Lẹblanulọkẹyi Vonọtaun Wẹ E Yin Nado Lẹzun Jehovah Tọn
Lẹblanulọkẹyi Vonọtaun Wẹ E Yin Nado Lẹzun Jehovah Tọn
“Jehovah tọn wẹ mí yin.”—LOM. 14:8, NW.
1, 2. (a) Lẹblanulọkẹyi tẹwẹ mí tindo? (b) Kanbiọ tẹlẹ ji wẹ mí na lẹnnupọndo?
JEHOVAH ze lẹblanulọkẹyi vonọtaun de donukọnna akọta Islaeli tọn to whenuena e dọna yé dọmọ: “Mìwlẹ na yin adọkunnu vivẹ́ de hlan mi sọn ṣẹnṣẹn gbẹtọ lẹpo tọn.” (Eks. 19:5) To egbehe, hagbẹ agun Klistiani tọn lẹ lọsu tindo lẹblanulọkẹyi lọ nado lẹzun Jehovah tọn. (1 Pita 2:9; Osọ. 7:9, 14, 15) Lẹblanulọkẹyi de wẹ enẹ yin he sọgan hẹn ale wá na mí kakadoi.
2 Gbọnvona dọ enẹ yin lẹblanulọkẹyi de, e sọ bẹ azọngban hẹn ga. Mẹdelẹ sọgan kanse dọ: ‘Be n’na penugo nado wà nuhe Jehovah biọ to asi e lẹ ya? Eyin e wá jọ bọ n’wà ylando, be e ma na gbẹ́ mi dai nẹ? Eyin n’lẹzun Jehovah tọn, be enẹ na zọ́n bọ n’ma na tindo mẹdekannujẹ ba wẹ ya?’ E jẹ dọ mí ni lẹnnupọndo kanbiọ mọnkọtọn lẹ ji. Ṣigba jẹnukọn whẹ́, kanbiọ devo tin he e jẹ dọ mí ni na ayidonugo sọwhiwhe tọn, enẹ wẹ: Ale tẹlẹ wẹ mí nọ mọyi eyin mí lẹzun Jehovah tọn?
Eyin Mí Lẹzun Jehovah Tọn, Mí Na Tindo Ayajẹ
3. Nawẹ nudide he Lahabi basi nado sẹ̀n Jehovah hẹn ale wá na ẹn gbọn?
3 Be mẹhe lẹzun Jehovah tọn lẹ nọ mọaleyi sọn mọwiwà mẹ ya? Lẹnnupọndo ninọmẹ Lahabi galọtọ de he nọ nọ̀ Jẹliko hohowhenu tọn ji. Matin ayihaawe, sinsẹ̀n-bibasi he gblezọn yẹwhe Kenaninu lẹ tọn mẹ wẹ e yin jiji do. Ṣigba, whenue e sè linlin awhàngbigba he Jehovah na akọta Islaeli tọn, e mọdọ Jehovah wẹ Jiwheyẹwhe nugbo lọ. Enẹwutu, e ze ogbẹ̀ etọn do owù mẹ nado basi hihọ́na omẹ Jehovah tọn lẹ bo gbọnmọ dali ze ogbẹ̀ etọn do alọ yetọn mẹ. Biblu dọmọ: “Be e ma yin gbọn azọ́n lẹ dali wẹ Lahabi galọtọ lọ yin lilá di dodonọ ga, to whenuena e ko yí wẹnsagun lẹ bo do gbigbọ johẹmẹ tọn hia yé bosọ do yé hlan gbonu gbọn aliho devo ji godo ya?” (Jak. 2:25, NW) Pọ́n ale he enẹ na ko hẹnwana ẹn to whenue e lẹzun apadewhe akọta wiwe Jiwheyẹwhe tọn, yèdọ mẹhe Jiwheyẹwhe yí Osẹ́n etọn do plọn to owanyi po whẹdida dodo po mẹ lẹ. Matin ayihaawe, homẹ etọn na ko hùn dọ e jo gbẹzan he e ko nọ zan dai do. E wlealọ hẹ Islaelivi de bo ji Boaz he wá lẹzun gbẹtọ jijọ dagbenọ de.—Jọṣ. 6:25; Luti 2:4-12; Mat. 1:5, 6.
