Be Hiẹ Sọgan Sẹtẹn Yì Makedonia Ya?

APỌSTELI Paulu mọ numimọ de to bato-glintẹn tòdaho Tloa tọn to Asia Pẹvi. Dawe Makedonianu de vẹ̀ ẹ dọmọ: “Wá Makedonia bo gọalọna mí.” To whenue Paulu mọ numimọ enẹ tlolo, ewọ po gbẹdohẹmẹtọ tomẹyitọ etọn lẹ po “mọdọ Jiwheyẹwhe wẹ ko ylọ [yé] nado lá wẹndagbe lọ” na Makedonianu lẹ. Etẹwẹ yin kọdetọn lọ? To tòdaho nukundeji Makedonia tọn he yin Filippi mẹ, Lydia po whédo etọn po lẹzun yisenọ. Mẹdevo lẹ sọ lẹzun yisenọ to ayimatẹn Lomu tọn enẹ mẹ ga.—Owalọ 16:9-15, NW.

Kunnudetọ Jehovah tọn lẹ nọ do zohunhun mọnkọtọn hia to egbehe. Susu yetọn ko desọn ojlo mẹ bo ko sẹtẹn yì fie nuhudo wẹnlatọ Ahọluduta lọ tọn lẹ sù hugan te na yede. Di apajlẹ, Lisa jlo na ze lizọnyizọn lọ do otẹn tintan mẹ to gbẹzan etọn mẹ. Enẹwutu e sẹtẹn sọn Canada yì Kenya. Trevor po Emily po, he yelọsu yin Canada-nu, sẹtẹn yì Malawi po linlẹn lọ po nado hẹn lizọnyizọn yetọn gblodeji. Paul po Maggie po he wá sọn Angleterre, mọdọ gbọjẹ whenu gaa tọn yetọn yin dotẹnmẹ hundote dagbe de nado wà susu dogọ to sinsẹ̀nzọn Jehovah tọn mẹ, enẹwutu yé sẹtẹn yì Whèzẹtẹn Aflika tọn. Be hiẹ lọsu tindo gbigbọ mẹde-yido-sanvọ́ tọn ya? Be a sọgan sẹtẹn ya? Eyin mọ wẹ, nunọwhinnusẹ́n Biblu tọn po ayinamẹ yọ́n-na-yizan tẹlẹ po wẹ sọgan gọalọna we nado tindo kọdetọn dagbe?

Gbeje Ninọmẹ Towe Pọ́n

Mẹwhinwhàn towe yin dopo to nuhe ji a dona lẹnnupọndo lẹ mẹ. Gbedide he klohugan he go Jesu donù wẹ: “Yí ahun towe lẹpo, alindọn towe lẹpo, podọ ayiha towe lẹpo do yiwanna  Jehovah Jiwheyẹwhe towe.” Owanyi he mí tindo na Jiwheyẹwhe po ojlo lọ nado hẹn azọ́ndenamẹ gbẹtọ lẹ hinhẹn zun devi tọn di po wẹ dona sisẹ́ mí nado yì sẹ̀n to tògodo. Jesu zindonukọn dọmọ: “Awetọ lọ die, he sọ taidi tintan lọ, ‘Hiẹ dona yiwanna kọmẹnu towe di dewe.’” Owanyi na kọmẹnu nọ sọawuhia to ojlo ahundopo tọn he mí tindo nado gọalọna mẹdevo lẹ mẹ. (Mat. 22:36-39; 28:19, 20, NW) To paa mẹ, nado yì sẹ̀n to tògodo nọ biọ vivẹnudo susu po gbigbọ mẹde-yido-sanvọ́ tọn po to mẹde si. E ma yin sadidi de poun gba. Owanyi wẹ dona whàn we. Remco po Suzanne po, he wá sọn Pays-Bas bo to sinsẹ̀n todin to Namibie basi bladopọ enẹ tọn dọmọ: “Owanyi wẹ zọ́n bọ mí do tofi.”

Willie, he yin nugopọntọ lẹdo tọn de to Namibie dọ dọ: “Mẹhe to sinsẹ̀n to tògodo lẹ ma nọ donukun dọ mẹmẹsunnu he to otò lọ mẹ lẹ wẹ na penukundo yé go gba. Yé wá po linlẹn lọ po nado sẹ̀n to pọmẹ hẹ mẹmẹsunnu he tin to otò lọ mẹ lẹ, podọ nado gọalọna yé to azọ́n yẹwhehodidọ tọn lọ mẹ wẹ.”

