Whẹndo Klistiani lẹ Emi—Mì Hodo Apajlẹ Jesu Tọn!
Whẹndo Klistiani lẹ Emi—Mì Hodo Apajlẹ Jesu Tọn!
“Klisti . . . yí ohia dai na mí, na míwlẹ nido nọ gbọn afọ etọn ji.”—1 PITA 2:21.
1. (a) Adà tẹwẹ Ovi Jiwheyẹwhe tọn yiwà to nudida mẹ? (b) Numọtolanmẹ tẹwẹ Jesu tindo na gbẹtọvi lẹ?
WHENUE Jiwheyẹwhe dá olọn po aigba po, viplọnji etọn tin to apá na ẹn taidi “azọ́nwatọgan de.” E kọngbedopọ hẹ Otọ́ etọn, Jehovah to whenue E dá kanlin po atin wunmẹwunmẹ susu po do aigba ji, podọ to whenue E wleawuna Paladisi he na wá lẹzun owhé na nudida etọn he e basi to apajlẹ Etọn mẹ lẹ. Ovi Jiwheyẹwhe tọn he wá yin yinyọnẹn taidi Jesu yiwanna gbẹtọvi lẹ taun. “Homẹhunhun [etọn] . . . tin to ovi gbẹtọ tọn lẹ” mẹ.—Howh. 8:27-31; Gẹn. 1:26, 27.
2. (a) Etẹwẹ Jehovah wleawuna nado gọalọna gbẹtọvi mapenọ lẹ? (b) Adà gbẹzan tọn dopo tẹ mẹ wẹ Biblu na mí anademẹ te?
2 To ylando asu po asi po tintan tọn godo, gbẹtọvi ylandonọ lẹ fifligọ wá lẹzun whẹho titengbe de to lẹndai Jehovah tọn mẹ. Jehovah wleawuna avọ́sinsan Klisti tọn nado hẹn ofligọ enẹ yọnbasi. (Lom. 5:8) Humọ, Jehovah wleawuna Ohó etọn, Biblu nado deanana gbẹtọvi lẹ na yé nido tindo kọdetọn dagbe to gbẹ̀mẹ mahopọnna ylando he yé dugu etọn. (Ps. 119:105) Jehovah wleawuna anademẹ delẹ do Ohó etọn mẹ nado gọalọna gbẹtọvi lẹ, na whẹndo yetọn nido lodo bo tindo ayajẹ. Owe Gẹnẹsisi tọn dọ gando alọwle go dọ sunnu dona “sẹbọdo asi etọn go: yé nasọ lẹzun olàn dopo.”—Gẹn. 2:24.
3. (a) Etẹwẹ Jesu plọnmẹ gando alọwle go? (b) Etẹwẹ mí na gbadopọnna to hosọ ehe mẹ?
3 To lizọnyizọn aigba ji tọn Jesu tọn whenu, e zinnudeji dọ alọwle dona yin kọndopọ tẹgbẹ tọn. E plọnmẹ nunọwhinnusẹ́n delẹ, he na gọalọna hagbẹ whẹndo tọn lẹ eyin yé yí yé do yizan mẹ, nado dapana jijọ po walọyizan he nọ ze alọwle kavi ayajẹ whẹndo tọn yetọn do owù mẹ lẹ po. (Mat. 5:27-37; 7:12) To hosọ ehe mẹ, mí na gbadopọnna lehe nuplọnmẹ Jesu tọn lẹ po apajlẹ he e zedai to whenue e tin to aigba ji po sọgan gọalọna asu lẹ, asi lẹ, mẹjitọ lẹ, po ovi lẹ po nado tindo ayajẹ po pekọ po do.
