu de wẹ e yin na todido sọgodo tọn mítọn.—15/12, weda 4-6.

• Etẹwẹ yin delẹ to tẹnmẹ-yinkọ he do azọngban vonọtaun Jesu tọn to lẹndai Jiwheyẹwhe tọn mẹ hia lẹ mẹ?

Ovi detọ́n dopo akàn. Ohó lọ. Niṣẹ. Whẹgbọtọ alẹnu yọyọ lọ tọn. Yẹwhenọ Daho. Okún dopagbe lọ.—15/12, weda 15.

• Nawẹ mí sọgan hẹn ayajẹ he mí nọ mọ to lizọnyizọn mítọn mẹ jideji gbọn?

Mí dona wleawuna ahun mítọn, bo ze ayiha do obá he mẹ mí sọgan gọalọna mẹdevo lẹ jẹ ji. Mí dona nọ dọyẹwheho po linlẹn lọ po nado nọ bẹ plọnmẹ Biblu lẹ jẹeji. Eyin mí dukosọ hẹ mẹhe ma tindo ojlo to wẹndagbe lọ mẹ lẹ, mí sọgan diọalọ na mẹdọnsẹpọ mítọn nado fọnjlodotena gbẹtọ lẹ to aigba-denamẹ mítọn ji.—15/1, weda 8-10.

• Gando ṣiọdidi go, nawẹ nuplọnmẹ Biblu tọn lẹ dona nọ yinuwa do pọndohlan po aṣa Klistiani de tọn po ji gbọn?

Dile etlẹ yindọ Klistiani de sọgan blawu na mẹyiwanna etọn he kú wutu, e nọ yọnẹn dọ mẹhe kú lọ ma yọ́n nude. Eyin mayisenọ lẹ tlẹ mọhodọdo e go, e dona dapana aṣa depope he tindo kanṣiṣa hẹ nuyise lọ dọ mẹhe kú lọ sọgan yinuwado mẹhe tin to ogbẹ̀ lẹ ji. Nado dapana nuhahun lẹ, Klistiani delẹ ko basi kandai anademẹ he na yin hihodo to tito ṣiọdidi tọn yetọn whenu lẹ tọn.—15/2, weda 29-31.

• Be “owe Jaṣali tọn” po “owe awhàn OKLUNỌ tọn” po yin owe Biblu tọn he bu lẹ wẹ ya? (Jọṣ. 10:13; Osọha 21:14)

Lala. E taidi dọ kandai he tin-to-aimẹ to ojlẹ Biblu tọn mẹ bo ma yin gbigbọdo he wekantọ Biblu tọn lẹ dlẹnalọdo wẹ yé yin.—15/3, weda 32.