Hodo Apajlẹ Jesu Tọn Gbọn Yẹwhehodidọ po Adọgbigbo po Dali
Hodo Apajlẹ Jesu Tọn Gbọn Yẹwhehodidọ po Adọgbigbo po Dali
“Mí wleawuna adọgbigbo . . . nado dọho wẹndagbe Jiwheyẹwhe tọn na mì.”—1 TẸS. 2:2, NW.
1. Naegbọn wẹndagbe Ahọluduta lọ tọn nọ dọnmẹdogo sọmọ?
LEHE homẹ nọ hùn mí nado sè wẹndagbe do sọ! Podọ owẹ̀n he yọ́n hugan owẹ̀n lẹpo wẹ wẹndagbe Ahọluduta Jiwheyẹwhe tọn. Wẹndagbe ehe nọ na mí jide dọ yajiji, awutu, awufiẹsa, awubla, po okú po na wá vivọnu. E nọ na mí todido ogbẹ̀ madopodo tọn, nọ do lẹndai Jiwheyẹwhe tọn hia mí, bo nọ do lehe mí na tindo haṣinṣan dagbe de hẹ ẹ do hia. Hiẹ sọgan lẹndọ mẹlẹpo wẹ na hùnhomẹ nado sè owẹ̀n lọ he Jesu lá na gbẹtọvi lẹ. Ṣigba, e blawu dọ e ma nọ yinmọ.
2. Basi zẹẹmẹ hogbe Jesu tọn he yin: “Yẹn wá nado klan” tọn.
2 Jesu dọna devi etọn lẹ dọmọ: “Mì lẹndọ yẹn wá nado do jijọho hlan aigba ji blo: yẹn ma wá nado do jijọho hlan gba, adavo ohí. Na yẹn wá nado klan visunnu dovo do otọ́ etọn ji, viyọnnu do onọ̀ etọn ji, podọ asi ovi tọn do onọ̀ asu etọn tọn ji. Kẹntọ gbẹtọ de tọn wẹ yé he tin to owhé ewlọsu tọn gbè lẹ na yin.” (Mat. 10:34-36) Kakati nado kẹalọyi wẹndagbe lọ po homẹhunhun po, suhugan gbẹtọ lẹ tọn wẹ nọ gbẹ́ owẹ̀n lọ. Mẹdelẹ nọ hẹn yede zun kẹntọ mẹhe to wẹndagbe lọ lá lẹ tọn, eyin yé tlẹ yin hagbẹ whẹndo dopolọ tọn lẹ.
3. Nado sọgan hẹn azọ́ndenamẹ yẹwhehodidọ tọn mítọn di, nuhudo etẹ tọn wẹ mí tindo?
3 Nugbo he Jesu lá lọ wẹ mílọsu nọ lá to egbehe, podọ eyin gbẹtọ lẹ sè nugbo ehelẹ, yé nọ yinuwa hẹ mí dile mẹsusu yinuwa hẹ Jesu do to whenẹnu. Ehe ma dona paṣa mí. Jesu dọna devi etọn lẹ dọmọ: “Afanumẹ ma klohu oklunọ etọn. Eyin yé dohomẹkẹn mi, yé nasọ dohomẹkẹn mìwlẹ ga.” (Joh. 15:20) To otò susu mẹ, mí ma nọ pehẹ homẹkẹn tlọlọ gba, ṣigba mí nọ pehẹ wangbẹna po ojlo matindo po. Enẹwutu, mí tindo nuhudo yise po adọgbigbo po tọn nado sinyẹnlin to azọ́n yẹwheho wẹndagbe tọn lọ didọ mẹ.—Hia 2 Pita 1:5-8.
