Be Hiẹ Ko “Doadọ̀do bo Yin Hinhẹn Lodo do Dodonu lọ ji” Ya?

BE A ko mọ atingbó he jẹhọn sinsinyẹn to yadona de pọ́n ya? Nuhe pehẹ atin lọ te ma bọawu, ṣigba e gbẹ́ pò to ote. Etẹwutu? Na e tindo adọ̀ he lodo bo hẹnai gbanun-gbanun wutu. Mí sọgan taidi atin enẹ nkọ. Eyin mí to pipehẹ whlepọn sinsinyẹn gbẹ̀mẹ tọn lẹ, mílọsu sọgan dudeji eyin mí “doadọ̀do bo yin hinhẹn lodo do dodonu lọ ji.” (Efe. 3:14-17, NW) Etẹwẹ dodonu enẹ?

Ohó Jiwheyẹwhe tọn dọ dọ “Jesu Klisti lọsu wẹ osé gángán lọnglọnẹn” agun Klistiani tọn lọ. (Efe. 2:20; 1 Kọl. 3:11) Taidi Klistiani, mí yin tulina dọmọ: “Mì nọ to zọnlinzin to ewọ mẹ . . . na yè ni yí afọ mìtọn hẹnai, na yè nisọ dó mì daga to e mẹ, bo hẹn mì lodo to yise mẹ.” Eyin mí wàmọ, mí na penugo nado duto whlepọn yise mítọn tọn lẹpo ji—kakajẹ “ohó lalo” he sinai do “oklọ tata” gbẹtọ tọn lẹ ji.—Kọl. 2:4-8.

“Gbigblo, Tedidi, Sisosiso po Jiyiyi Po”

To whelọnu lo, nawẹ mí sọgan “yí afọ [mítọn] hẹnai” bo “lodo to yise mẹ” gbọn? Dopo to aliho titengbe he mẹ mí sọgan doadọ̀do gbanun-gbanun to yẹhiadonu-liho te mẹ wẹ, nado nọ plọn Ohó gbọdo Jiwheyẹwhe tọn po sọwhiwhe po. Jehovah jlo dọ mí ni “tunwun hẹ mẹwiwe lẹpo . . . nuhe gbigblo, tedidi, sisosiso [podọ] jiyiyi” nugbo lọ tọn yin. (Efe. 3:18) Enẹwutu, Klistiani depope ma dona lẹndọ nukunnumọjẹnumẹ mọmọ tọn de poun ko pé, gbọn “onú dodonu” tọn he tin to Ohó Jiwheyẹwhe tọn mẹ lẹ yinyọnẹn kẹdẹ dali. (Heb. 5:12; 6:1, NW) Kakatimọ, dopodopo mítọn dona nọ nọ̀ jejeji nado hẹn nukunnumọjẹnumẹ ede tọn gando nugbo Biblu tọn lẹ go siso deji.—Howh. 2:1-5.

Na nugbo tọn, enẹ ma zẹẹmẹdo dọ mí dona tindo oyọnẹn vonọtaun whẹpo do “doadọ̀do bo yin hinhẹn lodo” to nugbo lọ mẹ gba. Satani lọsu saa yọ́n nuhe tin to Biblu mẹ lẹ. Mí tindo nuhudo nudevo tọn. Mí dona “yọ́n owanyi Klisti tọn, he sù hú nuyọnẹn” kavi oyọnẹn lẹpo. (Efe. 3:19) Ṣigba, eyin owanyi he mí tindo na Jehovah po nugbo lọ po wẹ nọ whàn mí nado plọn Biblu, oyọnẹn mítọn to Ohó Jiwheyẹwhe tọn mẹ na sudeji bọ enẹ na hẹn yise mítọn lodo.—Kọl. 2:2.

 Tẹ́n Nukunnumọjẹnumẹ Towe Pọ́n

Be e ma na yọ́n dọ a ni tẹ́n nukunnumọjẹnumẹ he a tindo gando vude to nugbo titengbe Biblu tọn lẹ mẹ go pọ́n todin ya? Mọwiwà sọgan na we tuli nado nọ basi oplọn mẹdetiti tọn po sọwhiwhe po. Di apajlẹ, hia wefọ he bẹ wekanhlanmẹ apọsteli Paulu tọn hlan Efesunu lẹ jẹeji lẹ. (Pọ́n apotin lọ “Hlan Efesunu lẹ.”) To wefọ ehelẹ hihia godo, kanse dewe dọ, ‘Be n’mọnukunnujẹ zẹẹmẹ hogbe he yin winwlan po wekun flinflin po do wefọ he tin to apotin lọ mẹ lẹ tọn mẹ ya?’ Mì gbọ mí ni gbadopọnna wefọ lọ lẹ debọdo-dego.

