N’mọ Nuhe Pọnte Hugan de to Gbẹzan Ṣie Mẹ

Dile e yin didọ gbọn Gaspar Martínez dali

To aliho de mẹ, dẹpẹ wamọnọ he tọ́n sọn gbétatò de mẹ wẹ n’yin, bọ onú wá yọ́n na mi to tòhomẹ. Ṣigba hiẹ na wá mọdọ adọkunnu he n’bẹpli lẹ ma yin dehe n’donukun lọ pẹpẹ gba.

GBÉTATÒ he aigba etọn ma nọ de sinsẹ́n tọ́n de mẹ wẹ n’whẹ́n te to owhe 1930 lẹ mẹ, to lẹdo Rioja tọn mẹ to agewaji Espagne tọn. Whenue n’do owhe ao, n’jo wehọmẹ yìyì do, ṣigba n’ko yọnwehia bo yọnkàn to ojlẹ enẹ mẹ. To pọmẹ hẹ mẹdaho ṣie lẹ po nọvi ṣie lẹ po, n’nọ plan lẹngbọ lẹ yì danji kavi nọ yì ogle kleun he mí tindo mẹ.

Na ohẹ́n wutu, agbasanu lẹ tintindo nọ duahunmẹna mí taun. Ogbẹ̀ mẹhe tindo nususu hugan mí lẹ tọn nọ jlo mí tlala. Biṣọpu mítọn dọ to gbèdopo dọ “gbétatò mítọn wẹ yiwanna sinsẹ̀n hugan to lẹdo he go emi nọ penukundo lẹ mẹ.” To ojlẹ enẹ mẹ, e ma lẹndọ mẹsusu na wá gbẹ́ sinsẹ̀n Katoliki tọn dai.

N’Jẹ Nuhe Pọnte Hugan de Dín Ji

N’wlealọ hẹ Mercedes, awhli de sọn gbétatò ṣie mẹ. E ma dẹn bọ mí jì visunnu dopo. To 1957, mí sẹtẹn yì Logroño tòdaho he sẹpọ de mẹ, podọ to godo mẹ, whẹndo ṣie blebu sẹtẹn wá. N’wá mọdọ na n’ma plọnazọ́n vonọtaun de wutu, e na vẹawuna mi nado mọ akuẹ he yinukunkẹ nado sọgan penukundo whẹndo ṣie go. N’ma yọ́n fihe n’sọgan lẹhlan. N’dín azọ́n yì wesẹdotẹn lẹdo lọ tọn, dile etlẹ yindọ n’ma yọ́n nuhe n’sọgan wà.

To ojlẹ de godo, n’sè dọ tito-to-whinnu ladio tọn de tin he nọ ze Biblu pinplọn gbọn wekanhlanmẹ dali donukọnnamẹ. Whenue n’dotana nupinplọn enẹ, e ma dẹn bọ Wẹndagbe-Jlatọ Plọtẹstant tọn delẹ wá dè e. To dlapọn kleun de bibasi yì nọtẹn sinsẹ̀n-bibasi tọn yetọn godo, n’doayi e go dọ nudindọn tin to nukọntọ lọ lẹ ṣẹnṣẹn. N’masọ lẹkọyi ba, na n’mọdọ e ma gbọnvona sinsẹ̀n he pò lẹ.

Din Wẹ N’Wá Mọ Nuhe Dín N’te Lọ

To 1964, dẹpẹ de he nọ yin Eugenio basi dlapọn wá owhé mítọn gbè. Ewọ yin dopo to Kunnudetọ Jehovah tọn lẹ mẹ, yèdọ sinsẹ̀n he n’ma ko yọnẹn dai de. Ṣigba e ko to jijlo yẹnlọsu dai nado dọho do Biblu ji. Linlẹn ṣie wẹ yindọ n’ko tindo oyọnẹn Owe-wiwe tọn ganji. N’yí wefọ he n’ko yọnẹn to whenue n’plọn Biblu gbọn wekanhlanmẹ dali delẹ zan nado na ẹn gblọndo. Na taun tọn, dile n’tlẹ tẹnpọn nado yiavunlọna sinsẹ̀n-nuplọnmẹ Plọtẹstant tọn delẹ, n’ma tindo yise nujọnu tọn de to yé mẹ.

