Nọ Do Walọ Dagbe Hia Dile E Jẹna Lizọnyizọnwatọ Jiwheyẹwhe Tọn lẹ Do
Nọ Do Walọ Dagbe Hia Dile E Jẹna Lizọnyizọnwatọ Jiwheyẹwhe Tọn lẹ Do
“Mì yin mẹhodotọ Jiwheyẹwhe tọn.”—EFE. 5:1.
1, 2. (a) Naegbọn walọ dagbe do yin nujọnu? (b) Etẹ ji wẹ mí na dọhodo to hosọ ehe mẹ?
NA NUHE dù jijọ dagbe, wekantọ Sue Fox wlan dọmọ: “Mí dona nọ do walọ dagbe hia to whepoponu. Walọ dagbe nọ yọ́n to filẹpo, podọ to ojlẹ lẹpo mẹ.” Eyin mẹde nọ do walọ dagbe hia, nuhahun lẹ nọ depò bo tlẹ nọ busẹ to whedelẹnu. Ṣigba eyin mí nọ yinuwa hẹ mẹdevo lẹ to aliho agọ̀ mẹ, enẹ sọgan hẹn nudindọn, mẹhẹndohomẹ, po awubla po wá.
2 To paa mẹ, walọ dagbe gbayipe to agun Klistiani nugbo tọn mẹ. Etomọṣo, mí dona họ́ míde ma nado dike walọ ylankan he gbayipe to aihọn mẹ to egbehe ni bẹpla mí. Mì gbọ mí ni pọ́n lehe nunọwhinnusẹ́n Biblu tọn lẹ yíyí do yizan mẹ gando walọ dagbe didohia go, sọgan basi hihọ́na mí bo dọ̀n gbẹtọ lẹ wá sinsẹ̀n-bibasi nugbo mẹ do. Nado mọnukunnujẹ nuhe walọ dagbe didohia bẹhẹn mẹ, mì gbọ mí ni lẹnnupọndo apajlẹ he Jehovah Jiwheyẹwhe po Ovi etọn po zedai na mí ji.
Jehovah po Ovi Etọn po Ze Apajlẹ Walọ Dagbe Tọn Dai Na Mí
3. Apajlẹ walọ dagbe tọn tẹwẹ Jehovah Jiwheyẹwhe zedai?
3 Jehovah Jiwheyẹwhe ze apajlẹ pipé walọ dagbe tọn dai na mí. Mahopọnna otẹn yiaga he mẹ e te taidi Nupojipetọ wẹkẹ tọn, e nọ yí homẹdagbe po sisi po do yinuwa hẹ gbẹtọvi lẹ. Eyin devizọnwatọ Jehovah tọn lẹ waylando, e nọ do ede hia taidi mẹhe “gọ́ na lẹblanu, dagbenọ, podọ awuwhletọ nado sadi, bosọ sù [to] dagbewanyi po nugbo po mẹ.” (Ps. 86:15) Jehovah gbọnvo taun na gbẹtọvi he ma nọ dava homẹgble yetọn eyin mẹdevo lẹ ma wà nuhe yé donukun sọn yé si.
4. Nawẹ mí sọgan hodo apajlẹ Jehovah tọn to whenue mẹdevo lẹ to hodọna mí gbọn?
4 Mí sọ mọ walọ dagbe Jiwheyẹwhe tọn hezeheze to aliho he mẹ e nọ dotoaina gbẹtọvi lẹ te mẹ. Whenue Ablaham to kanbiọ kanse gando omẹ Sọdọmi tọn lẹ go, Jehovah yí homẹfa do na gblọndo kanbiọ etọn lẹ dopodopo tọn. (Gẹn. 18:23-32) E ma pọ́n Ablaham taidi mẹhe to whenu etọn hẹngu, dile e to ahunmẹdunamẹnu etọn lẹ dọna ẹn gba. Jehovah nọ sè odẹ̀ devizọnwatọ etọn lẹ tọn po awhágbe ylandonọ he lẹnvọjọ lẹ tọn po. (Hia Psalm 51:11, 17.) Be e ma jẹ dọ mí ni nọ hodo apajlẹ Jehovah tọn bo dotoai to whenue mẹdevo lẹ to hodọna mí ya?