4. Nawẹ Luti mọaleyi sọn nudide he e basi nado sẹ̀n Jehovah mẹ gbọn?
4 Luti Moabinu lọsu basi dide nado sẹ̀n Jehovah. To whenue e tin to ovu, e sọgan ko nọ sẹ̀n Ṣemọṣi po yẹwhe Moabi tọn devo lẹ po, ṣigba e wá yọ́n Jiwheyẹwhe nugbo lọ Jehovah, bo wlealọ hẹ Islaelivi de, he wá dín fibẹtado to otò etọn mẹ. (Hia Luti 1:1-6.) To godo mẹ, whenue Luti po Olpa po gọna asunọ yetọn Naomi zingbejizọnlin sọn Moabi jei Bẹtlẹhẹm, Naomi vẹ̀ yé omẹ awe lẹ nado lẹkọyi owhé yetọn titi lẹ gbè, na e ma na bọawuna yé nado nọ̀ Islaeli wutu. Na nugbo tọn, Olpa “gọ̀ do godo do omẹ etọn lẹ dè, podọ do yẹwhe etọn dè,” ṣigba Luti ma lẹkọ. E yinuwa sọgbe hẹ yise etọn bo yọ́n mẹhe e jlo na ze ede jo na. E dọna Naomi dọmọ: “A doalọtun mi nado jo we do blo, podọ nado lẹ́ sọn hihodo we mẹ: na fie hiẹ jei wẹ yẹn na yì; podọ fie hiẹ jẹ, wẹ yẹn na jẹ: omẹ towe lẹ wẹ na yin omẹ ṣie lẹ, Jiwheyẹwhe towe Jiwheyẹwhe ṣie.” (Luti 1:15, 16) Na Luti basi nudide nado sẹ̀n Jehovah wutu, e mọaleyi sọn awuwledainanu vonọtaun he Osẹ́n Jiwheyẹwhe tọn bẹhẹn na asuṣiọsi lẹ, wamọnọ lẹ, po mẹhe ma tindo aigba depope po lẹ mẹ. E mọ ayajẹ po hihọ́ po to awà Jehovah tọn glọ.
5. Etẹ go wẹ a doayi gando mẹhe nọ sẹ̀n Jehovah po nugbonọ-yinyin po lẹ go?
5 Vlavo hiẹ sọgan yọ́n mẹdelẹ he ko klan yede do wiwe bo to Jehovah sẹ̀n po nugbonọ-yinyin po na owhe susu. Kanse yé nado dọ ale he yé ko mọyi sọn Jiwheyẹwhe sinsẹ̀n mẹ. Dile etlẹ yindọ mẹde ma nọma tindo nuhahun, kunnude dolido lẹ nọgodona hogbe psalm-kàntọ lọ tọn lẹ dọmọ: ‘Ayajẹnọ wẹ mẹhe Jiwheyẹwhe yetọn yin Jehovah.’—Ps. 144:15.
Jehovah Nọ Yin Lẹnpọn Dagbenọ Gando Nubiọtomẹsi Etọn lẹ Go
6. Naegbọn mí ma dona dibu dọ mí ma na penugo nado wà nuhe Jehovah nọ biọ to mí si lẹ?
6 Hiẹ sọgan ko kanse dewe eyin a na penugo nado wà nuhe Jehovah biọ to asi we lẹ. E bọawu nado tindo numọtolanmẹ lọ dọ mí ma na penugo nado lẹzun devizọnwatọ Jiwheyẹwhe tọn bo nọgbẹ̀ sọgbe hẹ osẹ́n etọn bosọ lá oyín etọn. Di apajlẹ, Mose mọdọ emi ma penugo to whenue e yin didohlan nado dọhona Islaelivi lẹ podọ na ahọlu Egipti tọn. Ṣigba e ma yin nuhe zẹ̀ nugopipe Mose tọn go wẹ Jiwheyẹwhe biọ to e si gba. Jehovah ‘plọn ẹn nuhe e na wà.’ (Hia Eksọdusi 3:11; 4:1, 10, 13-15.) Na Mose kẹalọyi alọgọ Jiwheyẹwhe tọn wutu, e duvivi ayajẹ he nọ wá sọn ojlo Jiwheyẹwhe tọn wiwà mẹ tọn. Mọdopolọ Jehovah ma nọ biọ nuhe zẹ̀ nugopipe mítọn go lẹ to mí si gba. E yọnẹn dọ mapenọ wẹ mí, podọ e nọ jlo nado gọalọna mí. (Ps. 103:14) Taidi hodotọ Jesu tọn lẹ, Jiwheyẹwhe sinsẹ̀n na yin kọfanamẹnu de na mí kakati nido yin nuhe na hú agbọ́ mí, na gbẹzan mọnkọtọn nọ hẹn ale wá na mẹdevo lẹ bo nọ hẹn homẹ Jehovah tọn hùn. Jesu dọmọ: “Mì wá dè e, . . . yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn.”—Mat. 11:28, 29, NW.
