Hẹn Alọnu Towe Ján bo Yin Ayajẹnọ to Sinsẹ̀nzọn Jiwheyẹwhe Tọn Mẹ

JEHOVAH jlo dọ hiẹ ni yin ayajẹnọ. (Ps. 100:2) Taidi dopo to devizọnwatọ etọn lẹ mẹ, e yọnbasi dọ hiẹ ko hẹn alọnu towe ján. Vlavo alọnu towe ma ko ján sọmọ to whenue a ma ko klan gbẹzan towe do wiwe na Jiwheyẹwhe, ṣigba todin agbasazọ́n po azọngban gbigbọmẹ tọn lẹ po sọgan zọ́n bọ a na mọdọ ehelẹ hú agbọ́ we. Etlẹ sọgan nọ vẹna we taun dọ a ma penugo nado wà nuhe a jlo na wà lẹpo ba. Nawẹ hiẹ sọgan nọ̀ jlẹkaji bo hẹn “ayajẹ OKLUNỌ tọn” go gbọn?—Nẹh. 8:10.

Na hiẹ to gbẹnọ to ojlẹ awusinyẹn tọn lẹ mẹ bo nọ pehẹ nuhahun susu wutu, e biọ dọ a ni basi tito dagbe na dewe. To whẹho ehe mẹ, delẹ to ayinamẹ gbọdo Paulu tọn lẹ mẹ yọ́n-na-yizan taun, e dọmọ: “Mì nọ payi tlala dọ lehe mì to zọnlinzin do ni ma yin taidi nulunọ blo ṣigba taidi nuyọnẹntọ lẹ, mì nọ fli ojlẹ he jẹ lẹ na mìde, na ylankan wẹ azán lẹ wutu.”—Efe. 5:15, 16, NW.

Po ayinamẹ nuyọnẹn tọn ehe po to ayiha mẹ, nawẹ hiẹ sọgan ze yanwle lẹnpọn dagbe tọn lẹ donukọnna dewe, bo nọ̀ jlẹkaji to nuwiwa towe lẹ mẹ taidi oplọn mẹdetiti tọn, nukunpipedo whẹndo towe go, kunnudegbe, agbasazọ́n, po onú tangan devo lẹ po gbọn?

Be a flin ayajẹ he a tindo to whenue a klan dewe do wiwe na Jiwheyẹwhe bo yí baptẹm ya? Oyọnẹn he a tindo gando Jehovah po lẹndai etọn lẹ po go wẹ hẹn we tindo ayajẹ enẹ. Hiẹ sọgan ko yí osun susu do plọnnu po sọwhiwhe po whẹpo do tindo nukunnumọjẹnumẹ po ayajẹ mọnkọtọn po. Ṣigba vivẹnudido towe lẹ hẹn ale wá. Nupinplọn mọnkọtọn ko hẹn gbẹzan towe pọnte todin.

Nado hẹn ayajẹ towe go, hiẹ dona to núdù to gbigbọ-liho zọnmii. Eyin e ma nọ bọawuna we nado mọ whenu na Biblu hihia po oplọn mẹdetiti tọn po, lẹnnupọndo tito-to-whinnu towe ji. Eyin a tlẹ nọ plọnnu na nukunwhiwhe kleun de to gbèdopo bo nọ lẹnayihamẹpọn deji, enẹ na hẹn we dọnsẹpọ Jehovah, podọ matin ayihaawe, enẹ na yidogọna ayajẹ towe.

Suhugan devizọnwatọ Jiwheyẹwhe tọn lẹ tọn wẹ sọgan fli ojlẹ he yé nọ yizan na numadinu lẹ nado na ayidonugo nujọnu lẹ. Kanse dewe dọ, ‘Gànhiho nẹmu wẹ n’nọ yizan nado hia linlinwe aihọn tọn lẹ, nado nọ pọ́n televiziọn, nado nọ doto húnhiho lẹ, kavi nado nọ deayidai?’ Nuwiwa  enẹlẹ ma ylan, ṣigba yé dona tin to jlẹkaji. (1 Tim. 4:8) Eyin a mọdọ e nọ vẹawuna we nado yí whenu towe zan dile e jẹ do, dovivẹnu nado basi vọjlado.

Adam, he do ovi atọ̀n bosọ yin mẹho agun tọn de basi zẹẹmẹ nuhe gọalọna ẹn tọn dọmọ: “N’nọ tẹnpọn nado hẹn gbẹzan ṣie bọawu. N’nọ dapana ayidedai he nọ yí whenu to mẹsi lẹ po nutindo he nọ biọ ayidonugo susu po. E ma yindọ n’gbẹwanna ayidedai wẹ gba, ṣigba ayidedai he bọawu lẹ wẹ n’nọ yiwanna.”

