Etẹwẹ Odẹ̀ Towe lẹ Nọ Dohia Gando Gowe?
Etẹwẹ Odẹ̀ Towe lẹ Nọ Dohia Gando Gowe?
“Hiẹ he nọ sè odẹ̀, dè we wẹ gbẹtọ lẹpo ja.”—PS. 65:2.
1, 2. Naegbọn devizọnwatọ Jehovah tọn lẹ sọgan deji dọ e na sè odẹ̀ yetọn lẹ?
JEHOVAH ma nọ sú otó etọn do obiọ devizọnwatọ nugbonọ etọn lẹ tọn gbede. Enẹwutu, mí sọgan deji dọ e nọ sè odẹ̀ mítọn lẹ. Eyin livi susu Kunnudetọ Jehovah tọn lẹ tọn tlẹ hodẹ̀ hlan Jiwheyẹwhe to ojlẹ dopolọ mẹ, odẹ̀ depope yetọn tọn ma na pòali.
2 Na psalm-kàntọ Davidi deji dọ Jiwheyẹwhe sè vẹvivẹ etọn lẹ wutu, e jihàn dọmọ: “Hiẹ he nọ sè odẹ̀, dè we wẹ gbẹtọ lẹpo ja.” (Ps. 65:2) Odẹ̀ Davidi tọn lẹ mọ gblọndo, na ewọ yin sinsẹ̀n-basitọ nugbonọ Jehovah tọn wutu. Gbọnmọ dali, mí sọgan wà dagbe nado kanse míde dọ: ‘Be ovẹvivẹ ṣie lẹ nọ dohia dọ n’deji do Jehovah go, bọ sinsẹ̀n-bibasi wiwe ṣeke etọn tin to otẹn tintan mẹ na mi ya? Etẹwẹ odẹ̀ ṣie lẹ nọ dohia gando go e?’
Nọ Dọnsẹpọ Jehovah po Whiwhẹ Po
3, 4. (a) Aliho tẹ mẹ wẹ mí dona nọ dọnsẹpọ Jiwheyẹwhe to odẹ̀ mẹ te? (b) Etẹwẹ mí dona wà eyin ylando sinsinyẹn de hẹn “tùmajai” wá na mí?
3 Eyin mí jlo dọ Jiwheyẹwhe ni sè odẹ̀ mítọn lẹ, mí dona nọ dọnsẹpọ ẹ po whiwhẹ po. (Ps. 138:6) Mí dona nọ biọ Jehovah dọ ni gbeje mí pọ́n dile Davidi biọ do dọmọ: “Dindona mi, Jiwheyẹwhe E, na a ni yọ́n ayiha ṣie: whlé mi pọ́n, na a ni yọ́n tùmajai ṣie lẹ: bosọ pọ́n eyin aliho ylankan de tin to ohò ṣie mẹ, bosọ hẹn mi gbọn aliho madopodo lọ mẹ.” (Ps. 139:23, 24) Enẹwutu, e mayin odẹ̀ kẹdẹ wẹ mí na nọ hò gba, ṣigba mí dona dike Jiwheyẹwhe ni gbeje mí pọ́n, bosọ jo míde na ayinamẹ Ohó etọn tọn lẹ. Eyin mí wàmọ, Jehovah penugo nado plan mí gbọn “aliho madopodo” tọn ji, bo na gọalọna mí nado mọ ogbẹ̀ madopodo.
4 Eyọn, eyin ylando sinsinyẹn de wẹ hẹn “tùmajai” wá na mí lo? (Hia Psalm 32:1-5.) Tintẹnpọn nado ṣinyọnnudo ylando sinsinyẹn de mahopọnna dọ ayihadawhẹnamẹnu mítọn to tuklado mí sọgan de huhlọn pò na mí to gbigbọ-liho kẹdẹdile yozò sinsinyẹn alunlun mẹ tọn nọ dọ̀nsin sọn atin de mẹ do. Na Davidi wà ylando wutu, e hẹn ayajẹ etọn bu bọ enẹ sọgan ko do awutu i. Ṣigba na e yigbe ylando etọn lẹ tọn na Jiwheyẹwhe wutu, e mọ kọgbọ. Pọ́n lehe ayajẹ Davidi tọn na ko sù sọ whenue e mọdọ Jehovah ko ‘jona tasinyẹn etọn.’ Eyin mí yigbe ylando mítọn lẹ tọn na Jiwheyẹwhe, enẹ sọgan hẹn kọgbọ wá na mí, podọ alọgọ mẹho agun tọn lẹ tọn sọ nọ hẹn ylanwatọ de jẹgangan to gbigbọ-liho.—Howh. 28:13; Jak. 5:13-16.
