Yọ́n Pinpẹn Jesu Tọn Taidi Davidi po Sọlọmọni Daho lọ Po

“Pọ́n, ode hú Sọlọmọni tin tofi.”—MAT. 12:42.

1, 2. To pọndohlan gbẹtọ tọn mẹ, naegbọn e do yin nupaṣamẹ dọ Jiwheyẹwhe dọna Samuẹli nado yiamisisadode Davidi taidi ahọlu?

 DAVIDI ma tindo awusọhia ahọlu de tọn. To nukun yẹwhegán Samuẹli tọn mẹ, e ma yin nude hugan jọja lẹngbọhọtọ de poun. Humọ, Bẹtlẹhẹm, otò he mẹ e wá sọn ma diyin sọmọ. E yin alọdlẹndo taidi otò “pẹvi . . . to whédo Juda tọn lẹ ṣẹnṣẹn.” (Mika 5:2) Ṣigba, dẹpẹ he yè ma sọgan lẹnnu jẹ e ji ehe wẹ Samuẹli na wá yiamisisadode taidi ahọlu sọgodo tọn Islaeli tọn.

² E ma yin Davidi wẹ visunnu tintan he Jẹsse, otọ́ etọn dohia Samuẹli nado yiamisisadode gba; mọ e masọ yin visunnu awetọ kavi atọ̀ntọ he e hẹnwa gba. Davidi, visunnu godo tọn to visunnu ṣinatọ̀n Jẹsse tọn lẹ mẹ, ma tlẹ tin to whégbè to whenuena Samuẹli wá nado yiamisisadode dopo to visunnu dawe nugbonọ enẹ tọn lẹ mẹ taidi ahọlu Islaeli tọn he na bọdego. Ṣigba, Davidi  wẹ Jehovah de, podọ nudide etọn wẹ yin nujọnu.—1 Sam. 16:1-10.

3. (a) Etẹwẹ Jehovah nọ mọ taidi nujọnu hugan to whenuena e to mẹde gbeje pọ́n? (b) Etẹwẹ jọ to whenue Samuẹli yiamisisadode Davidi?

³ Nuhe Samuẹli ma sọgan mọ wẹ Jehovah mọ. Jiwheyẹwhe yọ́n ninọmẹ ahun mẹ tọn Davidi tọn, podọ enẹ jẹ etọn ji. To Jiwheyẹwhe dè, awusọhia gbonu tọn tata ma yin nude; ṣigba nuhe mẹlọ yin to homẹ wẹ yin nujọnu. (Hia 1 Samuẹli 16:7.) Enẹwutu, to whenue Samuẹli mọdọ Jehovah ma de depope to visunnu mẹho Jẹsse tọn ṣinawe lẹ mẹ, e biọ dọ yè ni plan pẹvi pete lọ wá sọn danji. Kandai lọ dọmọ: “Ewọ sọ do omẹ hlan bo hẹn ẹn wá whégbè. Dinvie e yin omẹ vẹẹ, podọ . . . nukunta whanpẹnọ tọn de, bosọ disán nado pọ́n. OKLUNỌ sọ dọmọ, Fọnṣite, samisisana ẹn: na ehe wẹ ewọ. Whenẹnu wẹ Samuẹli yí lànzò amì tọn lọ, bo samisisana ẹn to ogbla mẹmẹsunnu etọn lẹ tọn mẹ: gbigbọ OKLUNỌ tọn sọ yí hlọnhlọn do wá Davidi ji sọn azán nẹ gbè jei jei.”—1 Sam. 16:12, 13.

Aliho He mẹ Davidi Taidi Klisti te Lẹ

4, 5. (a) Donù aliho he mẹ Davidi taidi Jesu te delẹ go. (b) Naegbọn e do sọgbe nado ylọ Jesu dọ Davidi Daho lọ?

⁴ Taidi Davidi, Jesu yin jiji to Bẹtlẹhẹm to nudi owhe 1100 delẹ to jiji Davidi tọn godo. To nukun mẹsusu tọn mẹ, Jesu lọsu ma tindo awusọhia ahọlu de tọn. Enẹ wẹ yindọ, e ma yin ahọlu wunmẹ he susu Islaelivi lẹ tọn to nukundo. Ṣogan, dile e yin do to whẹho Davidi tọn mẹ, Jesu wẹ Jehovah de. Taidi Davidi, Jehovah yiwanna ẹn tlala. a (Luku 3:22) To whẹho Jesu lọsu tọn mẹ ‘gbigbọ OKLUNỌ tọn wá e ji.’

