Do Dewe Hia Taidi Hodotọ Nujọnu Tọn Klisti Tọn
Do Dewe Hia Taidi Hodotọ Nujọnu Tọn Klisti Tọn
“Atin dagbe lẹpo nọ de sinsẹ́n dagbe tọ́n, ṣigba atin ylankan lẹpo nọ de sinsẹ́n gbigble tọ́n.”—MAT. 7:17, NW.
1, 2. To ojlẹ opodo tọn ehe mẹ, nawẹ hodotọ nugbo Klisti tọn lẹ gbọnvo na hodotọ lalo lẹ gbọn?
JESU dọ dọ hodotọ nugbo emitọn lẹ po mẹhe gbọn oklọ dali do yede hia nado to sinsẹ̀nzọnwa na ẹn lẹ po na yin yinyọnẹn gbọn sinsẹ́n yetọn lẹ dali—enẹ wẹ nuplọnmẹ po walọ yetọn lẹ po. (Mat. 7:15-17, 20) Ayihaawe ma tin dọ, nuhe gbẹtọ lẹ nọ yí do ayiha po ahun yetọn po mẹ nọ yinuwado yé ji taun. (Mat. 15:18, 19) Mẹhe mọ nuplọnmẹ lalo yí lẹ nọ de “sinsẹ́n gbigble” tọ́n, to whenuena mẹhe mọ nuplọnmẹ nugbo gbigbọmẹ tọn yí lẹ nọ de “sinsẹ́n dagbe” tọ́n.
2 Sinsẹ́n wunmẹ awe ehelẹ ko yin didohia hezeheze to ojlẹ opodo tọn ehe mẹ. (Hia Daniẹli 12:3, 10.) Klistiani lalo lẹ tindo pọndohlan agọ̀ gando Jiwheyẹwhe go bo nọ saba gbọn yẹnuwiwa dali dọ dọ yé to yede zejo na Jiwheyẹwhe, to whenuena mẹhe tindo nukunnumọjẹnumẹ gbigbọmẹ tọn lẹ nọ sẹ̀n Jiwheyẹwhe “to gbigbọ mẹ podọ to nugbo mẹ.” (Joh. 4:24, NW; 2 Tim. 3:1-5) Yé nọ dovivẹnu nado do jẹhẹnu Klisti tọn nkọ lẹ hia. Ṣigba etẹwẹ dogbọn dopodopo mítọn lẹ dali? Dile hiẹ to dogbapọnna onú voovo atọ́n he nọ dohiagona sinsẹ̀n Klistiani nugbo tọn, kanse dewe dọ: ‘Be jijọ ṣie po nuhe n’nọ plọnmẹ lẹ po tin to kọndopọ pẹkipẹki mẹ hẹ Ohó Jiwheyẹwhe tọn ya? Be walọ ṣie po nuhe n’nọ plọnmẹ lẹ po nọ dọ̀n mẹdevo lẹ wá nugbo lọ mẹ ya?’
Dike Ohó Jiwheyẹwhe Tọn Ni Nọ Deanana Gbẹzan Towe
3. Etẹwẹ nọ hẹn homẹ Jehovah tọn hùn, podọ nawẹ enẹ gando Klistiani nugbo lẹ go gbọn?
3 Jesu dọmọ: “E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ ahọluduta olọn tọn mẹ gba, ṣigba ewọ he to ojlo Otọ́ ṣie he tin to olọn mẹ tọn wà.” (Mat. 7:21, NW) Mọwẹ, e mayin nado dọ dọ mí yin Klistiani wẹ nọ hẹn homẹ Jehovah tọn hùn gba, ṣigba nado wà ojlo Jiwheyẹwhe tọn. Enẹ gando gbẹzan hodotọ nugbo Klisti tọn lẹ tọn blebu go, kakajẹ pọndohlan yetọn gando akuẹ, agbasazọ́n, ayidedai, alọwle, aṣa po hùnwhẹ aihọn tọn lẹ po go, gọna nuyiwa hẹ gbẹtọvi hatọ devo lẹ ji. Ṣigba, Klistiani lalo lẹ nọ kẹalọyi pọndohlan po aṣa aihọn tọn lẹ po he fọ́n bo to yinylan deji to azán godo tọn ehelẹ mẹ.—Ps. 92:7.