4. Naegbọn Paulu dona “wleawuna adọgbigbo” nado dọyẹwheho?
4 Vlavo hiẹ nọ mọ ẹn taidi nuhe vẹawu nado tindo mahẹ to lizọnyizọn lọ mẹ, kavi dọ adà etọn delẹ nọ taidi nuhe dobuna we to whedelẹnu. Eyin mọ wẹ, wẹnlatọ nugbonọ susu wẹ tindo numọtolanmẹ mọnkọtọn. Apọsteli Paulu yin yẹwhehodọtọ adọgbotọ he mọnukunnujẹ nugbo lọ mẹ ganji de, etomọṣo, e ma nọ bọawuna ẹn to whedelẹnu nado dọyẹwheho. Paulu kanwehlan Klistiani he tin to Tẹsalonika lẹ dọmọ: “To whenue mí ko jiya to tintan whenu bo ko yin nuyiwa hẹ po kanyinylan po (kẹdẹdile mì yọnẹn do) to Filippi godo, lehe mí wleawuna adọgbigbo gbọn Jiwheyẹwhe mítọn dali nado dọho wẹndagbe Jiwheyẹwhe tọn na mì to tuklajijẹ susu mẹ do.” (1 Tẹs. 2:2, NW) To Filippi, aṣẹpatọ lẹ yí opò do hò Paulu po gbẹdohẹmẹtọ etọn Sila po bo ze yé do gànpamẹ bosọ sú yé do osópò lẹ mẹ. (Owalọ 16:16-24) Etomọṣo, Paulu po Sila po “wleawuna adọgbigbo” nado zindonukọn to yẹwhehodidọ mẹ. Nawẹ mí sọgan wà nudopolọ gbọn? Nado na gblọndo kanbiọ enẹ tọn, mì gbọ mí ni gbadopọnna nuhe gọalọna devizọnwatọ Jiwheyẹwhe tọn hohowhenu tọn lẹ nado dọ nugbo gando Jehovah go po adọgbigbo po, podọ mì gbọ mí ni pọ́n lehe mí sọgan hodo apajlẹ yetọn do.
Yé Tindo Nuhudo Adọgbigbo Tọn Nado Pehẹ Homẹkẹn
5. Naegbọn devizọnwatọ nugbonọ Jehovah tọn lẹ do tindo nuhudo adọgbigbo tọn?
5 Ayihaawe ma tin dọ Jesu Klisti wẹ ze apajlẹ dagbe hugan adọgbigbo tọn dai. Ṣigba, sọn bẹjẹeji whenuho gbẹtọvi tọn gbọ́n wẹ devizọnwatọ nugbonọ Jehovah tọn lẹpo tindo nuhudo adọgbigbo tọn. Etẹwutu? Bọdo atẹṣiṣi Edẹni tọn go, Jehovah dọ dọdai dọ okẹ̀n de na tin to devizọnwatọ etọn lẹ po Satani tọn lẹ po ṣẹnṣẹn. (Gẹn. 3:15) E ma dẹn bọ enẹ mọ hẹndi to whenue Abẹli dodonọ lọ yin hùhù gbọn mẹdaho etọn dali. To enẹgodo, gbẹtọ lẹ dohomẹkẹn Enọku, yèdọ sunnu dodonọ devo he nọgbẹ̀ jẹnukọnna Singigọ lọ. E dọ dọdai dọ Jiwheyẹwhe na wá po fọtọ́n fọtọ́n angẹli wiwe Etọn lẹ tọn po nado dawhẹna mẹylankan lẹ. (Juda 14, 15) Owẹ̀n enẹ ma yọ́nsè na mẹsusu. Gbẹtọ lẹ gbẹwanna Enọku, podọ e yọnbasi dọ yé na ko hù i eyin Jehovah ma ko sán ogbẹ̀ etọn dogli. Lehe adọgbigbo Enọku tọn jẹna ayidego do sọ!—Gẹn. 5:21-24.
