Job Ze Oyín Jehovah Tọn Sù
Job Ze Oyín Jehovah Tọn Sù
“Donanọ wẹ oyín OKLUNỌ tọn.”—JOB 1:21.
1. Mẹnu wẹ sọgan ko kàn owe Job tọn, podọ to whetẹnu?
MOSE ko tindo nudi owhe 40 to whenue e họ̀n sọn Egipti na homẹgble Falo tọn wutu bo yì Midiani. (Owalọ 7:23) To whenuena e tin to finẹ, e sọgan ko sè dogbọn whlepọn Job tọn dali, yèdọ mẹhe nọ nọ̀ Uzi he ma dẹn do Midiani. To owhe delẹ godo, whenue Mose po akọta Islaeli tọn po sẹpọ Uzi dile yé sẹpọ vivọnu gbejizọnlin zungbo mẹ tọn yetọn, Mose sọgan ko sè dogbọn owhe godo tọn Job tọn lẹ dali. Sọgbe hẹ otàn Ju lẹ tọn, Mose wẹ kàn owe Job tọn to okú Job tọn godo.
2. Aliho tẹlẹ mẹ wẹ owe Job tọn yin asisa tulinamẹ tọn de na devizọnwatọ Jehovah tọn egbezangbe tọn lẹ te?
2 Owe Job tọn nọ hẹn yise devizọnwatọ Jiwheyẹwhe tọn egbezangbe tọn lẹ tọn lodo. To aliho tẹlẹ mẹ? Kandai lọ basi zẹẹmẹ nujijọ titengbe he wá aimẹ to olọn mẹ delẹ tọn bo zinnudo whẹho tangan he gando nupojipetọ-yinyin Jiwheyẹwhe tọn go ji. Otàn Job tọn sọ nọ hẹn nukunnumọjẹnumẹ mítọn siso dogọ na nuhe dù tenọgligo-hinhẹn podọ e nọ gọalọna mí nado yọ́n nuhewutu Jehovah nọ jotẹnna devizọnwatọ etọn lẹ nado jiya to whedelẹnu. Humọ, owe Job tọn do Satani Lẹgba hia taidi Kẹntọgán Jehovah tọn podọ kẹntọ gbẹtọvi lẹ tọn. Owe lọ sọ dohia dọ taidi Job, gbẹtọvi mapenọ lẹ sọgan yin nugbonọ na Jehovah mahopọnna whlepọn sinsinyẹn lẹ. Mì gbọ mí ni gbadopọnna delẹ to nujijọ he go owe Job tọn donù lẹ mẹ.
Satani Whlé Job Pọ́n
3. Etẹwẹ mí yọnẹn gando Job go, podọ naegbọn Satani do diọnukunsọ ẹ?
3 Job yin dawe adọkunnọ nukundeji de, podọ tatọ́-whẹndo tọn dagbe de. Ayihaawe matin dọ ayinamẹtọ he gbẹtọ lẹ nọ na sisi taun de wẹ e yin, podọ e sọ nọ gọalọna wamọnọ lẹ. Hú popolẹpo, Job nọ dibusi Jiwheyẹwhe. Biblu basi zẹẹmẹ Job tọn taidi mẹhe “yin pipé jlọjlọ, podọ mẹhe dibusi Jiwheyẹwhe, bosọ họnsi oylan.” E ma yin adọkun kavi yindidi Job tọn wẹ zọ́n bọ Satani Lẹgba do diọnukunsọ ẹ gba, kakatimọ mẹdezejo jijọ-di-Jiwheyẹwhe tọn etọn wutu wẹ.—Job 1:1; 29:7-16; 31:1.
4. Etẹwẹ tenọgli zẹẹmẹdo?
4 Bẹjẹeji owe Job tọn basi zẹẹmẹ opli de tọn to olọn mẹ, fie angẹli lẹ nọte to Jehovah nukọn te. Satani lọsu wá otẹn lọ mẹ bo sawhẹ delẹ dokọna Job. (Hia Job 1:6-11.) Dile etlẹ yindọ Satani donù nutindo Job tọn lẹ go, tenọgli Job tọn wẹ yin yanwle etọn. Hogbe lọ “tenọgli” bẹ linlẹn lọ nado yin omẹ jlọjlọ, madoblọ, dodonọ, podọ madowango hẹn. To Biblu mẹ, tenọgli gbẹtọ tọn zẹẹmẹdo mẹdezejo mlẹnmlẹn na Jehovah.