Yin Dide “Jẹnukọnna Dòdó Aihọn Tọn”

Paulu wlanwe hlan yisenọ hatọ etọn lẹ dọmọ: “[Jiwheyẹwhe] ko de mí na sọdodovi . . . gbọn Jesu Klisti mẹ na ede.” Na nugbo tọn, Jehovah magbe nado hẹn gbẹtọvi delẹ zun sọdodovi do whẹndo pipé olọn mẹ tọn etọn mẹ. Mẹhe yin sọdodovi Jiwheyẹwhe tọn ehelẹ na dugán hẹ Klisti taidi ahọlu po yẹwhenọ po. (Lom. 8:19-23; Osọhia 5:9, 10) To whenue Satani diọavunnukunsọ nupojipetọ-yinyin Jehovah tọn to tintan whenu, nuhe dọ e te wẹ yindọ gbẹtọvi lẹ ko gboawupo. Abajọ e do sọgbe dọ Jehovah ni de mẹdelẹ sọn whẹndo gbẹtọvi tọn mẹ nado tindo mahẹ to oylan lẹpo didesẹ sọn wẹkẹ lọ blebu mẹ, kakajẹ mẹhe yin asisa oylan tọn ji, yèdọ Satani Lẹgba! Ṣigba, enẹ ma dohia dọ Jehovah ko de gbẹtọvi dopodopo he na lẹzun sọdodovi etọn lẹ jẹnukọn gba. Kakatimọ, Jiwheyẹwhe ko magbe dọ pipli gbẹtọvi delẹ tọn na dugán hẹ Klisti to olọn mẹ.—Osọhia 14:3, 4.

“Aihọn” tẹ hodọ wẹ Paulu te to whenue e kanwehlan Klistiani hatọ etọn lẹ dọ, taidi pipli de, yé ko yin dide “jẹnukọnna dòdó aihọn  tọn”? Hogbe ehelẹ ma to alọdlẹndo ojlẹ he jẹnukọnna didá aigba po gbẹtọvi po tọn gba. Enẹ na jẹagọdo nunọwhinnusẹ́n dodo Jiwheyẹwhe tọn. Nawẹ Adam po Evi po na dogbè nuhe yé wà lẹ tọn gbọn, eyin Jiwheyẹwhe ko magbe dọ yé na gboawupo whẹpo yé tlẹ do yin didá? Eyin mọ wẹ, whetẹnu wẹ Jiwheyẹwhe magbe aliho he mẹ e na didẹ ninọmẹ he wá aimẹ to whenue Adam po Evi po kọnawudopọ hẹ Satani nado ṣiatẹ do nupojipetọ-yinyin Jiwheyẹwhe tọn go te? Atẹṣiṣi mẹjitọ mítọn tintan lẹ tọn godo wẹ Jehovah ṣẹṣẹ wá wà enẹ, ṣigba whẹpo gbẹtọvi mapenọ he sọgan yin fifligọ lẹ do yin jiji.

“Kẹdẹdi Adọkun Susu Ojọmiọn Etọn Tọn”

Naegbọn Paulu do dọ dọ tito he Jiwheyẹwhe wleawuna bọ mí gbadopọnna to wefọ bẹjẹeji Efesunu lẹ tọn mẹ, wá aimẹ “kẹdẹdi adọkun susu ojọmiọn [Jiwheyẹwhe] tọn”? E dọ enẹ nado zinnudeji dọ Jehovah ma tin to dandannu glọ nado fli gbẹtọvi mapenọ lẹ gọ̀ gba.

Na taun tọn, depope to mímẹ ma jẹ nado yin fifligọ gba. Etomọṣo, owanyi sisosiso he Jehovah tindo na whẹndo gbẹtọvi tọn wẹ whàn ẹn nado ze tito vonọtaun ehe dai na whlẹngán mítọn. Eyin mí lẹnnupọndo ninọmẹ mape po ylando po tọn mítọn ji, mí na mọdọ ojọmiọn wẹ ofligọ mítọn yin nugbonugbo, dile Paulu dọ do.

Aṣli Wiwe Lẹndai Jiwheyẹwhe Tọn

To bẹjẹeji, Jiwheyẹwhe ma de aliho he mẹ e na didẹ nuhe Satani hẹngble lẹ te hia gba. “Aṣli wiwe” de wẹ enẹ yin. (Efe. 3:4, 5, NW) To nukọn mẹ, whenue agun Klistiani tọn yin didoai, Jehovah de zẹẹmẹ gigọ́ lẹ hia gando aliho he mẹ e na hẹn lẹndai dowhenu tọn etọn na gbẹtọvi lẹ po aigba po di te go. Paulu dọ dọ, “To mimá ojlẹ gigọ́ lọ tọn mẹ,” Jiwheyẹwhe ze ‘tito anadenanu tọn de’ dai, yèdọ tito he na deanana nulẹ bo na zọ́n bọ nudida he tindo nuyọnẹn lẹpo na yin kinkọndopọ.