Eyin a ko gbeje ninọmẹ towe pọ́n godo, kanse dewe dọ: ‘Numimọ tẹwẹ n’tindo he sọgan zọ́n bọ n’na yọ́n-na-yizan to tògodo? Be n’bikan to lizọnyizọn lọ mẹ ya? Ogbè tẹlẹ wẹ n’nọ dó? Be n’nọ jlo nado plọn ogbè yọyọ devo ya?’ E na yọ́n dọ hiẹ po whẹndo towe po ni dọhodo whẹho ehe ji ganji. Biọ ayinamẹ to mẹho agun tọn towe lẹ si. Podọ hú popolẹpo, biọ alọgọ Jehovah tọn to odẹ̀ mẹ. Kanbiọ ehelẹ kinkanse dewe na gọalọna we nado yọnẹn eyin a penugo nugbonugbo bo magbe nado sẹ̀n to tògodo.—Pọ́n apotin lọ “Yọ́n Dewe Ganji.”

 Fie Wẹ A Sọgan Sẹ̀n Te?

Numimọ mẹ wẹ Paulu yin oylọ-basina te nado yì Makedonia. Jehovah ma nọ deanana mí gbọn aliho mọnkọtọn lẹ mẹ to egbehe gba. Etomọṣo, gbọn linlinnamẹwe ehe po owe devo lẹ po dali, omẹ Jiwheyẹwhe tọn lẹ nọ yọ́n aigba-denamẹ voovo he ji nuhudo sù te lẹ. Enẹwutu, jẹ todohukanji aigba-denamẹ enẹlẹ tọn basi ji. Eyin hiẹ ma ko wleawufo nado plọn ogbè yọyọ de kavi ma jlo na sẹ̀n to tògodo na ojlẹ dindẹn, hiẹ sọgan lẹn vlavo nado yì sẹ̀n to otò he nọ dó ogbè he a jẹakọ hẹ ganji de mẹ. Enẹgodo, lẹnnupọndo whẹho ehelẹ ji: gbedewema tògodo yìyì tọn, húndokuẹ, dagbemẹninọ towe, ahivivẹ nulẹ tọn, po ninọmẹ aimẹ tọn otò lọ mẹ tọn po. E sọgan yọ́n dọ a ni dín alọgọ sọn mẹhe ko yì sẹ̀n to tògodo pọ́n lẹ si. Dile a to ehe lẹpo wà, biọ alọgọ Jiwheyẹwhe tọn to odẹ̀ mẹ. Flindọ “gbigbọ wiwe gbẹ́ na [Paulu po gbẹdohẹmẹtọ etọn lẹ po] ma nado dọ ohó lọ to agbegbe Asia tọn ji.” Yé tẹnpọn nado yì Bitinia, ṣigba “gbigbọ Jesu tọn ma dike na yé.” Mọdopolọ e sọgan yí whenu vude to asiwe whẹpo a nido yọ́n fie nuhudo alọgọ towe tọn te taun.—Owalọ 16:6-10.

Po ayinamẹ ehelẹ po, hiẹ sọgan ko mọ fie sọgbe hẹ ninọmẹ towe delẹ. Eyin hiẹ to linlẹn nado yì sẹ̀n to tògodo, kanwehlan wekantẹn alahọ Kunnudetọ Jehovah tọn lẹ tọn he tin to otò he ji a to nulẹnpọndo lọ lẹ mẹ. Dọ ninọmẹ gbigbọmẹ tọn towe na yé gọna kanbiọ tangan depope he a jlo na mọ gblọndo na lẹ, taidi ahivivẹ nulẹ tọn, adọtẹn, dotowhé, podọ eyin a sọgan mọ agbasazọ́n de to finẹ. Enẹgodo ze wekanhlanmẹ lọ (lẹ) na wedegbẹ́ sinsẹ̀nzọn tọn agun towe tọn. Yé na ze wekanhlanmẹ mẹpipa tọn yetọn do e ji bo do e hlan wekantẹn alahọ tọn he go a donù lọ lẹ tlọlọ. E yọnbasi dọ gblọndo he yé na dohlan we lẹ ni gọalọna we nado yọ́n fie a sọgan yì gọalọ te taun.