4, 5. Nawẹ mí sọgan yí nuhe Jehovah dọ to Malaki 3:18 mẹ lẹ do yizan mẹ gbọn?
4 Mọdopolọ, yẹwhegán Malaki wlan dọmọ: “Mìwlẹ na lẹgọ bosọ yọ́n vogbingbọn to dodonọ po mẹylankan po ṣẹnṣẹn, to ewọ he to Jiwheyẹwhe sẹ̀n po ewọ he ma to sinsẹ̀n ẹn po ṣẹnṣẹn.” (Mal. 3:18) Dile hiẹ to ayihamẹlẹnpọndo hogbe enẹlẹ ji, kanse dewe dọ: ‘Be n’nọ yinuwa taidi aihọnmẹnu lẹ wẹ ya, kavi n’nọ do de e hia taidi mẹhe gbọnvo? Be yẹn nọ tẹnpọn nado yinuwa taidi hagbẹ ṣie lẹ, vlavo to wehọmẹ kavi to azọ́n mẹ, kavi n’nọ tẹdo nunọwhinnusẹ́n Biblu tọn lẹ go gligli, bo tlẹ nọ dọho po adọgbigbo po eyin e biọ domọ ya?’ (Hia 1 Pita 3:16.) Nugbo wẹ dọ, mí ma nọ jla míde taidi dodonọ, ṣigba mí dona nọ dohia dọ mí gbọnvo na mẹhe ma yiwanna Jehovah bo ma nọ sẹ̀n ẹn lẹ.
5 Eyin hiẹ mọdọ e jẹ dọ emi ni basi vọjlado, be e ma jẹ dọ a ni hodẹ̀ gando whẹho lọ go bo dín alọgọ gbigbọmẹ tọn gbọn Biblu pinplọn, dẹ̀hiho, po opli lẹ yìyì to gbesisọ mẹ po dali ya? Lehe a jẹakọ hẹ Ohó Jiwheyẹwhe tọn sọ, mọ wẹ hiẹ na de “sinsẹ́n dagbe” po “sinsẹ́n nùflo tọn he nọ basi gbeyiyi gbangba tọn na oyín [Jiwheyẹwhe tọn]” po tọ́n do niyẹn.—Heb. 13:15, NW.
Nọ Lá Ahọluduta Jiwheyẹwhe Tọn
6, 7. Na nuhe dù owẹ̀n Ahọluduta lọ tọn lilá, nawẹ Klistiani nugbo lẹ gbọnvo na Klistiani lalo lẹ gbọn?
6 Jesu dọmọ: “Yẹn dona yì tòdaho devo lẹ mẹ ga nado lá wẹndagbe ahọluduta Jiwheyẹwhe tọn, na ehe wutu wẹ yẹn do yin didohlan.” (Luku 4:43, NW) Naegbọn Jesu do yí Ahọluduta Jiwheyẹwhe tọn do basi hosọ tangan lizọnyizọn etọn tọn? Taidi Ahọlu Ahọluduta enẹ tọn, to pọmẹ hẹ mẹmẹsunnu etọn he yin jiji gbọn gbigbọ dali lẹ, e yọnẹn dọ emi na wá sukúndona adọ̀ nuhahun gbẹtọvi lẹ tọn—enẹ wẹ ylando po Lẹgba po. (Lom. 5:12; Osọ. 20:10) Abajọ e do degbena hodotọ etọn lẹ nado lá Ahọluduta enẹ kakajẹ opodo titonu lọ tọn. (Mat. 24:14) Mẹhe nọ de nùmẹ-yozò poun dọ yé yin hodotọ Klisti tọn lẹ ma nọ tindo mahẹ to azọ́n ehe mẹ gba—nado dọ hójọhó, enẹ glo yé. Etẹwutu? E whè gbau na whẹwhinwhẹ́n atọ̀n wutu: Tintan, yé ma sọgan dọyẹwheho nuhe yé ma mọnukunnujẹemẹ tọn. Awetọ, suhugan yetọn ma tindo whiwhẹ po adọgbigbo po nado pehẹ mẹṣanko po nukundiọsọmẹ he sọgan wá sọn wẹndagbe Ahọluduta lọ tọn lilá na kọmẹnu yetọn lẹ po mẹ. (Mat. 24:9; 1 Pita 2:23) Podọ atọ̀ntọ, Klistiani lalo lẹ ma tindo gbigbọ wiwe Jiwheyẹwhe tọn.—Joh. 14:16, 17.