Nọ Vẹ̀ Jiwheyẹwhe Bosọ Nọ Dopẹna Ẹn
5. Etẹwẹ mí dona wà eyin mí tin to ayimajai mẹ?
5 Eyin mí tin to ayimajai mẹ na whẹwhinwhẹ́n de kavi devo wutu, mí ma dona wọn nado yí ayinamẹ Paulu tọn do yizan mẹ, he dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ.” (Flp. 4:6) Mí dona nọ vẹ̀ Jehovah bo nọ biọ alọgọ po anademẹ etọn po, titengbe whenue mí tin to owù mẹ kavi tin to homẹkẹn glọ.
6, 7. Whẹwhinwhẹ́n tẹlẹ wutu wẹ mí ma dona wọn nado nọ dopẹ́ to odẹ̀ mítọn lẹ mẹ?
6 Ṣigba eyin whenue mí tindo nuhudo nude tọn kẹdẹ wẹ mí nọ hodẹ̀, etẹwẹ enẹ na dohia gando mẹwhinwhàn mítọn lẹ go? Paulu dọ dọ mí dona nọ hẹn obiọ po “pẹdido” mítọn lẹ po zun yinyọnẹn na Jiwheyẹwhe. Matin ayihaawe, mí tindo whẹwhinwhẹ́n dagbe nado do numọtolanmẹ Davidi tọn nkọ hia, mẹhe dọmọ: “OKLUNỌ E, towe kiklo yin, po huhlọn po, po gigo po, po awhàngba po, po gigo daho po: na ehe tin to olọn mẹ lẹpo podọ to wẹkẹ mẹ towe wẹ; towe wẹ ahọludu, OKLUNỌ E, hiẹ wẹ yè sọ zedaga di ota to popo ji. . . . Jiwheyẹwhe mítọn, mí dopẹna we, bosọ pà oyín towe gigonọ.”—1 Otan. 29:11-13.
7 Jesu dopẹna Jiwheyẹwhe na núdùdù he e na gbẹtọgun susu lẹ gọna akla po ovẹn po he e yizan to Tenu-Núdùdù Oklunọ tọn whenu. (Mat. 15:36; Malku 14:22, 23) Gbọnvona hogbe pẹdido tọn mọnkọtọn lẹ yiyizan to odẹ̀ mẹ, mí sọ dona “nọ pà OKLUNỌ” na “azọ́n jiawujiawu etọn lẹ hlan ovi gbẹtọ lẹ tọn,” na ‘whẹdida dodo’ etọn, podọ na ohó kavi owẹ̀n etọn he tin to Biblu mẹ lẹ.—Ps. 107:15; 119:62, 105.
Nọ Hodẹ̀ do Mẹdevo lẹ Tamẹ
8, 9. Naegbọn mí dona nọ hodẹ̀ do Klistiani hatọ lẹ tamẹ?
8 Nugbo wẹ dọ mí nọ hodẹ̀ na nuhudo mítọn lẹ wutu, ṣigba mí sọ dona hodẹ̀ do mẹdevo lẹ tamẹ—yèdọ kakajẹ Klistiani he mí ma tlẹ yọ́n yinkọ yetọn lẹ ji. Dile apọsteli Paulu sọgan nọma ko yọ́n yisenọ he tin to Kọlọsi lẹpo, e wlan dọmọ: “Mí to pẹdo hlan Jiwheyẹwhe Otọ́ Jesu Klisti Oklunọ mítọn tọn, mí sọ to dẹ̀ho na mì whepoponu, to whenue mí sè linlin yise mìtọn tọn to Klisti Jesu mẹ, po owanyi he mì tindo do mẹwiwe lẹpo go po.” (Kọl. 1:3, 4) Paulu sọ hodẹ̀ do Klistiani he tin to Tẹsalonika lẹ tamẹ ga. (2 Tẹs. 1:11, 12) Odẹ̀ mọnkọtọn lẹ nọ do nususu hia gando mí go, podọ e sọ nọ do nukun he mí nọ yí do pọ́n mẹmẹsunnu po mẹmẹyọnnu mítọn lẹ po hia.