Lehe Asu Klistiani de Nọ Wleyẹyina Asi Etọn Gbọn
4. Aliho tẹ mẹ wẹ azọngban Jesu tọn po asu Klistiani lẹ tọn po taidi yedelẹ te?
4 Jiwheyẹwhe de asu taidi tatọ́ whẹndo tọn kẹdẹdile Jesu yin Ota agun tọn do. Apọsteli Paulu dọmọ: “Asu wẹ ota asi tọn dile Klisti yin ota agun tọn do; ewọ sọ wẹ Whlẹngántọ agbasa tọn. Mì asu lẹ emi, mì yiwanna asi mìtọn lẹ, yèdọ dile Klisti ga yiwanna agun lọ do, bosọ yí ede na ẹn.” (Efe. 5:23, 25) Na nugbo tọn, aliho he mẹ Jesu yinuwa hẹ hodotọ etọn lẹ te yin apajlẹ de na sunnu Klistiani lẹ nado yọ́n lehe yé dona nọ yinuwa hẹ asi yetọn lẹ do. Mì gbọ mí ni gbadopọnna delẹ to aliho he mẹ Jesu yí aṣẹpipa he Jiwheyẹwhe na ẹn zan te lẹ mẹ.
5. Nawẹ Jesu yí aṣẹpipa etọn zan do devi etọn lẹ ji gbọn?
5 Jesu yin “homẹmimiọnnọ podọ ayiha whiwhẹnọ.” (Mat. 11:29) E sọ yin nujikudonọ. E ma nọ dovọ́na azọngban etọn lẹ gbede. (Malku 6:34; Joh. 2:14-17) E nọ gbọn homẹdagbe dali na ayinamẹ devi etọn lẹ, podọ to whedelẹnu gbọzangbọzan, eyin e biọ domọ. (Mat. 20:21-28; Malku 9:33-37; Luku 22:24-27) Etomọṣo, Jesu ma nọ wadán do yé ji kavi de yé pò, mọdopolọ nuyiwa etọn lẹ ma nọ hẹn yé tindo numọtolanmẹ lọ dọ e ma yiwanna yé kavi lẹndọ yé ma pegan nado hẹn nuhe plọn yé e te lẹ di. Kakatimọ, e nọ pà devi etọn lẹ bo nọ na tuli yé. (Luku 10:17-21) Abajọ devi etọn lẹ do nọ na ẹn sisi, na e nọ do owanyi hia yé bo nọ vẹawu yé!
6. (a) Etẹwẹ asu de sọgan plọn sọn aliho he mẹ Jesu yinuwa hẹ devi etọn lẹ te mẹ? (b) Ayinamẹ tẹwẹ Pita na asu lẹ?
6 Apajlẹ Jesu tọn plọn asu lẹ dọ tatọ́-yinyin Klistiani tọn ma yin otẹn aṣẹglanglan-panamẹ po fifiẹ po tọn gba. Kakatimọ, yé na nọ yinuwa hẹ asi yetọn po sisi po gọna owanyi mẹde-yido-sanvọ́ tọn. Apọsteli Pita na ayinamẹ asu lẹ nado nọ hodo apajlẹ Jesu tọn to aliho he mẹ e do owanyi hia te mẹ bo “nọ yí nuyọnẹn do nọ̀ hẹ” asi yetọn lẹ, bosọ ‘nọ wleyẹyina’ yé. (Hia 1 Pita 3:7.) To whelọnu lo, nawẹ asu de sọgan yí aṣẹpipa etọn zan podọ to ojlẹ dopolọ mẹ wleyẹyina asi etọn gbọn?
7. Aliho tẹ mẹ wẹ asu de sọgan wleyẹyina asi etọn te? Na apajlẹ.
7 Dopo to aliho he mẹ asu de sọgan wleyẹyina asi etọn te wẹ nado nọ yí sọwhiwhe do lẹnnupọndo pọndohlan etọn po numọtolanmẹ etọn lẹ po ji whẹpo do basi nudide he gando whẹndo lọ go lẹ. Vlavo nudide lọ gando tẹnsisẹ yì fidevo kavi agbasazọ́n didiọ kavi whẹho egbesọegbesọ tọn lẹ go, taidi fie yé na yì na gbọjẹ kavi vọjlado he yé sọgan basi nado de akuẹzinzan whẹndo lọ tọn pò nado sọgan pehẹ nuhahun ahivivẹ onú lẹ tọn. Na whẹho ehelẹ gando whẹndo lọ go wutu, e na yọ́n dọ asu lọ ni lẹnnupọndo pọndohlan asi etọn tọn ji, na enẹ sọgan gọalọna asu lọ nado wá gbèta dagbe de kọ̀n, podọ e na bọawuna asi lọ nado nọgodona ẹn. (Howh. 15:22) E ma yindọ owanyi po sisi po kẹdẹ wẹ asu Klistiani he nọ wleyẹyina asi yetọn lẹ nọ mọyi sọn asi yetọn si gba, ṣigba na taun tọn yé nọ mọ nukundagbe Jehovah tọn yí.—Efe. 5:28, 29.