7 Ṣigba, hodotọ nugbo Klisti tọn lẹ mọnukunnujẹ nuhe Ahọluduta Jiwheyẹwhe tọn yin po nuhe e na wadotana lẹ po mẹ. Humọ, yé nọ ze Ahọluduta lọ do otẹn tintan mẹ to gbẹzan yetọn mẹ, podọ po alọgọ gbigbọ Jehovah tọn po, yé nọ lá ẹ lẹdo aihọn pé. (Zek. 4:6) Be hiẹ nọ tindo mahẹ gbesisọ tọn to azọ́n ehe mẹ ya? Be hiẹ nọ tẹnpọn nado hẹn azọ́nyinyọnẹn towe pọnte dogọ taidi wẹnlatọ Ahọluduta lọ tọn, vlavo gbọn whenu susu yiyizan to lizọnyizọn lọ mẹ kavi nado bikan dogọ to e mẹ dali ya? Mẹdelẹ ko tẹnpọn nado hẹn lizọnyizọn yetọn pọnte dogọ gbọn Biblu yiyizan ganji dali. Apọsteli Paulu, he tindo aṣa lọ nado nọ yihojlẹdohogo sọn Owe-wiwe mẹ wlan dọmọ: “Ohó Jiwheyẹwhe tọn tin to ogbẹ̀.”—Heb. 4:12, NW; Owalọ 17:2, 3.
8, 9. (a) Numimọ tẹlẹ wẹ dohia dọ e yin nujọnu nado nọ yí Biblu zan to lizọnyizọn mítọn mẹ? (b) Nawẹ mí sọgan bikan dogọ to Ohó Jiwheyẹwhe tọn yiyizan mẹ gbọn?
8 Whenue mẹmẹsunnu de tin to azọ́n họndekọn-jẹ-họndekọn tọn mẹ to gbèdopo, e hia Daniẹli 2:44 na dawe Katoliki de bo basi zẹẹmẹ lehe Ahọluduta Jiwheyẹwhe tọn na hẹn jijọho nujọnu tọn po hihọ́ po wá gbọn tọn na ẹn. Dawe lọ dọmọ: “Homẹ ṣie hùn taun dọ a hùn Biblu bo do nuhe wefọ lọ dọ hia mi, kakati nado dọna mi sọn tamẹ poun.” Whenue mẹmẹsunnu de hia wefọ de na nawe he nọ yì Ṣọṣi Orthodoxe Grèce tọn de, nawe lọ kàn kanbiọ susu sè he dohia dọ e tindo ojlo nujọnu tọn. To whẹho ehe lọsu mẹ, mẹmẹsunnu lọ po asi etọn po na gblọndo sọn Biblu mẹ. To godo mẹ, nawe lọ dọmọ: “Be mì yọ́n nuhewutu n’do yigbe dọ mì ni dọho hẹ mi ya? Mì wá dè e po Biblu po, bosọ hia ẹ.”
9 Nugbo wẹ dọ, owe mítọn lẹ yin nujọnu bọ mí sọ dona nọ ze yé donukọnna gbẹtọ lẹ to kunnudegbe. Ṣigba Biblu wẹ azọ́nwanu tangan mítọn. Enẹwutu, eyin hiẹ ma ko tindo aṣa lọ nado nọ yí Biblu zan to lizọnyizọn towe mẹ, be e ma jẹ dọ hiẹ ni yí i do basi yanwle towe nado nọ wàmọ ya? Vlavo hiẹ sọgan de wefọ tangan delẹ he basi zẹẹmẹ do Ahọluduta Jiwheyẹwhe tọn po lehe e na didẹ nuhahun tangan he nọ duahunmẹna gbẹtọ lẹ to okọ́ mìtọn mẹ do po ji. Enẹgodo, wleawufo nado nọ hia wefọ lọ lẹ dile a to yẹwhehodọ sọn họndekọn-jẹ-họndekọn.