7. Naegbọn hiẹ sọgan deji dọ Jehovah na gọalọna we nado wà nuhe e biọ to asi we lẹ?
7 Dile e na dẹnsọ bọ mí na dejido huhlọn Jehovah tọn go, ewọ na nọ wleawu tuli he mí tindo nuhudo etọn. Di apajlẹ, e họnwun dọ Jelemia nọ whleawu nado dọho. Enẹwutu, to whenue Jehovah deazọ́nna Jelemia nado yin yẹwhegán Etọn, e dọmọ: “Jé, Oklunọ JIWHEYẸWHE! doayi e go, yẹn ma sọgan dọho: na yẹn yin yọpọvu wutu.” To nukọn mẹ, e tlẹ sọ dọmọ: ‘Yẹn ma na dọho to oyín etọn mẹ ba.’ (Jel. 1:6; 20:9) Etomọṣo, po tulinamẹ Jehovah tọn po, Jelemia penugo nado lá owẹ̀n he mẹsusu ma yiwanna lọ na owhe 40. Whlasusu wẹ Jehovah vọ́ jide na ẹn po hogbe ehelẹ po dọmọ: “Yẹn tin dè we nado whlẹn we.”—Jel. 1:8, 19; 15:20.
8. Nawẹ mí nọ dohia dọ mí dejido Jehovah go gbọn?
8 Dile Jehovah na huhlọn Mose po Jelemia po do, e sọgan gọalọna mílọsu nado wà nuhe e nọ biọ to Klistiani lẹ si to egbehe. Onú titengbe lọ wẹ nado ganjẹ Jiwheyẹwhe go. Biblu dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọnẹn to aliho towe lẹpo ji, ewọ nasọ jlọ omọ́ towe.” (Howh. 3:5, 6) Eyin mí nọ yí alọgọ he Jehovah nọ wleawuna gbọn Ohó etọn po agun etọn po gblamẹ zan ganji, enẹ na dohia dọ mí dejido ewọ go. Eyin mí nọ dike Jehovah ni deanana afọdide mítọn lẹ, nudepope ma na glọnalina mí nado yin nugbonọ na ẹn.
Jehovah Nọ Penukundo Omẹ Etọn lẹ Dopodopo Go
9, 10. Hihọ́ nankọ wẹ Psalm 91tọ dopagbe etọn na mí?
9 Whenue mẹdelẹ to nulẹnpọndo nudide lọ nado basi klandowiwe na Jehovah ji, yé sọgan nọ dibu dọ eyin emi wá wà ylando, Jehovah ma na yí nukundagbe do pọ́n emi, bọ enẹ na zọ́n bọ e na gbẹ́ emi dai. Mí dopẹ́ dọ Jehovah nọ wleawu nuhe mí tindo nuhudo etọn lẹpo tọn, na mí nido sọgan basi hihọ́na haṣinṣan họakuẹ he mí tindo hẹ ẹ. Mì gbọ mí ni pọ́n lehe Psalm 91tọ basi zẹẹmẹ etọn do.
10 Psalm enẹ bẹjẹeji dọmọ: “Ewọ he sinai to fiwhiwhlá Gigogán tọn mẹ na nọ nọ̀ oyẹ̀ Ganhunupo tọn glọ. Yẹn na dọ gbọn OKLUNỌ tọn dali, ewọ wẹ fibẹtado ṣie podọ figángán ṣie: Jiwheyẹwhe ṣie; ewọ go wẹ yẹn na dotudo. Na e na de we sọn omọ̀ hẹhùtọ tọn mẹ.” (Ps. 91:1-3) Doayi e go dọ Jiwheyẹwhe dopagbe nado basi hihọ́na mẹhe yiwanna ẹn bosọ dejido ewọ go lẹ. (Hia Psalm 91:9, 14.) Hihọ́ nankọ hodọ wẹ e te? Jehovah basi hihọ́na delẹ to devizọnwatọ hohowhenu tọn etọn lẹ mẹ to agbasa-liho. E wàmọ to ninọmẹ delẹ mẹ nado basi hihọ́na hukan whẹndo he mẹ Mẹssia dopagbe lọ wá sọn tọn. Etomọṣo, sunnu nugbonọ susu wẹ yin wiwle do gànmẹ, yin yasana, bo yin hùhù to aliho ylankan mẹ nado hẹn yé ma nado yin nugbonọ na Jiwheyẹwhe. (Heb. 11:34-39) Yé mọ tulinamẹ he jẹ yí nado doakọnnanu na Jehovah basi hihọ́na yé to gbigbọ-liho na yé nikaa hẹn tenọgli yetọn bu. Enẹwutu, mí sọgan pọ́n Psalm 91tọ taidi opagbe hihọ́-basinamẹ gbigbọmẹ tọn de.