Lehe Asi de Nọ Do Sisi Sisosiso Hia Asu Etọn Gbọn
8. Naegbọn asi Klistiani lẹ dona dapana apajlẹ Evi tọn?
8 Na nuhe du taliliai na aṣẹpipa, asi Klistiani lẹ na wà dagbe nado hodo apajlẹ pipé Jesu tọn. Lehe nukun he Jesu yí do pọ́n aṣẹpipa gbọnvona walọ he asi tintan he yin didá do aigba ji dohia do sọ! Evi gboawupo nado ze apajlẹ dagbe dai na asi lẹ. E tindo tatọ́ he Jiwheyẹwhe deazọ́nna de, he gblamẹ Jehovah nọ na ẹn anademẹ lẹ. Ṣigba, Evi ma na sisi aṣẹpipa asu etọn tọn. E ma kẹalọyi anademẹ he Adam na ẹn. (Gẹn. 2:16, 17; 3:3; 1 Kọl. 11:3) Nugbo wẹ dọ, yè klọ Evi, ṣigba e dona ko kanhose asu etọn bo dike e ni deanana ẹn whẹpo do yí ogbè he dọna ẹn dọ “Jiwheyẹwhe yọnẹn dọ” lọ sè. Kakatimọ, e gbọn sakla dali deanana asu etọn.—Gẹn. 3:5, 6; 1 Tim. 2:14.
9. Apajlẹ taliliai tọn tẹwẹ Jesu zedai?
9 To vogbingbọn mẹ, Jesu ze apajlẹ pipé dai na mí gbọn taliliaina mẹhe yin Tatọ́ etọn dali. Walọyizan po gbẹzan etọn po dohia dọ e “ma lẹn ẹn na ale [nado hò otẹn de yí] nado sọzẹn hẹ Jiwheyẹwhe gba.” Kakatimọ, “e klọ́n gigo etọn dai, e yí ojlẹmọ afanumẹ tọn de na ede.” (Flp. 2:5-7) To egbehe, taidi Ahọlu he to gandu, Jesu gbẹ́ tindo pọndohlan dopolọ. E nọ gbọn whiwhẹ dali litaina Otọ́ etọn to nulẹpo mẹ bo nọ nọgodona tatọ́-yinyin Etọn.—Mat. 20:23; Joh. 5:30; 1 Kọl. 15:28.
10. Nawẹ asi de sọgan nọgodona tatọ́-yinyin asu etọn tọn gbọn?
10 Asi Klistiani de na wà dagbe nado hodo apajlẹ Jesu tọn gbọn godoninọna tatọ́-yinyin asu etọn tọn dali. (Hia 1 Pita 2:21; 3:1, 2.) Pọ́n dopo to ninọmẹ he mẹ asi de sọgan wàmọ te. Ovi etọn to ogbè biọ nado yì fide ehe mẹjitọ etọn lẹ dona nagbè e whẹpo e nido yì. Na mẹjitọ lọ lẹ ma ko dọhodo whẹho lọ ji dai wutu, e na yọ́n dọ onọ̀ lọ ni kanse e dọ, “Be a ko biọgbè otọ́ towe ya?” Eyin ovi lọ ma ko wàmọ, onọ̀ lọ dona dọhodo whẹho lọ ji hẹ asu etọn whẹpo e nido basi nudide depope do whẹho lọ ji. Humọ, asi Klistiani de ma dona jẹagọdo asu etọn kavi diọnukunsọ pọndohlan etọn to ovi yetọn lẹ nukọn. Eyin e ma kọngbedopọ hẹ asu etọn do nude ji, e na yọ́n nado dọho hẹ ẹ do whẹho lọ ji to nuglọ.—Efe. 6:4.