Nọ Hùnhomẹ Dọ A Tindo Oyín Jiwheyẹwhe Tọn to Ota
10, 11. Gando oyín Jiwheyẹwhe tọn yiyizan go, nawẹ Jesu gbọnvo na susu mẹhe dọ dọ yé yin hodotọ etọn lẹ gbọn?
10 “Mì wẹ kunnudetọ ṣie, wẹ [Jehovah] dọ, dọ yẹn wẹ Jiwheyẹwhe.” (Isa. 43:12) Jesu Klisti he yin Kunnudetọ daho Jehovah tọn mọ ẹn taidi lẹblanulọkẹyi de nado tindo oyín Jiwheyẹwhe tọn to ota, podọ e hẹn oyín enẹ zun yinyọnẹn na gbẹtọ lẹ. (Hia Eksọdusi 6:2; Johanu 17:6; Heblu lẹ 2:12.) Na Jesu Klisti lá oyín Otọ́ etọn tọn wutu, e yin yiylọdọ “Kunnudetọ Nugbonọ lọ.”—Osọ. 1:5, NW; Mat. 6:9.
11 To vogbingbọn mẹ, susu mẹhe ylọ yede dọ afọzedaitọ Jiwheyẹwhe po Ovi etọn po tọn lẹ ko kọnmasin do oyín Jiwheyẹwhe tọn go, bo tlẹ de e sọn lẹdogbedevomẹ Biblu tọn yetọn lẹ mẹ. Onú mọnkọtọn de jọ to agọe, to whenue yẹwhenọ daho Katoliki tọn lẹ mọ gbedide de yí dọ “Oyín Jiwheyẹwhe tọn he yin kinkàn po tetlaglamu Heblu tọn YHWH po ma dona yin yiyizan kavi yin nùdego” to sinsẹ̀n-bibasi whenu. a Lehe enẹ ylan do sọ!
12. Nawẹ devizọnwatọ Jehovah tọn lẹ wá yin yinyọnẹn ganji po oyín Jehovah tọn po to 1931 gbọn?
12 Homẹ nọ hùn Klistiani nugbo lẹ nado yí oyín Jiwheyẹwhe tọn zan kẹdẹdile Klisti po ‘aslọ daho kunnudetọ’ he jẹnukọnna ẹn lẹ tọn po wà do. (Heb. 12:1) Na nugbo tọn, to 1931, devizọnwatọ Jiwheyẹwhe tọn lẹ wá yin yinyọnẹn po yinkọ Jehovah tọn po to gigọ́ mẹ to whenuena yé kẹalọyi yinkọ lọ, Kunnudetọ Jehovah tọn lẹ. (Hia Isaia 43:10-12.) Abajọ hodotọ nugbo Klisti tọn lẹ do lẹzun mẹhe yè nọ ylọ po oyín Jiwheyẹwhe tọn po.—Owalọ 15:14, 17.
