Angẹli lẹ Yin “Gbigbọ Devizọnwiwa Tọn” Lẹ
Angẹli lẹ Yin “Gbigbọ Devizọnwiwa Tọn” Lẹ
“Be e ma yin yemẹpo wẹ gbigbọ devizọnwiwa tọn, he yè dohlan nado wadevizọn na yé he na yin whédutọ whlẹngán tọn lẹ tọn wutu?”—HEB. 1:14.
1. Homẹmiọnnamẹ tẹwẹ mí sọgan mọyi sọn Matiu 18:10 po Heblu lẹ 1:14 po mẹ?
JESU KLISTI na avase mẹdepope he sọgan jlo nado hẹn hodotọ etọn lẹ dahli dọmọ: “Mì payi, dọ mì vlẹ dopo to pẹvi helẹ de mẹ blo: na yẹn dọ hlan mì, dọ, to olọn mẹ, whepoponu wẹ angẹli yetọn lẹ nọ pọ́n nukun mẹ Otọ́ ṣie he tin to olọn mẹ tọn.” (Mat. 18:10) To whenuena apọsteli Paulu to hodọ gando angẹli nugbonọ lẹ go, e wlan dọmọ: “Be e ma yin yemẹpo wẹ gbigbọ devizọnwiwa tọn, he yè dohlan nado wadevizọn na yé he na yin whédutọ whlẹngán tọn lẹ tọn wutu?” (Heb. 1:14) Hogbe homẹmiọnnamẹ tọn enẹlẹ na jide mí dọ Jiwheyẹwhe nọ yí nudida olọn mẹ tọn ehelẹ zan nado gọalọna gbẹtọvi lẹ. Etẹwẹ Biblu dọna mí gando angẹli lẹ go? Nawẹ yé nọ gọalọna mí gbọn? Etẹwẹ mí sọgan plọn sọn apajlẹ yetọn lẹ mẹ?
2, 3. Etẹwẹ yin delẹ to azọngban he nudida gbigbọnọ olọn mẹ tọn lẹ tindo mẹ?
2 Angẹli nugbonọ livi susu wẹ tin to olọn mẹ. Yemẹpo wẹ yin “hlọnhlọnnọ to huhlọn mẹ . . . he to ohó etọn basi.” (Ps. 103:20; hia Osọhia 5:11.) Ovi gbigbọmẹ tọn ehelẹ tindo jẹhẹnu Jiwheyẹwhe tọn nkọ lẹ, bosọ tindo mẹdekannujẹ nudide bibasi tọn. Yé yin tito-basina to aliho dagbe mẹ, podọ Jiwheyẹwhe ze yé do otẹn he yiaga lẹ mẹ, bọ yé sọ tindo angẹligán he yin Mikaẹli—yèdọ oyín he Jesu tindo to olọn mẹ. (Dan. 10:13; Juda 9) “Viplọnji to yé he yè dá lẹpo mẹ” ehe, wẹ “Ohó” kavi Hoyidọtọ Jiwheyẹwhe tọn mẹhe Jehovah yizan nado dá nuhe pò lẹpo.—Kọl. 1:15-17; Joh. 1:1-3.
3 To anademẹ angẹligán lọ tọn glọ, selafu lẹ nọ lá wiwe-yinyin Jehovah tọn bo nọ gọalọna omẹ etọn lẹ nado yin wiwe to gbigbọ-liho. Kelubimi lẹ sọ tin ga, yèdọ yé he nọ nọgodona nupojipetọ-yinyin Jiwheyẹwhe tọn. (Gẹn. 3:24; Isa. 6:1-3, 6, 7) Angẹli kavi wẹnsagun devo lẹ tindo azọngban voovo lẹ to ojlo Jiwheyẹwhe tọn hinhẹndi mẹ.—Heb. 12:22, 23.
4. (a) Etẹwẹ yin nuyiwa angẹli lẹ tọn to whenue aigba yin didoai? (b) Etẹwẹ na ko yin kọdetọn lọ, eyin gbẹtọvi lẹ ko yí mẹdekannujẹ nudide bibasi tọn zan ganji?