5. Nawẹ apajlẹ walọ dagbe Jesu tọn sọgan hẹn haṣinṣan he mí tindo hẹ mẹdevo lẹ pọnte gbọn?
5 Walọ dagbe yin dopo to nususu he Jesu Klisti plọn sọn Otọ́ etọn dè lẹ mẹ. Dile etlẹ yindọ e nọ biọ dọ Jesu ni yí whenu susu po huhlọn po zan to lizọnyizọn etọn mẹ to whedelẹnu, e nọ do homẹfa po homẹdagbe po hia to whepoponu. Pòtọnọ lẹ, nukuntọ́nnọ nubiọtọ lẹ, po mẹdevo he tin to nuhudo mẹ lẹ po, mọdọ Jesu hẹn ede tin-to-aimẹ bo jlo nado gọalọna yé. E ma dovọ́na yé, dile etlẹ yindọ e ma nọ donukun yé whẹpo yé do nọ wá. E nọ saba doalọtena nuhe wà e te nado sọgan gọalọna mẹhe to ayimajai mẹ lẹ. Jesu nọ do mẹtọnhopọn hia mẹhe tindo yise to ewọ mẹ lẹ taun. (Malku 5:30-34; Luku 18:35-41) Taidi Klistiani, mí nọ hodo apajlẹ Jesu tọn gbọn homẹdagbe didohia mẹdevo lẹ po alọgigọna yé po dali. Hẹnnumẹ mítọn lẹ, kọmẹnu mítọn lẹ po mẹdevo lẹ po nọ doayi nuyiwa mọnkọtọn lẹ go. Humọ, nuyiwa mọnkọtọn lẹ nọ pagigona Jehovah bo nọ hẹn ayajẹ wá na mí.
6. Apajlẹ awuyadomẹ po họntọnjihẹmẹ tọn tẹ po wẹ Jesu zedai na mí?
6 Jesu sọ do sisi hia mẹdevo lẹ gbọn yinkọ yetọn lẹ yiyizan dali. Be nukọntọ sinsẹ̀n Ju lẹ tọn doyẹyigona mẹdevo lẹ to aliho mọnkọtọn mẹ ya? Lala. Yé nọ pọ́n mẹhe ma yọ́n Osẹ́n Mose tọn lẹ taidi ‘mẹhodẹ̀do’ bo nọ dovọ́na yé. (Joh. 7:49) Ovi Jiwheyẹwhe tọn ma wàmọ gba. Malta, Malia, Zaṣe, po mẹsusu devo lẹ po sè bọ e nọ ylọ yé po oyín dopodopo yetọn tọn po. (Luku 10:41, 42; 19:5) Dile etlẹ yindọ aṣa po ninọmẹ lẹ po wẹ nọ dohia eyin mí na yí oyín mẹde tọn do ylọ ẹ kavi lala, devizọnwatọ Jehovah tọn lẹ nọ dovivẹnu nado yawudo mẹdevo lẹ. a Yé ma nọ dike hagbẹ ṣinṣinyan ni glọnalina yé nado do sisi hia yisenọ hatọ yetọn lẹ po mẹdevo lẹ po gba.—Hia Jakobu 2:1-4.
7. Nawẹ nunọwhinnusẹ́n Biblu tọn lẹ nọ gọalọna mí nado do walọ dagbe hia gbẹtọvi hatọ mítọn lẹ to filẹpo gbọn?
7 Aliho he mẹ Jiwheyẹwhe po Ovi etọn po nọ yí homẹdagbe do yinuwa hẹ gbẹtọ he wá sọn akọta lẹpo mẹ podọ sọn hẹnnu lẹpo mẹ te, nọ doyẹyigona yé bo nọ dọ̀n ahunjijlọnọ enẹlẹ wá nugbo lọ mẹ. Nugbo wẹ dọ nuhe yè nọ pọnhlan taidi walọ dagbe nọ gbọnvo sọn fide jẹ fide. Enẹwutu, mí ma nọ tindo pọndohlan hẹngogo tọn de gando ehe go. Kakatimọ, mí nọ dike nunọwhinnusẹ́n Biblu tọn lẹ ni gọalọna mí nado tindo pọndohlan jlẹkaji tọn gando yẹyi didogona gbẹtọvi hatọ mítọn lẹ go to filẹpo. Todin, mì gbọ mí ni gbadopọnna lehe walọ dagbe didohia gbẹtọ lẹ sọgan zọ́n bọ mí na tindo kọdetọn dagbe to lizọnyizọn Klistiani tọn mítọn mẹ do.
