Wleawuna Owanyi He Ma Nọ Gboawupo Gbede
Wleawuna Owanyi He Ma Nọ Gboawupo Gbede
‘Owanyi nọ doakọnna onú lẹpo. Owanyi ma nọ gboawupo gbede.’—1 KỌL. 13:7, 8, NW.
1. (a) Nawẹ owanyi nọ saba yin zẹẹmẹ basina gbọn? (b) Na nuhe dù owanyi, mẹnu podọ etẹlẹ wẹ mẹsusu nọ na ayidonugo?
OWE susu wẹ ko yin zinzinjẹgbonu do owanyi ji. Jẹhẹnu ehe nọ saba yin yíyí do ohàn owanyi tọn lẹ mẹ. Mẹlẹpo wẹ tindo nuhudo owanyi tọn. Ṣigba, owanyi he go owe po sinimọto he gbayipe to ahi mẹ to egbehe lẹ po nọ donù ma yin owanyi nujọnu tọn gba. Mọdopolọ, e blawu dọ owanyi nujọnu tọn tintindo na Jiwheyẹwhe po kọmẹnu po to didepo. To egbehe, mí to hẹndi nuhe Biblu dọ gando azán godo tọn lẹ go tọn mọ. Gbẹtọ lẹ ko lẹzun “wanyina mẹdetiti tọ́, wanyina akuẹtọ, . . . wanyina gbẹdudu tọ́ kakati nido yin wanyina Jiwheyẹwhe tọ́.”—2 Tim. 3:1-5, NW.
2. Avase tẹwẹ Biblu na gando awuwiwlena owanyi agọ̀ go?
2 Gbẹtọvi lẹ tindo nugopipe lọ nado do owanyi hia, ṣigba Ohó Jiwheyẹwhe tọn na mí avase gando awuwiwlena owanyi agọ̀ go. Podọ Biblu basi zẹẹmẹ nuhe nọ jọ to whenue owanyi mọnkọtọn doadọ̀do to ahun mẹde tọn mẹ tọn. (1 Tim. 6:9, 10) Be hiẹ flin nuhe Paulu dọ gando Dema go ya? Dile etlẹ yindọ Dema yin gbẹdohẹmẹtọ Paulu tọn, e jẹ wanyina onú aihọn tọn lẹ ji. (2 Tim. 4:10) Apọsteli Johanu na avase Klistiani lẹ gando owù enẹ dopolọ go. (Hia 1 Johanu 2:15, 16.) Wanyina aihọn po nuzedonukọnnamẹ etọn he to jujuyi lẹ po ma nọ yì afọsu-afọsi hẹ wanyina Jiwheyẹwhe po nuhe wá sọn ewọ dè lẹ po gba.
3. Pọndohlan tẹwẹ e nọ vẹawuna mí nado dapana, podọ kanbiọ tẹlẹ wẹ fọndote?
3 Dile etlẹ yindọ mí to gbẹnọ to aihọn ehe mẹ, mí ma yin apadewhe etọn. Enẹwutu, e nọ vẹawuna mí nado dapana pọndohlan agọ̀ he aihọn lọ tindo gando owanyi go. Nujọnu wẹ e yin ma nado jai jẹ omọ̀ enẹ mẹ. Eyin mọ wẹ, mẹnu wẹ mí dona wleawu owanyi nujọnu tọn na, bosọ nọ do e hia? Etẹlẹ wẹ sọgan gọalọna mí nado wleawuna owanyi he nọ doakọnna onú lẹpo bo masọ nọ gboawupo gbede? Nawẹ mọwiwà nọ hẹn ale wá na mí todin gbọn, podọ nawẹ e gando sọgodo mítọn go gbọn? Pọndohlan Jiwheyẹwhe tọn yinyọnẹn gando kanbiọ ehelẹ go na gọalọna mí to aliho he sọgbe mẹ.