5. Owhẹ̀ tẹwẹ Satani sadokọna Job?
5 Satani dọ dọ ṣejannabi wutu wẹ Job to Jiwheyẹwhe sẹ̀n, e ma yin tenọgli etọn wutu gba. Satani sawhẹdokọna Job dọ e na yin nugbonọ na Jehovah dile e na dẹnsọ bọ Jiwheyẹwhe na to didona ẹn bosọ to hihọ́-basina ẹn. Nado na gblọndo whẹsadokọnamẹ Satani tọn, Jehovah na ẹn dotẹnmẹ nado whlé Job nugbonọ lọ pọ́n. Taidi kọdetọn de, to azán dopo gblamẹ, Job sè dọ kanlin etọn lẹ ko yin finfin kavi yin hùhù, suhugan devi etọn lẹ tọn ko yin hùhù, podọ ovi etọn ao lẹ ko kú. (Job 1:13-19) Be Job jogbe to whlepọn Satani tọn lẹ nukọn wẹ ya? Biblu basi zẹẹmẹ lehe Job yinuwa to nugbajẹmẹji lọ whenu do tọn dọmọ: “OKLUNỌ wẹ na, OKLUNỌ wẹ sọ bẹ yì: donanọ wẹ oyín OKLUNỌ tọn.”—Job 1:21.
6. (a) Etẹwẹ jọ to opli devo whenu to olọn mẹ? (b) Mẹnu lẹ wẹ Satani tindo to ayiha mẹ whenue e fọ́n ayihaawe dote gando tenọgli Job tọn na Jehovah go?
6 To enẹgodo, opli devo sọ tin to olọn mẹ. Whladopo dogọ, Satani sawhẹ devo lẹ dokọna Job dọmọ: “Ayú na ayú, mọwẹ, ehe gbẹtọ tindo lẹpo wẹ e na jo na ogbẹ̀ etọn. Ṣigba de alọ towe jẹgbonu lo bo doalọ ohú etọn go po agbasalan etọn po, ewọ bo nasọ gbẹ́ we dai to nukun towe mẹ.” Doayi e go dọ whẹsadokọnamẹ Satani tọn sọ bẹ mẹdevo lẹ hẹn ga. Whenue Lẹgba dọ dọ, ‘Ehe gbẹtọ tindo lẹpo wẹ e na jo na ogbẹ̀ etọn,’ e ma yin tenọgli Job tọn kẹdẹ go wẹ e fọ́n ayihaawe dote gando gba, ṣigba mẹdepope he nọ sẹ̀n Jehovah. Enẹgodo, Jiwheyẹwhe na dotẹnmẹ Satani nado yí azọ́nylankan de do hò Job. (Job 2:1-8) Ṣigba whlepọn Job tọn lẹ ma ko fó do finẹ.