9 Odẹ̀ he mí nọ hò do Klistiani yiamisisadode lẹ po gbẹdohẹmẹtọ yetọn he yin “lẹngbọ devo” lẹ po tamẹ nọ dohia dọ onú titobasinanu Jiwheyẹwhe tọn tọn nọ duahunmẹna mí. (Joh. 10:16) Paulu biọ sinsẹ̀n-basitọ hatọ etọn lẹ nado hodẹ̀ na ẹn na ‘yè nido nagbè e na e nido sọgan hẹn aṣli wiwe wẹndagbe lọ tọn zun yinyọnẹn.’ (Efe. 6:17-20) Be mí nọ hodẹ̀ to aliho mọnkọ mẹ do Klistiani devo lẹ tamẹ ya?
10. Nawẹ dẹ̀hiho do mẹdevo lẹ tamẹ sọgan yinuwado mí ji gbọn?
10 Dẹ̀hiho do mẹdevo lẹ tamẹ sọgan gọalọna mí nado diọ pọndohlan mítọn gando yé go. Eyin onú mẹde tọn ma tlẹ nọ jẹ mítọn ji sọmọ ṣigba bọ mí nọ hodẹ̀ do ota etọn mẹ, e na vẹawu dọ mí ni gbẹwanna mẹlọ. (1 Joh. 4:20, 21) Odẹ̀ ehe nkọtọn lẹ nọ jlọmẹdote bo nọ yidogọna pọninọ mẹmẹsunnu lẹ tọn. Humọ, odẹ̀ mọnkọtọn lẹ nọ dohia dọ mí tindo owanyi Klisti tọn nkọ. (Joh. 13:34, 35) Owanyi mọnkọtọn yin apadewhe sinsẹ́n gbigbọ Jiwheyẹwhe tọn. Be dopodopo mítọn nọ hodẹ̀ na gbigbọ wiwe Jehovah tọn bo nọ biọ dọ Jehovah ni gọalọna mí nado nọ do sinsẹ́n etọn hia, yèdọ owanyi, ayajẹ, jijọho, linsinsinyẹn, homẹdagbe, dagbewà, yise, walọmimiọn, po mawazẹjlẹgo po ya? (Luku 11:13; Gal. 5:22, 23) Eyin mí nọ wàmọ, hogbe po walọ mítọn lẹ po na nọ dohia dọ mí to zọnlinzin bo to gbẹnọ gbọn gbigbọ dali.—Hia Galatianu lẹ 5:16, 25.
11. Naegbọn a do lẹndọ e sọgbe nado biọ to mẹdevo lẹ si dọ yé ni hodẹ̀ do ota mítọn mẹ?
11 Eyin mí sè dọ ovi mítọn lẹ nọ jlo nado finwepọ́n to tẹnpọn wehọmẹ tọn yetọn lẹ whenu, mí dona nọ hodẹ̀ do ota yetọn mẹ bo yí Owe-wiwe do gọalọna yé na yé nido sọgan yinuwa po nugbonọ-yinyin po bo ma wà oylan depope. Paulu dọna Klistiani Kọlinti tọn lẹ dọmọ: “Yẹn to dẹ̀ho hlan Jiwheyẹwhe dọ mìwlẹ wà oylan depope blo.” (2 Kọl. 13:7) Odẹ̀ whiwhẹ tọn mọnkọtọn lẹ nọ hẹn homẹ Jehovah tọn hùn bo nọ dọ dagbe gando mí go. (Hia Howhinwhẹn lẹ 15:8.) Mí sọgan biọ dọ mẹdevo lẹ ni hodẹ̀ do ota mítọn mẹ kẹdẹdile apọsteli Paulu wà do. “Mì nọ hodẹ̀ na mí,” wẹ e wlan, “na mí dotu dọ mí tindo ayiha dagbe bosọ jlo nado tin to owalọ dagbe mẹ to onú lẹpo mẹ.”—Heb. 13:18.
Nuhe Odẹ̀ Mítọn lẹ Sọ Nọ Dohia
12. Etẹ ji wẹ odẹ̀ mítọn lẹ dona nọ sinai do hugan?
12 Be odẹ̀ mítọn lẹ nọ dohia dọ mí yin Kunnudetọ Jehovah tọn zohunhunnọ podọ ayajẹnọ de ya? Be ovẹvivẹ mítọn lẹ nọ tin to kọndopọ mẹ mlẹnmlẹn hẹ ojlo Jiwheyẹwhe tọn wiwà, yẹwheho Ahọluduta lọ tọn didọ, whẹsuna nupojipetọ-yinyin Jehovah tọn, po klandowiwe oyín etọn tọn po ya? Onú ehelẹ ji wẹ odẹ̀ mítọn lẹ dona nọ sinai do hugan, dile Jesu dohia do to odẹ̀ apajlẹ tọn etọn mẹ, he bẹjẹeji po hogbe ehelẹ po dole: “Otọ́ mítọn he tin to olọn mẹ, hihiọ wẹ oyín towe. Ahọludu towe ni wá. Ojlo towe ni yin wiwà to aigba go, dile e te to olọn mẹ.”—Mat. 6:9, 10.