6. Naegbọn Mose do tindo nuhudo adọgbigbo tọn nado dọho to Falo nukọn?
6 Sọ lẹnnupọndo adọgbigbo he Mose dohia to whenue e tin to Falo nukọn ji. Gbẹtọ lẹ ma nọ pọ́n ahọlu ehe hlan taidi afọzedaitọ yẹwhe lẹ tọn de poun gba, ṣigba taidi yẹwhe de, yèdọ visunnu yẹwhe owhè tọn he nọ yin yiylọdọ Ra tọn. E sọgan ko nọ sẹ̀n boṣiọ edetiti tọn dile Falo devo lẹ wà do. Nudepope he tọ́n sọn onù etọn mẹ nọ lẹzun osẹ́n podọ e nọ na gbedide di nudevo. Na Falo dohuhlọn, nọ yigo bo nọ sinyẹnta wutu, e ma yá dọ e ni kẹalọyi ayinamẹ mẹdevo lẹ tọn. Dawe ehe nukọn wẹ Mose he yin lẹngbọhọtọ homẹmimiọnnọ de sọawuhia te whlasusu matin oylọ-basinamẹ. Podọ dọdai tẹwẹ Mose dọ? Azọ̀nylankan mẹhusudo tọn lẹ. Podọ etẹwẹ e biọ? E biọ to Falo si nado tún kanlinmọ livi susu etọn lẹ dote nado tọ́n sọn otò lọ mẹ! Be Mose tindo nuhudo adọgbigbo tọn ya? Gbau!—Osọha 12:3; Heb. 11:27.
7, 8. (a) Whlepọn tẹlẹ wẹ nugbonọ hohowhenu tọn lẹ pehẹ? (b) Etẹwẹ gọalọna devizọnwatọ hohowhenu tọn lẹ nado yí adọgbigbo do yiavunlọna sinsẹ̀n-bibasi wiwe ṣeke bo nọgodona ẹn?
7 To owhe kanweko lẹ godo, yẹwhegán lẹ po devizọnwatọ Jiwheyẹwhe tọn devo lẹ po zindonukọn nado yiavunlọna sinsẹ̀n-bibasi wiwe ṣeke po adọgbigbo po. Aihọn Satani tọn diọnukunsọ yé. Paulu dọmọ: “Yè to zannu dlan do yé, yè yí ayinyọ̀n de do yé sán do awe, yè to yé whlé pọ́n, yè yí ohí do to yé hù: yé to dindanpe to ayú lẹngbọ po gbọgbọẹ po tọn mẹ; yé zun agbátọnọ, nukunbibianọ, awufiẹsanọ.” (Heb. 11:37) Etẹwẹ gọalọna devizọnwatọ nugbonọ Jiwheyẹwhe tọn enẹlẹ nado hẹn tenọgli yetọn go? To wefọ delẹ mẹ jẹnukọn, apọsteli lọ ko donù nuhe na huhlọn Abẹli, Ablaham, Sala po mẹdevo lẹ po nado doakọnnanu go. E dọmọ: “Yé . . . ma mọ opagbe lọ yí, ṣigba [to yise mẹ] yé ko mọ ẹn to aganu boboe, bo yọnẹn to yede mẹ.” (Heb. 11:13) Matin ayihaawe, ayiha zizedo opagbe Jehovah tọn lẹ ji gọalọna yẹwhegán lẹ taidi Elija, Jẹlemia po devizọnwatọ nugbonọ hohowhenu tọn devo he yí adọgbigbo do yiavunlọna sinsẹ̀n-bibasi nugbo lẹ po nado doakọnnanu.—Titu 1:2.