Jesu Ze Apajlẹ Dai Na Mẹjitọ Lẹ
11. Apajlẹ tẹwẹ Jesu zedai na mẹjitọ lẹ?
11 Dile etlẹ yindọ Jesu ma wlealọ kavi jivi, e ze apajlẹ dagbe dai na mẹjitọ Klistiani lẹ. Gbọnna? E gbọn owanyi po sọwhiwhe po dali plọnnu devi etọn lẹ to ohó po walọ po mẹ. E do lehe yé na hẹn azọ́ndenamẹ he e na yé di gbọn hia yé. (Luku 8:1) Jijọ Jesu tọn po lehe e yinuwa hẹ devi etọn lẹ do po plọn yé aliho he mẹ yé na nọ yinuwa hẹ ode awetọ te.—Hia Johanu 13:14-17.
12, 13. Etẹwẹ yin bibiọ to mẹjitọ lẹ si eyin yé na plọn ovi yetọn lẹ to obu Jiwheyẹwhe tọn mẹ?
12 Ovi lẹ nọ jlo na hodo apajlẹ mẹjitọ yetọn lẹ tọn, vlavo e yọ́n wẹo kavi e ylan. Enẹwutu, mẹjitọ lẹ emi, mì kanse mìde dọ: ‘Etẹ plọn ovi lẹ wẹ mí te na nuhe du whenu he mí nọ yizan to televiziọn kọ̀n podọ na ayidedai, yijlẹdo whenu he mí nọ yí do plọn Biblu po mahẹ tintindo to sinsẹ̀nzọn kunnudegbe tọn mẹ po go? Etẹlẹ wẹ tin to otẹn tintan mẹ na whẹndo mítọn? Be mí nọ ze apajlẹ dagbe dai gbọn sinsẹ̀n-bibasi nugbo zizedo otẹn tintan mẹ dali ya?’ Osẹ́n Jiwheyẹwhe tọn dona tin to ahun mẹjitọ lẹ tọn mẹ whẹ́, eyin yé na plọn ovi yetọn lẹ to obu Jiwheyẹwhe tọn mẹ.—Deut. 6:6.
13 Eyin mẹjitọ lẹ dovivẹnu nado nọ yí nunọwhinnusẹ́n Biblu tọn lẹ zan to whẹho egbesọegbesọ tọn lẹ mẹ, ovi yetọn lẹ na nọ doayi e go. Ohó po nuplọnmẹ mẹjitọ lẹ tọn po nọ yinuwado ovi lẹ ji taun. Ṣigba, eyin ovi lẹ doayi e go dọ mẹjitọ lẹ nọ dọ vò bo nọ wà vò, yé sọgan wá tadona lọ kọ̀n dọ nunọwhinnusẹ́n Biblu tọn lẹ ma yin nujọnu sọmọ kavi yọ́n-na-yizan gba. Podọ taidi kọdetọn de, ovi lẹ sọgan joawuna kọgbidinamẹ aihọn tọn lẹ po awubibọ po.
14, 15. Nujinọtedo tẹlẹ wẹ mẹjitọ lẹ dona dó do ovi yetọn lẹ mẹ, podọ etẹwẹ yin dopo to aliho he mẹ yé sọgan wà ehe te mẹ?
14 Mẹjitọ Klistiani lẹ yọnẹn dọ ovi de pinplọn nọ biọ nususu hugan awuwiwlena nuhudo agbasa tọn etọn lẹ poun. Enẹwutu, nulunu pete wẹ e na yin nado plọn ovi de nado doafọna yanwle he na sinai do agbasanu lẹ kẹdẹ ji. (Yẹwh. 7:12) Jesu plọn devi etọn lẹ nado nọ doafọna gbigbọnu lẹ bo ze yé do otẹn tintan mẹ. (Mat. 6:33) Enẹwutu, eyin mẹjitọ Klistiani lẹ na hodo apajlẹ Jesu tọn, yé sọ dona dovivẹnu bo dó ojlo lọ nado doafọna gbigbọnu lẹ do ahun mẹ na ovi yetọn lẹ.