 To hodọdopọ he yí whenu susu whla awe godo, n’dona yigbe dọ Eugenio yọ́n Ohó Jiwheyẹwhe tọn taun. E paṣa mi nado mọ lehe e nọ yawu mọ wefọ lẹ bo nọ yihojlẹdohogo nado basi yọ́n-na-yizan yetọn do, mahopọnna dọ e ma yì wehọmẹ sọ mi. Eugenio dohia mi sọn Biblu mẹ dọ azán godo tọn lẹ mẹ wẹ mí to gbẹnọ te, podọ Ahọluduta Jiwheyẹwhe tọn na hẹn aigba zun paladisi to madẹnmẹ. Enẹ dọ̀n ayidonugo ṣie taun.—Ps. 37:11, 29; Isa. 9:6, 7; Mat. 6:9, 10.

Tlolo wẹ n’kẹalọyi plọnmẹ Biblu de. Diblayin nuhe plọn n’te lẹpo wẹ taidi nuyọyọ de na mi bosọ yinuwado ji e taun. Dotẹnmẹ he na hẹn gbẹzan ṣie tindo zẹẹmẹ de hùndonuvo na mi. N’wá mọ nuhe dín n’te lo. Todin, vivẹnudido lọ nado hẹn ninọmẹ ṣie pọnte to gbẹ̀mẹ masọ to ahunmẹduna mi sọmọ ba, mọjanwẹ n’masọ nọ lẹn nuhahun azọ́n tọn pọ́n glanglan do niyẹn. Eyin Jiwheyẹwhe na de azọ̀n po okú po sẹ̀, nẹmunẹmu wẹ e na yin na nuhahun he pò lẹ?—Isa. 33:24; 35:5, 6; Osọhia 21:4.

N’jẹ nuhe plọn n’te lẹ dọna hẹnnumẹ ṣie lẹ ji to afọdopolọji, bo yí zohunhun do basi zẹẹmẹ na yé dọ Jiwheyẹwhe dopagbe dọ emi na hẹn paladisi wá aigba ji fie gbẹtọvi nugbonọ lẹ na nọ̀ kakadoi.

Whẹndo Ṣie Kẹalọyi Nugbo Biblu Tọn

To ojlẹ vude godo, mímẹ 12 nkọ basi dide nado nọ plidopọ to dimanche whèmẹ lẹpo to owhé tavẹ ṣie tọn gbè nado sọgan dọhodopọ do opagbe Biblu tọn lẹ ji. Mí nọ yí gànhiho awe kavi atọ̀n zan to sẹmẹsẹmẹ nado nọ wà ehe. Whenue Eugenio mọdọ hẹnnumẹ ṣie ehelẹ tindo ojlo to Biblu mẹ, e basi tito nado na ayidonugo whẹndo dopodopo.

Hẹnnumẹ ṣie devo lẹ tin to Durango, yèdọ tòpẹvi de he dẹn do mí na nudi kilomẹtlu 120, fie Kunnudetọ depope ma te. Enẹwutu, to osun atọ̀n godo n’yí gbọjẹ na azán kleun de nado yì dla yé pọ́n bo basi zẹẹmẹ nuyise yọyọ ṣie tọn na yé. To ojlẹ enẹ mẹ, mímẹ ao nkọ nọ pli dopọ to whèjai lẹpo bọ n’nọ dọhona yé kaka biọ zánhomẹ. Homẹ nọ hùn yemẹpo nado dotoai. Whenue yìyì ṣie yá, n’jo Biblu po owe sinai do Biblu ji delẹ po do na yé. Sọn whenẹnu, mí nọ mọ míde janwẹ.