8 Devizọnwatọ nugbonọ hohowhenu tọn enẹlẹ to nukundo sọgodo whanpẹnọ de. Bọdo fọnsọnku yetọn go, yé na jẹ pipé kọ̀n to godo mẹ bo na jẹ mẹdekannu “sọn mẹglọnọ hẹngble tọn mẹ” gbọn sinsẹ̀nzọn yẹwhenọ tọn Klisti Jesu po yẹwhenọ pẹvi etọn, 144000 lẹ po tọn gblamẹ. (Lom. 8:21) Humọ, Jẹlemia po devizọnwatọ adọgbotọ Jiwheyẹwhe tọn hohowhenu tọn devo lẹ po gboadọ na Jehovah hẹn yé deji, dile e sọawuhia to opagbe he e do na Jẹlemia mẹ do dọmọ: “Yé nasọ hoavùn hẹ we: ṣigba yé ma na pé gowe gba; na yẹn tin dè we, wẹ OKLUNỌ dọ, nado whlẹn we.” (Jẹl. 1:19) To egbehe, eyin mí nọ lẹnnupọndo opagbe Jiwheyẹwhe tọn lẹ na sọgodo mítọn po jide he e na mí nado basi hihọ́na mí to gbigbọ-liho po ji, enẹ nọ hẹn mílọsu lodo.—Howh. 2:7; hia 2 Kọlintinu lẹ 4:17, 18.
Owanyi Whàn Jesu Nado Dọyẹwheho po Adọgbigbo Po
9, 10. Aliho tẹ mẹ wẹ Jesu do adọgbigbo hia te (a) to nukọntọ sinsẹ̀n tọn lẹ nukọn, (b) to pipli awhànfuntọ lẹ tọn nukọn, (c) to yẹwhenọ daho nukọn, (d) to Pilati nukọn?
9 Jesu Apajlẹnọ mítọn do adọgbigbo hia to aliho voovo mẹ. Di apajlẹ, dile etlẹ yindọ aṣẹpatọ lẹ po omẹ nukundeji lẹ po gbẹwanna Jesu, e ma doadudẹ́ji nado dọ nuhe Jiwheyẹwhe jlo dọ gbẹtọ lẹ ni yọ́n ẹn gba. E yí adọgbigbo do de nukọntọ sinsẹ̀n tọn lẹ gbà na dodonọ-jijlá po nuplọnmẹ lalo yetọn lẹ po. Jesu ma doadudẹ́ji nado gblewhẹdo sunnu enẹlẹ tlọlọ. To nujijọ de whenu, e dọmọ: “Dindọn hlan mì, wekantọ lẹ, po Falesi lẹ po, yẹnuwatọ! na mì tin jijlẹ do olído wewe go, he sọawuhia whanpẹnọ to gbonu, ṣigba to homẹ tin gọ́ na ohú mẹkuku lẹ tọn podọ na mawé lẹpo. Yèdọ mọwẹ mìwlẹ ga sọawuhia to gbonu hlan gbẹtọ lẹ di dodonọ, ṣigba to homẹ mì tin gọ́ na yẹnuwiwa po ylanwa po.”—Mat. 23:27, 28.
10 To whenue Jesu pannukọn pipli awhànfuntọ delẹ tọn to jipa Gẹtsemani tọn mẹ, e yí adọgbigbo do do ede hia yé. (Joh. 18:3-8) To enẹgodo, e yin pinplan yì Tohodọtọ Ju lẹ tọn nukọn bọ yẹwhenọ daho kanhose e. Dile etlẹ yindọ e yọnẹn dọ yẹwhenọ daho to aklọ̀n dín nado hù i, Jesu ma dibu nado dọ dọ emi wẹ Klisti podọ Ovi Jiwheyẹwhe tọn. E yidogọ dọ yé na mọ ẹn bọ e na “sinai to adusilọ huhlọn tọn ji, podọ ja po aslọ olọn tọn lẹ po.” (Malku 14:53, 57-65) Ojlẹ kleun de to enẹgodo, Jesu ṣite to Pilati nukọn, mẹhe tindo aṣẹ lọ nado tún in dote. Ṣigba, Jesu ma kẹnù gando owhẹ̀ he yin sisadokọna ẹn lẹ go. (Malku 15:1-5) Ehe lẹpo biọ adọgbigbo nujọnu tọn.
