Hẹn Dolilo Gbigbọmẹ Tọn Go Dile A to Nukunpedo Hẹnnumẹ He to Azọ̀njẹ de Go

TO WHENUENA nútitẹ̀ de yin mimọ sẹpọ nẹgbehú Kim he yin Kunnudetọ de tọn godo, doto lẹ basi dodinnanu bo mọdọ e to azọ̀n kansẹẹ tọn jẹ. a Steve he yin asu Kim tọn dọmọ: “Tlolo he doto lẹ wazọ́n mẹzizẹ tọn na ẹn bo de nútitẹ̀ lọ sẹ̀, Kim mọ nukunpedomẹgo dotowhé tọn he yin radiothérapie po chimiothérapie po yí sọn ojlẹ de mẹ jẹ devo mẹ. Nukunpedomẹgo lọ zọ́n bọ kanmẹ etọn ma ló sọmọ ba. E ma tindo nugopipe nado nọ basi yidọn-yide lẹ ba.”

Be a sọgan yí nukun homẹ tọn do pọ́n nuhe na ko yin numọtolanmẹ Steve tọn dile e to alọwlemẹ yiwanna etọn mọ to awufiẹsa mẹ na azọ̀nylankan he jẹ e te wutu ya? Vlavo hiẹ tindo hẹnnumẹ sẹpọmẹ de he to awufiẹsa mẹ na azọ̀nylankan de kavi na nuyiwadomẹji mẹhowhe tọn lẹ wutu. (Yẹwh. 12:1-7) Eyin mọ wẹ, hiẹ lọsu yọnẹn dọ nado sọgan penukundo mẹyiwanna towe go ganji, a dona penukundo dewe go. Eyin nuṣikọna we to gbigbọ-liho, a sọgan jiya to numọtolanmẹ-liho podọ to agbasa-liho bo sọgan nọma penugo nado wleawuna nuhe hagbẹ whẹndo towe tọn tindo nuhudo etọn lẹ. Nawẹ hiẹ sọgan hẹn jlẹkajininọ go to gbigbọ-liho dile a to nukunpedo hagbẹ whẹndo tọn he to azọ̀njẹ kavi yin mẹhomẹ de go gbọn? Be nude tin he hagbẹ agun Klistiani tọn lẹ sọgan wà nado do mẹtọnhopọn hia awutunọ mọnkọtọn lẹ ya?

Lehe Hiẹ Sọgan Hẹn Jlẹkajininọ Go Do

Eyin hiẹ na hẹn jlẹkajininọ go to gbigbọ-liho podọ to agbasa-liho dile a to nukunpedo hagbẹ whẹndo tọn he to azọ̀njẹ de go, a dona nọ diọada bo nọ basi titona whenu towe bosọ nọ zan huhlọn po nuyọnẹn po. “Nuyọnẹn tin to whiwhẹnọ dè,” wẹ Howhinwhẹn lẹ 11:2 dọ. To whẹho ehe mẹ hogbe lọ “whiwhẹnọ” zẹẹmẹdo nado yọ́n dogbó mẹdetiti tọn. Nado hẹn ẹn diun dọ a ma na zan dewe zẹjlẹgo, a dona gbadopọnna tito towe po azọngban towe lẹ po.

 Steve yí nuyọnẹn po whiwhẹ po zan gbọn dogbigbapọnna nuhe e nọ wà lẹ dali. Gbọnvona agbasazọ́n etọn, e to sinsẹ̀n taidi anadenanutọ to pipli mẹho lẹ tọn mẹ podọ nugopọntọ sinsẹ̀nzọn tọn to agun Kunnudetọ Jehovah tọn lẹ tọn de mẹ to Irlande. E sọ yin dopo to hagbẹ Wedegbẹ́ Whẹgbọtọ Dotowhé tọn lẹ mẹ to lẹdo etọn mẹ. Steve dọmọ: “Kim ma wule gbede dọ n’to vọdona emi bo to ayidonugo na azọngban ṣie lẹ zẹjlẹgo gba. Ṣigba yẹnlọsu yọnẹn dọ n’to dee zan zẹjlẹgo.” Nawẹ Steve didẹ ninọmẹ lọ gbọn? E dọmọ: “To whenuena n’gbadopọnna whẹho lọ po odẹ̀ po godo, n’basi dide nado jo azọngban anadenanutọ tọn do. N’zindonukọn nado to sinsẹ̀n taidi mẹho, ṣigba na n’ze delẹ to azọngban agun tọn ṣie lẹ mẹ jo na mẹdevo lẹ wutu, n’penugo nado yí whenu zan na Kim bo na ẹn ayidonugo he e tindo nuhudo etọn.”