Nuhe Mí Sọgan Plọn sọn Apajlẹ Job Tọn Mẹ
7. Aliho tẹlẹ mẹ wẹ asi po gbẹdohẹmẹtọ Job tọn lẹ po gbidikọna ẹn te?
7 To bẹjẹeji, e mayin Job kẹdẹ wẹ jiya awufiẹsa lọ lẹ tọn gba, ṣigba asi etọn lọsu jiya dopolọ hẹ ẹ. Okú ovi etọn lẹ tọn po adọkunnu he whẹndo lọ hẹnbu lẹ po dona ko hẹn ẹn jẹflumẹ taun. E dona ko blawuna ẹn nado mọdọ asu etọn to oyà azọ̀n sinsinyẹn de tọn ji. E dawhá bo dọna Job dọmọ: “Be hiẹ gbẹsọ hẹn walọ pipé towe go gligli? Gbẹ́ Jiwheyẹwhe dai, bo kú.” Enẹgodo, sunnu atọ̀n delẹ wá—yèdọ Elifazi, Bildadi, podọ Zofali—po linlẹn lọ po nado miọnhomẹna Job. Ṣigba, kakati nado wàmọ, yé yí linlẹn agọ̀ lẹ zan bo do yede hia nado yin “homẹmiọnnamẹtọ mẹhẹnzungbẹdonọ.” Di apajlẹ, Bildadi dọ dọ ovi Job tọn lẹ na ko waylando bo jẹna nuhe jọ do yé go. Elifazi yí ayiha do dọ dọ Job na ko to oyà ylando he e wà wayi lẹ tọn ji. E tlẹ sọ tindo ayihaawe eyin tenọglinọ lẹ họakuẹ to nukun Jiwheyẹwhe tọn mẹ! (Job 2:9, 11; 4:8; 8:4; 16:2; 22:2, 3) Mahopọnna kọgbidinamẹ sinsinyẹn enẹlẹ, Job hẹn tenọgli etọn go. Nugbo wẹ dọ owhẹ̀ etọn ma whẹ́n to whenuena e ‘to whẹsuna ede taidi dodonọ hú Jiwheyẹwhe.’ (Job 32:2) Ṣigba, e hẹn nugbonọ-yinyin etọn go kakajẹ opodo.
8. Apajlẹ dagbe tẹwẹ Elihu zedai na ayinamẹtọ lẹ to egbehe?
8 Bọdo enẹ go, Biblu dọ dọ Elihu lọsu wá dla Job pọ́n. Jẹnukọn whẹ́, Elihu doto ohó he Job po gbẹdohẹmẹtọ etọn atọ̀n lẹ po dọ. Dile etlẹ yindọ Elihu whè hú sunnu ẹnẹ ehelẹ to owhe mẹ, e yí nuyọnẹn zan taun. E dọhona Job po sisi po, bo pà ẹ na dodowiwa etọn. Ṣigba, e sọ dohia dọ Job ko ze ayiha do ede ji zẹjlẹgo bo do ede hia taidi mẹhe madoblọ paali. Enẹgodo, Elihu hẹn Job deji dọ Jiwheyẹwhe sinsẹ̀n po nugbonọ-yinyin po nọ hẹn ale wá to whepoponu. (Hia Job 36:1, 11.) Apajlẹ dagbe nankọ die na mẹhe nọ namẹ ayinamẹ to egbehe lẹ! Elihu whesọ, dotoai ganji bo na pipà to fie e jẹ te, bosọ na ayinamẹ mẹjlọdote tọn lẹ.—Job 32:6; 33:32.
9. Nawẹ Jehovah gọalọna Job gbọn?
9 To godo mẹ, awuji Job to whenue Jehovah dọhona ẹn! Kandai lọ dọmọ: “OKLUNỌ gblọnna Job sọn jẹhọn ahizi mẹ.” Gbọn kanbiọ voovo lẹ yiyizan dali, Jehovah gọalọna ẹn to aliho he jọmẹ de mẹ nado jla linlẹn etọn do. Job kẹalọyi wọhẹ lọ sọn ojlo mẹ wá bo yigbe dọmọ: “Yẹn ma yin onú tlala de gba.” E sọ yidogọ dọ emi “sọ lẹnvọjọ to kọ́gudu po afín po mẹ.” To whenuena Jehovah ko dọhona Job godo, E gblehomẹ do gbẹdohẹmẹtọ atọ̀n lọ lẹ go, na yé ma dọ “nuhe yin jijlọ” wutu. Job dona hodẹ̀ do ota yetọn mẹ. Enẹgodo, “OKLUNỌ sọ diọ mẹglọnọ Job tọn, whenuena e hodẹ̀ na họntọn etọn lẹ lọ: OKLUNỌ sọ na Job whla awe [hú] ehe e ko tindo dai.”—Job 38:1; 40:4; 42:6-10.
Nawẹ Owanyi Mítọn Na Jehovah Siso Sọ?