⁵ Aliho he mẹ Davidi taidi Jesu te ma ko fó do finẹ. Di dohia, Davidi yin didehia gbọn ayinamẹtọ etọn Ahitofẹli dali, podọ Jesu yin didehia gbọn apọsteli etọn Juda Iskaliọti dali. (Ps. 41:9; Joh. 13:18) Davidi po Jesu po tindo zohunhun vẹkuvẹku na nọtẹn sinsẹ̀n-bibasi Jehovah tọn. (Ps. 27:4; 69:9; Joh. 2:17) Jesu sọ yin whédutọ Davidi tọn ga. Whẹpo Jesu do yin jiji, angẹli de dọna onọ̀ etọn dọmọ: “[Jehovah] Jiwheyẹwhe nasọ yí ofìn Davidi otọ́ etọn tọn na ẹn.” (Luku 1:32; Mat. 1:1) Ṣigba, na opagbe he gando Mẹssia go lẹpo na mọ hẹndi to Jesu mẹ wutu, ewọ klo hú Davidi tlala. Ewọ wẹ Davidi Daho lọ, yèdọ Ahọlu Mẹssia he yè ko to nukundo sọn ojlẹ dindẹn.—Joh. 7:42.

Hodo Ahọlu Lẹngbọhọtọ Lọ

6. Aliho tẹlẹ mẹ wẹ Davidi yin lẹngbọhọtọ dagbe de te?

⁶ Jesu sọ yin lẹngbọhọtọ ga. Nawẹ yè nọ yọ́n lẹngbọhọtọ dagbe de gbọn? E nọ yí adọgbigbo do plan kanlinpa etọn pé, nọ na núdùdù yé bosọ nọ basi-hihọ́na yé to gbesisọ mẹ. (Ps. 23:2-4) To jọja whenu Davidi tọn, e yin lẹngbọhọtọ de bo nọ penukundo lẹngbọ otọ́ etọn tọn lẹ go ganji. Davidi ze ogbẹ̀ ede tọn do owù mẹ bo yí adọgbigbo do basi hihọ́na lẹngbọ lọ lẹ sọn kinnikinni po beali de po si.—1 Sam. 17:34, 35.

7. (a) Etẹwẹ hẹn Davidi pegan na azọngban etọn lẹ taidi ahọlu? (b) Nawẹ Jesu do ede hia taidi Lẹngbọhọtọ Dagbe lọ gbọn?

⁷ Owhe he Davidi yizan nado penukundo lẹngbọ lẹ go to danji podọ to pópló lẹ ji hẹn ẹn pegan na azọngban he e na didá nado penukundo akọta Islaeli tọn go lẹ. b (Ps. 78:70, 71) Jesu lọsu do ede hia nado yin lẹngbọhọtọ apajlẹ dagbenọ de. E mọ huhlọn po anademẹ po yí sọn Jehovah dè dile e to nukunpedo “lẹngbọpa pẹvi” etọn po “lẹngbọ devo” lẹ po go. (Luku 12:32; Joh. 10:16) Gbọnmọ dali, Jesu do ede hia taidi Lẹngbọhọtọ Dagbe lọ. E jẹakọ hẹ lẹngbọpa etọn taun bo nọ ylọ oyín lẹngbọ  dopodopo tọn. E yiwanna lẹngbọ etọn lẹ sọmọ bọ to whenuena e tin to aigba ji, e desọn ojlo mẹ wá nado yí ede do sanvọ́ do ota yetọn mẹ. (Joh. 10:3, 11, 14, 15) Taidi Lẹngbọhọtọ Dagbe lọ, Jesu wà onú delẹ he Davidi ma na ko penugo nado wà gbede. Avọ́sinsan ofligọ tọn etọn hùn dotẹnmẹ dotena gbẹtọvi lẹ nado yin whinwhlẹngán sọn okú si. Nudepope ma na doalọtena ẹn nado deanana “lẹngbọpa pẹvi” etọn biọ ogbẹ̀ jọmaku tọn mẹ to olọn mẹ, podọ nado plan “lẹngbọ devo” etọn lẹ biọ ogbẹ̀ madopodo mẹ to aihọn yọyọ dodowiwa tọn de mẹ, fie ohla nuwledutọ lẹ ma na tin te.—Hia Johanu 10:27-29.

