Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Be todido fọnsọnku tọn de tin na ovi he kú do homẹ na onọ̀ etọn de ya?

Ogbẹ̀ nọ bẹjẹeji to hòmimọ whenu. Jehovah sọgan fọ́n mẹdepope sọnku mahopọnna owhe he mẹlọ tindo na “nulẹpo wẹ wiwà na Jiwheyẹwhe.” (Malku 10:27) Ṣigba, Biblu ma dọ tlọlọ dọ Jiwheyẹwhe na fọ́n ovi he kú do homẹ na onọ̀ etọn de sọnku gba.—15/4, weda 12, 13.

• Etẹwẹ adidẹ́ lẹ, azui he nọ nọ̀ aigba osé tọn lẹ ji, owẹ̀n lẹ, po họmẹsi lẹ po sọgan plọn mí?

Nudida ẹnẹ ehelẹ do nuyọnẹn jọwamọ tọn hia. Gbọnmọ dali, yé nọ ze nuyọnẹn Jiwheyẹwhe tọn sù. (Howh. 30:24-28)—15/4, weda 16-19.

• Naegbọn Biblu do dọ dọ e yọ́n nado nabọẹ?

Biblu dohia dọ abọẹninọ sọgan yin ohia sisi tọn de he nọ gọalọ nado lẹnayihamẹpọn, podọ e yin kunnudenu nuyọnẹn po zinzin po tọn. (Ps. 37:7; 63:6; Howh. 11:12)—15/5, weda 3-5.

• Ahọlu Juda tọn nẹmu wẹ do zohunhun vonọtaun hia na ohọ̀ Jiwheyẹwhe tọn?

Ahọlu 19 wẹ dugán to Juda he yin ahọluduta hùwaji tọn, podọ ẹnẹ to yé mẹ wẹ do zohunhun ayidego tọn mọnkọtọn hia—yèdọ Asa, Jehọṣafati, Hẹzekia, po Josia po.—15/6, weda 7-11.

• Be Klistiani yiamisisadode he tin to aigba ji lẹpo wẹ nọ wleawuna núdùdù gbigbọmẹ tọn ya?

Lala. Mẹhe yin dide gbọn gbigbọ Jiwheyẹwhe tọn dali lẹpo wẹ yin apadewhe pipli afanumẹ nugbonọ nuyọnẹntọ lọ tọn, ṣigba Hagbẹ Anademẹtọ lọ wẹ nọ penukundo núdùdù gbigbọmẹ tọn go.—15/6, weda 22-24.

• Naegbọn mí sọgan dọ dọ owanyi wẹ onú titengbe he hẹn aliho he mẹ Jesu yinuwa hẹ gbẹtọ lẹ te gbọnvo na nukọntọ sinsẹ̀n tọn lẹ tọn?

Kakati nado yiwanna gbẹtọ paa lẹ, nukọntọ sinsẹ̀n tọn enẹlẹ nọ ṣàn yé ko. Humọ, yé ma yiwanna Jiwheyẹwhe. Jesu yiwanna Otọ́ etọn podọ onú gbẹtọ lẹ tọn nọ blawuna ẹn. (Mat. 9:36) E tindo awuvẹmẹ sisosiso, bo jọmẹ, bosọ nọ hò yetọn pọ́n.—15/7, weda 15.