4 Angẹli lẹpo wẹ jaya to ‘didoai aigba tọn’ whenu podọ homẹ yetọn sọ hùn tlala to azọ́ndenamẹ yetọn lẹ kọ̀n dile aigba lẹzun fie gbẹtọvi sọgan nọ̀. (Job 38:4, 7) Jehovah dá gbẹtọ bọ e “whè pẹvide hú angẹli lẹ” ṣigba to ‘apajlẹ’ Etọn mẹ. Enẹ zọ́n bọ gbẹtọvi lẹ sọgan do jẹhẹnu vonọtaun Mẹdatọ lọ tọn lẹ hia. (Heb. 2:7; Gẹn. 1:26) Eyin Adam po Evi po gọna kúnkan yetọn lẹ ko yí nunina mẹdekannujẹ nudide bibasi tọn zan ganji wẹ, yé na ko duvivi ogbẹ̀ tọn to paladisi aigba ji tọn de mẹ taidi dopo to whẹndo nudida nuyọnẹntọ Jehovah tọn lẹ tọn mẹ.
5, 6. Atẹṣiṣi tẹwẹ fọ́n to olọn mẹ, podọ nawẹ Jiwheyẹwhe yinuwa gbọn?
5 Matin ayihaawe, angẹli wiwe lẹ dona ko jọsi to whenue yé mọdọ atẹṣiṣi fọ́n to whédo Jiwheyẹwhe tọn mẹ. Dopo to yé mẹ masọ tindo pekọ to Jehovah pipà mẹ ba ṣigba e jlo nado yin sinsẹ̀n-basina. E hẹn ede zun Satani (he zẹẹmẹdo “Agọjẹdomẹtọ”) gbọn ayihaawe finfọndote gando jlọjẹ Jehovah tọn nado dugán go dali, podọ e sọ gbọn ojlo zogbe dali tẹnpọn nado whlẹnagbà hẹ Jiwheyẹwhe. To whenue Satani dolalo, e gbọn ayiha gigẹdẹ dali klọ asu po asi po tintan lọ nado kọnawudopọ hẹ ẹ to atẹṣiṣi do Mẹdatọ owanyinọ lọ go mẹ.—Gẹn. 3:4, 5; Joh. 8:44.
6 Jehovah dawhẹna Satani to afọdopolọji gbọn dọdai Biblu tọn tintan didọ dali dọmọ: “Yẹn nasọ yí okẹ̀n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe, hiẹ na só afọgbẹn etọn.” (Gẹn. 3:15) Okẹ̀n lọ na zindonukọn to Satani po “yọnnu” Jiwheyẹwhe tọn po ṣẹnṣẹn. Mọwẹ, Jehovah nọ pọ́n titobasinanu olọn mẹ tọn nudida gbigbọnọ nugbonọ lẹ tọn hlan taidi asi yiwanna de he ewọ wlealọ hẹ taidi Asu de to yẹhiadonu-liho. Dọdai ehe wleawuna dodonu dejidego de na todido, dile etlẹ yindọ nudọnamẹ gigọ́ he gandego lẹ gbẹ́ yin “aṣli wiwe” de he na to wunhọ́n vudevude. Lẹndai Jiwheyẹwhe tọn wẹ yindọ dopo to nudida he tin to adà titobasinanu olọn mẹ tọn etọn mẹ de na sukúndona atẹṣitọ lẹpo podọ gbọn ewọ gblamẹ “ehe tin to olọn mẹ, po ehe tin to aihọn mẹ po” na yin kinkọndopọ.—Efe. 1:8-10.