11. Kanṣiṣa tẹwẹ tin to adọgbigbo po owanyi po ṣẹnṣẹn?
11 Jesu dọna Pilati dọmọ: “Hlan opodo he wẹ yè ko do ji mi, podọ hlan opodo he wẹ yẹn do wá aihọn mẹ, na yẹn nido dekunnu hlan nugbo lọ.” (Joh. 18:37) Jehovah ko deazọ́nna Jesu nado dọyẹwheho wẹndagbe lọ tọn, podọ homẹ Jesu tọn hùn nado wàmọ na e yiwanna Otọ́ olọn mẹ tọn etọn wutu. (Luku 4:18, 19) Jesu sọ yiwanna gbẹtọ lẹ. E yọnẹn dọ yé tindo nuhahun. Mọdopolọ, owanyi mítọn na Jiwheyẹwhe po kọmẹnu mítọn lẹ po wẹ nọ whàn mí nado yí adọgbigbo do dọyẹwheho.—Mat. 22:36-40.
Gbigbọ Wiwe Nọ Na Mí Huhlọn Nado Dọyẹwheho po Adọgbigbo Po
12. Etẹwẹ hẹn devi dowhenu tọn lẹ jaya?
12 To osẹ he bọdo okú Jesu tọn go lẹ mẹ, devi lẹ tindo whẹwhinwhẹ́n nado jaya na Jehovah de devi yọyọ devo lẹ dogọ yé. To gbèdopo poun, nudi Juvi po mẹdiọzun Ju 3000 he wá sọn otò susu mẹ lẹ po he pli to Jelusalẹm nado basi hùnwhẹ Pẹntikọsti tọn lẹ yin bibaptizi! Matin ayihaawe, linlin enẹ na ko gbayipe gbọn Jelusalẹm! Biblu dọmọ: “Obu sọ jẹ gbigbọ [kavi alindọn] lẹpo ji: azọ́njiawu po ohia susu po wẹ yè gbọn alọ apọsteli lẹ tọn mẹ wà.”—Owalọ 2:41, 43.
13. Naegbọn mẹmẹsunnu lẹ do biọ tugbigbo kavi adọgbigbo to odẹ̀ mẹ, podọ etẹwẹ yin kọdetọn lọ?
13 Po adi po, nukọntọ sinsẹ̀n tọn lẹ wle Pita po Johanu po bo sú yé do gànmẹ jẹ wunkẹngbe, bosọ gbẹna yé ma nado dọho gando Jesu go. To whenue yé yin tuntundote, yé omẹ awe lẹ yì dọ nuhe jọ lẹ na mẹmẹsunnu lẹ, podọ yemẹpo hodẹ̀ gando nukundiọsọmẹ he yé to pipehẹ go, bo biọ dọmọ: “[Jehovah], . . . na hlan afanumẹ towe lẹ, nado nọ yí tugbigbo lẹpo do dọ ohó towe.” Etẹwẹ kọdetọn lọ? “Yemẹpo sọ gọ́ na [gbigbọ wiwe], yé sọ yí tugbigbo do dọ ohó Jiwheyẹwhe tọn.”—Owalọ 4:24-31.
14. Nawẹ gbigbọ wiwe nọ gọalọna mí to yẹwhehodidọ mítọn mẹ gbọn?
14 Doayi e go dọ huhlọn gbigbọ wiwe Jehovah tọn wẹ gọalọna devi lẹ nado dọ ohó Jiwheyẹwhe tọn po adọgbigbo po. E ma yin nugopipe mílọsu tọn wẹ mí do nọ tindo adọgbigbo nado lá nugbo lọ na mẹdevo lẹ, kakajẹ mẹhe nọ jẹagọdo owẹ̀n mítọn lẹ ji gba. Jehovah sọgan na mí gbigbọ wiwe etọn podọ e na wàmọ eyin mí biọ to e si. Po alọgọ Jehovah tọn po, mílọsu sọgan do adọgbigbo he mí tindo nuhudo etọn hia nado doakọnna nukundiọsọmẹ depope.—Hia Psalm 138:3.