13, 14. Etẹwẹ odẹ̀ mítọn lẹ nọ dohia gando mí go?
13 Odẹ̀ he mí nọ hò hlan Jiwheyẹwhe lẹ nọ do mẹwhinwhàn, ahunmẹdunamẹnu, po ojlo mítọn lẹ po hia. Jehovah nọ yọ́n nuhe mí yin to homẹ. Howhinwhẹn lẹ 17:3 dọmọ: “Ganzẹn tin na fataka, zòkán na sika: ṣigba OKLUNỌ to ayiha whlepọn.” Jiwheyẹwhe nọ mọ nuhe tin to ahun mítọn mẹ. (1 Sam. 16:7) E nọ yọ́n nukun he mí nọ yí do pọ́n opli lẹ, lizọnyizọn mítọn, po yisenọ hatọ mítọn lẹ po. Jehovah yọ́n nuhe mí nọ lẹn gando “mẹmẹsunnu” Klisti tọn lẹ go. (Mat. 25:40) E nọ yọnẹn eyin nuhe mí nọ biọ to odẹ̀ mítọn lẹ mẹ nọ duahunmẹna mí nugbonugbo kavi vlavo onú dopolọ lẹ wẹ mí nọ to vivọdọ poun. “Whenuena mì to dẹ̀ho,” wẹ Jesu dọ, “mì zan dọvọdọ vọ́tọ di Kosi lẹ blo; na yé [gbọn nuṣiwa dali] lẹndọ yè na sè yetọn na ohó susu didọ yetọn.”—Mat. 6:7.
14 Hogbe he mí nọ yizan to odẹ̀ mẹ lẹ sọ nọ do obá he mẹ mí dejido Jiwheyẹwhe go jẹ hia. “Hiẹ [Jehovah] wẹ yin fibẹtado de na mi,” wẹ Davidi dọ, “atọ̀họ̀ sinsinyẹn sọn kẹntọ lọ si. Yẹn na nọ nọ̀ gòhọ towe mẹ kakadoi: yẹn na dín fibẹtado to bibẹtẹn awà towe tọn mẹ.” (Ps. 61:3, 4) Whenue Jiwheyẹwhe na “dlẹn gòhọ etọn do [mí] ji” to yẹhiadonu-liho, mí na duvivi hihọ́ po nukunpedomẹgo etọn po tọn. (Osọhia 7:15) Enẹwutu, homẹmiọnnamẹnu de wẹ e yin nado dọnsẹpọ Jehovah to odẹ̀ mẹ, bo tindo nujikudo lọ dọ ewọ tin ‘to awhàn mítọn mẹ’ whedepopenu he yise mítọn yin whiwhlepọn.—Hia Psalm 118:5-9.
15, 16. Etẹwẹ odẹ̀ sọgan gọalọna mí nado yọnẹn gando ojlo he mí tindo na lẹblanulọkẹyi sinsẹ̀nzọn tọn lẹ go?
15 Odẹ̀ ahundopo tọn hihò hlan Jehovah nado dọ numọtolanmẹ mítọn lẹ na ẹn sọgan gọalọna mí nado yọ́n nuhe mẹwhinwhàn mítọn lẹ yin ganji. Di apajlẹ, be nugbonugbo whiwhẹ podọ ojlo lọ nado gọalọ bo wà nuhe go mí pé lẹpo na nukọnyiyi Ahọluduta lọ tọn janwẹ nọ whàn mí nado nọ nọ̀ jejeji na otẹn azọngban tọn lẹ ya? Kavi vlavo mí nọ “jlo nado yin ogán” kavi tlẹ duklunọ do mẹdevo lẹ ji wutu wẹ ya? E ma dona yinmọ to omẹ Jehovah tọn lẹ ṣẹnṣẹn. (Hia 3 Johanu 9, 10; Luku 22:24-27.) Eyin mí tindo ojlo agọ̀, dẹ̀hiho ahundopo tọn hlan Jehovah Jiwheyẹwhe sọgan de enẹ hia bo gọalọna mí nado diọ whẹpo yé nido doadọ̀do do ahun mítọn mẹ.