10. Naegbọn Jehovah ma do miyọnnukundo whẹsadokọnamẹ Satani tọn kavi và ẹ sudo?
10 Jehovah wẹ Mẹdatọ podọ Nupojipetọ wẹkẹ tọn lọ. Naegbọn e ma do miyọnnukundo whẹsadokọnamẹ Lẹgba tọn? Jiwheyẹwhe yọnẹn dọ nado miyọnnukundo whẹsadokọnamẹ Satani tọn kavi và ẹ sudo ma na didẹ whẹho he yin finfọndote lọ gba. Lẹgba sọalọakọ́n dọ Job, yèdọ devizọnwatọ nukundeji Jehovah tọn, ma na hẹn nugbonọ-yinyin etọn go eyin e hẹn adọkunnu etọn lẹpo bu. Ṣigba, Job ma jogbe. Enẹgodo, Satani sọalọakọ́n dọ gbẹtọvi lẹpo wẹ na lẹ́ sọn Jiwheyẹwhe dè, eyin yé jiya to agbasa-liho. Job jiya, ṣigba e hẹn tenọgli etọn go. Gbọnmọ dali, dile etlẹ yindọ dawe nugbonọ enẹ yin mapenọ, e do Satani hia taidi lalonọ. Etẹwẹ dogbọn sinsẹ̀n-basitọ Jiwheyẹwhe tọn devo lẹ dali?
11. Nawẹ Jesu dohia hezeheze dọ whẹsadokọnamẹ Satani tọn lẹ yin lalo gbọn?
11 Na nugbo tọn, devizọnwatọ Jiwheyẹwhe tọn dopodopo, he hẹn tenọgligo mahopọnna nudepope he Satani nọ hẹn wá e ji nọ dohia dọ whẹsadokọnamẹ kẹntọ ylankan enẹ tọn yin lalo to whẹho mẹlọ lọsu tọn mẹ. Jesu wá aigba ji bo dohia hezeheze dọ whẹsadokọnamẹ Satani tọn lẹ yin lalo. Mẹpipe wẹ Jesu yin taidi otọ́ mítọn tintan Adam. Nugbonọ-yinyin Jesu tọn kakajẹ okú dohia dọ Satani yin lalonọ podọ lalo wẹ whẹsadokọnamẹ etọn lẹ.—Osọhia 12:10.
12. Dotẹnmẹ hundote po azọngban tẹ po wẹ devizọnwatọ Jehovah tọn lẹ tindo?
12 Ṣigba, Satani gbẹ́ pò to sinsẹ̀n-basitọ Jehovah tọn lẹ whlé pọ́n. Dopodopo mítọn tindo dotẹnmẹ hundote po azọngban lọ po nado dohia gbọn tenọgligo-hinhẹn mítọn dali dọ mí to Jehovah sẹ̀n na mí yiwanna ẹn wutu, e ma yin na whẹwhinwhẹ́n ṣejannabi tọn lẹ wutu gba. Nukun tẹwẹ mí do nọ pọ́n azọngban enẹ? Mí nọ pọ́n ẹn hlan taidi lẹblanulọkẹyi de nado yin nugbonọ na Jehovah. Homẹmiọnnamẹnu de wẹ e sọ yin nado yọnẹn dọ Jehovah nọ na mí huhlọn nado doakọnna whlepọn lẹ podọ dile e wà do to whẹho Job tọn mẹ, e ma na dike mí ni yin whiwhlepọn hugan nuhe mí sọgan doakọnna.—1 Kọl. 10:13.