Whenue Kunnudetọ lẹ wá Durango—yèdọ lẹdo he mẹ mẹdevo de, gbọnvona yẹn, ma ko dọyẹwheho te pọ́n—yé mọ gbẹtọ 18 he ko to jejeji nado plọn Biblu. Po homẹhunhun po, Kunnudetọ ehelẹ basi tito nado plọn Biblu hẹ dopodopo whẹndo lọ lẹ tọn.

Kakajẹ ojlẹ enẹ mẹ, Mercedes ma ko kẹalọyi nugbo lọ gba. Gbọnvona ojlo matindo, nuhe glọnalina ẹn hugan wẹ obu gbẹtọ tọn. Na azọ́n Kunnudetọ Jehovah tọn lẹ tọn yin alọhẹndotena to Espagne to ojlẹ enẹ mẹ wutu, e lẹndọ aṣẹpatọ lẹ na yàn ovi mítọn lẹ sọn wehọmẹ bọ mímẹpo na wá lẹzun aṣagbọ́nu. Ṣigba whenue e wá mọdọ whẹndo lọ blebu kẹalọyi nugbo Biblu tọn, ewọ lọsu yigbe nado plọnnu.

To owhe awe gblamẹ, hagbẹ whẹndo ṣie tọn 40 wẹ basi klandowiwe yetọn nado sẹ̀n Jiwheyẹwhe gbọn baptẹm osin tọn dali. Mọwẹ, yẹn po whẹndo ṣie po wá tindo yanwle gbẹ̀mẹ tọn dopolọ. N’wá mọdọ alọ ṣie ko jẹ nuhọakuẹ de go nugbonugbo. Jiwheyẹwhe ko dona mí po adọkunnu gbigbọmẹ tọn susugege po.

Gbẹzan Ṣie Tindo Zẹẹmẹ Dogọ Dile N’to Mẹho Yin

To owhe 20 he bọdego lẹ mẹ, n’na ayidonugo visunnu mítọn awe lẹ to gbigbọ-liho bo gọalọna agun he to lẹdo lọ mẹ. To ojlẹ he mẹ yẹn po Mercedes po wá Logroño, nudi Kunnudetọ 20 poun wẹ tin to tòdaho he tindo nudi gbẹtọ 100000 enẹ mẹ. E ma dẹn bọ azọngban susu jẹ alọmẹ na mi to agun lọ mẹ.

Enẹgodo, whenue n’do owhe 56, azọ́nwhé mítọn suhọ̀n to ajiji mẹ bọ azọ́n gble do mi. Na lizọnyizọn whenu-gigọ́ tọn ko nọ jlo mi dai wutu, n’yí dotẹnmẹ hundote ehe zan nado lẹzun gbehosọnalitọ. Sunzankuẹ gbọjẹ gaa tọn he n’nọ mọyi ma sọtẹ́n. Enẹwutu, Mercedes nọ wazọ́n taidi họmẹjladotọ na mẹdevo lẹ nado nọgodona mi. Gbọnmọ dali, mí penugo nado penukundo whẹndo mítọn go bo ma gbọagba nuhe yin dandannu lẹ tọn. N’gbẹ́ to  sinsẹ̀n taidi gbehosọnalitọ, bọ asi ṣie nọ doalọ to sinsẹ̀nzọn gbehosọnalitọ alọgọtọ tọn mẹ sọn ojlẹ de mẹ jẹ devo mẹ, podọ e nọ tindo ayajẹ to azọ́n yẹwhehodidọ tọn mẹ taun.

Owhe delẹ die wayi, Mercedes nọ yí linlinnamẹwe mítọn lẹ na nawe de he nọ yin Merche, mẹhe ko plọn Biblu whenue e to ovu. Merche nọ do ojlo to owe mítọn lẹ hihia mẹ, podọ Mercedes mọdọ e gbẹ́ yọ́n pinpẹn nugbo Biblu tọn. To godo mẹ, Merche kẹalọyi plọnmẹ Biblu bo jẹ nukọnzindo ji. Ṣigba asu etọn Vicente nọ nùahànmú bo ma sọgan penukundo agbasazọ́n tangan de go. Enẹwutu, e ma nọ penukundo asi etọn go to akuẹzinzan-liho, podọ alọwle yetọn dibla gbà kija na ahàn sinsinyẹn ṣiṣizan etọn wutu.