Nọ Dọnudo Mẹdevo lẹ bo Nọ Dọho hẹ Yé
8, 9. (a) Jijọ tẹwẹ sọgan yin pinpọnhlan taidi jijọ ylankan? (b) Naegbọn mí dona dike nuhe Jesu dọ to Matiu 5:47 mẹ ni yinuwado aliho he mẹ mí nọ yinuwa hẹ mẹdevo lẹ te ji?
8 Na gbẹtọ lẹ nọ to mizọnmizọn ji to fisusu to egbehe wutu, yé nọ saba zẹ̀ yenọzo go bo ma tlẹ nọ dọnudo yedelẹ. Nugbo wẹ dọ yè ma sọgan donukun dọ mí ni dọnudo gbẹtọgun he mí pé to aliho ji lẹpo gba. Ṣigba to ninọmẹ susu devo lẹ mẹ, nuhe sọgbe bọ mẹsusu sọ nọ donukun wẹ e yin dọ mí ni dọnudomẹ. Be aṣa towe wẹ e yin nado nọ dọnudomẹ ya? Kavi hiẹ nọ saba juwayi poun bo ma tlẹ nọ konudomẹ kavi yìn-aslan hẹmẹ wẹ ya? To mayọnẹn mẹ, mẹde tlẹ sọgan wleawuna jijọ he mẹdevo lẹ na pọnhlan taidi jijọ ylankan.
9 Jesu flinnu mí to whenue e dọ dọ: “Eyin mì sọ dọnudo mẹmẹsunnu mìtọn lẹ kẹdẹ, etẹwẹ mì wà hú mẹdevo lẹ? Kosi lẹ ma nọ wàmọ ga?” (Mat. 5:47) Na nuhe dù walọ dagbe, ayinamẹtọ Donald Weiss wlan dọmọ: “E nọ vẹna gbẹtọ lẹ eyin mẹdevo lẹ dovọ́na yé bo zẹ̀ yé go. Na nugbo tọn, a ma sọgan na whẹjijọ depope nado fahomẹna mẹhe a dovọ́na. Nuhe na didẹ nuhahun lọ poun wẹ yindọ: Nọ dọnudo gbẹtọ lẹ. Nọ dọho hẹ yé.” Eyin mí ma nọ mọ míde mẹ kavi nọ dèkọ̀ sọn mẹdevo lẹ go to whenue mí pé yé, mí na tindo kọdetọn dagbe.
10. Nawẹ walọ dagbe sọgan gọalọna mí nado tindo kọdetọn dagbe to lizọnyizọn lọ mẹ gbọn? (Pọ́n apotin lọ “Nọ Bẹ Hodọdopọ Jẹeji po Nukiko Yẹsẹ Po.”)
10 Lẹnnupọndo apajlẹ Tom po Carol po he yin asu po asi po he nọ nọ̀ tòdaho Amérique du Nord tọn de mẹ tọn ji. Yé ko dike hogbe mẹdọndogo tọn lẹ didọ hẹ kọmẹnu yetọn lẹ ni lẹzun apadewhe lizọnyizọn yetọn tọn. Nawẹ yé nọ wàmọ gbọn? Tom donù Jakobu 3:18 go bo dọmọ: “Mí nọ tẹnpọn nado jihọntọn bo tin to jijọho mẹ hẹ mẹdevo lẹ. Mí nọ dọnsẹpọ mẹhe mí mọ to gbonu owhé yetọn lẹ tọn po mẹhe to azọ́nwa to lẹdo lọ mẹ lẹ po. Mí nọ konu yẹsẹ bo nọ dọnudo yé. Mí nọ dọho hẹ yé do nuhe mẹ yé tindo ojlo te lẹ ji—yèdọ ovi yetọn lẹ, avún yetọn lẹ, whẹndo yetọn lẹ, po agbasazọ́n yetọn po. Dile ojlẹ to yìyì, yé nọ pọ́n mí taidi họntọn yetọn lẹ.” Carol yidogọ dọmọ: “Eyin mí lẹkọyi dla yé pọ́n, mí nọ dọ yinkọ mítọn na yé bo nọ kàn yelọsu tọn sè. Mí nọ dike yé ni yọ́n nuhe wà mí te to okọ́ yetọn mẹ bo nọ dọho do glido. To godo mẹ, mí nọ penugo nado dekunnuna yé.” Kọmẹnu susu Tom po Carol po tọn lẹ wẹ dejido yé go. Susu yetọn wẹ ko kẹalọyi owe sinai do Biblu ji lẹ, podọ delẹ to yé mẹ ko do ojlo susu hia to nugbo lọ pinplọn mẹ.