13. Nawẹ mí sọgan nọgbẹ̀ sọgbe hẹ oyín he Jiwheyẹwhe na mí gbọn?
13 Nawẹ dopodopo mítọn sọgan nọgbẹ̀ sọgbe hẹ oyín vonọtaun he to ota na mí gbọn? Tintan whẹ́, mí dona dekunnuna Jiwheyẹwhe po nugbonọ-yinyin po. “Mẹdepope he dawhá ylọ oyín Jehovah tọn na yin whinwhlẹngán,” wẹ Paulu wlan. Ṣigba “nawẹ yé na dawhá ylọ mẹhe mẹ yé ma ko tindo yise te lọ gbọn? Podọ nawẹ yé na tindo yise to mẹhe yé ma ko sè ohó etọn mẹ gbọn? Podọ nawẹ yé na sè gbọn eyin mẹde ma dọyẹwheho na yé? Podọ nawẹ yé na dọyẹwheho gbọn eyin yé ma ko yin didohlan?” (Lom. 10:13-15, NW) Gbọnvona enẹ, mí sọ dona yí zinzin do hùngona lalo sinsẹ̀n tọn he nọ kọnmasin do Mẹdatọ mítọn go lẹ, taidi sinsẹ̀n-nuplọnmẹ olọnzomẹ tọn, he na taun tọn nọ do jijọ kanyinylan Lẹgba tọn hia, ṣigba he nọ yin yiyizan na Jiwheyẹwhe owanyinọ lọ.—Jel. 7:31; 1 Joh. 4:8; yijlẹdo Malku 9:17-27 go.
14. Whenue mẹdelẹ mọ oyín Jiwheyẹwhe tọn titi hia na yede to Biblu mẹ, nawẹ yé yinuwa gbọn?
14 Be homẹ nọ hùn we dọ a tindo oyín Otọ́ olọn mẹ tọn towe tọn to ota ya? Be hiẹ nọ gọalọna mẹdevo lẹ nado yọ́n oyín wiwe enẹ ya? Yọnnu de to Paris, France, sè dọ Kunnudetọ Jehovah tọn lẹ yọ́n oyín Jiwheyẹwhe tọn, enẹgodo, whenue e dukosọ hẹ Kunnudetọ de, e biọ to e si nado do oyín lọ hia ẹ to Biblu mẹ. Whenue e hia Psalm 83:18, e yinuwadeji taun. E jẹ Biblu plọn ji, podọ e ko lẹzun mẹmẹyọnnu nugbonọ de todin, bo to sinsẹ̀nzọnwa to otò devo mẹ. To whenue nawe Katoliki de, he nọ nọ̀ Australie mọ oyín Jiwheyẹwhe tọn whla tintan to Biblu mẹ, dasin ayajẹ tọn wayi do e. E ko to sinsẹ̀n taidi gbehosọnalitọ whepoponu tọn na owhe susu todin. To agọe, whenue Kunnudetọ he tin to Jamaïque lẹ do oyín Jiwheyẹwhe tọn hia nawe de to Biblu etọn titi mẹ, dasin ayajẹ tọn wayi do ewọ lọsu. Enẹwutu, homẹ towe ni nọ hùn dọ a tindo oyín Jiwheyẹwhe tọn to ota, podọ to apajlẹ Jesu tọn hihodo mẹ, nọ hẹn oyín họakuẹ enẹ zun yinyọnẹn na mẹlẹpo.
“Mì Yiwanna Aihọn . . . Blo”
15, 16. Nukun tẹwẹ Klistiani nugbo lẹ do nọ pọ́n aihọn lọ, podọ kanbiọ tẹlẹ wẹ mí dona kanse míde?
15 “Mì yiwanna aihọn kavi onú he tin to aihọn mẹ lẹ blo. Eyin mẹde yiwanna aihọn, owanyi Otọ́ tọn ma tin to ewọ mẹ.” (1 Joh. 2:15, NW) Aihọn po gbigbọ he e nọ dohia po jẹagọdo Jehovah po gbigbọ wiwe etọn po. Enẹwutu, hodotọ nugbo Klisti tọn lẹ ma nọ dapana yinyin apadewhe aihọn tọn poun gba. Yé nọ gbẹwanna ẹn sọn ahun mẹ, na yé yọnẹn dọ, “họntọnjiji hẹ aihọn okẹ̀n wẹ e yin to Jiwheyẹwhe dè,” dile devi Jakobu wlan do.—Jak. 4:4, NW.