Eyin a nọ lẹnayihamẹpọn do dagbe he nudide mọnkọtọn lẹ na wà na we ji, enẹ sọgan yidogọna ayajẹ towe bo gọalọna we nado hẹn pọndohlan dagbe go. Di apajlẹ, Mariusz, yèdọ mẹho agun tọn de he tindo ovi atọ̀n, dọmọ: “Whenue n’jẹ Biblu plọn ji, enẹ gọalọna mi nado tindo pọndohlan dagbe. Ṣigba sọn ojlẹ de mẹ jẹ devo mẹ, n’gbẹ́ nọ pehẹ nuhahun lẹ, he Jehovah kẹdẹ wẹ mọnukunnujẹ susu yetọn mẹ. Etomọṣo, po alọgọ etọn po, n’nọ pọ́n sọgodo hlan po ayajẹ po.”

Dile e yin do to whẹho Mariusz tọn mẹ, pọndohlan dagbe tintindo ma na de magbọjẹ towe lẹpo sẹ̀ gba. Ṣigba, enẹ sọgan hẹn ninọmẹ towe pọnte bo na gọalọna we nado pehẹ nuhahun gbẹ̀mẹ tọn lẹ po kọdetọn dagbe po. Biblu dọmọ: “Azán nukunbianọ tọn lẹpo wẹ oylan: ṣigba homẹvivinọ to jijọho dù to whepoponu.” (Howh. 15:15) Sọ nọ lẹnayihamẹpọn do owanyi he Jiwheyẹwhe dohia we ji. Eyin a nọ wàmọ, enẹ na hẹn owanyi he a tindo na Jiwheyẹwhe jideji bo hẹn ayajẹ towe siso deji.—Mat. 22:37.

Eyin whẹndo de nọ ze Jehovah po ojlo etọn wiwà po do otẹn tintan mẹ, enẹ nọ yidogọna ayajẹ yetọn. Jẹhẹnu Klistiani tọn lẹ didohia nọ de wiwọ́ lẹ pò, podọ hagbẹ whẹndo lọ tọn lẹ nọ vẹ́ dogọ bo nọ duvivi haṣinṣan dagbe de tọn. Eyin whẹndo towe nọ wàmọ, e na lẹzun fie jijọho po pọninọ po pavava do.—Ps. 133:1.

Taidi whẹndo de, eyin mì nọ tindo mahẹ to nuwiwa gbigbọmẹ tọn lẹ mẹ to pọmẹ, enẹ na yidogọna ayajẹ mìtọn. Mariusz dọ dọ: “N’nọ yọ́n pinpẹn whenu he mí nọ yizan dopọ to whẹndo mẹ tọn taun. Asi ṣie nọ gọalọna mi taun. Whedepopenu he e yọnbasi na ẹn, e nọ zọ̀n hẹ mi yì kunnudegbe bosọ nọ hodo mi nado yì jla nọtẹn plidopọ tọn do, podọ e nọ hodo mi eyin n’jlo na yì dọ togunmẹho to agun devo mẹ. Ehe nọ na mi tuli.”

Biblu biọ to Klistiani lẹ si nado wleawuna nuhudo agbasa tọn na whẹndo yetọn. (1 Tim. 5:8) Ṣigba, eyin agbasazọ́n nọ yí whenu po huhlọn towe susu po, enẹ sọgan hò ayajẹ he a tindo to sinsẹ̀nzọn Jiwheyẹwhe tọn mẹ yí. Enẹwutu, biọ alọgọ Jehovah tọn to odẹ̀ mẹ. (Ps. 55:22) Mẹdelẹ ko diọ agbasazọ́n yetọn nado sọgan ze Ahọluduta Jiwheyẹwhe tọn do otẹn tintan mẹ. Klistiani depope ma dona dike agbasazọ́n he nọ hò whenu etọn yí ṣigba bo nọ hẹn akuẹ susu wá na ẹn ni glọnalina ẹn nado na ayidonugo nuhe yin nujọnu hugan lẹ, yèdọ gbigbọnu lẹ.—Howh. 22:3.

E sọgan yọ́n hugan nado kàn ale gọna kọdetọn ylankan azọ́n he dín a te kavi azọ́n he wà a te to alọnu din tọn lẹ dai. Nugbo wẹ dọ mẹlẹpo wẹ yiwanna agbasazọ́n dagbe he pekuẹ. Ṣigba be azọ́n he wà a te to alọnu din nọ na we dotẹnmẹ nado penukundo dagbemẹninọ whẹndo towe tọn go to gbigbọ-liho ya? Gbeje whẹho lọ lẹpo pọ́n ganji, bo basi nudide he na dohia dọ haṣinṣan towe hẹ Jehovah wẹ tin to otẹn tintan mẹ na we.

Eyin agbasazọ́n towe ma nọ na we dotẹnmẹ nado yinukọn to gbigbọ-liho, hiẹ dona yí nude wà. Klistiani susu wẹ ko basi diọdo titengbe delẹ nado sọgan mọ whenu na gbigbọnu lẹ. Mẹmẹsunnu de to Pologne dọ dọ: “To ojlẹ de mẹ wayi, e lẹzun dandan na mi nado jo agbasazọ́n ṣie do na e nọ biọ dọ ma tọ́nwhẹ̀n gbọzangbọzan. N’ma nọ tindo whenu susu nado penukundo gbigbọnu lẹ po whẹndo ṣie po go ganji.” Agbasazọ́n he wà e te todin ma nọ yí whenu po huhlọn susu po to e si ba.