15 Dopo to aliho he mẹ mẹjitọ lẹ sọgan wà ehe te lẹ mẹ wẹ nado dín dotẹnmẹ hundote lẹ na ovi yetọn lẹ, na yé nido dogbẹ́ hẹ mẹhe tin to sinsẹ̀nzọn whenu-gigọ́ tọn mẹ lẹ. Pọ́n lehe e na yin tulinamẹnu nado dike jọja aflanmẹ de ni jẹakọ hẹ gbehosọnalitọ lẹ kavi nugopọntọ lẹdo tọn po asi etọn po do. Eyin mí nọ dla mẹdehlan lẹ, azọ́nwatọ Bẹtẹli tọn lẹ, po devizọnwatọ tògodo tọn he nọ gbáhọ lẹ po pọ́n, apàpà sọgan sọ́ yé nado dọ ayajẹ he yé nọ mọ to Jehovah sinsẹ̀n mẹ lẹ na mí. Matin ayihaawe, devizọnwatọ enẹlẹ na tindo numimọ mẹjlọdote tọn lẹ nado dọ. Apajlẹ sinsẹ̀nzọn mẹde-yido-sanvọ́ tọn yetọn sọgan gọalọna ovi towe lẹ taun nado basi nudide nuyọnẹn tọn lẹ, nado ze yanwle dagbe lẹ donukọnna yede, podọ enẹ na gọalọna yé nado plọnwe jẹ obá de mẹ he na zọ́n bọ yé na penukundo yede go to sinsẹ̀nzọn whenu-gigọ́ tọn mẹ.
Mì Ovi lẹ—Etẹwẹ Na Gọalọna Mì Nado Hodo Apajlẹ Jesu Tọn?
16. Nawẹ Jesu gbògbéna mẹjitọ aigba ji tọn etọn lẹ po Otọ́ olọn mẹ tọn etọn po gbọn?
16 Ovi lẹ emi, Jesu ze apajlẹ dagbe dai na mìlọsu ga. Jesu yin zizedo alọmẹ na Josẹfu po Malia po nado penukundego, podọ e setonuna yé. (Hia Luku 2:51.) E yọnẹn dọ, mahopọnna dọ yé yin mapenọ, Jiwheyẹwhe ko ze azọngban lọ do alọmẹ na yé nado penukundo emi go. Enẹwutu, Jesu mọdọ emi dona gbògbéna yé. (Deut. 5:16; Mat. 15:4) To whenue Jesu whẹ́n, e nọ wà nuhe na hẹn homẹhun Otọ́ olọn mẹ tọn etọn to whepoponu. Enẹ biọ dọ e ni nọavunte sọta whlepọn lẹ. (Mat. 4:1-10) Mì jọja lẹ sọgan yin whiwhlepọn to whedelẹnu nado vẹtolina mẹjitọ mìtọn lẹ. Enẹwutu, etẹwẹ sọgan gọalọna mì nado hodo apajlẹ Jesu tọn?
17, 18. (a) Whlepọn wunmẹ tẹlẹ wẹ jọja lẹ nọ pehẹ to wehọmẹ? (b) Etẹ finflin wẹ na gọalọna jọja lẹ nado duto whlepọn lẹ ji?
17 Vlavo, suhugan wehọmẹvigbẹ́ towe lẹ tọn ma tindo sisi na nujinọtedo Biblu tọn lẹ sọmọ. Yé sọgan tẹnpọn nado dọ̀n we biọ nuhe fọ́n ayihaawe dote lẹ wiwà mẹ bo ṣàn we kò eyin a gbẹ́. Be wehọmẹvigbẹ́ towe lẹ nọ do oyín na we na a gbẹ́ nado doalọ to nuwiwa delẹ mẹ wutu ya? Eyin mọwẹ, nawẹ hiẹ nọ yinuwa gbọn? A yọnẹn dọ eyin emi dibu bo hodo gbẹtọgun lẹ, a na dowinyan mẹjitọ towe lẹ po Jehovah po. Etẹwẹ na yin kọdetọn lọ eyin a hodo wehọmẹvigbẹ́ towe lẹ? Vlavo a ko ze yanwle delẹ do nukọn na dewe, taidi nado lẹzun gbehosọnalitọ de kavi devizọnwatọ lizọnyizọnwiwa tọn, nado wà sinsẹ̀nzọn to fie nuhudo wẹnlatọ Ahọluduta lọ tọn lẹ sù hugan te, kavi nado yì sẹ̀n to Bẹtẹli. Be gbẹdido hẹ wehọmẹvigbẹ́ towe lẹ na gọalọna we nado jẹ yanwle towe lẹ kọ̀n ya?