Nọ Do Walọ Dagbe Hia to Ninọmẹ Sinsinyẹn lẹ Glọ
11, 12. Naegbọn e ma dona nọ paṣa mí eyin gbẹtọ lẹ yinuwa hẹ mí to aliho agọ̀ mẹ dile mí to wẹndagbe lọ lá, podọ nawẹ mí dona nọ yinuwa gbọn?
11 To whedelẹnu, mí nọ pehẹ nuyiwahẹmẹ agọ̀ dile mí to wẹndagbe lọ lá. Enẹ ma nọ paṣa mí, na Klisti Jesu ko na avase devi etọn lẹ jẹnukọn dọmọ: “Eyin yé dohomẹkẹn mi, yé nasọ dohomẹkẹn mìwlẹ ga.” (Joh. 15:20) Ṣigba eyin mí nọ tẹnpọn nado yiahọsu to mẹhe zùn mí lẹ go, enẹ ma na hẹn kọdetọn dagbe wá. Nawẹ mí dona nọ yinuwa gbọn? Apọsteli Pita wlan dọmọ: “Mì ni nọ klan Oklunọ [Klisti] do wiwe to ayiha mìtọn mẹ: mì sọ nọ wleawu whepoponu nado yigbena omẹ popo to walọmimiọn po osi po mẹ.” (1 Pita 3:15) Eyin mí nọ do walọ dagbe hia gbọn walọmimiọn po sisi didohia po dali, enẹ sọgan diọ pọndohlan mẹhe nọ zùn mí lẹ tọn.—Titu 2:7, 8.
12 Be e yọnbasi dọ mí ni wleawu nado pehẹ hodọdomẹgo agọ̀ lẹ to aliho he na hẹn homẹ Jiwheyẹwhe tọn hùn de mẹ ya? Mọwẹ. Paulu na ayinamẹ dọmọ: ‘Mì gbọ hogbe mìtọn ni tin po ojọmiọn po to whepoponu, ehe ojẹ pé, na mìwlẹ nido yọ́n lehe mì na nọ gblọnhona gbẹtọ lẹ dopodopo do.’ (Kọl. 4:6) Eyin mí yí i do do aṣa nado nọ do walọ dagbe hia hagbẹ whẹndo tọn mítọn lẹ, wehọmẹvigbẹ́ lẹ, azọ́nwatọgbẹ́ lẹ, hagbẹ agun tọn lẹ, po kọmẹnu mítọn lẹ po, enẹ na hẹn ẹn bọawuna mí nado pehẹ mẹṣanko po mẹzunzun po dile e jẹ dọ Klistiani de ni wà do.—Hia Lomunu lẹ 12:17-21.
