Be Hiẹ Ko De Whenu Dovo Na Biblu Pinplọn Ya?

TO OWHE he wayi, Hagbẹ Anademẹtọ lọ lá diọdo de gando tito opli agun tọn lẹ tọn go. Ehe hùn dotẹnmẹ dotena mí dogọ nado plọn Biblu bo dọhodeji dopọ to whẹndo mẹ. Eyin tatọ́ whẹndo tọn de wẹ hiẹ yin, hẹn ẹn diun dọ a nọ basi oplọn whẹndo tọn nujọnu tọn de to gbesisọ mẹ hẹ asi towe po ovi towe lẹ po. Asu po asi po he ma tindo ovi lẹ sọgan yí whenu ehe zan nado plọn Biblu dopọ. Mẹmẹsunnu po mẹmẹyọnnu tlẹnnọ he ma tindo azọngban whẹndo tọn lẹ po sọgan yí ojlẹ ehe zan nado basi oplọn mẹdetiti tọn.

Mẹsusu ko do pinpẹn-nutọn-yinyọnẹn hia na tito sinsẹ̀n-bibasi whẹndo tọn he Hagbẹ Anademẹtọ lọ zedai todin. Di apajlẹ, Kevin he yin mẹho agun tọn de wlan dọmọ: “Hogbe whè do mí nado do lehe agun mítọn yọ́n pinpẹn tito ehe tọn sọ hia. Mí mẹho agun tọn lẹ ko dọhodo lehe mí na nọ yí whèjai he vò enẹ zan do ji, dile Hagbẹ Anademẹtọ lọ biọ do—enẹ wẹ nado plọnnu dopọ hẹ whẹndo mítọn lẹ.”

Jodi, he asu etọn yin mẹho agun tọn de, wlan dọmọ: “Viyọnnu atọ̀n wẹ mí tindo. Tintan do owhe 15, awetọ, owhe 11 podọ atọ̀ntọ do owhe 2. To agọe, mí sẹtẹn yì agun ogbè alọ-yido-dọho tọn de mẹ. E nọ biọ whenu po vivẹnu susu po nado wleawuna opli lẹpo. Ṣigba todin, diọdo ehe ko gọalọna mí nado mọ whèjai he vò dopo dogọ he hùn dotẹnmẹ dotena mí nado na ayidonugo sinsẹ̀n-bibasi whẹndo tọn!”

John po JoAnn po, yèdọ asu po asi po he to sinsẹ̀n taidi gbehosọnalitọ whepoponu tọn de wlan dọmọ: “To dai, oplọn whẹndo tọn mítọn nọ saba súnadu na nuwiwa agun tọn voovo lẹ nọ ján do e mẹ wutu. Tito yọyọ ehe yin nunina de sọn Jehovah dè he na hẹn mí lodo to gbigbọ-liho—eyin mí yí whenu ehe zan dile e jẹ do.”

Tony, mẹmẹsunnu tlẹnnọ de he tindo nudi owhe 25, de mardi whèjai lẹ dovo nado nọ basi oplọn mẹdetiti tọn. E nọ yí azán devo lẹ zan to osẹ dopodopo gblamẹ nado wleawuna opli agun tọn lẹ. Ṣigba, Tony dọ dọ, “Na taun tọn n’nọ to jejeji dọ mardi ni wá.” Etẹwutu? “Whèjai vonọtaun de wẹ enẹ yin na mi he n’nọ yizan na Jehovah.” Tony basi zẹẹmẹ dọmọ: “N’nọ yí nudi gànhiho awe zan nado plọnnu do nuhe na hẹn haṣinṣan ṣie hẹ Jehovah lodo lẹ ji. Whenu susu he n’nọ yizan nado plọnnu nọ zọ́n bọ n’nọ lẹnayihamẹpọn do wefọ Biblu tọn he n’hia lẹ ji.” Etẹwẹ yin kọdetọn lọ? “Ayinamẹ Jehovah tọn lẹ nọ biọ ahun ṣie mẹ sisosiso todin hugan dai tọn.” Etẹwẹ do ehe hia? “To owe lọ Étude perspicace mẹ, n’hia dogbọn haṣinṣan Davidi po Jonatani po tọn dali. N’plọn nususu sọn gbigbọ mẹde-yido-sanvọ́ Jonatani tọn mẹ. Apajlẹ etọn gọalọna mi nado mọnukunnujẹ nuhe e zẹẹmẹdo nado yin họntọn dagbe mẹ hezeheze. Na taun tọn, n’nọ to jejeji nado mọ nuhọakuẹ susu mọnkọtọn devo lẹ plọn dogọ to mardi whèjai lẹ!”

Matin ayihaawe, devizọnwatọ Jehovah tọn lẹpo wẹ na mọ ale susu yí, eyin yé nọ yí whenu he mí tindo dogọ todin ehe zan ganji na oplọn mẹdetiti tọn po sinsẹ̀n-bibasi whẹndo tọn nujọnu tọn de po.