Klistiani lẹ Nọ Dọyẹwheho po Adọgbigbo po to Egbehe
15. Nawẹ nugbo lọ nọ klan gbẹtọ lẹ to egbehe gbọn?
15 To egbehe, nugbo lọ gbẹ́ pò to gbẹtọ lẹ klan dile e yin do to hohowhenu. Mẹdelẹ nọ kẹalọyi owẹ̀n mítọn, to whenue mẹdevo lẹ ma nọ mọnukunnujẹemẹ kavi ma nọ yọ́n pinpẹn sinsẹ̀n-bibasi mítọn tọn. Mẹdelẹ nọ mọhodọdo mí go, ṣàn mí kò, kavi tlẹ gbẹwanna mí, dile Jesu dọ dọdai etọn do. (Mat. 10:22) To whedelẹnu, linlinnamẹnu lẹ nọ saba na nudọnamẹ agọ̀ lẹ gando mí go bo nọ hẹn mí gble. (Ps. 109:1-3) Ṣogan, omẹ Jehovah tọn lẹ nọ lá wẹndagbe lọ po adọgbigbo po lẹdo aihọn pé.
16. Numimọ tẹwẹ dohia dọ adọgbigbo sọgan diọ pọndohlan mẹhe mí nọ dọyẹwheho na lẹ tọn?
16 Adọgbigbo mítọn sọgan zọ́n bọ gbẹtọ lẹ na diọ pọndohlan he yé tindo gando owẹ̀n Ahọluduta lọ tọn go. Mẹmẹyọnnu de to Kirghizstan dọmọ: “Whenue n’tin to kunnudegbe to gbèdopo, whétọ de dọna mi dọ: ‘N’do yise to Jiwheyẹwhe mẹ, ṣigba e ma yin Jiwheyẹwhe Klistiani lẹ tọn. Eyin a sọ wá họngbo ehe ji devo, n’na do avún ṣie na we!’ Avún daho hùnylantọ de wẹ to gẹdẹ mẹ to godo etọn. Ṣigba whenue mí to Linlin Ahọluduta tọn sọha 37tọ he hosọ etọn yin ‘Opodo Sinsẹ̀n Lalo Tọn Ko Sẹpọ!’ lọ má, n’magbe nado lẹkọyi owhé dopolọ gbè po linlẹn lọ po dọ n’sọgan mọ dopo to hagbẹ whẹndo dawe lọ tọn lẹ mẹ. Ṣigba, dawe dopolọ wẹ wá hùnhọ̀n. N’hodẹ̀ hlan Jehovah tlolo, bo dọna dawe lọ dọ: ‘Na mì te do, n’flin nuhe mí dọ to azán atọ̀n die, podọ n’sọ flin avún mìtọn ga. Ṣigba n’ma sọgan gbọn fi wayi bo ma zẹ̀ mì dè, na n’do yise to Jiwheyẹwhe nugbo dopo akàn lọ mẹ taidi mìlọsu. To madẹnmẹ, Jiwheyẹwhe na sayana sinsẹ̀n he nọ kọnmasin do e go lẹ. Mì sọgan mọnukunnujẹ ehe mẹ dogọ eyin mì hia alọnuwe pẹvi ehe.’ E paṣa mi nado mọdọ dawe lọ kẹalọyi Linlin Ahọluduta tọn lọ. Enẹgodo, n’yì owhé devo gbè. To nukunwhiwhe kleun de godo, dawe lọ họ̀nwezun wá plá mi po Linlin Ahọluduta tọn lọ po to alọmẹ. ‘N’ko hia ẹ,’ wẹ e dọ. ‘Etẹwẹ n’dona wà bọ homẹgble Jiwheyẹwhe tọn ma nado wá jie?’” Plọnmẹ Biblu de yin bibẹjẹeji po dawe lọ po, bọ e jẹ opli Klistiani tọn lẹ wá ji.