13. Na apajlẹ he do lehe walọ dagbe sọgan diọ pọndohlan agọjẹdomẹtọ lẹ tọn do hia.
13 Walọ dagbe didohia to ninọmẹ sinsinyẹn lẹ glọ nọ tindo kọdetọn dagbe. Di apajlẹ, to Japon, whétọ de po jonọ etọn po ṣàn Kunnudetọ de ko. Mẹmẹsunnu lọ lẹkọ whii. Dile e zindonukọn to kunnudide etọn mẹ to aigba-denamẹ lọ ji, e doayi e go dọ jonọ lọ to pinpọn ẹn hlan. Whenue mẹmẹsunnu lọ dọnsẹpọ ẹ, dawe lọ dọmọ: “Jaale ma gblehomẹ na nuhe jọ lọ blo. Dile etlẹ yindọ nuhe mí dọna we ma sọgbe, n’doayi e go dọ a gbẹ́ pò to nuko. Etẹwẹ n’sọgan wà na yẹnlọsu nido to mọ?” Dawe lọ ko hẹn todido bu bo masọ tindo ayajẹ depope ba, na azọ́n ko gble do e bọ onọ̀ etọn sọ ṣẹṣẹ kú. Mẹmẹsunnu lọ ze plọnmẹ Biblu donukọnna dawe lọ bọ e sọ kẹalọyi. To ojlẹ kleun de godo, e jẹ nuplọn ji whla awe to osẹ dopo mẹ.
Aliho Dagbe Hugan Nado Wleawuna Walọ Dagbe
14, 15. Nawẹ devizọnwatọ Jehovah tọn hohowhenu tọn lẹ nọ plọn ovi yetọn lẹ gbọn?
14 To hohowhenu, mẹjitọ budisi Jiwheyẹwhe tọ́ lẹ nọ hẹn ẹn diun dọ ovi yetọn lẹ plọn onú tangan delẹ gando walọ dagbe go to whégbè. Lẹnnupọndo aliho dagbe he mẹ Ablaham po ovi etọn Isaki po dọhona yedelẹ te ji to Gẹnẹsisi 22:7 mẹ. Oplọn dagbe he Josẹfu lọsu mọyi sọn mẹjitọ etọn lẹ dè sọawuhia hezeheze to nuyiwa etọn lẹ mẹ. Etlẹ yin whenue e to gànpamẹ, e do walọ dagbe hia gàntọ hatọ etọn lẹ. (Gẹn. 40:8, 14) Aliho he mẹ e dọhona Falo te dohia dọ e ko plọn lehe yè nọ dọhona mẹhe tin to otẹn aṣẹpipa tọn mẹ do.—Gẹn. 41:16, 33, 34.
15 Gbedide ao he yin nina Islaelivi lẹ sọ bẹ gbedide ehe hẹn dọmọ: “Gbògbéna otọ́ towe po onọ̀ towe po: na azán towe lẹ nido yin gaa to aigba lọ ji he OKLUNỌ Jiwheyẹwhe towe na we.” (Eks. 20:12) Dopo to aliho he mẹ ovi lẹ sọgan gbògbéna mẹjitọ yetọn lẹ te wẹ nado nọ do walọ dagbe hia to whégbè. Viyọnnu Jẹfta tọn do sisi ayidego tọn hia otọ́ etọn to whenuena e kọngbedopọ hẹ ẹ bo hẹn opà he otọ́ etọn do lọ di, dile etlẹ yindọ enẹ wiwà vẹawuna ẹn.—Whẹ. 11:35-40.
16-18. (a) Etẹwẹ mẹjitọ lẹ sọgan wà nado plọn walọ dagbe ovi yetọn lẹ? (b) Etẹwẹ yin delẹ to ale he walọ dagbe pinplọn ovi lẹ nọ hẹnwa mẹ?
16 Nujọnu wẹ e yin nado plọn walọ dagbe ovi mítọn lẹ, enẹwutu mí ma dona yí nukun pẹvi do pọ́n azọngban enẹ. Eyin ovi lẹ na whẹ́n bo lẹzun mẹho he jẹna sisi, mẹjitọ lẹ dona plọn yé nado nọ yọ́n lehe yé na nọ dọnudo jonọ lẹ po sisi po do, lehe yé sọgan nọ na gblọndo mẹdevo lẹ to alokan ji do, podọ nado yọ́n lehe yé na nọ núdù hẹ mẹdevo lẹ do. Mẹjitọ lẹ dona gọalọna yé nado yọ́n nuhewutu e do sọgbe nado nọ jo otẹn yetọn do na mẹhe yin mẹho na yé lẹ, nado nọ do homẹdagbe hia mẹhomẹ lẹ po mẹhe to awutu jẹ lẹ po, podọ nado nọ gọalọna mẹhe hẹn agbàn pinpẹn lẹ. Yé dona yọ́n nuhewutu e do yin nujọnu nado nọ dọ “mì jaale,” “mì wanu,” “mì dike ma gọalọna mì,” podọ nado nọ dọ “mì ma gblehomẹ blo” sọn ahun mẹ wá.