Hodo Ahọlu Awhàngbatọ Lọ

8. Nawẹ Davidi do ede hia taidi ahọlu awhàngbatọ de gbọn?

⁸ Whenue Davidi to gandu taidi ahọlu, e yin awhànfuntọ akonka he basi hihọ́na akọta Jiwheyẹwhe tọn, podọ “OKLUNỌ sọ na awhàngba hlan Davidi to fihe e to yìyì lẹpo.” To gandudu Davidi tọn glọ, dogbó akọta lọ tọn dlẹnkan sọn tọ̀sisa Egipti tọn kọ̀n kakajẹ tọ̀sisa Euflate kọ̀n. (2 Sam. 8:1-14) Po alọgọ Jehovah tọn po, e lẹzun ahọlu he dohuhlọn hugan de. Biblu dọmọ: “Linlin Davidi tọn sọ di pé biọ aigba lẹpo mẹ; OKLUNỌ sọ hẹn osi etọn wá akọta lẹpo ji.”—1 Otan. 14:17.

9. Do lehe Jesu he yin Ahọlu Dide lọ yin awhàngbatọ de gbọn hia.

⁹ Taidi Ahọlu Davidi, Jesu lọsu yin adọgbotọ. To whenuena Jesu lẹzun Ahọlu Dide, e yàn aovi lẹ jẹgbonu bo whlẹn mẹhe tin to nuyiwadomẹji yetọn glọ lẹ. (Malku 5:2, 6-13; Luku 4:36) Kẹntọgán lọ, Satani Lẹgba lọsu ma tlẹ tindo huhlọn do e ji. Po alọgọ Jehovah tọn po, Jesu gbawhàn aihọn he tin to huhlọn Satani tọn glọ tọn.—Joh. 14:30; 16:33; 1 Joh. 5:19.

10, 11. Etẹwẹ yin azọngban Jesu tọn taidi Ahọlu Awhàngbatọ de to olọn mẹ?

¹⁰ Nudi owhe 60 to okú po fọnsọnku Jesu tọn yì olọn mẹ po godo, apọsteli Johanu mọ numimọ dọdai tọn de he gando azọngban Jesu tọn go taidi Ahọlu Awhàngbatọ to olọn mẹ. Johanu wlan dọmọ: “Pọ́n, osọ́ wewe de; ewọ he sinai to e ji sọ tindo ogá dopo; yè sọ yí jẹgbakun de na ẹn: e sọ tọ́njẹgbonu to awhàngbigba mẹ, podọ nado gbawhàn.” (Osọhia 6:2) Jesu wẹ to osọ́ wewe lọ kùn. “Yè . . . yí jẹgbakun de na ẹn” to whenue e yin zizedo ofìn ji taidi Ahọlu to olọn mẹ to 1914. Enẹgodo, e “tọ́njẹgbonu to awhàngbigba mẹ.” Mọwẹ, taidi Davidi, Jesu yin ahọlu awhàngbatọ de. Ojlẹ vude to whenue e yin zizedo ofìn ji taidi Ahọlu Ahọluduta Jiwheyẹwhe tọn godo, e gbawhàn Satani tọn bo yàn ewọ po aovi etọn lẹ po dlan aigba ji. (Osọhia 12:7-9) E na zindonukọn to awhàngbigba etọn mẹ kaka e na do “gbawhàn” aihọn ylankan Satani tọn mlẹnmlẹn.—Hia Osọhia 19:11, 19-21.

¹¹ Podọ taidi Davidi, Jesu yin ahọlu awuvẹmẹtọ de he na basi hihọ́na “gbẹtọ susugege” lọ nado lùn Amagẹdọni tọ́n. (Osọhia 7:9, 14) Humọ, to gandudu Jesu po whédutọgbẹ́ etọn 144000 he na yin finfọnsọnku lẹ po glọ, “fọnsọnku dodonọ lẹ tọn, po mawadodonọ lẹ po tọn de na tin.” (Owalọ 24:15) Mẹhe na yin finfọnsọnku do aigba ji lẹ na tindo todido lọ nado nọgbẹ̀ kakadoi to aigba ji. Sọgodo jiawu tẹ die to tepọn yé! Mì gbọ mímẹpo ni magbe nado nọ “wà dagbe” na mí nido nọgbẹ̀ to whenuena aigba na gọ́ na dodonọ lẹ, yèdọ mẹjidugando ayajẹnọ Davidi Daho lọ tọn lẹ.—Ps. 37:27-29.