11. Etẹwẹ “fiwhiwhlá Gigogán tọn” nọtena podọ mẹnu lẹ wẹ Jiwheyẹwhe nọ basi hihọ́na to finẹ?
11 Gbọnmọ dali, “fiwhiwhlá Gigogán tọn” he go psalm-kàntọ lọ donù yin nọtẹn hihọ́-basinamẹ gbigbọmẹ tọn de. Mẹhe wá dín fibẹtado to e mẹ lẹ nọ yin hihọ́-basina sọn nudepope kavi mẹdepope he sọgan ze yise po owanyi he yé tindo na Jiwheyẹwhe po do owù mẹ lẹ si. (Ps. 15:1, 2; 121:5) E yin fiwhiwhlá de, na mayisenọ lẹ ma sọgan doayi e go wutu. To finẹ, Jehovah nọ basi hihọ́na mẹdepope he dọ to linlẹn de mẹ dọmọ: ‘Hiẹ wẹ Jiwheyẹwhe ṣie; mẹhe go yẹn na dotudo.’ Eyin mí gbọṣi fiwhiwhlá enẹ, mí ma dona dibu dọ mí na jai jẹ omọ̀ Satani, “hẹhùtọ” lọ tọn mẹ, bo hẹn nukundagbe Jiwheyẹwhe tọn bu gba.
12. Etẹlẹ wẹ nọ ze haṣinṣan mítọn hẹ Jiwheyẹwhe do owù mẹ?
12 Etẹlẹ wẹ nọ ze haṣinṣan họakuẹ he mí tindo hẹ Jiwheyẹwhe do owù mẹ? Psalm-kàntọ lọ donù owù susu go he delẹ to yé mẹ yin “azọ̀nylankan he to zọnlinzin to zinvlu mẹ, . . . [podọ] husudo he to mẹvà to klekle.” (Ps. 91:5, 6) “Hẹhùtọ” lọ ko yí ojlo ṣejannabi tọn he mẹsusu nọ tindo na mẹdekannujẹ zan nado domọwle yé. (2 Kọl. 11:3) E nọ wle mẹdelẹ gbọn nukunkẹn, goyiyi, po ojlo agbasanu lẹ tọn zizedonukọnna yé po dali. Ṣigba na mẹdevo lẹ, e nọ yí tamẹnuplọnmẹ lẹ taidi owanyi na akọta mẹtọn, nuplọnmẹ nulẹ tin yededenu tọn, po sinsẹ̀n lalo po zan nado klọ yé. (Kọl. 2:8) Podọ mẹsusu ko yin kiklọ biọ omọ̀ zanhẹmẹ he ma sọgbe tọn mẹ. Azọ̀nylankan gbigbọmẹ tọn mọnkọtọn lẹ ko zọ́n bọ owanyi he gbẹtọ livi susu tindo na Jiwheyẹwhe ko miọn.—Hia Psalm 91:7-10; Mat. 24:12.