7. Etẹwẹ angẹli delẹ wà to azán Noa tọn gbè, podọ etẹwẹ yin kọdetọn lọ?
7 To azán Noa tọn gbè, angẹli delẹ “jo fininọ jlọjlọ yetọn do” bo ze agbasa gbẹtọ tọn do nado hẹn pekọwana ojlo ṣejannabi tọn yetọn lẹ to aigba ji. (Juda 6; Gẹn. 6:1-4) Jehovah yàn atẹṣitọ enẹlẹ do zinvlu gọ́ngọ́n mẹ, bọ yé gbọnmọ dali kọnawudopọ hẹ Satani nado lẹzun ‘nudida gbigbọnọ ylankan’ podọ kẹntọ ylankan devizọnwatọ Jiwheyẹwhe tọn lẹ tọn.—Efe. 6:11-13; 2 Pita 2:4.
Nawẹ Angẹli lẹ Nọ Gọalọna Mí Gbọn?
8, 9. Nawẹ Jehovah yí angẹli lẹ zan nado gọalọna gbẹtọvi lẹ gbọn?
8 Ablaham, Jakobu, Mose, Jọṣua, Isaia, Daniẹli, Jesu, Pita, Johanu, po Paulu po tin to mẹhe angẹli lẹ yilizọn na lẹ mẹ. Angẹli nugbonọ lẹ hẹn whẹdida Jiwheyẹwhe tọn lẹ ṣẹ, podọ yé hẹn owẹ̀n dọdai tọn po anademẹ lẹ po yì na gbẹtọvi lẹ, kakajẹ Osẹ́n Mose tọn ji. (2 Ahọ. 19:35; Dan. 10:5, 11, 14; Owalọ 7:53; Osọhia 1:1) Na mí ko tindo Ohó Jiwheyẹwhe tọn blebu to egbehe wutu, e sọgan nọma yin dandan dọ angẹli lẹ ni hẹn owẹ̀n Jiwheyẹwhe tọn lẹ wá na mí. (2 Tim. 3:16, 17) Ṣigba to lẹdo gbigbọmẹ tọn yetọn mẹ, angẹli lẹ nọ hẹn alọnu ján to ojlo Jiwheyẹwhe tọn hinhẹndi mẹ podọ to alọgigọna devizọnwatọ etọn lẹ mẹ.
9 Biblu na mí jide dọmọ: “Angẹli OKLUNỌ tọn lẹdo yé he dibusi i lẹ pé, bosọ whlẹn yé.” (Ps. 34:7; 91:11) Na whẹho tenọgligo-hinhẹn tọn wutu, Jehovah jotẹnna Satani nado hẹn whlepọn wunmẹ lẹpo wá mí ji. (Luku 21:16-19) Etomọṣo, Jiwheyẹwhe yọ́n obá he mẹ devizọnwatọ etọn lẹ sọgan doakọnna whlepọn lẹ po nugbonọ-yinyin po jẹ. (Hia 1 Kọlintinu lẹ 10:13.) Angẹli lẹ nọ tin to aṣeji to whepoponu nado gọalọna mí sọgbe hẹ ojlo Jiwheyẹwhe tọn. Yé whlẹn Ṣadlaki, Mẹṣaki, Abẹdinẹgo, Daniẹli, po Pita po ṣigba ma glọnalina okú Stefani po Jakobu po tọn sọn alọ kẹntọ lẹ tọn mẹ gba. (Dan. 3:17, 18, 28; 6:22; Owalọ 7:59, 60; 12:1-3, 7, 11) Ninọmẹ po whẹho lọ lẹ po gbọnvo. Mọdopolọ, delẹ to mẹmẹsunnu mítọn lẹ mẹ yin hùhù to osla yasanamẹ Nazi tọn lẹ mẹ, ṣogan Jehovah hẹn ẹn diun dọ suhugan yetọn yin whinwhlẹngán.