16 E sọgan vẹawu nado setonuna nuhe Jakọbu dọ to aihọn he nọ ze whlepọn susu donukọnnamẹ ehe mẹ. (2 Tim. 4:10) Enẹwutu, Jesu hodẹ̀ do ota hodotọ etọn lẹ tọn mẹ dọmọ: “Yẹn biọ we, e ma yin nado de yé sẹ̀ sọn aihọn lọ mẹ gba, ṣigba nado họ́ yé na mẹylankan lọ tọn wutu. Yé ma yin apadewhe aihọn tọn, kẹdẹdile yẹn ma yin apadewhe aihọn tọn do.” (Joh. 17:15, 16, NW) Kanse dewe dọ: ‘Be n’nọ dovivẹnu ma nado yin apadewhe aihọn tọn ya? Be mẹdevo lẹ yọ́n teninọ ṣie gando hùnwhẹ po aṣa he ma sọgbe hẹ Owe-wiwe lẹ po gọna dehe ma tindo kanṣiṣa hẹ aṣa kosi lẹ tọn ṣigba nọ do gbigbọ aihọn tọn hia lẹ go ya?’—2 Kọl. 6:17; 1 Pita 4:3, 4.
17. Etẹwẹ sọgan whàn ahunjijlọnọ lẹ nado wá Jehovah dè?
17 Matin ayihaawe, na mí nọ tẹdo nujinọtedo Biblu tọn lẹ go wutu, aihọn na gbẹwanna mí. Ṣigba enẹ sọgan hẹn ahunjijlọnọ lẹ nado dín tlintlindo. Na nugbo tọn, eyin omẹ mọnkọtọn lẹ mọdọ nuyise mítọn lẹ sinai do Owe-wiwe ji gligli bo nọ sọawuhia to gbẹzan mítọn blebu mẹ, yé sọgan gbọnmọ dali yigbe bo dọna mẹyiamisisadode lẹ dọmọ: “Míwlẹ na yì hẹ mì, na mí ko sè dọ Jiwheyẹwhe tin to mì dè.”—Zek. 8:23.
Nọ Do Owanyi Nujọnu Tọn Klistiani Tọn Hia
18. Etẹwẹ owanyi didohia Jehovah po kọmẹnu mítọn po bẹhẹn?
18 Jesu dọmọ: “Hiẹ dona yí ahun towe lẹpo, alindọn towe lẹpo, podọ ayiha towe lẹpo do yiwanna Jehovah Jiwheyẹwhe towe.” E yidogọ dọmọ: “Hiẹ dona yiwanna kọmẹnu towe di dewe.” (Mat. 22:37, 39, NW) Owanyi enẹ (a·gaʹpe to Glẹkigbe mẹ) yin owanyi de he sinai do nuhe sọgbe wiwà ji. E nọ biọ dọ mẹde ni hẹn azọngban etọn di bo yinuwa sọgbe hẹ anademẹ po nujinọtedo walọ dagbe tọn he yin alọkẹyi lẹ po. Etomọṣo, e nọ saba bẹ numọtolanmẹ hẹn bo nọ sinyẹn taun. (1 Pita 1:22) Adà awetọ pete ṣejannabi tọn wẹ e yin, na e nọ sọawuhia to hogbe po nuyiwa he ma nọ do ṣejannabi hia po lẹ mẹ.—Hia 1 Kọlintinu lẹ 13:4-7.
19, 20. Dọ numimọ delẹ he do huhlọn he owanyi Klistiani tọn tindo hia.
19 Na owanyi yin apadewhe sinsẹ́n gbigbọ wiwe Jiwheyẹwhe tọn wutu, e nọ gọalọna Klistiani nugbo lẹ ma nado ṣinyan akọ̀, yiwanna aṣa de hugan devo, kavi gbẹwanna mẹhe wá sọn otò devo mẹ lẹ—yèdọ nuhe nọ glo mẹdevo lẹ nado wà. (Hia Johanu 13:34, 35; Gal. 5:22) Owanyi mọnkọtọn nọ yinuwado omẹ taidi lẹngbọ lẹ ji taun. Di apajlẹ, whenue dawe he yin Ju de to Islaeli yì opli Klistiani tọn whla tintan, e paṣa ẹ nado mọdọ Ju po Arabe he yin mẹmẹsunnu lẹ po to Jehovah sẹ̀n to pọmẹ. Enẹ whàn ẹn nado nọ yì opli lẹ to gbesisọ mẹ podọ e kẹalọyi plọnmẹ Biblu. Be hiẹ nọ do owanyi ahundopo tọn mọnkọtọn hia mẹmẹsunnu towe lẹ ya? Podọ, be hiẹ nọ dovivẹnu nado nọ dọnudo mẹyọyọ lẹ po zohunhun po to Plitẹnhọ Ahọluduta tọn mìtọn mẹ, mahopọnna otò he mẹ yé wá sọn, sinmẹ agbasa tọn yetọn, vlavo yé yin wamọnọ kavi adọkunnọ ya?