Lehe Hiẹ Sọgan Hẹn Owanyi Towe Na Jiwheyẹwhe Go Gbọn
13. Nawẹ Jehovah nọ basi hihọ́na mí sọn owù gbigbọmẹ tọn lẹ si gbọn?
13 Nawẹ Jehovah nọ basi hihọ́na omẹ etọn lẹ sọn owù gbigbọmẹ tọn ehelẹ si gbọn? Psalm lọ dọmọ: “E na naṣẹ angẹli etọn lẹ to jiwe nado whlá we to aliho towe lẹpo ji.” (Ps. 91:11) Angẹli olọn mẹ tọn lẹ nọ deanana mí bo nọ basi hihọ́na mí na mí nido sọgan lá wẹndagbe lọ. (Osọ. 14:6) Gbọnvona angẹli lẹ, mẹho agun tọn lẹ lọsu nọ basi hihọ́na mí ma nado yin kiklọ gbọn linlẹn agọ̀ lẹ dali, na yé nọ tẹdo Owe-wiwe go gligli to mẹpinplọn yetọn lẹ mẹ wutu. Yé sọgan gọalọna mẹdepope he to vivẹnudo nado duto walọ aihọn tọn lẹ ji. (Titu 1:9; 1 Pita 5:2) Gbọnvona enẹ, “afanumẹ nugbonọ podọ nuyọnẹntọ lọ” nọ wleawuna núdùdù gbigbọmẹ tọn nado basi hihọ́na mí sọn nuplọnmẹ nulẹ tin yededenu tọn, ojlo mawé lẹ, afọdidona agbasanu lẹ po yindidi po, gọna ojlo po nuyiwadomẹji agọ̀ devo lẹ po si. (Mat. 24:45, NW) Etẹwẹ ko gọalọna we nado duto delẹ to owù enẹlẹ mẹ ji?
14. Etẹwẹ mí sọgan wà nado duvivi hihọ́-basinamẹ Jiwheyẹwhe tọn?
14 Etẹwẹ mí dona wà nado gbọṣi “fiwhiwhlá” hihọ́-basinamẹ Jiwheyẹwhe tọn mẹ? Kẹdẹdile mí nọ basi hihọ́na mídelẹ to whepoponu sọn owù agbasa tọn lẹ taidi asidan, sẹ́nhẹngbatọ lẹ, kavi awutu si do, mọdopolọ, mí dona nọ yinuwa to whepoponu nado basi hihọ́na mídelẹ sọn owù gbigbọmẹ tọn lẹ si. Enẹwutu, mí ma dona dike anademẹ he Jehovah nọ wleawu etọn to owe mítọn lẹ mẹ, to opli agun tọn lẹ po plidopọ mítọn lẹ po ji ni gbọ mí go. Mí nọ dín ayinamẹ sọn mẹho lẹ si. Podọ be mí ma nọ duvivi jẹhẹnu voovo he mẹmẹsunnu po mẹmẹyọnnu Klistiani mítọn lẹ po nọ dohia tọn ya? Na nugbo tọn, awukinkọndopọ hẹ agun nọ gọalọna mí nado lẹzun nuyọnẹntọ.—Howh. 13:20; hia 1 Pita 4:10.
15. Naegbọn hiẹ sọgan deji dọ Jehovah na basi hihọ́na we sọn nudepope he na zọ́n bọ a na hẹn nukundagbe etọn bu si?
15 Whẹwhinwhẹ́n depope ma tin nado tindo ayihaawe dọ Jehovah na basi hihọ́na mí sọn nudepope he na zọ́n bọ mí na hẹn nukundagbe etọn bu si. (Lom. 8:38, 39) E ko basi hihọ́na agun lọ sọn sinsẹ̀n po tonudidọ he yin kẹntọ mítọn lẹ po si, ehe yanwle yetọn ma yin nado hù mí, ṣigba nado klan mí sọn Jiwheyẹwhe wiwe mítọn go. Opagbe Jehovah tọn ko mọ hẹndi dọmọ: “Avùnhonu depope he yè jlẹ do gowe ma na wà nude.”—Isa. 54:17.
Mẹnu Wẹ Nọ Na Mí Mẹdekannujẹ?
16. Naegbọn aihọn ma sọgan na mí mẹdekannujẹ?
16 Eyin mí lẹzun Jehovah tọn, be enẹ na zọ́n bọ mí ma na tindo mẹdekannujẹ ba wẹ ya? Paali. Kakatimọ, eyin mí yin aihọn tọn, enẹ nọ hò mẹdekannujẹ mítọn yí. Aihọn lọ ko jẹla sọn Jehovah dè podọ yẹwhe kanylantọ he nọ wle gbẹtọvi lẹ do kanlinmọgbenu wẹ to gandu do e ji. (Joh. 14:30) Di apajlẹ, titonu Satani tọn nọ yí yanwle akuẹ tọn zan nado hò mẹdekannujẹ yí sọn gbẹtọ lẹ si. (Yijlẹdo Osọhia 13:16, 17 go.) Ylando lọsu tindo huhlọn nado hẹn gbẹtọ lẹ zun afanumẹ etọn. (Joh. 8:34; Heb. 3:13) Enẹwutu, dile etlẹ yindọ mayisenọ lẹ sọgan dopà mẹdekannujẹ tọn na mẹdevo lẹ to whenue yé to gbẹzan he jẹagọdo nuplọnmẹ Jehovah tọn lẹ zan, mẹdepope he dotoaina yé na yawu mọ ede to kanlinmọgbenu ylando po gbẹzan gblezọn po tọn.—Lom. 1:24-32.
