Yin Nugbonọ Taidi Itai

“KIKLO po nujiawu po wẹ azọ́n towe, [Jehovah] E Jiwheyẹwhe Ganhunupo; dodo po nugbo po wẹ ali towe, hiẹ Ahọlu mẹwiwe lẹ tọn. Mẹnu wẹ ma na dubusi we, [Jehovah] E, bo ma na pagigona oyín towe? Na hiẹ dopo kẹdẹ wẹ [nugbonọ].” Ohàn he yin jiji to olọn mẹ gbọn “yé he gọ̀ to awhàngba mẹ sọn kanlin lọ dè, [podọ] sọn boṣiọ etọn dè” ehe dọ̀n ayidonugo wá nugbonọ-yinyin Jiwheyẹwhe tọn ji. (Osọhia 15:2-4) Jehovah jlo dọ sinsẹ̀n-basitọ etọn lẹ ni nọ hodo apajlẹ etọn to jẹhẹnu etọn he dọnmẹdogo lẹ didohia mẹ.—Efe. 4:24.

To vogbingbọn mẹ, Satani Lẹgba nọ wà nuhe go e pé lẹpo nado klan devizọnwatọ Jiwheyẹwhe tọn he tin to aigba ji lẹ sọn owanyi Jiwheyẹwhe he sẹ̀n yé te tọn mẹ. Etomọṣo, mẹsusu ko tẹdo nugbonọ-yinyin yetọn na Jiwheyẹwhe go etlẹ yin to ninọmẹ he sinyẹn taun lẹ glọ. Lehe mí dopẹ́ dọ Jehovah nọ yọ́n pinpẹn mẹdezejo mọnkọ tọn taun do sọ! Na nugbo tọn, Biblu na mí jide dọ: “OKLUNỌ yiwanna  whẹdida, bo masọ nọ gbẹ́ [nugbonọ] etọn lẹ dai.” (Ps. 37:28) Nado gọalọna mí nado gbọṣi nugbonọ-yinyin mẹ, e ko wleawuna kandai nuyiwa nugbonọ susu tọn do Ohó etọn mẹ. Dopo to yé mẹ wẹ kandai Itai Gitinu lọ tọn.

‘Jonọ po Gbéjinu de Po’

E taidi dọ tòdaho diyin Filistininu lẹ tọn he yin Gati mẹ wẹ Itai wá sọn, yèdọ fie Goliati gángánsu lọ po kẹntọ dobu Islaeli tọn lẹ po wá sọn. To ajiji mẹ, yinkọ Itai awhànfuntọ numimọnọ lọ tọn sọawuhia to Biblu mẹ to whenue Absalọmi to ogbé Ahọlu Davidi tọn yàn. Itai po sunnu Filistininu 600 he hodo e lẹ po yin gbéjinu to lẹdo Jelusalẹm tọn mẹ.

Ninọmẹ Itai po mẹhe hodo e lẹ po tọn sọgan ko hẹn Davidi flin ojlẹ he mẹ ewọ lọsu họ̀njẹgbé te bọ ewọ po awhànfuntọ Islaeli tọn 600 po yì aigba Filistininu lẹ tọn ji to Akiṣi, ahọlu Gati tọn dè. (1 Sam. 27:2, 3) Etẹwẹ Itai po sunnu etọn lẹ po na wà dile Absalọmi fọ́ngu do Davidi ji? Be yé na nọgodona Absalọmi wẹ, kavi nọ̀ kada, kavi dọ yé na kọnawudopọ hẹ Davidi po sunnu etọn lẹ po?

Yí nukun homẹ tọn do pọ́n dile Davidi to hinhọ̀n sọn Jelusalẹm, bo nọte to fide he nọ yin yiylọdọ Bẹtimẹlhaki he zẹẹmẹdo “Ohọ̀ He Dẹn Lọ.” Vlavo e na ko yin ohọ̀ godo tọn to Jelusalẹm, eyin hiẹ jei Osó Olivieli tọn ji, whẹpo do dasá Agbàdo Kidlọni tọn. (2 Sam. 15:17) Finẹ wẹ Davidi vọ́ awhànfuntọ etọn lẹ gbeje pọ́n te dile yé to wiwayi. Pọ́n! E ma yin Islaelivi nugbonọ lẹ kẹdẹ wẹ tin po e po gba, ṣigba Kẹlẹtinu lẹpo gọna Pẹlẹtinu lẹpo sọ tin po e po ga. Humọ, Gitinu lọ lẹpo—yèdọ Itai po awhànfuntọ 600 etọn lẹ po—sọ gọna yé.—2 Sam. 15:18.

Po awuvẹmẹ sisosiso po, Davidi dọna Itai dọmọ: “Etẹwutu wẹ hiẹ ga hodo mí jei? Lẹ́, bo nọ̀ ahọlu dè [he dona ko yin Absalọmi]: na jonọ de wẹ hiẹ, podọ ga gbéjinu de; lẹ́ do otẹn towe titi mẹ. Osọ fi wẹ hiẹ wá, yẹn nisọ hẹn we to egbé to oji yì to odò yì po mí po, mimọ yẹn jei fie yẹn plá? Hiẹ ni lẹ́, bo plan mẹmẹsunnu towe lẹ yì; lẹblanu po nugbo po ni tin to dè we.”—2 Sam. 15:19, 20.