16 Asi Klistiani lẹ sọgan tindo ojlo vẹkuvẹku dọ asu yetọn lẹ ni lẹzun devizọnwatọ lizọnyizọnwiwa tọn podọ vlavo wá lẹzun mẹho agun tọn. Mẹmẹyọnnu ehelẹ sọgan nọ yinuwa sọgbe hẹ ojlo yetọn he yé nọ dọtọ́n to odẹ̀ mẹdetiti tọn yetọn lẹ mẹ gbọn vivẹnudido nado yin apajlẹ dagbenọ to walọyizan yetọn lẹ mẹ dali. Ehe yin nujọnu, na ohó po walọyizan hagbẹ whẹndo mẹmẹsunnu de tọn po tọn nọ yinuwado nukun he agun lọ nọ yí do pọ́n mẹmẹsunnu lọ ji.
Nukọnninọna Mẹdevo lẹ to Odẹ̀ Gbangba Tọn Mẹ
17. Naegbọn e do nọ yọ́n nado nọ̀ míde ṣo whenue mí to odẹ̀ mẹdetiti tọn hò?
17 Jesu nọ saba tọ́n sọn gbẹtọgun lẹ mẹ nado sọgan yì hodẹ̀ hlan Otọ́ etọn edeṣo. (Mat. 14:13; Luku 5:16; 6:12) Mílọsu dona nọ wà nudopolọ. Eyin mí hodẹ̀ to fie tin to abọẹ de, e yọnbasi dọ nudide he mí na basi to odẹ̀ lọ godo lẹ ni hẹn homẹ Jehovah tọn hùn bo nasọ hẹn mí lodo to gbigbọ-liho. Ṣigba, Jesu sọ hodẹ̀ to gbangba, podọ e na yọ́n nado lẹnnupọndo lehe mílọsu sọgan wàmọ to aliho he sọgbe mẹ do ji.
18. Etẹlẹ wẹ mẹmẹsunnu lẹ dona hẹn do ayiha mẹ to whenue yé to nukọnnọna agun to odẹ̀ gbangba tọn lẹ mẹ?
18 To opli mítọn lẹ ji, sunnu nugbonọ lẹ nọ nọ̀ nukọnna agun to odẹ̀ mẹ. (1 Tim. 2:8) Yisenọ hatọ lẹ dona penugo nado dọ “niṣẹ,” he zẹẹmẹdo “e ni yinmọ,” to vivọnu odẹ̀ lọ tọn. Ṣigba whẹpo yé na do dọ mọ, yé dona kọngbedopọ hẹ nuhe odẹ̀ lọ dọ. Nudepope ma hẹnmẹ jọsi kavi do lẹnpọn dagbe matindo hia to odẹ̀ apajlẹ tọn Jesu tọn mẹ. (Luku 11:2-4) Etomọṣo, e mayin nuhudo kavi nuhahun hosetọ etọn lẹ tọn lẹpo go wẹ e donù gba. Odẹ̀ mẹdetiti tọn lẹ mẹ wẹ mí nọ donù ahunmẹdunamẹnu mẹdetiti tọn lẹ go te, e mayin to odẹ̀ gbangba tọn lẹ mẹ gba. Podọ eyin mí to nukọnnọna pipli de to odẹ̀ mẹ, mí dona dapana whẹho aṣli tọn lẹ didọ.