20 Taidi Klistiani nugbo, mí nọ tẹnpọn nado do owanyi hia mẹlẹpo. To Salvador, wẹnlatọ jọja de to Biblu plọn hẹ nawe Katoliki akonka he tindo owhe 87 de. To gbèdopo, nawe lọ jẹazọ̀n sinsinyẹn bo yin ginglọndo dotowhé. Whenue e lẹkọwa whégbè, Kunnudetọ lẹ nọ wá e dè, bo hẹn ẹn diun dọ núdùdù ma hán ẹn. Yé wàmọ na nudi osun dopo. Mẹdepope ma wá dla ẹ pọ́n sọn ṣọṣi etọn mẹ. Etẹwẹ kọdetọn lọ? E bẹ yẹdide sinsẹ̀n tọn etọn lẹpo dlan, bo wlanwe nado tọ́n sọn ṣọṣi lọ mẹ, bosọ gọ̀ Biblu pinplọn etọn bẹ. Mọwẹ, owanyi Klistiani tọn dohuhlọn taun! Etlẹ nọ yinuwado ahun gbẹtọ lẹ tọn ji hugan yẹwhehodidọ na yé poun.
21. Nawẹ mí sọgan hẹn dodonu todido mítọn tọn lodo gbọn?
21 To madẹnmẹ, Jesu na dọna mẹhe gbọn oklọ dali do yede hia nado to sinsẹ̀nzọnwa na ẹn lẹ dọmọ: “Yẹn ma yọ́n mì gbede! Mì tọ́n sọn dè e, mì mẹhe nọ wazọ́n sẹ́nhẹngba tọn lẹ.” (Mat. 7:23, NW) Enẹwutu, mì gbọ mí ni nọ de sinsẹ́n he nọ doyẹyigona Otọ́ po Ovi etọn po tọn lẹ tọ́n. Jesu dọmọ: “Mẹdepope he sè ohó he yẹn to didọ ehelẹ bo basi yé, na yin yiyijlẹdo dawe nuyọnẹntọ de go, he gbá ohọ̀ etọn do osé gángán ji.” (Mat. 7:24, NW) Mọwẹ, eyin mí do míde hia nado yin hodotọ nujọnu tọn Klisti tọn lẹ, mí na mọ nukundagbe Jiwheyẹwhe tọn, podọ dodonu todido mítọn tọn na lodo taidi nuhe yin didoai do osé ji!
[Nudọnamẹ odò tọn]
a Owe he sinsẹ̀n Katoliki tọn detọ́n to Glẹnsigbe mẹ to agọe delẹ, gọna Bible de Jérusalem, lẹ́ tetlaglamu lọ do “Yahweh” kavi “Yahvé.”
Be Hiẹ Flin Ya?
• Nawẹ hodotọ nugbo Klisti tọn lẹ gbọnvo na hodotọ lalo lẹ gbọn?
• Donù “sinsẹ́n” delẹ go he nọ do Klistiani nugbo lẹ hia.
• Yanwle tẹlẹ wẹ hiẹ sọgan zedonukọnna dewe dile a to sinsẹ́n Klistiani tọn lẹ detọ́n?
[Kanbiọ Oplọn tọn lẹ]
[Yẹdide to weda 13]
Be hiẹ tindo aṣa lọ nado nọ yí Biblu zan to lizọnyizọn towe mẹ ya?
[Yẹdide to weda 15]
Be mẹdevo lẹ yọ́n teninọ towe gando hùnwhẹ he ma sọgbe hẹ Owe-wiwe lẹ go ya?