17. Mẹdekannujẹ tẹwẹ Jehovah nọ na mí?
17 To alọ devo mẹ, Jehovah na hẹn mí jẹ mẹdekannu sọn nudepope he sọgan gbleawuna mí lẹ si eyin mí ze míde jo na ẹn. To linlẹn de mẹ, ninọmẹ mítọn taidi mẹhe ze ogbẹ̀ etọn do alọmẹ na doto-mẹzẹtọ azọ́nyọnẹntọ de he sọgan whlẹn ẹn sọn azọ̀n sinsinyẹn de si. Mímẹpo wẹ tin to ninọmẹ sinsinyẹn mọnkọtọn de mẹ—enẹ wẹ ylando he mí dugu etọn. Kiki eyin mí ze míde jo na Jehovah to dodonu avọ́sinsan Klisti tọn ji wẹ mí sọgan tindo todido nado yin tuntundote sọn nuyiwadomẹji ylando tọn si bo nọgbẹ̀ kakadoi. (Joh. 3:36) Kẹdẹdile mí nọ vọ́ jide tindo to doto-mẹzẹtọ de mẹ dile mí to sisè dogbọn azọ́nyinyọnẹn etọn dali do, mọdopolọ, dile mí to nuplọn gando Jehovah go, enẹ nọ vọ́ jide na mí gando ewọ go dogọ. Enẹwutu, mí nọ zindonukọn nado to Ohó Jiwheyẹwhe tọn plọn po sọwhiwhe po, na enẹ na gọalọna mí nado yiwanna ẹn sọmọ bọ mí ma nasọ dibu nado yin etọn ba.—1 Joh. 4:18.
18. Ale tẹwẹ mẹhe lẹzun Jehovah tọn lẹ nọ mọyi?
18 Gbẹtọvi lẹpo wẹ Jehovah na nudide mẹdekannujẹ tọn. Ohó etọn dọmọ: ‘De ogbẹ̀, na hiẹ nido gán, hiẹ po okún towe po: Nado nọ yiwanna OKLUNỌ lọ Jiwheyẹwhe towe.’ (Deut. 30:19, 20) E jlo dọ mí ni dohia dọ mí yiwanna emi gbọn dide sọn ojlo mẹ wá nado sẹ̀n ẹn dali. Na nugbo tọn, eyin mí lẹzun Jiwheyẹwhe he mí yiwanna lọ tọn, enẹ na hẹn ayajẹ wá na mí kakati nido hò mẹdekannujẹ mítọn yí.
19. Naegbọn e do yin nukundagbe majẹhẹ nado lẹzun Jehovah tọn?
19 Na mí yin ylandonọ wutu, mí ma jẹ nado yin Jiwheyẹwhe pipé lọ tọn. Nukundagbe majẹhẹ Jiwheyẹwhe tọn kẹdẹ wẹ hẹn enẹ yọnbasi. (2 Tim. 1:9) Abajọ Paulu wlan dọmọ: “Eyin mí to ogbẹ̀, mí to ogbẹ̀ na Jehovah, podọ eyin mí kú, mí kú na Jehovah. Enẹwutu, eyin mí to ogbẹ̀ podọ eyin mí kú, Jehovah tọn wẹ mí yin.” (Lom. 14:8, NW) Matin ayihaawe, e ma na vẹna mí gbede dọ mí basi nudide nado lẹzun Jehovah tọn.
Nawẹ Hiẹ Na Na Gblọndo Gbọn?
• Ale tẹlẹ wẹ mí nọ mọyi eyin mí lẹzun Jehovah tọn?
• Naegbọn mí sọgan wà nuhe Jiwheyẹwhe biọ to mí si lẹ?
• Nawẹ Jehovah nọ wleawuna hihọ́ na omẹ etọn lẹ gbọn?
[Kanbiọ Oplọn tọn lẹ]
[Yẹdide to weda 8]
Kanse mẹdevo lẹ nado dọ ale he yé ko mọyi na yé lẹzun Jehovah tọn wutu
[Yẹdide to weda 10]
Etẹwẹ yin delẹ to aliho he mẹ Jehovah nọ wleawuna hihọ́ na mí te lẹ mẹ?