Hẹn Owanyi Towe Na Jehovah Jideji
4. Nawẹ owanyi na Jiwheyẹwhe nọ jideji gbọn?
4 Lẹnnupọndo apajlẹ glesi he nọ wazọ́n sinsinyẹn nado jla aigba do na e nido dó jinukun de tọn ji. E nọ donukun dọ jinukun etọn lẹ ni whẹ́n. (Heb. 6:7) Mọdopolọ, mílọsu dona hẹn owanyi mítọn na Jiwheyẹwhe jideji. Etẹwẹ enẹ biọ to mí si? Mí dona wazọ́n do aigba yẹhiadonu tọn mítọn, yèdọ ahun mítọn go, fie okún Ahọluduta lọ tọn yin didó do. Mí sọgan wàmọ gbọn sọwhiwhe yíyí do plọn Ohó Jiwheyẹwhe tọn dali, na oyọnẹn etọn he mí tindo nido jideji. (Kọl. 1:10) Opli agun tọn lẹ yìyì to gbesisọ mẹ po mahẹ tintindo to yé mẹ po nasọ gọalọna mí nado hẹn oyọnẹn mítọn jideji. Be dopodopo mítọn nọ dovivẹnu vẹkuvẹku nado hẹn oyọnẹn mítọn siso deji ya?—Howh. 2:1-7.
5. (a) Nawẹ mí sọgan plọnnu gando jẹhẹnu tangan Jehovah tọn lẹ go gbọn? (b) Etẹwẹ a sọgan dọ gando whẹdida dodo, nuyọnẹn po huhlọn Jiwheyẹwhe tọn po go?
5 Jehovah do jẹhẹnu etọn lẹ hia to Ohó etọn mẹ. Eyin mí nọ plọn Ohó Jehovah tọn bo nọ to oyọnẹn etọn dín madoalọte, mí na yọ́n pinpẹn jẹhẹnu etọn lẹ tọn dogọ—yèdọ whẹdida dodo, huhlọn, nuyọnẹn, podọ hú popolẹpo, owanyi etọn he mayọnjlẹ. Jehovah nọ do whẹdida dodo etọn hia to ali etọn lẹpo mẹ podọ to osẹ́n pipé etọn lẹ mẹ. (Deut. 32:4; Ps. 19:7) Eyin mí lẹnnupọndo nudida Jehovah tọn lẹ ji, mí na mọdọ nuyọnẹn etọn sẹhundaga. (Ps. 104:24) Wẹkẹ lọ blebu sọ dohia dọ Jehovah klo to huhlọn mẹ podọ huhlọn etọn ma do dogbó.—Isa. 40:26.
6. Aliho tẹ mẹ wẹ Jiwheyẹwhe do owanyi hia mí te, podọ nawẹ enẹ ko yinuwado jiwe gbọn?
6 Etẹwẹ mí sọgan dọ gando owanyi go—yèdọ jẹhẹnu Jiwheyẹwhe tọn he tọ́nta? Owanyi enẹ sẹhundaga podọ mímẹpo wẹ nọ duvivi etọn. E do owanyi enẹ hia gbọn awuwiwlena ofligọ lọ dali nado whlẹn gbẹtọvi lẹ gán. (Hia Lomunu lẹ 5:8.) Awuwledainanu enẹ tin-to-aimẹ na gbẹtọvi lẹpo, ṣigba kiki mẹhe yiwanna Jiwheyẹwhe bo do yise hia to Ovi etọn mẹ lẹ wẹ na mọaleyi sọn e mẹ. (Joh. 3:16, 36) Na Jiwheyẹwhe ze Jesu jo nado wleawuna avọ́sinsan oyẹsu ylando mítọn lẹ tọn wutu, enẹ dona whàn mílọsu nado yiwanna ẹn.
7, 8. (a) Etẹwẹ mí dona wà nado dohia dọ mí yiwanna Jiwheyẹwhe? (b) Omẹ Jiwheyẹwhe tọn lẹ nọ yìn gbedide etọn lẹ, mahopọnna etẹ?
