Gbekọndopọ Nọ Gọalọ Nado Yinukọn to Gbigbọ-Liho

GBIGBỌ gbekọndopọ tọn yin dandannu na mẹhe jlo dọ whẹndo yetọn ni yinukọn to gbigbọ-liho lẹ. Whenue Jehovah dá asu po asi po tintan, e zinnudeji dọ gbekọndopọ yin dandannu. E dọ dọ Evi dona wazọ́n hẹ Adam taidi “alọgọtọ” etọn. (Gẹn. 2:18) Asu po asi po lẹ dona nọ wazọ́n dopọ nado gọalọna ode awetọ. (Yẹwh. 4:9-12) E sọ biọ dọ mẹjitọ lẹ po ovi lẹ po ni kọngbedopọ nado hẹn azọngban he Jehovah dena yé lẹ di.

Sinsẹ̀n-Bibasi Whẹndo Tọn

Barry po Heidi po tindo ovi atọ́n. Yé wá mọdọ gbekọndopọ nado plọn Biblu to whẹndo mẹ wẹ gọalọna yé nado yinukọn to gbigbọ-liho. Barry dọ dọ: “N’nọ deazọ́n flinflin lẹ na ovi lẹ jẹnukọnna oplọn whẹndo tọn lọ sọn ojlẹ de mẹ jẹ devo mẹ. To whedelẹnu, n’nọ deazọ́nna yé nado hia hosọ de to Réveillez-vous! mẹ bo nọ biọ to yé si nado dọ nuhe yé mọ to hosọ lọ mẹ lẹ na whẹndo lọ. Mí sọ nọ basi zepọn nuzedonukọnnamẹ kunnudegbe tọn lẹ tọn na ovi lẹ dopodopo nido jẹakọ hẹ nuzedonukọnnamẹ yetọn.” Heidi yidogọ dọmọ: “Dopodopo mítọn wẹ tindo todohukanji yanwle gbigbọmẹ tọn he kọ̀n mí jlo na jẹ lẹ tọn, podọ mí nọ gbadopọnna todohukanji ehelẹ sọn ojlẹ de mẹ jẹ devo mẹ to oplọn whẹndo tọn whenu nado yọ́n lehe mí to nukọnyi do.” Asu po asi po ehe sọ mọdọ whèjai tangan de didedovo to osẹ lẹpo mẹ matin televiziọn pinpọn hùn dotẹnmẹ dotena mẹlẹpo nado nọ hiawe.

Opli Agun Tọn Lẹ

Mike po Denise po plọn ovi ẹnẹ whẹ́n. Ale tẹwẹ gbigbọ gbekọndopọ tọn hẹnwana whẹndo yetọn? Mike dọ dọ: “To whedelẹnu, tito he tlẹ nọ yin bibasi po sọwhiwhe po lẹ ma nọ wazọ́n, ṣigba mí mọdọ gbekọndopọ gọalọna mí nado nọ yì opli lẹ domẹwhenu.” Denise dọmọ: “To whenue ovi lẹ jẹ whinwhẹ́n ji, dopodopo yetọn nọ tindo whégbè-zọ́n de nado wà. Viyọnnu mítọn, Kim nọ gọalọ nado danú bo bẹ yé do tafo ji.” Visunnu yetọn Michael flin dọmọ: “Mí nọ basi opli to owhé mítọn gbè to mardi whèjai. Enẹwutu, mí nọ zà họmẹ, nọ súnsún nulẹ ji, bo nọ tò oján lẹ do fie jẹ.” Matthew, visunnu yetọn devo, yidogọ dọmọ: “Papa nọ yawu lẹkọwa whégbè sọn azọ́nmẹ to opli-zan lẹ ji na e nido gọalọna mí nado wleawuna opli.” Etẹwẹ yin kọdetọn lọ?

Vivẹnudido Nọ Hẹn Ale Susu Wá

Mike dọmọ: “Yẹn po Denise po bẹ sinsẹ̀nzọn gbehosọnalitọ tọn jẹeji to 1987. Atọ̀n to ovi mítọn lẹ mẹ gbẹ́ pò to whégbè to whenẹnu. Awe to yé mẹ sọ lẹzun gbehosọnalitọ ga, podọ mẹhe pò lẹ gọalọ to azọ́n họgbigbá Bẹtẹli tọn lẹ mẹ. Nuhe sọ yidogọna ayajẹ mítọn wẹ yindọ mí ko penugo nado gọalọna omẹ voovo 40 nado klan gbẹzan yetọn do wiwe bo yí baptẹm. Mí ko sọ tindo lẹblanulọkẹyi lọ nado wazọ́n dopọ taidi whẹndo de to azọ́n họgbigbá tọn lẹ mẹ, etlẹ yin to tògodo.”

Na nugbo tọn, vivẹnudido nado kọngbedopọ to whẹndo mẹ nọ hẹn ale susu wá. Be mì sọgan dín aliho devo he mẹ mì sọgan kọngbedopọ hẹ ode awetọ te to whẹndo mìtọn mẹ ya? Mì deji dọ eyin mì tindo gbigbọ gbekọndopọ tọn, e na gọalọna whẹndo mìtọn nado yinukọn dogọ to gbigbọ-liho.

[Yẹdide to weda 28]

Zepọn nuzedonukọnnamẹ kunnudegbe tọn lẹ bibasi nọ gọalọ nado yinukọn to lizọnyizọn lọ mẹ