18 Be e ko jọ pọ́n bọ mì jọja he tin to agun Klistiani tọn mẹ lẹ mọ mìde to ninọmẹ de mẹ he whlé yise mìtọn pọ́n ya? Nawẹ mì yinuwa gbọn? Mì lẹnnupọndo apajlẹ Jesu tọn ji. E gbẹ́ nado joawuna whlepọn bo yiavunlọna nuhe e yọnẹn dọ e sọgbe. Ehe finflin na na mì adọgbigbo nado dọna wehọmẹvigbẹ́ mìtọn lẹ po jintli po dọ mì ma jlo nado kọnawudopọ hẹ yé to nuhe ma sọgbe wiwà mẹ. Taidi Jesu, mì ze ayidonugo mìtọn do sinsẹ̀nzọn he na hẹn ayajẹ tẹgbẹ tọn wá podọ do tonusisena Jehovah ji.—Heb. 12:2.
Nuhe Nọ Hẹn Gbẹzan Whẹndo Tọn Tindo Ayajẹ
19. Gbẹzan wunmẹ tẹwẹ nọ hẹn ayajẹ nujọnu tọn wá?
19 Nuhe na wà dagbe na gbẹtọvi lẹ hugan wẹ Jehovah Jiwheyẹwhe po Jesu Klisti po nọ jlo. Mahopọnna dọ mí yin mapenọ, e yọnbasi dọ mí sọgan duvivi ayajẹ tọn jẹ obá de mẹ. (Isa. 48:17, 18; Mat. 5:3) Jesu plọnmẹ nugbo he ji ayajẹ gbẹtọvi lẹ tọn sinai do lẹ, ṣigba e ma yin enẹ kẹdẹ wẹ e plọn devi etọn lẹ gba. E sọ plọnmẹ aliho gbẹzan tọn he yọ́n hugan lọ. Humọ, e ze apajlẹ gbẹzan jlẹkaji tọn po pọndohlan jlẹkaji tọn po dai. Mímẹpo wẹ sọgan mọaleyi sọn apajlẹ etọn mẹ, mahopọnna azọngban he mí tindo to whẹndo mẹ. Enẹwutu, mì asu lẹ, asi lẹ, mẹjitọ lẹ, po ovi lẹ po emi, mì nọ hodo apajlẹ Jesu tọn! Eyin mí kẹalọyi nuplọnmẹ Jesu tọn bo hodo apajlẹ etọn, enẹ na zọ́n bọ whẹndo mítọn na tindo ayajẹ po pekọ po.
[Yẹdide to weda 11]
Nawẹ Hiẹ Na Na Gblọndo Gbọn?
• Nawẹ asu lẹ dona nọ yí aṣẹpipa he Jiwheyẹwhe na yé zan gbọn?
• Nawẹ asi de sọgan hodo apajlẹ Jesu tọn gbọn?
• Etẹwẹ mẹjitọ lẹ sọgan plọn sọn lehe Jesu yinuwa hẹ devi etọn lẹ do mẹ?
• Etẹwẹ jọja lẹ sọgan plọn sọn apajlẹ Jesu tọn mẹ?
[Kanbiọ Oplọn tọn lẹ]
[Yẹdide to weda 8]
Whẹpo asu owanyinọ de nido basi nudide he gando whẹndo etọn go lẹ, etẹwẹ e dona wà?
[Yẹdide to weda 9]
Ninọmẹ tẹwẹ sọgan hùn dotẹnmẹ dotena asi de nado nọgodona tatọ́-yinyin asu etọn tọn?
[Yẹdide to weda 10]
Ovi lẹ nọ hodo apajlẹ dagbe mẹjitọ yetọn lẹ tọn