7 Po nuhe Jiwheyẹwhe ko wà na mí lẹpo po, nawẹ mílọsu sọgan dohia dọ mí yiwanna ẹn gbọn? Biblu na gblọndo lọ to aliho he họnwun mẹ dọmọ: “Ehe wẹ nuhe owanyi Jiwheyẹwhe tọn zẹẹmẹdo, dọ, mí ni yìn gbedide etọn lẹ; ṣogan gbedide etọn lẹ ma pẹnagbanmẹ.” (1 Joh. 5:3) Mọwẹ, owanyi he mí tindo na Jehovah Jiwheyẹwhe nọ whàn mí nado setonuna gbedide etọn lẹ. Enẹ yin dopo to whẹwhinwhẹ́n he wutu mí nọ dekunnuna oyín etọn po Ahọluduta etọn po lẹ mẹ, podọ mọwiwà nọ hẹn ale wá na mẹdevo lẹ. Eyin mí nọ wàmọ po ahundopo po, enẹ na dohia dọ mí to gbedide Jiwheyẹwhe tọn lẹ yìn po mẹwhinwhàn dagbe po.
8 Mẹmẹsunnu mítọn lẹ lẹdo aihọn pé nọ sinyẹnlin dile yé to gbedide Jiwheyẹwhe tọn lẹ yìn mahopọnna dọ gbẹtọ lẹ ma nọ tindo ojlo to owẹ̀n Ahọluduta lọ tọn mẹ bo nọ gbẹ́ tlọlọ. Agbọ́ ma nọ pé mẹmẹsunnu mítọn lẹ nado to lizọnyizọn yetọn hẹndi to gigọ́ mẹ. (2 Tim. 4:5) Mọdopolọ, apàpà nọ sọ mílọsu nado má oyọnẹn Jiwheyẹwhe tọn hẹ mẹdevo lẹ podọ nado nọ yìn gbedide etọn devo lẹ.
Nuhewutu Mí Yiwanna Jesu Klisti Oklunọ Mítọn
9. Etẹlẹ wẹ Klisti doakọnna, podọ etẹwẹ whàn ẹn nado wàmọ?
9 Gbọnvona owanyi tintindo na Jiwheyẹwhe, mí tindo whẹwhinwhẹ́n susu he wutu mí sọ dona yiwanna Ovi etọn. Dile etlẹ yindọ mí ma mọ Jesu pọ́n, owanyi he mí tindo na ẹn nọ siso deji dile mí to nususu plọn gandego. (1 Pita 1:8) Etẹwẹ yin delẹ to nuhe Jesu doakọnna lẹ mẹ? Whenue Jesu to ojlo Otọ́ etọn tọn wà, gbẹtọ lẹ gbẹwanna ẹn matin whẹwhinwhẹ́n depope, bo dohomẹkẹn ẹn, yé sawhẹ agọ̀ dokọna ẹn, bosọ vlẹ ẹ. Yè sọ de e pò to aliho devo lẹ mẹ. (Hia Johanu 15:25.) Owanyi he Jesu tindo na Otọ́ olọn mẹ tọn etọn wẹ whàn ẹn nado doakọnna whlepọn enẹlẹ. Humọ, owanyi whàn ẹn nado yí ede do sanvọ́ na ofligọ mẹsusu tọn.—Mat. 20:28.
10, 11. Eyin mí nọ lẹnnupọndo nuhe Klisti wà na mí ji, etẹwẹ enẹ dona whàn mí nado wà?
10 Nuhe Jesu wà nọ whàn mílọsu nado yiwanna ẹn. Eyin mí nọ lẹnnupọndo nuhe Klisti wà do ota mítọn mẹ ji, owanyi he mí tindo na ẹn na siso deji. Taidi hodotọ etọn lẹ, mí dona dovivẹnu nado tindo owanyi Klisti tọn nkọ bo nọ do e hia, na mí nido sinyẹnlin to gbedide etọn yinyin mẹ—enẹ wẹ, nado nọ dekunnu dogbọn Ahọluduta lọ dali bosọ nọ hẹn gbẹtọ lẹ zun devi.—Mat. 28:19, 20.