10. Gbọnvona alọgọ angẹli lẹ tọn, mẹnu lẹ wẹ sọgan sọ gọalọna mí?
10 Owe-wiwe ma plọnmẹ dọ dopodopo mítọn tindo angẹli mẹgopọntọ de gba. Mí nọ hodẹ̀ po jide po dọ “eyin mí biọ nudepope kẹdẹdi ojlo etọn, [Jiwheyẹwhe nọ] sè mítọn.” (1 Joh. 5:14) Nugbo wẹ dọ Jehovah sọgan do angẹli hlan nado gọalọna mí, ṣigba e sọgan sọ wàmọ to aliho voovo mẹ ga. Klistiani hatọ lẹ sọgan yin whinwhàn nado gọalọna mí bosọ miọnhomẹna mí. Jiwheyẹwhe sọgan na mí nuyọnẹn po huhlọn he mí tindo nuhudo etọn po nado doakọnna “owùn [de] to agbasalan mẹ” he sọgan ko to tuklado mí taidi dọ “mẹdagun Satani tọn” de wẹ to nutun mí nkọ.—2 Kọl. 12:7-10; 1 Tẹs. 5:14.
Hodo Apajlẹ Jesu Tọn
11. Nawẹ angẹli lẹ yin yiyizan nado gọalọna Jesu gbọn, podọ etẹwẹ e wadotana gbọn nugbonọ-yinyin etọn na Jiwheyẹwhe dali?
11 Pọ́n aliho he mẹ Jehovah yí angẹli lẹ zan to whẹho Jesu tọn mẹ te. Yé lá jiji po fọnsọnku etọn po bosọ yilizọn na ẹn to whenue e tin to aigba ji. Angẹli lẹ sọgan ko glọnalina kẹntọ etọn lẹ nado wle e bo hù i. Kakatimọ, angẹli de yin didohlan nado na ẹn huhlọn. (Mat. 28:5, 6; Luku 2:8-11; 22:43) To kọndopọ mẹ hẹ lẹndai Jehovah tọn, Jesu kú okú avọ́sinsan tọn bo dohia dọ gbẹtọvi pipé sọgan hẹn tenọgligo na Jiwheyẹwhe mahopọnna lehe whlepọn lọ sinyẹn sọ. Enẹwutu, Jehovah fọ́n Jesu do ogbẹ̀ jọmaku tọn mẹ to olọn mẹ, bo na ẹn “aṣẹ lẹpo” bosọ yí angẹli lẹ do oglọ etọn. (Mat. 28:18; Owalọ 2:32; 1 Pita 3:22) Gbọnmọ dali, Jesu lẹzun adà tangan “okún” “yọnnu” Jiwheyẹwhe tọn lọ tọn.—Gẹn. 3:15; Gal. 3:16.
12. Aliho tẹ mẹ wẹ mí sọgan hodo apajlẹ lẹnpọn dagbe Jesu tọn te?
12 Jesu yọnẹn dọ e ma sọgbe nado whlé Jehovah pọ́n gbọn didonukun dọ angẹli lẹ ni basi hihọ́na ẹn dali, eyin e tlẹ yinuwa taidi wunvinọ. (Hia Matiu 4:5-7.) Enẹwutu, mì gbọ mí ni hodo apajlẹ Jesu tọn nado nọ yinuwa po ‘ayiha zinzin tọn’ po bo dapana mídelẹ zizedo owù he ma yin dandan tọn lẹ mẹ, ṣogan nọ doakọnna homẹkẹn po jidide po.—Titu 2:12.
Nuhe Mí Sọgan Plọn sọn Apajlẹ Angẹli Nugbonọ lẹ Tọn Mẹ
13. Etẹwẹ mí sọgan plọn sọn apajlẹ angẹli nugbonọ he yin nùdego to 2 Pita 2:9-11 mẹ lẹ tọn mẹ?
13 To whenue apọsteli Pita to nugbẹna mẹhe nọ “zannu” do devizọnwatọ dide Jehovah tọn lẹ go, e dlẹnalọdo apajlẹ dagbe angẹli nugbonọ lẹ tọn. Dile etlẹ yindọ angẹli ehelẹ tindo huhlọn taun, po whiwhẹ po, yé ma nọ yí yede do basi whẹdatọ bo nọ to whẹsadokọnamẹ gba, ‘na yé tindo sisi na Jehovah wutu.’ (Hia 2 Pita 2:9-11.) Mì gbọ mílọsu ni nọ dapana whẹdidana ode awetọ to aliho agọ̀ mẹ, bo nọ na sisi mẹhe yin nugopọntọ to agun mẹ lẹ, bosọ nọ jo whẹho lẹ do alọmẹ na Jehovah, Whẹdatọ Daho lọ.—Lom. 12:18, 19; Heb. 13:17.