Sọlọmọni Biọ Nuyọnẹn to Odẹ̀ Mẹ

12. Etẹwẹ Sọlọmọni biọ to odẹ̀ mẹ?

¹² Sọlọmọni, ovi Davidi tọn lọsu sọ yinuwa taidi Jesu. c To whenuena Sọlọmọni lẹzun ahọlu, Jehovah sọawuhia ẹ to odlọ de mẹ bo dọna ẹn dọ emi na na ẹn nudepope he e biọ. Sọlọmọni sọgan ko biọ adọkun susu, huhlọn, kavi ogbẹ̀ gaa. Kakatimọ, e gbọn ṣejannabi matindo dali biọ Jehovah dọmọ: “Na nuyọnẹn po oyọnẹn po mi dinvie, na yẹn nido nọ yì gbonu bosọ nọ wá whégbè to gbẹtọ helẹ nukọn: na mẹnu wẹ sọgan dawhẹna gbẹtọ towe ehelẹ, he yin daho mọnkọ?” (2 Otan. 1:7-10)  Jehovah sè odẹ̀ Sọlọmọni tọn.—Hia 2 Otannugbo lẹ 1:11, 12.

13. Naegbọn mẹdepope ma do tindo nuyọnẹn sọ Sọlọmọni to ojlẹ etọn mẹ, podọ mẹnu wẹ yin Asisa nuyọnẹn etọn tọn?

¹³ Whenue Sọlọmọni gbẹ́ pò to nugbonọ yin na Jehovah, mẹdepope ma dọ ohó nuyọnẹn tọn sọ ẹ to ojlẹ etọn mẹ. Sọlọmọni dọ “howhinwhẹn [kavi oló] fọtọ́n atọ̀n.” (1 Ahọ. 4:30, 32, 34) Susu yetọn lẹ yin kinkàndai podọ yé gbẹ́ họakuẹ na mẹhe to nuyọnẹn dín lẹ. Ahọsi Ṣeba tọn zingbejizọnlin na nudi kilomẹtlu 2400 nado yí “kanbiọ sinsinyẹn lẹ” do tẹ́n nuyọnẹn etọn pọ́n. Nuhe Sọlọmọni dọ lẹ po kọdetọn dagbe ahọluduta etọn tọn lẹ po jiawu do ahọsi lọ. (1 Ahọ. 10:1-9) Biblu do mẹhe yin Asisa nuyọnẹn Sọlọmọni tọn hia dọmọ: “Aigba lẹpo sọ nọ to nukun Sọlọmọni tọn dín, nado sè nuyọnẹn etọn, he Jiwheyẹwhe yí do ayiha etọn mẹ.”—1 Ahọ. 10:24.

Hodo Ahọlu Nuyọnẹntọ Lọ

14. Aliho tẹlẹ mẹ wẹ Jesu “hú Sọlọmọni” te?

¹⁴ E họnwun dọ gbẹtọvi dopo gee wẹ tindo nuyọnẹn hugan Sọlọmọni. Jesu Klisti wẹ omẹ enẹ, he basi zẹẹmẹ ede tọn taidi mẹhe “hú Sọlọmọni.” (Mat. 12:42) Jesu dọ “ohó ogbẹ̀ madopodo tọn” lẹ. (Joh. 6:68) Di apajlẹ, Yẹwhehodidọ Osó ji tọn lọ hẹn delẹ to oló Sọlọmọni tọn lẹ mẹ họnwun dogọ. Sọlọmọni basi zẹẹmẹ do onú delẹ ji, he nọ hẹn ayajẹ wá na sinsẹ̀n-basitọ Jehovah tọn lẹ. (Howh. 3:13; 8:32, 33; 14:21; 16:20) Jesu zinnudeji dọ ayajẹ nugbo nọ wá sọn nuhe tindo kanṣiṣa hẹ sinsẹ̀n-bibasi Jehovah tọn po hẹndi opagbe Jiwheyẹwhe tọn lẹ tọn po mẹ. E dọmọ: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ, na yetọn wẹ ahọluduta olọn tọn.” (Mat. 5:3, NW) Mẹhe nọ yí nunọwhinnusẹ́n he tin to ohó Jesu tọn mẹ lẹ do yizan mẹ lẹ nọ dọnsẹpọ Jehovah “asisa ogbẹ̀ tọn.” (Ps. 36:9; Howh. 22:11; Mat. 5:8) Klisti do “nuyọnẹn Jiwheyẹwhe tọn” hia. (1 Kọl. 1:24, 30) Taidi Ahọlu Mẹssia lọ, Jesu Klisti tindo “gbigbọ nuyọnẹn” tọn.—Isa. 11:2.