Dile ojlẹ to yìyì, Kim wá jẹgangan. Steve po Kim po vọ́ nulẹnpọndo ninọmẹ yetọn ji, podọ po godonọnamẹ asi etọn tọn po, Steve penugo nado gọ̀ azọngban agun tọn etọn lẹ yí. Steve basi zẹẹmẹ dọmọ: “Mí omẹ awe lẹ plọn nado nọ wazọ́n jẹ obá he mẹ azọ̀n lọ na mí dotẹnmẹ jẹ. N’dopẹ́ na Jehovah taun na alọgọ etọn podọ na asi ṣie na e nọgodona mi matin lewuwu dile etlẹ yindọ e to azọ̀njẹ.”

Sọ lẹnnupọndo numimọ Jerry he yin nugopọntọ tomẹyitọ de po asi etọn Maria po tọn ji.  Yé dona diọadana yanwle yetọn nado sọgan penukundo mẹjitọ mẹhomẹ yetọn lẹ go. Maria dọmọ: “Yẹn po asu ṣie po tindo yanwle nado sẹ̀n taidi mẹdehlan to tògodo. Ṣigba Jerry wẹ ovi dopo gee he mẹjitọ etọn lẹ tindo, podọ yé tindo nuhudo nukunpedomẹgo tọn. Enẹwutu, mí basi dide nado gbọṣi Irlande nado penukundo yé go. Gbọnmọ dali, mí penugo nado tin po otọ́ Jerry tọn po to ojlẹ lẹpo mẹ he e yin ginglọndo dotowhé jẹnukọnna okú etọn. Todin mí nọ dọho hẹ onọ̀ Jerry tọn egbesọegbesọ, podọ fihe mí te ma dẹn nado yì e dè eyin e tindo nuhudo alọgọ tọn. Agun he onọ̀ Jerry tọn to awukọndopọ hẹ gọalọ bo nọgodona mí taun, ehe hẹn mí penugo nado zindonukọn to azọ́n nugopọntọ tọn mẹ.”

Nuhe Mẹdevo lẹ Sọgan Wà Nado Gọalọ

To whenuena apọsteli Paulu to hodọdo nuhe hagbẹ agun tọn lẹ wà nado penukundo asuṣiọsi mẹhomẹ lẹ go to agbasa-liho ji, e wlan dọmọ: “Eyin mẹdepope ma wleawudaina mẹhe yin etọn titi lẹ, podọ titengbe na mẹhe yin hagbẹ whédo etọn tọn lẹ, ewọ ko mọ́n yise lọ bosọ ylanhu mayisenọ.” Paulu flin Klistiani hatọ lẹ dọ eyin nuyiwa yetọn na yin “alọkẹyi to nukun Jiwheyẹwhe tọn mẹ,” yé dona penukundo mẹjitọ, babadaho po onọ̀-daho yetọn he yin mẹhomẹ lẹ po go to akuẹzinzan-liho. (1 Tim. 5:4, 8) Ṣigba, mẹdevo lẹ to agun lọ mẹ sọgan gọalọ podọ yé dona wàmọ.

Doayi ninọmẹ Hakan po Inger po tọn go, yèdọ asu po asi po mẹhomẹ de he nọ nọ̀ otò Suède tọn mẹ. Hakan dọmọ: “Whenuena doto lẹ mọdọ asi ṣie bẹ azọ̀n kansẹẹ tọn, e gbàhundona mí. Inger yin mẹde he tindo huhlọn bo ma nọ yawu jẹazọ̀n. Ṣigba todin, mí dona nọ yì dotowhé egbesọegbesọ na nukunpedomẹgo, podọ amasin he e nọ zan lẹ nọ kú kanmẹ na ẹn. Inger ma sọgan nọ yì fide to ojlẹ ehe mẹ, podọ n’dona nọ nọ̀ e dè nado penukundo e go.” Nawẹ agun lọ gọalọna Hakan po Inger po gbọn?