14. Apajlẹ sinsẹ̀nzọnwiwa po whiwhẹ po tọn tẹlẹ wẹ angẹli lẹ zedai na mí?
14 Angẹli Jehovah tọn lẹ ze apajlẹ dagbe sinsẹ̀nzọnwiwa po whiwhẹ po tọn lẹ dai na mí. Angẹli delẹ gbẹ́ nado dọ yinkọ yetọn na gbẹtọvi lẹ. (Gẹn. 32:29; Whẹ. 13:17, 18) Dile etlẹ yindọ livi susu nudida gbigbọnọ lẹ tọn wẹ tin to olọn mẹ, oyín Mikaẹli po Gabliẹli po tọn kẹdẹ go wẹ Biblu donù. Ehe sọgan gọalọna mí ma nado na gbégbò he ma jẹ angẹli lẹ. (Luku 1:26; Osọhia 12:7) Whenue apọsteli Johanu jẹklo nado litaina angẹli de, e gbẹnuna ẹn dọmọ: “Pọ́n, hiẹ wàmọ blo: devi hatọ de wẹ yẹn po hiẹ po, po yẹwhegán mẹmẹsunnu towe lẹ po.” (Osọhia 22:8, 9) Jiwheyẹwhe kẹdẹ wẹ mí dona sẹ̀n bo nọ hodẹ̀ hlan.—Hia Matiu 4:8-10.
15. Nawẹ angẹli lẹ ze apajlẹ dai na mí gando sọwhiwhe go gbọn?
15 Angẹli lẹ sọ ze apajlẹ dai na mí gando sọwhiwhe go. Dile etlẹ yindọ yé tindo ojlo sinsinyẹn to aṣli wiwe Jiwheyẹwhe tọn lẹ yinyọnẹn mẹ, popolẹpo ma yin didohia yé. Biblu dọmọ: “Angẹli lẹ jlo nado doun [onú ehelẹ] mẹ pọ́n.” (1 Pita 1:12) Enẹwutu, etẹwẹ yé wà? Yé yí sọwhiwhe do nọte kakajẹ whenue Jiwheyẹwhe hẹn “nuyọnẹn hunkọhunkọ” etọn “zun yinyọnẹn . . . gbọn agun lọ” dali.—Efe. 3:10, 11.
16. Nawẹ walọyizan mítọn lẹ nọ yinuwado angẹli lẹ ji gbọn?
16 Klistiani he tin to whlepọn glọ lẹ nọ lẹzun ‘nupinpọn de na angẹli lẹ.’ (1 Kọl. 4:9) Homẹ nọ hùn angẹli lẹ tlala nado mọ nuyiwa nugbonọ-yinyin tọn mítọn lẹ bo tlẹ nọ jaya to whenue ylandonọ de lẹnvọjọ. (Luku 15:10) Angẹli lẹ sọ nọ doayi walọ dagbe yọnnu Klistiani lẹ tọn go. Biblu dohia dọ “e jẹ dọ yọnnu ni tindo ohia mẹmẹglọ tọn de to ota, na angẹli lẹ wutu.” (1 Kọl. 11:3, 10, NW) Mọwẹ, homẹ nọ hùn angẹli lẹ nado mọdọ yọnnu Klistiani lẹ po devizọnwatọ Jiwheyẹwhe tọn he tin to aigba ji lẹpo kọngbedopọ hẹ tito yẹwhehọluduta tọn po tito tatọ́-yinyin tọn po. Tonusise mọnkọtọn nọ yin nuflinmẹ dagbe de na ovi olọn mẹ tọn Jiwheyẹwhe tọn lẹ.