11 Pinpẹn-nutọn-yinyọnẹn tintindo na owanyi he Klisti dohia gbẹtọvi lẹpo dona whàn mí nado dotana azọ́ndenamẹ mítọn whẹpo opodo lọ nido wá. (Hia 2 Kọlintinu lẹ 5:14, 15.) Eyin owanyi he Klisti dohia enẹ tọn dẹ́n, lẹndai Jiwheyẹwhe tọn na gbẹtọvi lẹ ma sọgan yin hinhẹndi gbede. Podọ apajlẹ he Klisti zedai na mí nado hodo pẹkipẹki nọ gọalọna dopodopo mítọn nado yí adà de wà to lẹndai Jiwheyẹwhe tọn mẹ. Ehe nọ biọ dọ mí ni yiwanna Jiwheyẹwhe po huhlọn mítọn lẹpo po. (Mat. 22:37) Eyin mí nọ hodo nuplọnmẹ Jesu tọn lẹ bosọ nọ yìn gbedide etọn lẹ, mí na dohia dọ mí yiwanna ẹn bo magbe nado yiavunlọna nupojipetọ-yinyin Jiwheyẹwhe tọn mahopọnna nudepope he to jijọ, kẹdẹdile Jesu wà do.—Joh. 14:23, 24; 15:10.
Nọ Doafọna Owanyi —Yèdọ Aliho He Yiaga Hugan Lọ
12. Etẹ dọ wẹ Paulu te to whenue e zan hogbe lọ “aliho he yiaga hugan”?
12 Apọsteli Paulu hodo apajlẹ Klisti tọn. Na Paulu hodo afọdòmẹ Klisti tọn pẹkipẹki wutu, e tindo awuvivo hodidọ tọn nado dotuhomẹna mẹmẹsunnu etọn lẹ na yé nido nọ hodo apajlẹ etọn. (1 Kọl. 11:1) Nugbo wẹ dọ Paulu dotuhomẹna Klistiani Kọlinti owhe kanweko tintan tọn lẹ nado tindo zohunhun to nunina gbigbọ tọn delẹ dindin mẹ, taidi nunina azọ̀nhẹngbọ po ogbè hunkọhunkọ didó tọn po he tin-to-aimẹ to whenẹnu, ṣigba e dohia yé dọ nuhe pọnte hugan de tin he yé dona nọ doafọna. To 1 Kọlintinu lẹ 12:31 mẹ, e dọmọ: “Yẹn do aliho he yiaga hugan lọ hia mì.” Nuhe e dọ to wefọ he bọdego lẹ mẹ dohia dọ owanyi wẹ aliho he yiaga hugan lọ. Aliho tẹ mẹ wẹ e yiaga hugan te? Paulu zindonukọn to nuhe dọ e te mẹ. (Hia 1 Kọlintinu lẹ 13:1-3.) Eyin e tindo nugopipe vonọtaun delẹ bo nọ wà nujiawu lẹ ṣigba bo ma tindo owanyi, ale tẹwẹ enẹ na hẹnwa na ẹn? Popolẹpo na yin ovọ́! Na gbigbọ Jiwheyẹwhe tọn whàn ẹn wutu, e de nuagokun ehe tọ́n na mí. Be e ma wà dagbe nado hẹn ehe họnwun na mí ya?
13. (a) Etẹwẹ hosọ owhe 2010 tọn? (b) Linlẹn tẹ mẹ wẹ owanyi ma nọ gboawupo gbede te?
