Okún Nugbo lọ Tọn Jẹ Lẹdo He Tin to Olá lẹ Mẹ

TUVA yin otò de he tin to Russie to hùwaji pete dogbó Sibérie tọn, bọ Mongolie tin to hùwaji podọ to whèzẹtẹn etọn. Susu Tuva-nu lẹ tọn wẹ nọ nọ̀ lẹdo he dẹn do yede lẹ mẹ, gbọnmọ dali, e nọ vẹawu nado hẹn owẹ̀n Ahọluduta lọ tọn jẹ yé dè. Ṣigba, to ojlẹ de mẹ wayi, mẹdelẹ zingbejizọnlin sọn lẹdo voovo Tuva tọn enẹlẹ mẹ wá tatọ́-tònọ otò lọ tọn he nọ yin Kyzyl nado basi opli de. Maria he yin gbehosọnalitọ de to Kyzyl, sè gando wiwá yetọn go, bo mọdọ dotẹnmẹ hundote daho de wẹ ehe na yin nado lá wẹndagbe lọ na yé.

Maria na linlin nuhe jọ tọn dọmọ: “Wehọ he mẹ n’nọ wazọ́n te taidi mẹplọntọ de basi tito opli de tọn nado lẹnnupọndo lehe yè sọgan penukundo amasin adínọ lẹ po ahàn sinsinyẹn ṣiṣizan po go do. Nudi gbẹtọ 50 sọn lẹdo voovo Tuva tọn lẹ mẹ wẹ dona wá opli ehe tẹnmẹ. Pipli lọ bẹ mẹplọntọ wehọmẹ tọn lẹ, doto he nọ plọn walọyizan gbẹtọ tọn lẹ, doto he nọ penukundo dagbemẹninọ yọpọvu lẹ tọn go, po mẹdevo lẹ po hẹn.” Na Maria, dotẹnmẹ hundote de wẹ opli enẹ yin nado dọyẹwheho, ṣigba e ma na bọawuna ẹn. E dọmọ: “N’nọ kuwinyan to jọwamọ-liho, podọ e nọ vẹawuna mi nado dekunnu to aliho mayin aṣa tọn mẹ. Ṣigba, n’biọ adọgbigbo Jehovah to odẹ̀ mẹ nado duto obu ji podọ nado yí dotẹnmẹ hundote ehe zan nado dekunnu.” Be e tindo kọdetọn dagbe ya?

Maria zindonukọn dọmọ: “N’mọ Réveillez-vous! de he dọhodo obu ji. N’lẹndọ ‘ehe sọgan fọnjlodotena doto he nọ plọn walọyizan gbẹtọ tọn lẹ.’ Enẹwutu, n’hẹn linlinnamẹwe lọ yì wehọmẹ. To gbenẹgbe, dopo to mẹplọntọ he wá opli lọ lẹ mẹ wá wekantẹn ṣie, bọ n’ze linlinnamẹwe lọ donukọnna ẹn. E kẹalọyi i po homẹhunhun po. Na nugbo tọn, e dọna mi dọ emi lọsu nọ dibu. To wunkẹngbe, n’hẹn owe Kanbiọ He Jọja lẹ Nọ Kanse—Gblọndo He Wazọ́n Lẹ, Bladopọ 1 yì na ẹn. E sọ kẹalọyi owe enẹ lọsu po homẹhunhun po. Lehe e yinuwa do hẹn mi nado lẹndọ mẹplọntọ he pò lẹ sọgan tindo ojlo to owe enẹ mẹ. Enẹwutu, n’bẹ owe Kanbiọ He Jọja lẹ Nọ Kanse po owe devo lẹ po do pali de mẹ yì wehọmẹ.” Tlolo janwẹ pali lọ jẹvọ́. Maria na linlin nuhe jọ tọn dole: “Mẹplọntọ hatọ mẹhe n’ze owe lọ Kanbiọ He Jọja lẹ Nọ Kanse donukọnna lọ tọn susu wẹ wá wekantẹn ṣie bo kanse dọ, ‘Fie wẹ yè to owe lọ lẹ má te?’” Fie dín yé te lọ wẹ yé wá!

Samedi de wẹ opli lọ fó. Na Maria ma nọ wazọ́n to gbenẹgbe wutu, e bẹ owe lẹ do tafo voovo lẹ ji to wekantẹn etọn. E wlan do núgo dọmọ: “Mẹplọntọ vivẹ lẹ emi! Mì sọgan yí owe lọ lẹ na mìde podọ na mẹyinyọnẹn mìtọn lẹ. Owe dagbedagbe ehelẹ na gọalọna mì nado tindo kọdetọn dagbe to azọ́n mìtọn mẹ, podọ yé na hẹn whẹndo mìtọn lẹ lodo.” Etẹwẹ yin kọdetọn lọ? “N’lẹkọyi wekantẹn ṣie to gbenẹgbe bo mọdọ yé ko bẹ suhugan owe lọ lẹ tọn yì. To afọdopolọji, n’yì bẹ owe po linlinnamẹwe devo lẹ po wá.” To vivọnu opli enẹ tọn, Maria do linlinnamẹwe 380, owe 173, po alọnuwe 34 po gbonu. Dile mẹhe wá opli lọ lẹ lẹkọyi lẹdo he tin to olá enẹlẹ mẹ, fie yé nọ nọ̀ bo nọ wazọ́n te, owe lọ lẹ yì po yé po. Maria dọmọ, “Homẹ ṣie hùn taun dọ okún nugbo lọ tọn ko jẹ lẹdo he to olá Tuva tọn lẹ mẹ todin!”—Yẹwh. 11:6.

[Yẹdide Otò tọn to weda 32]

(Nado mọ yẹdide lọ ganji, pọ́n zinjẹgbonu lọ)

RUSSIE

RÉPUBLIQUE DE TUVA