Adà tintan kọndopọ ehe tọn bẹjẹeji to Pẹntikọsti 33 W.M. whenue Jehovah jẹ mẹhe na dugán hẹ Klisti to olọn mẹ lẹ bẹpli ji. (Owalọ 1:13-15; 2:1-4) Adà awetọ lọ na wá aimẹ po bibẹpli mẹhe na nọgbẹ̀ to paladisi aigba ji tọn mẹ to Ahọluduta Klisti, Mẹssia tọn glọ lẹ tọn po. (Osọhia 7:14-17; 21:1-5) ‘Tito anadenanu tọn’ ehe ma to alọdlẹndo Ahọluduta Mẹssia tọn gba, na 1914 wẹ Ahọluduta enẹ wá yin didoai. Kakatimọ, hogbe lọ to alọdlẹndo aliho he mẹ Jiwheyẹwhe nọ penukundo nulẹ go, kavi deanana nulẹ te, na lẹndai etọn nido yin hinhẹndi, enẹ wẹ kọndopọ nudida etọn lẹpo tọn hinhẹngọwa.

Mì ‘Yin Mẹho to Wuntuntun Mẹ’

Matin ayihaawe, tito oplọn mẹdetiti tọn dagbe de tintindo na gọalọna we nado mọnukunnujẹ “gbigblo, tedidi, sisosiso [podọ] jiyiyi” nugbo lọ tọn mẹ. Ṣigba, ayihaawe ma tin dọ Satani nọ yawu yí magbọjẹ gbẹ̀mẹ tọn lẹ zan nado dekanpona ojlo nupinplọn tọn he mí tindo, kavi tlẹ hù ojlo enẹ sudo. A dike enẹ jọ do gowe blo. Nọ yí nugopipe “nukunnumọjẹnumẹ” tọn he Jiwheyẹwhe na we zan nado lẹzun ‘mẹho to wuntuntun mẹ.’ (1 Joh. 5:20, NW; 1 Kọl. 14:20) Hẹn ẹn diun dọ a mọnukunnujẹ whẹwhinwhẹ́n he wutu a do yise mẹ, na hiẹ nido nọ dọ “linlẹn todido tọn” he a tindo to whepoponu.—1 Pita 3:15.

Mí ni dọ dọ hiẹ tin to Efesu to whenue wekanhlanmẹ Paulu tọn yin hihia whla tintan. Be hogbe etọn lẹ ma na ko whàn we nado sudeji to “oyọnẹn Ovi Jiwheyẹwhe tọn tọn mẹ” ya? (Efe. 4:13, 14) Gbau! Enẹwutu, dike ohó gbọdo Paulu tọn lẹ ni whàn we nado wà nudopolọ to egbehe. Owanyi sisosiso tintindo na Jehovah po oyọnẹn he pegan Ohó etọn tọn tintindo po na gọalọna we nado “doadọ̀do bo yin hinhẹn lodo do dodonu” Klisti tọn ji gbanun-gbanun. Gbọnmọ dali, hiẹ na penugo nado duto whlepọn depope he Satani sọgan zedonukọnna we ji whẹpo aihọn ylankan ehe nido wá opodo.—Ps. 1:1-3; Jẹl. 17:7, 8.

[Apotin/Yẹdide to weda 27]

“Hlan Efesunu Lẹ”

‘Donanọ wẹ Jiwheyẹwhe Otọ́ Jesu Klisti Oklunọ mítọn tọn, mẹhe yí dona gbigbọnọ lẹpo to otẹn he tin to olọn lẹ mẹ do dona mí to Klisti mẹ: yèdọ dile e ko de mí to e mẹ jẹnukọnna dòdó aihọn tọn, na mí nido yin wiwe, podọ matin mọdọ do omẹ go to nukọn etọn to owanyi mẹ: mẹhe ko de mí na sọdodovi ovi lẹ tọn gbọn Jesu Klisti mẹ na ede, kẹdẹdi homẹdagbe ojọmiọn etọn tọn, na pipà gigo ojọmiọn etọn tọn, ehe mẹ yè ko hẹn míwlẹ zun mẹkẹalọyi to Mẹyiwanna lọ mẹ. Mẹhe mẹ míwlẹ ko mọ ofligọ yí te gbọn ohùn etọn mẹ, jona ylando tọn, kẹdẹdi adọkun susu ojọmiọn etọn tọn; ehe ewọ ko yí nuyọnẹn lẹpo, po zinzin po do basi na mí susugege; mẹhe ko yí [aṣli wiwe] ojlo etọn tọn hia mí, kẹdẹdi homẹdagbe etọn he e ko lẹndai to ede homẹ: [nado ze tito anadenanu tọn de dai,] dọ, to mimá ojlẹ gigọ́ lọ tọn mẹ, ewọ nido hò nulẹpo pli do dopo to Klisti mẹ, eyin ehe tin to olọn mẹ, po ehe tin to aihọn mẹ po; yèdọ to ewọ mẹ.’—Efe. 1:3-10.