13 Enẹgodo, Paulu do nuhe owanyi zẹẹmẹdo po nuhe e ma zẹẹmẹdo po hia mí. (Hia 1 Kọlintinu lẹ 13:4-8.) Yì agbọji vude bo gbeje dewe pọ́n eyin a jẹ nubiọtomẹsi owanyi tọn lẹ kọ̀n. Na ayidonugo nuhe Paulu dọ gbọngodo to wefọ 7tọ po nuhe e dọ to bẹjẹeji wefọ 8tọ po tọn mẹ dọmọ: ‘Owanyi nọ doakọnna onú lẹpo. Owanyi ma nọ gboawupo gbede.’ Ehe wẹ hosọ owhe 2010 tọn. Doayi e go dọ to wefọ 8tọ mẹ, Paulu dọ dọ nunina gbigbọ tọn lẹ, he bẹ dọdai didọ po ogbè hunkọhunkọ didó po hẹn—he yin yiyizan to whenue agun Klistiani tọn ṣẹṣẹ yin didoai—na busẹ. Mọwẹ, yé na doalọte. Ṣigba owanyi na gbẹ́ tin tẹgbẹ. Jehovah wẹ dowatọ owanyi tọn, podọ ewọ tin kaka yì mavọmavọ. Enẹwutu, owanyi ma na gboawupo, kavi doalọte gbede. E na tin tẹgbẹ taidi dopo to jẹhẹnu Jiwheyẹwhe madopodo lọ tọn lẹ mẹ.—1 Joh. 4:8.
Owanyi Nọ Doakọnna Onú Lẹpo
14, 15. (a) Nawẹ owanyi sọgan gọalọna mí nado doakọnna whlepọn lẹ gbọn? (b) Etẹwẹ whàn mẹmẹsunnu jọja de bọ e ma do jogbe?
14 Etẹwẹ nọ gọalọna Klistiani lẹ nado doakọnnanu mahopọnna whlepọn, ninọmẹ sinsinyẹn, po nuhahun he yé to pipehẹ lẹ po? Na taun tọn, owanyi nujọnu tọn he yé tindo wẹ. Owanyi mọnkọtọn ma nọte do nunamẹ kẹdẹ ji gba. E sọ nọ biọ dọ mí ni wleawufo nado hẹn tenọgli mítọn go, podọ etlẹ yin nado hẹn ogbẹ̀ mítọn bu na Klisti tọn wutu. (Luku 9:24, 25) Lẹnnupọndo apajlẹ nugbonọ-yinyin Kunnudetọ he jiya to osla yasanamẹ tọn po azọ́n sinsinyẹn wiwá tọn lẹ po mẹ, podọ to gànpa lẹ mẹ to Wẹkẹ-Whàn II whenu tọn ji.
15 Apajlẹ Kunnudetọ jọja Allemagne-nu de he nọ yin Wilhelm tọn hẹn ehe họnwun. Kakati nado jogbe, e hẹn tenọgli etọn go to whenue awhànfuntọ Nazi tọn he nọ hù mẹhe yè dá kú-whẹ̀ na lẹ jlo na hù i. To wekanhlanmẹ godo tọn he e dohlan whẹndo etọn mẹ, e wlan dọmọ: “Hú popolẹpo, mí dona yiwanna Jiwheyẹwhe, dile Nukọntọ mítọn Jesu Klisti degbena mí do. Eyin mí hẹn tenọgli mítọn go, ewọ na suahọ mí.” To nukọn mẹ, hagbẹ whẹndo etọn tọn de dọ to Atọ̀họ̀-Nuhihọ́ Lọ Tọn de mẹ dọmọ: “To ojlẹ hunyanhunyan tọn lẹ mẹ, mí ko hẹn ẹn diun dọ owanyi he mí tindo na Jiwheyẹwhe wẹ tin to otẹn tintan mẹ na mí to whẹndo mítọn mẹ.” Pọndohlan mọnkọtọn wẹ mẹmẹsunnu mítọn susu he tin to gànpamẹ to alọnu din to Arménie, Corée du Sud, Érythrée, po otò devo lẹ po mẹ tindo. Mẹmẹsunnu ehelẹ tẹdo owanyi he yé tindo na Jehovah go gligli.
16. Etẹwẹ mẹmẹsunnu mítọn lẹ doakọnna to Malawi?
16 To otò susu mẹ, whlepọn wunmẹ voovo wẹ nọ whlé yise po akọndonanu mẹmẹsunnu mítọn lẹ tọn po pọ́n. Kunnudetọ Jehovah tọn lẹ to Malawi doakọnna alọhẹndotenamẹ ahọlu tọn, nukundiọsọmẹ sinsinyẹn, po danuwadomẹgo susu po na owhe 26. Jehovah dona akọndonanu yetọn. Whenue homẹkẹn lọ bẹjẹeji, nudi Kunnudetọ 18 000 wẹ tin to otò lọ mẹ. Ṣigba to owhe 30 godo, sọha enẹ jideji yì 38 393. Otò devo lẹ ko sọ tindo kọdetọn dagbe mọnkọtọn lẹ ga.