Satani—Kẹntọ Podọ Atẹṣitọ Ylankan De
13. Nudọnamẹ tẹlẹ wẹ owe Job tọn na mí gando Satani go?
13 To Owe Wiwe Glẹki tọn lẹ mẹ, mí mọ nudọnamẹ susu gando lehe Satani diọnukunsọ Jehovah do go, podọ to owe Osọhia tọn mẹ, mí mọ lehe nupojipetọ-yinyin Jehovah tọn na yin whẹsuna bọ Satani na yin vivasudo mlẹnmlẹn do. To Owe Wiwe Heblu tọn lẹ mẹ, mí mọ lehe Satani diọnukunsọ Jehovah bosọ hẹn gbẹtọvi lẹ buali do. Owe Job tọn gọalọna mí nado yọ́n nususu gando atẹṣiṣi Satani tọn go. To whenuena Satani yì opli he yin bibasi to olọn mẹ lọ lẹ tẹnmẹ, e ma yì po linlẹn lọ po nado pà Jehovah gba. Ayiha gigẹdẹ po yanwle ylankan lẹ po wẹ e tindo. Whenue e sawhẹdokọna Job bọ Jiwheyẹwhe na ẹn dotẹnmẹ nado whlé e pọ́n godo, “Satani tọ́nyi sọn nukọn OKLUNỌ tọn.”—Job 1:12; 2:7.
14. Nawẹ Satani yinuwa hẹ Job gbọn?
14 Gbọnmọ dali, owe Job tọn do Satani hia taidi kẹntọ gbẹtọvi lẹ tọn he ma tindo lẹblanu. To gblagbla ojlẹ he mẹ opli he yin nùdego to Job 1:6 po Job 2:1 mẹ po yin bibasi te mẹ, ojlẹ he ma yin nùdego de juwayi, ehe mẹ Job yin whiwhlepọn te sinsinyẹn. Nugbonọ-yinyin Job tọn na dotẹnmẹ Jehovah nado gblọnna Satani dọ: “[Job gbẹ́ hẹn] walọpipe etọn go gligli, yídomọ hiẹ sisẹ́ mi do e ji, nado ze e mì pete matin whẹho de.” Ṣigba, Satani ma yigbe dọ emi ko duwinyan gba. Kakatimọ, e biọ Jiwheyẹwhe dọ Job ni yin whiwhlepọn to aliho sinsinyẹn devo mẹ. Gbọnmọ dali, Lẹgba whlé Job pọ́n to whenue e yin adọkunnọ podọ to whenue e jẹhẹ́n klókló. E họnwun dọ Satani ma nọ wàlẹblanuna wamọnọ kavi mẹhe adángbò lẹ. E nọ gbẹwanna tenọglinọ lẹ. (Job 2:3-5) Ṣigba, nugbonọ-yinyin Job tọn dohia dọ Satani yin lalonọ.
15. Etẹwẹ atẹṣitọ egbezangbe tọn lẹ yí do di Satani?
15 Satani wẹ nudida tintan he lẹzun atẹṣitọ. Jijọ Lẹgba tọn nkọ wẹ atẹṣitọ egbezangbe tọn lẹ nọ dohia. Ayiha ylankan yetọn sọgan hẹn yé nado nọ mọhodọdo hagbẹ agun tọn delẹ, mẹho agun tọn lẹ, kavi Hagbẹ Anademẹtọ lọ go. Atẹṣitọ delẹ nọ jẹagọdo oyín Jiwheyẹwhe tọn, Jehovah yiyizan. Yé ma nọ tindo ojlo nado plọnnu gando Jehovah go kavi tlẹ sẹ̀n ẹn. Taidi otọ́ yetọn Satani, atẹṣitọ lẹ nọ yangbé tenọglinọ lẹ tọn. (Joh. 8:44) Abajọ devizọnwatọ Jehovah tọn lẹ do nọ nọla mlẹnmlẹn na yé!—2 Joh. 10, 11.
Job Ze Oyín Jehovah Tọn Sù
16. Nawẹ Job yinuwa hlan Jehovah gbọn?
16 Job yí oyín Jehovah tọn zan bosọ pà ẹ. Mahopọnna dọ linlin okú ovi etọn lẹ tọn gbàhundona ẹn, Job ma dowhẹ Jiwheyẹwhe to aliho depope mẹ. Dile etlẹ yindọ Job lẹndọ Jiwheyẹwhe wẹ hẹn nugbajẹmẹji lọ lẹ wá, to popolẹpo mẹ e ze oyín Jehovah tọn sù. Job dọ to nukọn mẹ dọmọ: “Doayi e go, budisi OKLUNỌ tọn, enẹ wẹ nuyọnẹn; podọ nado fọnyi sọn oylan mẹ wẹ wuntuntun.”—Job 28:28.