Angẹli lẹ Nọ Nọgodona Azọ́n Yẹwhehodidọ lọ Tọn
17, 18. Naegbọn mí sọgan dọ dọ angẹli lẹ nọ nọgodona azọ́n yẹwhehodidọ tọn mítọn?
17 Angẹli lẹ doalọ to nujijọ ayidego tọn he wá aimẹ to “azán Oklunọ tọn gbè” delẹ mẹ. Nujijọ ehelẹ bẹ jiji Ahọluduta lọ tọn to 1914 gọna Satani po aovi etọn lẹ po yinyan sọn olọn mẹ gbọn “Mikaẹli po angẹli etọn lẹ po” dali hẹn. (Osọhia 1:10; 11:15; 12:5-9) Apọsteli Johanu mọ “angẹli . . . de to zinzlọn to olọn ṣẹnṣẹn, bo tindo wẹndagbe madopodo de to alọmẹ, nado dọyẹwheho hlan yé he tin to aigba ji lẹ.” Angẹli lọ lá dọmọ: “Mì dibusi Jiwheyẹwhe, bosọ na gigo e; na whẹdida whenu etọn wá; mì sọ litaina [Ewọ] he dá olọn, aigba, ohù, po asisa otọ̀ tọn lẹ po.” (Osọhia 14:6, 7) Enẹwutu, dile devizọnwatọ Jehovah tọn lẹ to yẹwheho wẹndagbe Ahọluduta he yin didoai lọ tọn lá mahopọnna nukundiọsọmẹ sinsinyẹn Lẹgba tọn lẹ, yé nọ dejido godonọnamẹ angẹli lẹ tọn go.—Osọhia 12:13, 17.
18 To egbehe, angẹli lẹ ma nọ deanana mí yì ahunjijlọnọ lẹ dè gbọn hodidọ na mí dali dile e deanana Filipi yì ojọ̀ Etiopianu lọ dè do gba. (Owalọ 8:26-29) Ṣigba, numimọ egbezangbe tọn susu dohia dọ angẹli lẹ nọ nọgodona azọ́n yẹwhehodidọ Ahọluduta lọ tọn bosọ nọ deanana mí yì “mẹhe tindo ninọmẹ ahun mẹ tọn he jẹ na ogbẹ̀ madopodo lẹ” dè. a (Owalọ 13:48, NW) Enẹwutu, nujọnu wẹ e yin nado nọ tindo mahẹ gbesisọ tọn to lizọnyizọn lọ mẹ nado sọgan yí adà mítọn wà to mẹhe tindo ojlo nado “sẹ̀n Otọ́ to [gbigbọ] po nugbo po mẹ” lẹ dindinmọ mẹ.—Joh. 4:23, 24.
19, 20. Adà tẹlẹ yiwà wẹ angẹli lẹ te to nujijọ he to hiadogona ‘vivọnu titonu lọ tọn’ lẹ mẹ?
19 Whenue Jesu to hodọ gando azán mítọn go, e dọ dọ ‘to vivọnu titonu lọ tọn,’ angẹli lẹ na “klan omẹ ylanylan lẹ sọn dodonọ lẹ” go. (Mat. 13:37-43, 49) Angẹli lẹ nọ yí adà de wà to jibẹwawhé godo tọn po ohia didogona mẹyiamisisadode lẹ po mẹ. (Hia Matiu 24:31; Osọhia 7:1-3) Humọ, angẹli lẹ na kọnawudopọ hẹ Jesu to whenue e na “klan lẹngbọ . . . lẹ sọn gbọgbọẹ lẹ go.”—Mat. 25:31-33, 46.
