Kanbiọ lẹ sọn Wehiatọ lẹ Dè

Be e sọgbe dọ mẹmẹyọnnu de ni ṣinyọnnudo ota to whenue e to hodidọ de lẹ́ do ogbè alọ-yido-dọho tọn mẹ to opli agun tọn lẹ ji, kavi to plidopọ lẹ ji ya?

To paa mẹ, yọnnu Klistiani de dona ṣinyọnnudo ota eyin e to nukunpedo azọngban he yin asu etọn tọn kavi mẹmẹsunnu de tọn go. Ehe tin to kọndopọ mẹ hẹ nunọwhinnusẹ́n he go apọsteli Paulu donù dọ “yọnnusi depope he to dẹ̀ho kavi didọdai to ma ṣinyọnnu ota etọn mẹ, e de yẹyi sọn ota etọn go” na “sunnu wẹ ota yọnnu tọn.” (1 Kọl. 11:3-10) Eyin mẹmẹyọnnu de yí tabla he to jlẹkaji de ṣinyọ́n to ninọmẹ mọnkọtọn lẹ mẹ, enẹ yin ohia taliai tọn de na tito yẹwhehọluduta tọn to agun Klistiani tọn mẹ.—1 Tim. 2:11, 12. a

Ṣigba, eyin mẹmẹyọnnu de ka to hodidọ mẹmẹsunnu de tọn lẹ́ do ogbè alọ-yido-dọho tọn mẹ lo? Nado dọ hójọhó, azọ́n gbesetọ tọn wà wẹ mẹmẹyọnnu lọ te poun. Enẹ wẹ yindọ, mẹmẹsunnu lọ wẹ to mẹplọn, e ma yin mẹmẹyọnnu lọ. Ṣigba nado lẹ́ hodidọ de do ogbè alọ-yido-dọho tọn mẹ gbọnvo taun na azọ́n gbesetọ paa de tọn. Mẹplidopọ lẹ nọ saba na ayidonugo hodọtọ de to paa mẹ, bosọ nọ dotoaina gbesetọ etọn to ojlẹ dopolọ mẹ. Podọ, to vogbingbọn mẹ na gbesetọ ogbè alọ-yido-dọho tọn de, mẹplidopọ lẹ ma nọ saba na ayidonugo mẹmẹyọnnu he nọ lẹ́ hodidọ de do ogbè devo mẹ sọmọ. To whedelẹnu, mẹmẹyọnnu gbesetọ de sọgan sinai to whenue e to gbesena hodọtọ de kavi, eyin e to ote janwẹ, e na pannukọn hodọtọ lọ kakati nido yin mẹplidopọ lẹ. Enẹwutu, e ma na yin dandan dọ mẹmẹyọnnu he to hodidọ de lẹ́ do ogbè devo mẹ ni ṣinyọnnudo ota.

Gbọnvona ehe, na nukọnyiyi azọ́n nuyọnẹn wintinwintin tọn he nọ yin yiyizan to  whenue hodidọ de to yinyin lilẹ́ do ogbè alọ-yido-dọho tọn mẹ wutu, adà he yiwà gbesetọ lọ te sọgan dọ̀n ayidonugo mẹsusu tọn hugan dai tọn. Gbesetọ lọ nọ saba yin mimọ to televiziọn daho de ji, to whenue mẹplidopọ lẹ sọgan nọma mọ hodọtọ lọ lọsu. Po ehelẹ po to ayiha mẹ, e na sọgbe dọ mẹmẹyọnnu he to hodidọ de lẹ́ do ogbè alọ-yido-dọho tọn mẹ ni mọnukunnujẹemẹ dọ emi dona ṣinyọnnudo ota.

Nawẹ vọjlado he yin bibasi gando anademẹ ehe go sọgan yinuwado hodidọ de lilẹ́ do ogbè alọ-yido-dọho tọn mẹ ji to Wehọmẹ Lizọnyizọn Yẹwhehọluduta tọn whenu, to wadohia lẹ whenu, podọ to gblọndo lẹ nina to Biblu Pinplọn Agun tọn, Opli Sinsẹ̀nzọn tọn, po Oplọn Atọ̀họ̀-Nuhihọ́ Lọ Tọn po whenu gbọn? Be mẹmẹyọnnu he nọ lẹ́ hodidọ de do ogbè alọ-yido-dọho tọn mẹ de to nuwiwa mọnkọtọn lẹ whenu lọsu dona ṣinyọnnudo ota wẹ ya? E taidi dọ e ma na yin dandan dọ mẹmẹyọnnu de ni ṣinyọnnudo ota to ninọmẹ delẹ mẹ, na e dona ko họnwun na mẹplidopọ lẹ dọ e ma yin ewọ wẹ to anadena opli lọ gba. Di apajlẹ, e sọgan nọma ṣinyọnnudo ota to whenue e to gblọndo mẹplidopọ lẹ tọn, azọ́ndenamẹ mẹmẹyọnnu de tọn, kavi wadohia lẹ lẹ́ do ogbè alọ-yido-dọho tọn mẹ. Ṣigba, eyin e to nuyiwa taidi gbesetọ na hodidọ mẹmẹsunnu de tọn to opli ehelẹ ji, kavi eyin e to Oplọn Atọ̀họ̀-Nuhihọ́ Lọ Tọn, Biblu Pinplọn Agun tọn, po ohàn lẹ po lẹ́ do ogbè alọ-yido-dọho tọn mẹ, e dona ṣinyọnnudo ota. Mẹmẹyọnnu de sọgan yin azọ́ndena nado lẹ́ hodidọ mẹmẹsunnu lẹ, mẹmẹyọnnu lẹ, ovi lẹ, po mẹho agun tọn lẹ po tọn do ogbè alọ-yido-dọho tọn mẹ. Po nudọnamẹ ehelẹ po, e sọgan yọ́n hugan nado ṣinyọnnudo ota to opli lọ blebu whenu.

[Nudọnamẹ odò tọn]