15. Nawẹ mí sọgan mọaleyi sọn nuyọnẹn Jiwheyẹwhe tọn mẹ gbọn?

¹⁵ Nawẹ míwlẹ, taidi hodotọ Sọlọmọni Daho lọ tọn, sọgan mọaleyi sọn nuyọnẹn Jiwheyẹwhe tọn mẹ gbọn? Na nuyọnẹn Jehovah tọn tin to Ohó etọn mẹ wutu, mí dona dovivẹnu vẹkuvẹku nado dín in mọ gbọn sọwhiwhe yíyí do plọn Biblu dali, titengbe ohó Jesu tọn he yin kinkàndai lẹ, bo nọ lẹnayihamẹpọn do yé ji. (Howh. 2:1-5) Humọ, mí dona zindonukọn nado to nuyọnẹn Jiwheyẹwhe tọn biọ. Biblu na mí jide dọ Jiwheyẹwhe na sè odẹ̀ ahundopo tọn he mí nọ hò nado biọ alọgọ etọn lẹ. (Jak. 1:5) Po alọgọ gbigbọ wiwe tọn po, mí na mọ nuyọnẹn họakuẹ he tin to Ohó Jiwheyẹwhe tọn mẹ lẹ, he sọgan gọalọna mí nado duto avùnnukundiọsọmẹnu lẹ ji bo basi nudide nuyọnẹn tọn lẹ. (Luku 11:13) Sọlọmọni sọ yin yiylọdọ “yẹwhehodọtọ lọ” kavi mẹhe nọ bẹ gbẹtọ lẹ pli nado ‘plọn nuyọnẹn’ yé. (Yẹwh. 12:9, 10) Taidi Ota agun Klistiani tọn, Jesu lọsu nọ bẹ omẹ etọn lẹ pli. (Joh. 10:16; Kọl. 1:18) Enẹwutu, mí na wà dagbe nado nọ yì opli agun tọn lẹ, fie mí nọ ‘plọn nuyọnẹn’ te.

16. Aliho tẹlẹ mẹ wẹ Sọlọmọni taidi Jesu te?

¹⁶ Ahọlu Sọlọmọni basi wadotana susu. E basi tito azọ́n voovo lẹ tọn to akọta lọ blebu mẹ, yèdọ nado deanana owhé ahọlu tọn lẹ gbigbá, aliho lẹ bibasi, osinwhín lẹ kùnkùn, gọna tòdaho lẹ gbigbá na agbànhọ lẹ, awhàn-kẹkẹ lẹ, po osọ́nọ lẹ po. (1 Ahọ. 9:17-19) Ahọluduta etọn blebu duale onú voovo he e doai lẹ tọn. Jesu lọsu wà onú mọnkọtọn de. E do  agun etọn ai do “osé” ji. (Mat. 16:18) Ewọ nasọ deanana nuhe na yin wiwadotana to aihọn yọyọ lọ mẹ lẹ.—Isa. 65:21, 22.

Hodo Ahọlu Jijọho Tọn Lọ

17. (a) Etẹwẹ hẹn gandudu Sọlọmọni tọn yin ayidego tọn? (b) Etẹwẹ Sọlọmọni ma penugo nado wà?