17. Etẹwẹ gọalọna Job nado hẹn tenọgli etọn go?
17 Etẹwẹ gọalọna Job nado hẹn tenọgli etọn go? E họnwun dọ, whẹpo nugbajẹmẹji lọ lẹ do bẹjẹeji, e ko wleawuna haṣinṣan pẹkipẹki de hẹ Jehovah. Dile etlẹ yindọ mí ma tindo kunnudenu depope dọ Job yọnẹn dọ Satani to nukundiọsọ Jehovah, e magbe nado hẹn nugbonọ-yinyin etọn go. E dọmọ: “Kaka yẹn [na do] kú yẹn ma na de walọpipe ṣie sọn dè e gba.” (Job 27:5) Nawẹ Job wleawuna haṣinṣan pẹkipẹki ehe gbọn? Matin ayihaawe, e yọ́n pinpẹn nuhe e sè gando aliho he mẹ Jiwheyẹwhe yinuwa hẹ tọgbo etọn lẹ, yèdọ Ablaham, Isaki, po Jakobu po te go tọn. Podọ gbọn ayidido nudida lẹ go, Job na ko doayi jẹhẹnu Jehovah tọn susu go.—Hia Job 12:7-9, 13, 16.
18. (a) Nawẹ Job do mẹdezejo etọn na Jehovah hia gbọn? (b) Aliho tẹlẹ mẹ wẹ mí nọ hodo apajlẹ dagbe Job tọn te?
18 Nuhe Job plọn lẹ nọ whàn ẹn nado hẹn homẹ Jehovah tọn hùn. E nọ sanvọ́ to gbesisọ mẹ na e nọ dibu dọ vlavo hagbẹ whẹndo tọn etọn lẹ sọgan ko wà nude he hẹn homẹgble Jiwheyẹwhe kavi “zánnu do Jiwheyẹwhe go to ayiha yetọn mẹ” wutu. (Job 1:5) Etlẹ yin to whlepọn sinsinyẹn glọ, Job gbẹ́ to nuhe sọgbe dọ gando Jehovah go. (Job 10:12) Apajlẹ dagbe nankọ die! Mílọsu dona plọn ohó he pegan Jehovah tọn po lẹndai etọn lẹ po to gbesisọ mẹ. Mí nọ tẹdo aṣa dagbe gbigbọmẹ tọn lẹ go taidi nupinplọn, opli lẹ yìyì, dẹ̀hiho po yẹwheho wẹndagbe lọ tọn didọ po. Humọ, mí nọ wà nuhe go mí pé lẹpo nado hẹn oyín Jehovah tọn zun yinyọnẹn na mẹlẹpo. Podọ kẹdẹdile tenọgli Job tọn hẹn homẹ Jehovah tọn hùn do, mọ wẹ tenọgli devizọnwatọ Jiwheyẹwhe tọn egbezangbe tọn lẹ tọn nọ hẹn homẹ Jehovah tọn hùn do niyẹn. Mí na gbadopọnna ehe to hosọ he bọdego mẹ.
Be Hiẹ Flin Ya?
• Naegbọn Satani Lẹgba ze ayidonugo do Job ji?
• Whlepọn tẹlẹ wẹ Job doakọnna podọ nawẹ e yinuwa gbọn?
• Etẹwẹ na gọalọna mí nado hẹn tenọgligo dile Job wà do?
• Etẹwẹ mí plọn gando Satani go to owe Job tọn mẹ?
[Kanbiọ Oplọn tọn lẹ]
[Yẹdide to weda 4]
Otàn Job tọn flin mí whẹho tangan he gando nupojipetọ-yinyin Jiwheyẹwhe tọn go
[Yẹdide to weda 6]
Ninọmẹ tẹlẹ glọ wẹ tenọgli towe sọgan yin whiwhlepọn te?