17. (a) Etẹlẹ wẹ mẹdelẹ nọ pehẹ sọn hagbẹ whẹndo tọn yetọn he ma yin Kunnudetọ lẹ dè? (b) Etẹwẹ nọ gọalọna yé nado doakọnna nuyiwahẹmẹ agọ̀ mọnkọtọn lẹ?
17 Onú dopo wẹ yindọ yè ni yangbé omẹ Jiwheyẹwhe tọn lẹ tọn to pọmẹ. Ṣigba onú devo pete wẹ e yin dọ hagbẹ whẹndo Klistiani de tọn ni nukundiọsọ ẹ. Nukundiọsọmẹ enẹ sọgan wá sọn mẹhe tin to whédo etọn mẹ lẹ dè kavi sọn hẹnnumẹ sẹpọmẹ etọn lẹ dè. Be Jesu ma ko dọ dọ enẹ na jọ ya? Mọwẹ, podọ mẹsusu ko tindo numimọ nuhe Jesu dọ enẹlẹ tọn. (Mat. 10:35, 36) Jọja aflanmẹ susu wẹ ko doakọnna nukundiọsọmẹ mẹjitọ mayisenọ yetọn lẹ tọn. Delẹ to yé mẹ ko yin yinyan sọn whégbè, ṣigba Kunnudetọ delẹ ko do homẹdagbe hia yé bo yí yé do. Mẹdevo lẹ ko yin gbigbẹdai gbọn hagbẹ whẹndo yetọn tọn lẹ dali. Etẹwẹ gọalọna jọja enẹlẹ nado doakọnna nuyiwahẹmẹ agọ̀ mọnkọtọn lẹ? E ma yin owanyi he yé tindo na mẹmẹsunnu lẹ kẹdẹ wẹ gba, ṣigba owanyi nujọnu tọn he yé tindo na Jehovah po Ovi etọn po wẹ zọ́n taun.—1 Pita 1:22; 1 Joh. 4:21.
18. Nawẹ owanyi he nọ doakọnna onú lẹpo nọ gọalọna alọwlemẹ Klistiani lẹ gbọn?
18 Ninọmẹ susu devo lẹ sọ tin to gbẹ̀mẹ he nọ biọ dọ mí ni do owanyi he nọ doakọnna onú lẹpo hia. To alọwle mẹ, owanyi nọ gọalọna asu po asi po lẹ nado setonuna hogbe Jesu tọn lẹ dọmọ: “Nuhe Jiwheyẹwhe ko kọndopọ mì dike mẹde klan ẹn blo.” (Mat. 19:6, NW) Whenue asu po asi po Klistiani de to pipehẹ “nukunbibia to agbasalan mẹ,” yé dona nọ flindọ Jehovah wẹ yin dòtin alọwle yetọn tọn. (1 Kọl. 7:28, NW) Ohó etọn dọ dọ ‘owanyi nọ doakọnna onú lẹpo,’ podọ eyin asu po asi po de ze jẹhẹnu ehe dogo, enẹ na gọalọna yé nado dọnsẹpọ yede dogọ bo hẹn gbemima alọwle tọn yetọn lodo.—Kọl. 3:14.