¹⁷ Yinkọ lọ Sọlọmọni wá sọn hogbe dowhenu tọn de mẹ he zẹẹmẹdo “jijọho.” Ahọlu Sọlọmọni dugán to Jelusalẹm, yèdọ tòdaho he oyín etọn zẹẹmẹdo “Jijọho Tintindo do Ogbẹ́ Awe Ji.” To gandudu owhe 40 tọn etọn whenu, akọta Islaeli tọn blebu duvivi jijọho he yé ma ko tindo numimọ etọn pọ́n tọn. Biblu dọ gando owhe gandudu Sọlọmọni tọn ehelẹ go dọmọ: “Juda po Islaeli po sọ yí jijọho do to ninọ̀, omẹ dopodopo to vẹntin etọn glọ, podọ to ovòtin etọn glọ, sọn Dani yèdọ jẹ Beẹli-ṣeba, to azán Sọlọmọni tọn lẹpo mẹ.” (1 Ahọ. 4:25) Ṣogan, mahopọnna nuyọnẹn Sọlọmọni tọn lẹpo, e ma penugo nado de mẹjidugando etọn lẹ sọn nuyiwadomẹji azọ̀n, ylando, po okú po tọn si. Ṣigba, Sọlọmọni Daho lọ na de mẹjidugando etọn lẹ sọn nuyiwadomẹji enẹ lẹpo glọ.—Hia Lomunu lẹ 8:19-21.

18. Ninọmẹ tẹlẹ wẹ mí nọ duvivi etọn to agun Klistiani tọn mẹ?

¹⁸ To egbehe lọsu, mí nọ duvivi jijọho tọn to agun Klistiani tọn mẹ. Na nugbo tọn, mí to vivi paladisi gbigbọmẹ tọn de tọn dù. Mí nọ nọ̀ jijọho mẹ hẹ Jiwheyẹwhe podọ hẹ kọmẹnu mítọn lẹ. Doayi nuhe Isaia dọ dọdai etọn gando ninọmẹ he mí to vivi etọn dù to egbehe lẹ go dọmọ: “Yé nasọ yí ohí yetọn do tùn agbogọdọẹ: akọta ma to na ze ohí do akọta ji ba, mọ yé ma to na plọn awhànfunfun ba.” (Isa. 2:3, 4) Eyin mí nọ dike gbigbọ Jiwheyẹwhe tọn ni deanana mí, mí na yidogọna jijọho enẹ.

19, 20. Whẹwhinwhẹ́n tẹlẹ wẹ mí tindo nado jaya?

¹⁹ Ṣigba, jijọho sọgodo tọn na tlẹ sọ pọnte hú enẹ. Dile gbẹtọvi tonusetọ lẹ na to vivi jijọho he yé ma ko tindo numimọ etọn pọ́n tọn dù to gandudu Jesu tọn glọ, yé na jẹ ‘mẹdekannu sọn mẹglọnọ hẹngble tọn mẹ’ vudevude kaka yé nado jẹ pipé kọ̀n. (Lom. 8:21) To whenue yé na ko jugbọn whlepọn godo tọn lọ mẹ to Gandudu Owhe Fọtọ́n tọn lọ whenu, “homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.” (Ps. 37:11; Osọhia 20:7-10) Na nugbo tọn, gandudu Klisti Jesu tọn na yọ́n hugan Sọlọmọni tọn to aliho he mayọnjlẹ de mẹ!

²⁰ Dile akọta Islaeli tọn jaya to anademẹ Mose, Davidi po Sọlọmọni po tọn glọ do, mílọsu na jaya to gandudu Klisti tọn glọ, podọ ayajẹ mítọn na tlẹ sọ gọfla hugan enẹ. (1 Ahọ. 8:66) Mí dona dopẹna Jehovah, mẹhe do Ovi detọ́n dopo akàn etọn, he yin Mose, Davidi po Sọlọmọni Daho lọ po hlan!

[Nudọnamẹ odò tọn]

Be Hiẹ Sọgan Na Gblọndo Ya?

• Nawẹ Jesu yin Davidi Daho lọ gbọn?

• Nawẹ Jesu yin Sọlọmọni Daho lọ gbọn?

• Adà gandudu Jesu he yin Davidi po Sọlọmọni Daho lọ po tọn tẹwẹ dọ̀n we dogo?

[Kanbiọ Oplọn tọn lẹ]

[Yẹdide to weda 31]

Nuyọnẹn he Jiwheyẹwhe na Sọlọmọni yin ohia nuyọnẹn Sọlọmọni Daho lọ tọn

[Yẹdide to weda 32]

Gandudu Jesu tọn na yọ́n hugan gandudu Davidi po Sọlọmọni po tọn to aliho he mayọnjlẹ de mẹ!