19. Nawẹ mí dona nọ yinuwa gbọn to odẹ̀ gbangba tọn lẹ whenu?
19 Eyin mẹmẹsunnu de to nukọnnọna mí to odẹ̀ gbangba tọn mẹ, mí dona nọ do ‘budisi Jiwheyẹwhe’ hia. (1 Pita 2:17) Nuyiwa delẹ sọgan sọgbe to ojlẹ delẹ mẹ podọ to nọtẹn delẹ mẹ ṣigba bo ma na sọgbe to opli Klistiani tọn lẹ ji. (Yẹwh. 3:1) Di apajlẹ, mí ni dọ dọ hagbẹ delẹ nọ ze awà do awà mẹ kavi hẹn alọ go na yede to odẹ̀ whenu to opli agun tọn lẹ ji. Ehe sọgan hẹn homẹgble mẹdelẹ kavi fẹayihasẹna yé kakajẹ jonọ he ma tindo nuyise dopolọ hẹ mí lẹ ji. Alọwlemẹ delẹ sọgan hẹn alọ go na yede po zinzin po, ṣigba eyin yé nọ gbò yede fán to odẹ̀ gbangba tọn lẹ whenu, enẹ sọgan hẹn mẹhe mọ yé lẹ dahli. Yé sọgan lẹndọ asu po asi po lọ to owanyi dohia yede kakati nado do osi sisosiso hia Jehovah. Enẹwutu, mì gbọ osi sisosiso he mí tindo na Jehovah ni whàn mí nado nọ “wà [onú] popo hlan gigo Jiwheyẹwhe tọn” bo ma dike nuyiwa mítọn lẹ ni fẹayihasẹnamẹ, hẹnmẹ jọsi, kavi hẹn mẹdepope dahli.—1 Kọl. 10:31, 32; 2 Kọl. 6:3.
Etẹwẹ Mí Dona Nọ Biọ to Odẹ̀ Mẹ?
20. Nawẹ hiẹ sọgan basi zẹẹmẹ Lomunu lẹ 8:26, 27 tọn gbọn?
20 To whedelẹnu, mí sọgan nọma yọ́n nuhe mí na dọ to odẹ̀ mẹdetiti tọn mítọn lẹ mẹ. “Mí ma yọ́n nuhe mí na hodẹ̀ na dile e jẹna mí do,” wẹ Paulu wlan, “ṣigba [gbigbọ wiwe] lọsu yí winwẹ̀n he yè ma sọgan dọtọ́n do to vẹvẹ na mí. Podọ [Jiwheyẹwhe] he to ayiha mẹ dinpọn yọ́n nuhe ayiha [gbigbọ] tọn yin.” (Lom. 8:26, 27) Jehovah hẹn ẹn diun dọ odẹ̀ susu yin kinkàndai to Owe-wiwe mẹ. E nọ kẹalọyi nuhe yin bibiọ to gbọdo glọ enẹlẹ taidi nuhe mí tindo nuhudo yetọn, bosọ nọ hẹn yé di. Jiwheyẹwhe yọ́n mí bo yọ́n zẹẹmẹ nuhe gbigbọ etọn whàn wekantọ Biblu tọn lẹ nado basi kandai yetọn lẹ tọn. Eyin gbigbọ “vẹvẹ” do ota mítọn mẹ, Jehovah nọ sè. Ṣigba eyin mí jẹakọ hẹ Ohó Jiwheyẹwhe tọn ganji, nuhe mí na biọ to odẹ̀ mẹ lẹ na nọ wá ayiha mẹ na mí to jọwamọ-liho.
21. Etẹwẹ mí na gbadopọnna to hosọ he bọdego mẹ?
21 Dile mí ko mọ do, odẹ̀ mítọn lẹ nọ do nususu hia gando mí go. Di apajlẹ, yé sọgan do obá he mẹ mí dọnsẹpọ Jehovah jẹ po lehe mí jẹakọ hẹ Ohó etọn ganji sọ po hia. (Jak. 4:8) To hosọ he bọdego mẹ, mí na gbadopọnna odẹ̀ delẹ po hogbe he yin yiyizan to odẹ̀ he tin to Biblu mẹ delẹ po. Nawẹ dogbapọnnanu Owe-wiwe tọn mọnkọtọn sọgan yinuwado aliho he mẹ mí nọ dọnsẹpọ Jiwheyẹwhe to odẹ̀ mẹ ji gbọn?
Nawẹ Hiẹ Na Na Gblọndo Gbọn?
• Aliho tẹ mẹ wẹ mí dona nọ dọnsẹpọ Jehovah to odẹ̀ mẹ te?
• Naegbọn mí dona nọ hodẹ̀ do yisenọ hatọ lẹ tamẹ?
• Etẹwẹ odẹ̀ mítọn lẹ sọgan dohia gando míwlẹ po mẹwhinwhàn mítọn lẹ po go?
• Nawẹ mí dona nọ yinuwa gbọn to odẹ̀ gbangba tọn lẹ whenu?
[Kanbiọ Oplọn tọn lẹ]
[Yẹdide to weda 4]
Be hiẹ nọ pà Jehovah bo nọ dopẹna ẹn whẹwhẹ ya?
[Yẹdide to weda 6]
Nuyiwa mítọn to odẹ̀ gbangba tọn lẹ whenu dona nọ do sisi hia Jehovah to whepoponu