Kanbiọ lẹ sọn Wehiatọ lẹ Dè

To whenuena e yindọ tòdaho Islaeli tọn lẹpo mẹ wẹ Jesu dọyẹwheho gbọn, etẹwutu apọsteli Pita do dọ dọ Juvi lẹ po ogán yetọn lẹ po, yinuwa to “mayọnẹn mẹ” to whenue yé biọ dọ Jesu ni yin hùhù?—Owalọ 3:17.

Whenue apọsteli Pita to hodọna pipli Juvi lẹ tọn de gando adà he yé yiwà to okú Mẹssia tọn mẹ go, e dọmọ: “Yẹn yọnẹn dọ mayọnẹn mẹ wẹ mì wà ẹ gbọn, dile ogán mìtọn lẹ basi do ga.” (Owalọ 3:14-17) Juvi delẹ sọgan ko nọma yọnẹn dọ Jesu wẹ Mẹssia lọ kavi ma mọnukunnujẹ nuplọnmẹ etọn lẹ mẹ. Nuhewutu mẹdevo lẹ ma kẹalọyi Jesu taidi Mẹssia wẹ yindọ, yé ma do ojlo nado hẹn homẹ Jiwheyẹwhe tọn hùn, bo tindo nuvẹun, awuwhàn, po wangbẹna po.

Lẹnnupọndo lehe ojlo matindo nado hẹn homẹ Jehovah tọn hùn yinuwado pọndohlan mẹsusu tọn ji gando nuplọnmẹ Jesu tọn lẹ go do. Jesu nọ saba plọnnumẹ po oló lẹ po, bo nọ wá basi zẹẹmẹ etọn na mẹdepope he jlo na plọnnu dogọ. Ṣigba, delẹ to hosetọ etọn lẹ mẹ yì bo ma tlẹ dovivẹnu sọmọ nado mọnukunnujẹ nuhe e dọ lẹ mẹ. To gbèdopo, nuhe Jesu dọ tlẹ gblehomẹna delẹ to devi etọn lẹ mẹ. (Joh. 6:52-66) Yé gboawupo nado yọnẹn dọ Jesu yí oló enẹ zan nado pọ́n eyin yé na diọ pọndohlan po nuyiwa yetọn lẹ po kavi lala. (Isa. 6:9, 10; 44:18; Mat. 13:10-15) Yé masọ payi dọdai he gando Mẹssia go lọ dọ e na yí oló lẹ zan to nuplọnmẹ etọn lẹ mẹ.—Ps. 78:2.

Nuvẹun zọ́n bọ mẹdelẹ gbẹ́ nuplọnmẹ Jesu tọn lẹ dai. Whenue e plọnnumẹ to sinagọgu mẹ to otò etọn, Nazalẹti mẹ, ‘avò vò’ gbẹtọ lẹ. Ṣigba, kakati yé ni kẹalọyi Jesu taidi Mẹssia lọ, yé jẹ kanbiọ delẹ kanse ji gandego dọmọ: “Fie wẹ dawe he hẹn onú helẹ sọn? . . . Be ehe ma wẹ atinpatọ lọ, visunnu Malia tọn, nọvisunnu Jakobu, Jose, Juda, po Simọni po tọn? Be mẹmẹyọnnu etọn lẹ ma tin tofi to mí dè?” (Malku 6:1-3) Na Jesu whẹ́n to whẹndo wamọnọ tọn mẹ wutu, tòmẹnu Nazalẹti tọn lẹ ma hia nuplọnmẹ etọn lẹ gọ́ nude.

Etẹwẹ dogbọn nukọntọ sinsẹ̀n tọn lẹ dali? Susu to yé mẹ ma dotoaina Jesu sọmọ na whẹwhinwhẹ́n dopolọ lẹ wutu. (Joh. 7:47-52) Yé gbọn awuwhàn dali gbẹ́ nuplọnmẹ Jesu tọn lẹ dai, na e to ayidonugo gbẹtọ lẹ tọn dọ̀n wutu. (Malku 15:10) Podọ e họnwun dọ, susu omẹ nukundeji lẹ tọn wẹ yinuwa to aliho agọ̀ mẹ whenue e gblewhẹdo yé na yẹnuwiwa po oklọ yetọn po. (Mat. 23:13-36) Abajọ Jesu do gblewhẹdo mayọndenọ-yinyin oklọ tọn yetọn dọmọ: “Dindọn hlan mì, osẹ́nnọ lẹ! Na mìwlẹ ko yí họnhungan nuyọnẹn tọn: mìlọsu ma biọ [Ahọluduta lọ mẹ], yé he sọ to na biọ [e mẹ] lẹ, mì ginglọn.”—Luku 11:37-52.

Owhe atọ̀n daa wẹ Jesu do lá wẹndagbe lọ to aigba lọ pete ji. E sọ plọnazọ́n mẹsusu nado tindo mahẹ to azọ́n enẹ mẹ. (Luku 9:1, 2; 10:1, 16, 17) Jesu po devi etọn lẹ po tindo kọdetọn dagbe sọmọ bọ Falesi lẹ wule dọmọ: “Pọ́n, aihọn lẹpo wẹ to yìyì hodo e.” (Joh. 12:19) Enẹwutu, e ma yindọ suhugan Ju lẹ tọn ma yọ́n nudepope wẹ gba. Nulọ poun wẹ yindọ, yé desọn ojlo mẹ bo gbọṣi “mayọnẹn mẹ” gando nugbo lọ go dọ Jesu wẹ Mẹssia lọ. Yé dona ko hẹn oyọnẹn po owanyi yetọn na Mẹssia lọ po siso deji, ṣigba yé ma wàmọ. Delẹ to yé mẹ tlẹ doalọ to okú Jesu tọn mẹ. Enẹwutu, apọsteli Pita dotuhomẹna susu yetọn dọmọ: “Mì lẹnvọjọ na enẹwutu, na yè ni diọ mì, na yè nido súnsún ylando mìtọn sẹ̀, to whenuena ojlẹ awumiọn tọn na sọn nukun [Jehovah] tọn mẹ wá; ewọ nasọ do Jesu Klisti hlan, mẹhe yè dọyẹwheho etọn hlan mì dai.” (Owalọ 3:19, 20) E jẹna ayidego dọ Juvi fọtọ́n susu po “mẹsusu to yẹwhenọ lẹ mẹ” po jẹ todoai ji. Yé ma yinuwa to mayọnẹn mẹ ba. Kakatimọ, yé lẹnvọjọ bo mọ nukundagbe Jehovah tọn.—Owalọ 2:41; 4:4; 5:14; 6:7.