20 “To whenuena yè na do Jesu Oklunọ hia sọn olọn mẹ, po angẹli huhlọnnọ etọn lẹ po, . . . yé he ma yọ́n Jiwheyẹwhe lẹ . . . , podọ yé he ma setonuna wẹndagbe Jesu Klisti Oklunọ mítọn tọn” lẹpo wẹ na yin vivasudo. (2 Tẹs. 1:6-10) Whenue Johanu mọ nujijọ enẹ dopolọ to numimọ mẹ, e do Jesu po awhànpa angẹli lẹ tọn po hia taidi mẹhe to osọ́ wewe lẹ kùn nado yì funawhàn to dodo mẹ.—Osọhia 19:11-14.
21. Etẹwẹ angẹli he “tindo họnhungan odò mapote lọ tọn, [bọ] kọgàn daho de sọ tin to alọ etọn mẹ” lọ na wà na Satani po aovi etọn lẹ po?
21 Johanu sọ “mọ angẹli de jẹte sọn olọn mẹ ja odò, e tindo họnhungan odò mapote lọ tọn, kọgàn daho de sọ tin to alọ etọn mẹ.” Ehe ma yin mẹdevo de hugan Mikaẹli angẹligán lọ, mẹhe na dogàn Lẹgba bo dọ̀n ẹn dlan odò mapote mẹ, to pọmẹ hẹ aovi etọn lẹ. Yé na yin tuntundote na ojlẹ gli de to vivọnu Gandudu Owhe Fọtọ́n Klisti tọn, yèdọ whenue gbẹtọvi pipé lẹ na jugbọn whlepọn godo tọn mẹ. To enẹgodo, Satani po atẹṣitọ devo lẹ po na yin vivasudo. (Osọhia 20:1-3, 7-10; 1 Joh. 3:8) Atẹṣiṣi do Jiwheyẹwhe go depope ma nasọ tin ba.
22. Adà tẹwẹ angẹli lẹ na yiwà to nujijọ he tin to yakẹ lọ mẹ, podọ nawẹ mí dona nọ pọ́n azọngban yetọn hlan gbọn?
22 Tundote sọn aihọn ylankan Satani tọn ehe si ko to yakẹ. Angẹli lẹ na yí adà tangan de wà to nujijọ ayidego tọn ehelẹ mẹ, he na suwhẹna nupojipetọ-yinyin Jehovah tọn bo na hẹn lẹndai etọn na aigba po gbẹtọvi lẹ po di mlẹnmlẹn. Matin ayihaawe, “gbigbọ devizọnwiwa tọn, he yè dohlan nado wadevizọn na yé he na yin whédutọ whlẹngán tọn lẹ” wẹ angẹli lẹ yin. Enẹwutu, mì gbọ mí ni dopẹna Jehovah Jiwheyẹwhe na aliho he mẹ e nọ yí angẹli lẹ zan nado gọalọna mí te, na mí nido wà ojlo etọn bo duvivi ogbẹ̀ madopodo tọn.
[Nudọnamẹ odò tọn]
a Pọ́n Les Témoins de Jéhovah: Prédicateurs du Royaume de Dieu weda 549-551.
Nawẹ Hiẹ Na Na Gblọndo Gbọn?
• Nawẹ nudida gbigbọnọ lẹ yin tito-basina gbọn?
• Etẹwẹ angẹli delẹ wà to azán Noa tọn gbè?
• Nawẹ Jiwheyẹwhe nọ yí angẹli lẹ zan nado gọalọna mí gbọn?
• Adà tẹ yiwà wẹ angẹli nugbonọ lẹ te to egbehe?
[Kanbiọ Oplọn tọn lẹ]
[Yẹdide to weda 21]
Homẹ nọ hùn angẹli lẹ nado wà ojlo Jiwheyẹwhe tọn
[Yẹdide to weda 23]
Dile e te to whẹho Daniẹli tọn mẹ, angẹli lẹ nọ tin to aṣeji to whepoponu nado wà ojlo Jiwheyẹwhe tọn
[Yẹdide to weda 24]
Gboadọ, angẹli lẹ to godonọna azọ́n yẹwhehodidọ Ahọluduta lọ tọn!
[Yẹdide to weda 24]
Globe: NASA photo