Nọ Mọ Ayajẹ to Alọgigọna Mẹdevo lẹ Mẹ

Jesu dọ dọ “Ayajẹ sù to nunamẹ mẹ hú to mimọyi mẹ.” (Owalọ 20:35, NW) Dotẹnmẹ susu wẹ nọ hundote na Klistiani lẹ nado nanumẹ. To whedelẹnu, nukiko yẹsẹ, alọnamẹ, kavi nudọdomẹ ahundopo tọn na vivẹnu he mẹde do nado penukundo azọ́ndenamẹ yẹwhehọluduta tọn de go, sọgan ko pé nado hẹn ayajẹ wá na hiẹ po mẹlọ po.

Apọsteli Paulu na tuli Klistiani hatọ lẹ nado “nọ dọho homẹmiọnnamẹ tọn na alindọn he jẹflumẹ lẹ, nado nọ gọalọna madogánnọ lẹ.”  (1 Tẹs. 5:14, NW) Mẹhe jẹflumẹ lẹ sọgan tindo numọtolanmẹ lọ dọ nuhahun yetọn lẹ nọ hú agbọ́ yé. Be a sọgan gọalọna omẹ mọnkọtọn lẹ ya? Eyin a mọdọ mẹmẹsunnu towe de masọ to ayajẹ tindo to sinsẹ̀nzọn Jehovah tọn mẹ sọmọ ba, tẹnpọn nado na tuli i. Mọwiwà na na tuli hiẹ lọsu ga. Nuhahun delẹ tin bo zẹ̀ nugopipe gbẹtọvi tọn go. Ṣigba, hiẹ sọgan do awuvẹmẹ nujọnu tọn hia bo na tuli mẹmẹsunnu towe nado ganjẹ godonọnamẹ Jehovah tọn he ma nọ gboawupo gbede go. Mẹhe nọ wàmọ lẹ ma na jẹflumẹ gbede.—Ps. 27:10; Isa. 59:1.

Afọdide dagbe devo he hiẹ sọgan sọ ze wẹ nado dọna mẹhe masọ to ayajẹ tindo sọmọ ba lọ nado hodo we yì kunnudegbe. Whenue Jesu do devi 70 etọn lẹ hlan, “awe awe” wẹ e do yé hlan. (Luku 10:1, NW) Be hiẹ ma lẹndọ enẹ hẹn ẹn yọnbasi na devi lẹ nado na tuli ode awetọ ya? Be hiẹ lọsu sọgan wàmọ nado gọalọna mẹdelẹ na yé nido vọ́ ayajẹ yetọn mọ to egbehe ya?

Aihọn he mẹ mí to gbẹnọ te to egbehe gọ́ na nuhahun susu. Etomọṣo, Paulu dotuhomẹna mí dọmọ: “Mì nọ jaya to Oklunọ mẹ to whepoponu. Yẹn na vọ́ dọ whladopo dogọ, Mì nọ jaya!” (Flp. 4:4, NW) Na hiẹ yiwanna Jiwheyẹwhe, bo nọ setonuna ẹn, bosọ nọ yí zohunhun do zindonukọn to azọ́n he e de na we lọ mẹ wutu, todido tin na we. Enẹ nọ hẹn ayajẹ wá na we podọ, Jehovah sọ nọ gọalọna we nado pehẹ ahunmẹdunamẹnu po nuhahun towe lẹ po.—Lom. 2:6, 7.

Na mí tindo yise wutu, mí nọ yọnẹn dọ mí ko sẹpọ aihọn yọyọ dopagbe Jehovah tọn taun. Enẹ na hẹn dona po ayajẹ susu po wá na mí. (Ps. 37:34) Enẹwutu, homẹ mítọn dona nọ hùn, podọ mí ma dona wọnji aliho he mẹ Jehovah to didona mí te to alọnu din lẹ go. Gbọnmọ dali, mí sọgan nọ “yí homẹhun do sẹ̀n OKLUNỌ.”—Ps. 100:2.

[Yẹdide lẹ to weda 8]

(Nado mọ yẹdide lọ ganji, pọ́n zinjẹgbonu lọ)

E sọgan biọ dọ hiẹ ni vọ́ tito whenu towe lẹ tọn basi nado sọgan hẹn ayajẹ towe go

AYIDEDAI

NUKUNPIPEDO WHẸNDO GO po AGBASAZỌ́N po

OPLI KLISTIANI TỌN LẸ

OPLỌN MẸDETITI TỌN

LIZỌNYIZỌN LỌ

[Yẹdide to weda 10]

Be hiẹ sọgan gọalọna mẹdevo lẹ nado vọ́ ayajẹ yetọn mọ ya?