Mẹho lẹ basi tito na alọwlemẹ lọ lẹ nido sọgan nọ dotoaina opli agun tọn lẹ gbọn alokan ji. Humọ, mẹmẹsunnu po mẹmẹyọnnu lẹ po nọ kàn linlin yetọn sè gbọn dlapọn bibasi na yé po kàntitẹ hlan yé po dali. Yé sọ nọ kanwehlan yé bo nọ do kalti nudọdomẹ tọn hlan yé. Hakan dọmọ: “Mí mọ alọgọ Jehovah tọn po godonọnamẹ mẹmẹsunnu lẹpo po tọn. Ayidonugo he yé na mí wẹ gọalọna mí taun nado hẹn dolilo gbigbọmẹ tọn go. Mí dopẹ́ dọ Inger ko jẹgangan, podọ whladopo dogọ mí penugo nado nọ yì opli Klistiani tọn lẹ to Plitẹnhọ Ahọluduta tọn mẹ.” To whenuena hagbẹ agun tọn lẹ wà nuhe go yé pé nado gọalọna mẹhe to azọ̀njẹ po mẹhomẹ he to ṣẹnṣẹn yetọn lẹ po, yé nọ do yede hia nado yin ‘họntọn he nọ yiwannamẹ to whepoponu, podọ mẹmẹsunnu he yè ji na ojlẹ ayimajai tọn.’—Howh. 17:17.

Jehovah Yọ́n Pinpẹn Vivẹnudido Towe lẹ Tọn

E họnwun dọ nukunpipedo hagbẹ whẹndo tọn awutunọ de go sọgan hẹn nuṣikọnamẹ. Ṣigba, Ahọlu Davidi wlan dọmọ: “Donanọ wẹ yé he to madogánnọ lẹ tọn lẹnpọn,” enẹ wẹ mẹhe tin to nuhudo mẹ na azọ̀njijẹ wutu lẹ.—Ps. 41:1.

Naegbọn mẹhe nọ penukundo awutunọ kavi mẹhe to awufiẹsa mẹ lẹ go sọgan yin ayajẹnọ? Howhinwhẹn lẹ 19:17 dọmọ: “Ewọ he wàlẹblanuna wamọnọ, OKLUNỌ wẹ e yàn na: onú he e wà e nasọ suahọ etọn ẹn.” Jiwheyẹwhe nugbo lọ tindo ojlo vonọtaun de to devizọnwatọ nugbonọ etọn he to oyà manọna tọn ji lẹ mẹ, podọ e nọ dona mẹhe wàlẹblanuna yé lẹ. Psalm-kàntọ Davidi jihàn dọmọ: “OKLUNỌ na hẹn [omẹ mọnkọtọn] go to azọ̀nzan etọn ji: hiẹ sọ diọ adọzan etọn lẹpo to azọ̀n etọn whenu.” (Ps. 41:3) Mí sọgan deji dọ eyin mẹhe to mẹtọnhopọn owanyinọ dohia lọ lọsu pehẹ ninọmẹ sinsinyẹn kavi nugbajẹmẹji de, Jehovah na gọalọna ẹn.

Lehe e yin ayajẹnu nado yọnẹn dọ Jehovah Jiwheyẹwhe nọ doayi nuhe wà mí te nado penukundo hagbẹ whẹndo mítọn tọn he to azọ̀njẹ lẹ go bọ e sọ nọ hẹn homẹ etọn hùn do sọ! Dile etlẹ yindọ nado gọalọ to aliho mọnkọtọn mẹ nọ biọ vivẹnudido to mí si, Owe-wiwe na mí jide dọ “avọ́sinsan mọnkọtọn lẹ go wẹ homẹ Jiwheyẹwhe tọn nọ hùn do taun.”—Heb. 13:16.

[Nudọnamẹ odò tọn]

[Yẹdide to weda 18]

Hẹn jlẹkajininọ go to gbigbọ-liho bo kẹalọyi alọgọ mẹdevo lẹ tọn