19. Nawẹ omẹ Jiwheyẹwhe tọn lẹ ko yinuwa hẹ ode awetọ to nugbajẹmẹji lẹ whenu gbọn?
19 Owanyi nọ gọalọna mí nado nọ doakọnnanu to ojlẹ nugbajẹmẹji jọwamọ tọn lẹ whenu. Onú mọnkọ de jọ to whenue aigba sisọsisọ de gbànú to hùwaji Peru tọn bọ jẹhọn-ahizi Katrina hẹnnugble to lẹdo he tin to huto États-Unis tọn de mẹ. Mẹmẹsunnu mítọn susu wẹ hẹn owhé po nutindo yetọn lẹ po bu to nugbajẹmẹji enẹlẹ whenu. Owanyi wẹ whàn mẹmẹsunnu lẹ lẹdo aihọn pé nado basi nunina voovo lẹ, podọ mẹsusu ze yede jo nado gọalọ to owhé lẹ vivọgbá po Plitẹnhọ Ahọluduta tọn lẹ vivọjlado po mẹ. Nuyiwa mọnkọtọn lẹ dohia dọ mẹmẹsunnu mítọn lẹ yiwanna ode awetọ bo nọ hò yenọzo tọn pọ́n to whelẹponu podọ to ninọmẹ lẹpo mẹ.—Joh. 13:34, 35; 1 Pita 2:17.
Owanyi Ma Nọ Gboawupo Gbede
20, 21. (a) Naegbọn owanyi ma nọ gboawupo gbede? (b) Naegbọn hiẹ do magbe nado nọ doafọna aliho owanyi tọn?
20 To omẹ Jehovah tọn lẹ ṣẹnṣẹn to egbehe, mí nọ mọdọ nuyọnẹnnu wẹ e yin nado nọ doafọna owanyi, yèdọ aliho he yiaga hugan lọ. Na nugbo tọn, e ma nọ gboawupo to ninọmẹ depope mẹ. Pọ́n lehe apọsteli Paulu zinnudo nugbo ehe ji do. Tintan, e zinnudeji dọ nunina gbigbọ tọn lẹ na doalọte podọ agun Klistiani tọn he ṣẹṣẹ yin didoai na wá jẹ whinwhẹ́n kọ̀n. Enẹgodo, e dotana dọmọ: “Nalete, todin, onú atọ̀n ehelẹ wẹ pò, yise, todido, owanyi; ṣigba dehe klohugan to ehelẹ mẹ wẹ owanyi.”—1 Kọl. 13:13, NW.
21 To godo mẹ, nuhe mẹ mí tindo yise te lẹ na wá mọ hẹndi, gbọnmọ dali mí ma na tindo nuhudo nado tindo yise to yé mẹ ba. Whenue onú lẹpo na ko zun yọyọ, mí ma nasọ to jejeji na opagbe he mí to nukundo dai lẹ ba. Ṣigba owanyi lo? E ma na gboawupo, kavi doalọte gbede. E na gbẹ́ tin tẹgbẹ. Dile mí to nukundo ogbẹ̀ madopodo, jide tin dọ mí na mọ dohia owanyi Jiwheyẹwhe tọn to aliho voovo mẹ bosọ mọnukunnujẹ yé mẹ dogọ. Eyin hiẹ nọ wà ojlo Jiwheyẹwhe tọn, enẹ wẹ nado nọ doafọna owanyi—yèdọ aliho he yiaga hugan he ma nọ gboawupo gbede lọ—hiẹ sọgan nọgbẹ̀ kakadoi.—1 Joh. 2:17.
Nawẹ Hiẹ Na Na Gblọndo Gbọn?
• Naegbọn mí dona họ́ míde sọta owanyi agọ̀?
• Etẹwẹ owanyi sọgan gọalọna mí nado doakọnna?
• Linlẹn tẹ mẹ wẹ owanyi ma nọ gboawupo gbede te?
[Kanbiọ Oplọn tọn lẹ]
[Blurb on page 27]
Hosọ owhe 2010 tọn wẹ: ‘Owanyi nọ doakọnna onú lẹpo. Owanyi ma nọ gboawupo gbede.’ —1 Kọl. 13:7, 8.
[Yẹdide to weda 25]
Owanyi na Jiwheyẹwhe nọ whàn mí nado dekunnu
[Yẹdide to weda 26]
Owanyi nujọnu tọn gọalọna mẹmẹsunnu lẹ po mẹmẹyọnnu lẹ po to Malawi nado doakọnna whlepọn lẹ