Gblọndo Itai tọn do nugbonọ-yinyin mawhango etọn hia. E dọmọ: “Le OKLUNỌ to ogbẹ̀, podọ le ahọlu klunọ ṣie sọ to ogbẹ̀, nugbonugbo otẹn fie mẹ ahọlu klunọ ṣie na te, eyin na okú kavi na ogbẹ̀, yèdọ finẹ ga wẹ mẹmẹsi towe na te.” (2 Sam. 15:21) Ehe sọgan ko flinnu Davidi gando hogbe Luti, onọ̀ daho etọn tọn lẹ go. (Luti 1:16, 17) Hogbe Itai tọn lẹ whàn Davidi bọ e dọna Itai dọmọ: “Yì bo juyi godo dọ́n,” yèdọ to Agbàdo Klidlọni tọn godo. Po enẹ po, “Itai Gitinu lọ sọ juyi godo dọ́n, po omẹ etọn lẹpo po, po omẹ flinflin he tin to e dè lẹpo po.”—2 Sam. 15:22.

Nuhe Mí Plọn sọn Otàn Etọn Mẹ

“Nudepope yè ko wlan dai, yè wlan yé na oplọn mítọn” wẹ Lomunu lẹ 15:4 dọ. Enẹwutu, mí na wà dagbe nado kanse dọ, Etẹwẹ mí sọgan plọn sọn apajlẹ Itai tọn mẹ? Pọ́n nuhe sọgan ko whàn ẹn nado yin nugbonọ na Davidi. Dile etlẹ yindọ jonọ po gbéjinu he wá sọn Filistia de po wẹ ewọ yin, Itai yọ́n Jehovah taidi Jiwheyẹwhe ogbẹ̀nọ lọ podọ Davidi taidi mẹyiamisisadode Jehovah tọn. Itai mọnú zẹ̀ okẹ̀n he tin to Islaelivi lẹ po Filistininu lẹ po ṣẹnṣẹn go. E ma pọ́n Davidi taidi mẹhe hù Goliati awhàngán Filistininu lẹ tọn po tòmẹnu Itai tọn susu devo lẹ po gba. (1 Sam. 18:6, 7) Itai mọ Davidi taidi mẹhe yiwanna Jehovah podọ matin ayihaawe, e doayi jẹhẹnu dagbe Davidi tọn lẹ go. Taidi kọdetọn de, Davidi yí nukun nujọnu tọn do pọ́n Itai. Davidi tlẹ sọ bẹ madatọ̀n awhànfuntọ etọn lẹ tọn do “alọ Itai” tọn mẹ to awhàn sinsinyẹn lọ mẹ sọta awhànfuntọ Absalọmi tọn lẹ.—2 Sam. 18:2.

Mílọsu dona dovivẹnu nado nọ mọnú zẹ̀ vogbingbọn aṣa tọn, sinmẹ agbasa tọn, kavi akọ̀ mítọn tọn lẹ—yèdọ nuvẹun po wangbẹna akọ̀ tọn po—go bo nọ ze ayidonugo do jẹhẹnu dagbe mẹdevo lẹ tọn ji. Kanṣiṣa he tin to Davidi po Itai po ṣẹnṣẹn dohia dọ, eyin mí yọ́n Jehovah bo yiwanna ẹn, enẹ sọgan gọalọna mí nado duto aliglọnnamẹnu mọnkọtọn lẹ ji.

 Dile mí to nulẹnpọndo apajlẹ Itai tọn ji, mí sọgan kanse mídelẹ dọ: ‘Be yẹn nọ do nugbonọ-yinyin mọnkọtọn hia Klisti Jesu, Davidi Daho lọ ya? Be n’nọ do nugbonọ-yinyin ṣie hia gbọn mahẹ zohunhun tọn tintindo to azọ́n yẹwheho Ahọluduta lọ tọn didọ po mẹhẹnzun devi tọn po mẹ ya?’ (Mat. 24:14; 28:19, 20) ‘Obá tẹ mẹ wẹ n’nọ jlo nado do nugbonọ-yinyin ṣie hia jẹ?’

Tatọ́ whẹndo tọn lẹ nasọ mọaleyi eyin yé lẹnayihamẹpọn do apajlẹ nugbonọ-yinyin Itai tọn ji. Mẹdezejo Itai tọn na Davidi po nudide etọn nado yì hẹ ahọlu dide Jiwheyẹwhe tọn po yinuwado omẹ etọn lẹ ji. Mọdopolọ, nudide he tatọ́ whẹndo tọn lẹ nọ basi nado nọgodona sinsẹ̀n-bibasi nugbo lọ nọ yinuwado whẹndo yetọn lẹ ji bo tlẹ sọgan hẹn nuhahun ojlẹ gli tọn lẹ wá. Etomọṣo, Biblu na mí jide dọmọ: ‘Hẹ nugbonọ, Jehovah na do ede hia di nugbonọ.’—Ps. 18:25.

Biblu masọ donù Itai go ba to awhàn Davidi po Absalọmi tọn po godo. Matin ayihaawe, otàn etọn he go Ohó Jiwheyẹwhe tọn donù to kleun mẹ ehe, plọn mí nususu gando gbẹtọ-yinyin etọn go to ojlẹ sinsinyẹn he mẹ Davidi jugbọn mẹ. Na Biblu donù Itai go wutu, enẹ dohia dọ Jehovah nọ yọ́n pinpẹn nugbonọ-yinyin tọn bosọ nọ suahọ mẹhe do e hia lẹ.—Heb. 6:10.