Asi ṣie na ayinamẹ Merche dọ Vicente ni dọho hẹ mi do whẹho lọ ji, podọ e wàmọ to godo mẹ. To dlapọn susu godo, e kẹalọyi plọnmẹ Biblu. Vicente jẹ vọjlado basi ji bo nọ gọ̀n ahàn nù na azán delẹ. Vudevude, e nọ gọ̀n ahàn nù na osẹ dopo kavi humọ. To godo mẹ, e jo ahàn sinsinyẹn nùnù do pete. Nukunmẹ etọn wá yọ́npọ́n taun, podọ whẹndo etọn wá tin to kọndopọ mẹ. Whẹndo etọn blebu, kakajẹ asi etọn po viyọnnu etọn po ji, wẹ nọgodona agun pẹvi he to Lopo Canarie tọn lẹ ji, fie yé te todin.

Nulinlẹnpọndo Gbẹzan Dagbe Ṣie Ji

Dile etlẹ yindọ delẹ to hagbẹ whẹndo ṣie tọn he plọn nugbo Biblu tọn sọn owhe delẹ die wayi lẹ mẹ ko kú, whẹndo mítọn fọ́n bo to gbigblo deji, podọ Jiwheyẹwhe ko dona mí susugege. (Howh. 10:22) Pekọ nankọ die nado mọdọ diblayin mẹhe jẹ nugbo Biblu tọn plọn ji sọn owhe 40 die wayi lẹpo—gọna ovi po ovivi yetọn lẹ po—gbẹ́ to Jehovah sẹ̀n po nugbonọ-yinyin po!

To egbehe, hẹnnumẹ ṣie susu wẹ yin Kunnudetọ bọ susu yetọn to sinsẹ̀n taidi mẹho, devizọnwatọ lizọnyizọnwiwa tọn, po gbehosọnalitọ po. Plọnji ṣie po asi etọn po to sinsẹ̀n to alahọ Kunnudetọ Jehovah tọn lẹ tọn mẹ to Madrid, Espagne. Mímẹ Kunnudetọ 3000 nkọ wẹ tin to Espagne to whenue n’mọ nugbo. Todin, mí ko hugan 100000. N’nọ duvivi lizọnyizọn whenu-gigọ́ tọn taun, podọ n’dopẹna Jiwheyẹwhe tlala na gbẹzan dagbe he n’zan to sinsẹ̀nzọn etọn mẹ. Mahopọnna dọ n’ma yì wehọmẹ sọmọ, n’penugo nado nọ sẹ̀n sọn ojlẹ de mẹ jẹ devo mẹ taidi nugopọntọ lẹdo tọn tẹnmẹpọnnamẹtọ.

To owhe delẹ die wayi, n’mọdọ gbétatò he mẹ n’whẹ́n te ko dibla jẹvọ́. Ohẹ́n zọ́n bọ tòmẹnu lọ lẹpo to dandannu glọ nado jo owhé po ogle yetọn lẹ po do, nado sọgan hẹn gbẹzan yetọn pọnte dogọ. Homẹhunnu de wẹ e yin nado mọdọ susu mímẹ he tọ́n sọn gbétatò lọ mẹ lẹ tọn wẹ ko lẹzun adọkunnọ to gbigbọ-liho. Mí mọdọ ogbẹ̀ tindo lẹndai, podọ Jehovah sinsẹ̀n wẹ nọ hẹn ayajẹ mayọnjlẹ wá.

[Yẹdide to weda 32]

Suhugan whẹndo Mẹmẹsunnu Martínez tọn he tin to nugbo lọ mẹ lẹ tọn die