17. Nawẹ adọgbigbo mẹmẹyọnnu de tọn gọalọna Biblu plọntọ de nado duto obu ji gbọn?
17 Adọgbigbo mítọn sọgan sọ na tuli mẹdevo lẹ nado lẹzun adọgbotọ. To Russie, mẹmẹyọnnu he do ahihun de ze linlinnamẹwe de donukọnna mẹhe sinai to apá etọn. Whenue e to ehe wà, dawe de lọ́n sọn oján etọn ji, bo gbì linlinnamẹwe lọ yí sọn alọmẹ na mẹmẹyọnnu lọ, bo wló e bosọ ze e dlan aigba. Dawe lọ jẹ zùnzùn in ji po awhá po, bo kàn fie mẹmẹyọnnu lọ wá sọn sè e bosọ gbẹna ẹn ma nado dọyẹwheho to gbétatò lọ mẹ. Mẹmẹyọnnu lọ biọ alọgọ Jehovah tọn to odẹ̀ mẹ podọ e flin hogbe Jesu tọn lẹ dọmọ: “Mì dibusi yé he nọ hù agbasa, . . . blo.” (Mat. 10:28) Po whiwhẹ po, mẹmẹyọnnu lọ fọnṣite bo dọna dawe lọ dọmọ, “N’ma na dọ fie n’wá sọn na we, podọ n’na gbẹ́ to yẹwhehodọ to gbétatò lọ mẹ.” Enẹgodo, e jẹte sọn ahihun lọ mẹ. Ṣigba plọnmẹ Biblu mẹmẹyọnnu lọ tọn de tin to ahihun lọ mẹ bọ e ma yọnẹn. Na obu gbẹtọ tọn wutu, e ma nọ yì opli Klistiani tọn lẹ. Ṣigba, to whenue e doayi adọgbigbo mẹmẹyọnnu mítọn tọn go godo, e magbe dọ emi na jẹ opli lẹ yì ji.
18. Etẹwẹ na gọalọna we nado dọyẹwheho po adọgbigbo po dile Jesu wà do?
18 To aihọn he jẹla sọn Jiwheyẹwhe dè ehe mẹ, e nọ biọ adọgbigbo nado dọyẹwheho dile Jesu wà do. Etẹwẹ na gọalọna we nado wàmọ? Nọ pọ́n sọgodo hlan. Nọ hẹn owanyi towe na Jiwheyẹwhe po kọmẹnu towe po sinyẹn dogọ. Nọ biọ adọgbigbo Jehovah to odẹ̀ mẹ. Nọ flin to whepoponu dọ, a ma tin dewe ṣo gbede, Jesu tin hẹ we. (Mat. 28:20) Gbigbọ wiwe na na we huhlọn. Podọ Jehovah na dona we bo nasọ gọalọna we. Enẹwutu, mì gbọ mí ni yí adọgbigbo do dọmọ: “[Jehovah] wẹ alọgọtọ ṣie, yẹn ma to obu na di; na nuhe gbẹtọ na wà do mi.”—Heb. 13:6.
Nawẹ Hiẹ Na Na Gblọndo Gbọn?
• Naegbọn devizọnwatọ Jiwheyẹwhe tọn lẹ do tindo nuhudo adọgbigbo tọn?
• Nado yin adọgbotọ, etẹwẹ mí plọn sọn apajlẹ . . .
devizọnwatọ nugbonọ hohowhenu tọn lẹ tọn mẹ?
Jesu Klisti tọn mẹ?
Klistiani dowhenu tọn lẹ tọn mẹ?
Klistiani hatọ egbezangbe tọn lẹ tọn mẹ?
[Kanbiọ Oplọn tọn lẹ]
[Yẹdide to weda 21]
Jesu yí adọgbigbo do de nukọntọ sinsẹ̀n tọn lẹ gbà
[Yẹdide to weda 23]
Jehovah nọ na mí adọgbigbo nado dọyẹwheho