17 Mí ma dona yí alọ sinsinyẹn do plọn ovi lẹ nado nọ do walọ dagbe hia dandan gba. Aliho dagbe hugan lọ wẹ nado ze apajlẹ dagbe dai. Kurt he tindo owhe 25 dọ lehe ewọ, mẹdaho etọn sunnu awe lẹ, po nọvisunnu etọn po plọn nado nọ do walọ dagbe hia do dọmọ: “Mí nọ mọ bo nọ sè lehe Papa po Mama po nọ yí homẹdagbe do dọho hẹ ode awetọ bo nọ yí homẹfa do yinuwa hẹ mẹdevo lẹ po mẹtọnhopọn po do. To Plitẹnhọ Ahọluduta tọn mẹ, Papa nọ plan mi hẹn to whenue e to nudọdo mẹmẹsunnu po mẹmẹyọnnu mẹhomẹ lẹ po whẹpo opli do nọ bẹ podọ to opli godo. N’nọ mọ lehe e nọ dọnudo yé po lehe e nọ do sisi hia yé po do.” Kurt yidogọ dọmọ: “To nukọn mẹ, yẹnlọsu wá jẹ mọwà ji. Walọ dagbe didohia mẹdevo lẹ wá lẹzun jọwamọnu na mi. Yè ma nọ hẹnmẹ gánnugánnu nado do walọ dagbe hia gba, e dona wá sọn ojlo mẹ wẹ.”
18 Etẹwẹ sọgan yin kọdetọn lọ eyin mẹjitọ lẹ plọn walọ dagbe ovi yetọn lẹ? Ovi lọ lẹ na penugo nado jihọntọn bo nọ̀ jijọho mẹ hẹ mẹdevo lẹ. E na bọawuna yé nado nọ̀ azọ́ngán yetọn lẹ glọ podọ nado wazọ́n dopọ hẹ azọ́nwatọgbẹ́ yetọn lẹ to jijọho mẹ. Humọ, ovi he tindo walọ dagbe bo nọ símẹ, bosọ nọ wà nuhe sọgbe na hẹn ayajẹ susu wá na mẹjitọ etọn lẹ.—Hia Howhinwhẹn lẹ 23:24, 25.
Walọ Dagbe Nọ Hẹn Mí Gbọnvo
19, 20. Naegbọn mí dona magbe nado hodo apajlẹ homẹdagbe Jiwheyẹwhe po Ovi etọn po tọn?
19 “Mì yin mẹhodotọ Jiwheyẹwhe tọn di ovi yiwanna lẹ,” wẹ Paulu wlan. (Efe. 5:1) Apajlẹ Jehovah Jiwheyẹwhe po Ovi etọn po tọn hihodo bẹ nunọwhinnusẹ́n Biblu tọn lẹ, taidi dehe mí gbadopọnna to hosọ ehe mẹ lẹ yíyí do yizan mẹ hẹn. Mọwiwà na zọ́n bọ mí na dapana walọ dagbe didohia nukunta tọn kiki nado mọ nukundagbe mẹhe tin to otẹn he yiaga hú mí mẹ de tọn kavi nado mọ nude yí.—Juda 16.
20 To azán he gbọngodo na gandudu ylankan Satani tọn ehelẹ mẹ, e ko jẹma nado sukúndona nujinọtedo walọ dagbe tọn he Jehovah zedai lẹ. Ṣigba na nuhe dù walọ dagbe Klistiani nugbo lẹ tọn, e ma na pà ẹ. Mì gbọ dopodopo mítọn ni magbe nado hodo apajlẹ homẹdagbe Jiwheyẹwhe po Ovi etọn po tọn. Gbọnmọ dali, hodidọ mítọn po walọ mítọn po na nọ gbọnvona nuyiwa mẹhe tindo jijọ ylankan lẹ tọn to whepoponu. Mọwiwà na zọ́n bọ mí na hẹn pipà wá na oyín Jehovah tọn, yèdọ Jiwheyẹwhe he ze apajlẹ pipé walọ dagbe tọn dai na mí, bọ enẹ na dọ̀n ahunjijlọnọ lẹ wá sinsẹ̀n-bibasi nugbo lọ mẹ.