Willie, he go mí donù wayi dọmọ: “Mẹhe nọ saba tindo kọdetọn dagbe to fie yé yì sẹ̀n te lẹ wẹ mẹhe ko nọ dla otò lọ pọ́n whẹ́, nado yọ́n fie na pọnte na yé, bọ yé na sẹ̀n po ayajẹ po te lẹ. Asu po asi po de mọdọ e na vẹawuna yé nado nọ̀ gbétatò de mẹ. Enẹwutu, yé sẹtẹn yì tòhò kleun he tindo nuhudo de mẹ, fie yé sọgan zan gbẹzan jlẹkaji tọn he na hẹn yé tindo ayajẹ te.”

Pipehẹ Avùnnukundiọsọmẹnu Yọyọ Lẹ

Ayihaawe ma tin dọ hiẹ na pehẹ nuhahun delẹ eyin a sẹtẹn sọn otò towe mẹ yì lẹdo yọyọ devo mẹ. Lisa he go mí donù wayi dọmọ: “E sọgan vẹawu taun nado duto numọtolanmẹ ṣokẹdẹninọ tọn ji.” Ṣigba etẹwẹ gọalọna ẹn? E nọ dọnsẹpọ mẹhe tin to agun yọyọ etọn mẹ lẹ. E yí i do basi yanwle nado yọ́n yinkọ hagbẹ agun lọ tọn lẹ dopodopo tọn. Nado jẹ yanwle ehe kọ̀n, e nọ yawu wá opli lẹ bo masọ nọ yawu yì whé to opli godo, na e nido dọho hẹ mẹmẹsunnu po mẹmẹyọnnu lẹ po. Lisa nọ yì kunnudegbe  hẹ hagbẹ agun lọ tọn lẹ, nọ ylọ delẹ to yé mẹ wá owhé etọn gbè, bo nọ jihọntọn hẹ yé. E dọmọ: “Avọ́sinsan he n’basi lẹ ma vẹna mi gba. Jehovah dona mi taun.”

Whenue Paul po Maggie po masọ do ovi he go yé na penukundo ba, yé sẹtẹn sọn owhé yetọn he gbè yé ko nọ̀ na owhe 30. E dọmọ: “E ma vẹawuna mí nado jo nutindo mítọn lẹ do. Ṣigba avùnnukundiọsọmẹnu taun wẹ e yin nado jo hẹnnumẹ mítọn lẹ do, mí ma lẹndọ e na vẹawuna mí sọmọ. Mí viavi taun to whenue mí tin to agahun mẹ. E bọawu taun nado diọ linlẹn. Ṣigba mí ganjẹ Jehovah go. Họntọn yọyọ lẹ jiji yidogọna gbemima mítọn nado zindonukọn.”

Greg po Crystal po basi dide nado sẹtẹn sọn Canada yì Namibie, na Glẹnsigbe wẹ yovo-gbè otò lọ tọn wutu. Ṣigba to nukọn mẹ, yé mọdọ e na yọ́n taun dọ yé ni plọn dopo to ogbè otò lọ tọn lẹ mẹ. Yé dọmọ: “To whedelẹnu, apọ̀ nọ ṣì mí. Ṣigba, whenue mí wá plọn ogbè enẹ godo wẹ mí ṣẹṣẹ wá mọnukunnujẹ aṣa otò lọ tọn delẹ mẹ dogọ. Haṣinṣan pẹkipẹki tintindo hẹ mẹmẹsunnu lẹdo lọ tọn lẹ gọalọna mí nado diọada sọgbe hẹ lẹdo yọyọ mítọn.”

Whiwhẹ po gbigbọ mẹdezejo tọn mọnkọtọn po sọgan yinuwado mẹmẹsunnu lẹdo lọ tọn lẹ ji to aliho dagbe mẹ ga. Jenny he whẹ́n to Irlande dọ dọ họmẹ emitọn nọ hùn taun eyin emi flin whẹndo he sẹtẹn wá finẹ lẹ. E dọmọ: “Yé jọmẹ taun. Na taun tọn, sinsẹ̀nzọn lọ wẹ hẹn yé wá, e ma yin na mẹdevo lẹ nido sẹ̀n yé. Yé tindo zohunhun po ayajẹ po sọmọ bọ e jlo yẹnlọsu nado yì sẹ̀n to fie nuhudo sù te.” Todin, Jenny po asu etọn po to sinsẹ̀n taidi mẹdehlan to Gambie.

