Nọ Nanumẹ po Homẹhunhun Po

NA NUHE dù nunamẹ, apọsteli Paulu wlan dọmọ: “Omẹ dopodopo dile e lẹn to ayiha etọn mẹ do, mọ wẹ mì ni gbọ e ni na do,” podọ e yidogọ dọmọ: “E yin po hùnhlún po blo, kavi huhlọndohẹnmẹ basi tọn blo: na Jiwheyẹwhe yiwanna nunamẹtọ homẹhunhunnọ.” (2 Kọl. 9:7) Jehovah ma nọ hẹn mẹde gánnugánnu nado nọgodona sinsẹ̀n-bibasi wiwe ṣeke etọn gba. E nọ na dotẹnmẹ devizọnwatọ etọn lẹ nado do owanyi he yé tindo na ẹn hia gbọn nunina bibasi sọn ojlo mẹ wá podọ po homẹhunhun po dali. Whenuho dohia dọ omẹ etọn lẹ ko nọ wàmọ po jejejininọ po. Mì gbọ mí ni lẹnnupọndo apajlẹ atọ̀n ji.

Whenue Jehovah tún Islaelivi lẹ dote sọn Egipti godo, e degbena yé nado gbá gòhọtúntún lọ. Yé tindo nuhudo azọ́nwanu lẹ tọn, enẹwutu wẹ e do yin bibiọ to Islaelivi lẹ si nado basi nunina. Taidi kọdetọn de, “mẹhe gbigbọ etọn hẹn yin ojlonọ” lẹ hẹn sika po fataka po, aṣọ́donu lẹ, po núzinzan devo lẹ po wá. Akọta lọ tlúalọ sọmọ bọ nulila de yin bibasi na gbẹtọ lọ lẹ nido doalọtena nunina yetọn lẹ.—Eks. 35:5, 21; 36:6, 7.

Whenue Islaelivi lẹ jlo na gbá tẹmpli Jehovah  tọn to owhe kanweko delẹ godo, dotẹnmẹ sọ hundote na omẹ Jiwheyẹwhe tọn lẹ whladopo dogọ nado do godonọnamẹ yetọn hia na sinsẹ̀n-bibasi wiwe ṣeke etọn. Ahọlu Davidi basi nunina daho de nado nọgodona azọ́n lọ podọ e biọ to mẹdevo lẹ si nado basi nunina ga. Yé wàmọ po jejejininọ po. Nunina sika po fataka po tọn kẹdẹ he yé basi hugan dọla Amelika tọn liva 100 (50 500 000 000 000F CFA). Homẹhun akọta lọ dọ e nanú Jehovah sọn ojlo mẹ wá.—1 Otan. 29:3-9; 2 Otan. 5:1.

Mọdopolọ, hodotọ dowhenu tọn Jesu Klisti tọn lẹ do gbigbọ alọtútlú tọn hia. To azán Pẹntikọsti tọn gbè to owhe 33 W.M., nudi gbẹtọ 3000 wẹ yin bibaptizi. Susu omẹ ehelẹ tọn ma nọ nọ̀ Jelusalẹm. Nado gọalọna wamọnọ lẹ nado gbọṣi tòdaho lọ mẹ bo plọn nususu dogọ gando yise yọyọ yetọn go, Klistiani lẹ ze tito nunina ojlẹ gli tọn de dai nado nọgodona yé to akuẹzinzan-liho. Mẹmẹsunnu lẹ sà nutindo yetọn lẹ bo hẹn akuẹ lọ wá apọsteli lẹ dè na yé nido gọalọna mẹhe to nuhudo mẹ lẹ. Matin ayihaawe, homẹ Jehovah tọn na ko hùn taun nado mọ dohia yise po owanyi po tọn mọnkọtọn!—Owalọ 2:41-47.

To egbehe, Klistiani lẹ gbẹ́ pò to godonọna sinsẹ̀n-bibasi wiwe ṣeke gbọn whenu, huhlọn po nutindo yetọn lẹ po nina sọn ojlo mẹ wá dali. Apotin he to odò ehe do aliho he mẹ mí sọgan wàmọ te delẹ hia.