[Nudọnamẹ odò tọn]
a To aṣa delẹ mẹ, mẹmasi wẹ e yin nado nọ ylọ oyín mẹhe yin mẹho namẹ de tọn, adavo mẹlọ lọsu nagbè nado wàmọ. Klistiani lẹ na wà dagbe nado nọ na sisi aṣa mọnkọtọn lẹ.
Be Hiẹ Flin Ya?
• Etẹwẹ mí plọn sọn walọ dagbe he Jehovah po Ovi etọn po nọ dohia mẹ?
• Nawẹ nudọdomẹ po zohunhun po nọ do mí hia taidi Klistiani gbọn?
• Nawẹ walọ dagbe sọgan gọalọna mí nado tindo kọdetọn dagbe to lizọnyizọn lọ mẹ gbọn?
• Adà tẹwẹ mẹjitọ lẹ nọ yiwà to walọ dagbe pinplọn ovi yetọn lẹ mẹ?
[Kanbiọ Oplọn tọn lẹ]
[Apotin to weda 27]
Nọ Bẹ Hodọdopọ Jẹeji po Nukiko Yẹsẹ Po
Mẹsusu wẹ nọ whleawu nado dọho hẹ mẹhe yé ma yọnẹn de. Ṣigba owanyi he Kunnudetọ Jehovah tọn lẹ tindo na Jiwheyẹwhe po kọmẹnu yetọn lẹ po nọ whàn yé nado nọ dovivẹnu vẹkuvẹku nado plọn lehe yè nọ dọho hẹ mẹdevo lẹ do nado sọgan lá nugbo Biblu tọn lẹ na yé. Etẹwẹ sọgan gọalọna we nado wà ehe ganji?
Nunọwhinnusẹ́n dagbe de tin to Filippinu lẹ 2:4 mẹ, fie mí hia te dọmọ: “[Nọ] pọ́n nuhe yin [towe] kẹdẹ go blo, ṣigba na omẹ popo ni nọ pọ́n nuhe yin mẹdevo tọn go ga.” Sọgbe hẹ nuhe dọ mí te sọn aga, nuhe dọ wefọ lọ te die: Eyin hiẹ po mẹde po ma ko dukosọ pọ́n, e sọgan yí we do mọ jonọ. Nawẹ hiẹ sọgan hẹn ẹn voawu gbọn? Nukiko yẹsẹ po nudọdomẹ zohunhun tọn de po sọgan gọalọ. Etomọṣo, nususu gbẹ́ pò.
Eyin a to tintẹnpọn nado bẹ hodọdopọ jẹeji hẹ mẹde, e yọnbasi dọ hiẹ na ko de ayiha etọn sọn nuhe lẹn e te ji. Eyin a nọ tẹnpọn nado dọhodo linlẹn towe kẹdẹ ji bo ma hò nuhe lẹn e te pọ́n, e sọgan nọma yí we ganji. Enẹwutu, eyin e yọnbasi dọ hiẹ yọ́n nuhe ji e ko to nulẹnpọndo, be e ma na yọ́n dọ a ni yí enẹ do bẹ hodọdopọ jẹeji hẹ ẹ ya? Nuhe Jesu wà to whenue e dukosọ hẹ yọnnu Samaliatọ lọ niyẹn. (Joh. 4:7-26) Osin didà ji wẹ yọnnu lọ to nulẹnpọndo. Enẹ ji wẹ Jesu bẹ hodọdopọ jẹeji hẹ nawe lọ sọn, bo wá lẹ́ hodọdopọ enẹ zun yẹwhehodidọ.
[Yẹdide to weda 26]
Họntọnjiji hẹ gbẹtọ lẹ sọgan dekọtọn do kunnudide na yé mẹ
[Yẹdide to weda 28]
E nọ yọ́n nado do walọ dagbe hia to whepoponu