Dona Jehovah Tọn “Nọ Hẹnmẹ Wàdọkun”

Numimọ he Paulu tindo to Makedonia hẹn dona susu wá na ẹn. To owhe delẹ godo, e kanwehlan mẹmẹsunnu Filippi tọn lẹ dọmọ: “Yẹn nọ dopẹna Jiwheyẹwhe ṣie to whepoponu to whedepopenu he yẹn flin mì.”—Flp. 1:3.

Trevor po Emily po he sẹ̀n to Malawi whẹpo do yin oylọ-basina yì Wehọmẹ Biblu Pinplọn Watchtower Giliadi tọn tindo numọtolanmẹ dopolọ. “To whedelẹnu, mí nọ kanse mídelẹ eyin mí ko ṣì nudide basi, ṣigba mí tindo ayajẹ. Enẹ zọ́n bọ mí dọnsẹpọ mídelẹ dogọ, podọ mí mọdọ Jehovah dona mí.” Greg po Crystal po he go mí donù wayi dọmọ: “Nudepope ma yọ́n sọ nuhe wà mí te.”

E họnwun dọ e ma yin mẹlẹpo wẹ na penugo nado yì sẹ̀n to tògodo. Mẹdelẹ sọgan sẹtẹn yì lẹdo devo he mẹ nuhudo sù hugan te to otò yetọn mẹ nado wà susu dogọ. Mẹdevo lẹ sọgan yí i do basi yanwle yetọn nado yì sẹ̀n to agun devo he ma dẹn do yé lẹ mẹ. Nujọnu lọ wẹ yindọ a ni wà nuhe go a pé lẹpo nado sẹ̀n Jehovah. (Kọl. 3:23) Gbọnmọ dali, hogbe gbọdo ehelẹ na họnwun na we dọmọ: “Dona OKLUNỌ tọn, e nọ hẹnmẹ wàdọkun, e ma nọ yí awubla do gọ́ ẹ gba.”—Howh. 10:22.

[Apotin/Yẹdide to weda 5]

Yọ́n Dewe Ganji

Nado gbeje dewe pọ́n bo yọnẹn eyin a sọgan yì sẹ̀n to tògodo kavi lala, lẹnnupọndo kanbiọ he to odò ehelẹ ji to odẹ̀ mẹ bo pọ́n eyin a sọgan yì sẹ̀n to otò devo mẹ nugbonugbo. Nudọnamẹ he tin to zinjẹgbonu Atọ̀họ̀-Nuhihọ́ Lọ Tọn he wayi lẹ mẹ sọgan gọalọna we.

• Be n’yin gbẹtọ gbigbọnọ ya?—“Des pas qui mènent au bonheur” (Atọ̀họ̀-Nuhihọ́ Lọ Tọn Flansegbe 15 octobre 1997, weda 6)

• Be n’bikan to lizọnyizọn lọ mẹ ya?—“Comment être un pionnier efficace?” (Atọ̀họ̀-Nuhihọ́ Lọ Tọn Flansegbe 15 mai 1989, weda 21)

• Be n’sọgan jo whẹndo po họntọn ṣie lẹ po do ya?—“Comment surmonter le mal du pays dans le service de Dieu” (Atọ̀họ̀-Nuhihọ́ Lọ Tọn Flansegbe 15 mai 1994, weda 28)

• Be n’sọgan plọn ogbè devo ya?—“Devizọnwiwa to Agun He Nọ Dó Jonọgbè de Mẹ” (15 mars 2006, weda 17)

• Be n’sọgan dohún na de e ya?—“Be Hiẹ Sọgan Sẹ̀n to Aigba Jonọ Tọn de Ji Ya?” (15 octobre 1999, weda 23)

[Yẹdide to weda 6]

Whiwhẹ po gbigbọ mẹdezejo tọn mọnkọtọn po sọgan yinuwado mẹmẹsunnu lẹdo lọ mẹ tọn lẹ ji to aliho dagbe mẹ

[Yẹdide to weda 7]

Mẹhe yì tògodo na sinsẹ̀nzọn lọ wutu lẹ nọ tindo kọdetọn dagbe