[Apotin to weda 18]

ALIHO HE MẸ MẸDELẸ NỌ BASI NUNINA TE DELẸ

NUNINA LẸ NA AZỌ́N LẸDO AIHỌN PÉ TỌN

Mẹsusu nọ de, kavi klan akuẹ sọha de dovo he yé nọ yí do apotin nunina tọn he go yè kàn “Azọ́n Lẹdo Aihọn Pé Tọn” do lẹ mẹ.

To osun dopodopo mẹ, agun lẹ nọ do akuẹ ehelẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Akuẹ he yin nina sọn ojlo mẹ wá lẹ sọgan sọ yin didohlan Association Religieuse Les Témoins de Jéhovah du Bénin (A.R.T.J.B.) tlọlọ kavi hlan wekantẹn alahọ Kunnudetọ Jehovah tọn lẹ tọn he nọ penukundo otò towe go. Eyin hiẹ jlo na basi nunina po akuẹyiwema po, a sọgan wleawuna ẹn do A.R.T.J.B. tamẹ. Aṣọ́donu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de dona hodo nunina ehelẹ bo dohia dọ nunina tlọlọ lẹ wẹ yé yin.

TITO NUNAMẸ HOMẸDAGBE TỌN

Gbọnvona nunina akuẹ tọn tlọlọ lẹ, nunina wunmẹ devo lẹ tin ga na alemọyi azọ́n Ahọluduta lọ tọn lẹdo aihọn pé. Ehelẹ wẹ:

Alọgọ Owù-Nujijọ Tọn: Nunina alọgọ owù-nujijọ gbẹzan tọn kavi tito gbọjẹ gaa/agbasazọ́n jijodo tọn de sọgan yin didohlan A.R.T.J.B.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, akuẹ he yin bibẹdo akuẹsẹdotẹn lẹ na ojlẹ tangan de (dépôt à terme), kavi akuẹ gbọjẹ gaa mẹdopodopo tọn lẹ sọgan yin zizedo alọ A.R.T.J.B. tọn mẹ nado nọ yizan kavi mẹde sọgan basi tito dọ to okú emitọn godo, akuẹ lọ ni yin súsú na A.R.T.J.B., to kọndopọ mẹ hẹ nubiọtomẹsi akuẹsẹdotẹn lọ tọn lẹ.

Ale Ajọ́ Tọn Lẹ: Ale ajọ́ tọn lẹ sọgan yin nina taidi nunina tlọlọ de kavi yin didohlan A.R.T.J.B.

Ohọ̀ po Aigba Po: Ohọ̀ po aigba po he sọgan yin sisà sọgan yin nina vlavo gbọn nunina tlọlọ de bibasi dali kavi, na nuhe dù aigba he ji ohọ̀ tin te bọ gbẹtọ gbẹ́ tin to e mẹ, nunamẹtọ lọ sọgan yí i do basi nunina ṣigba e dona dohia dọ emi na gbẹ́ nọ nọ̀ e mẹ dile e na dẹnsọ bọ emi tin to ogbẹ̀. Dọna alahọ otò towe tọn whẹpo do basi nunina ohọ̀ po aigba po tọn depope.

Kandai Gúmimá po Nunina lẹ Tọn Po: Nutindo kavi akuẹ sọgan yin nina taidi ogú hlan A.R.T.J.B. gbọn kandai sọgbe hẹ osẹ́n de bibasi dali, kavi yinkọ A.R.T.J.B. tọn sọgan yin kinkàndai taidi mẹhe na dugu nunina lẹ tọn.

Dile hogbe lọ “tito nunamẹ homẹdagbe tọn” dohia do, nunina wunmẹ ehelẹ nọ biọ tito delẹ bibasi to adà nunamẹtọ lọ tọn mẹ.

Na nudọnamẹ dogọ, hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn to Bénin, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò towe go.

Association Religieuse Les Témoins de Jéhovah du Bénin

06 B.P. 1131,

Akpakpa pk3, Cotonou, Bénin

Alokan: (229) 21 36 01 14