Kanbiọ lẹ sọn Wehiatọ lẹ Dè

To whenuena e yindọ Jehovah jẹagọdo boṣiọ-sinsẹ̀n, naegbọn e ma sayana Aalọn to whenue e basi oyìnvu sika tọn?

To whenuena Aalọn basi oyìnvu sika tọn dile e yin kinkàndai to Eksọdusi weta 32 mẹ do, e gbà osẹ́n Jiwheyẹwhe tọn he gando boṣiọ-sinsẹ̀n go. (Eks. 20:3-5) Taidi kọdetọn de, “OKLUNỌ lọ bosọ yin adinọ do Aalọn go nado ko và ẹ: [Mose] sọ hodẹ̀ na Aalọn to ojlẹ dopolọ mẹ ga.” (Deut. 9:19, 20) Be ovẹvivẹ Mose dawe dodonọ lọ tọn tindo “huhlọn taun” to whẹho Aalọn tọn mẹ wẹ ya? (Jak. 5:16) Mọwẹ. Na ovẹvivẹ mọnkọtọn po e whè gbau whẹwhinwhẹ́n awe devo lẹ po wutu, e taidi dọ Jehovah na gblọndo odẹ̀ Mose tọn bo ma sayana Aalọn.

E yọnbasi dọ whẹwhinwhẹ́n devo wẹ kandai nugbonọ-yinyin tọn Aalọn tọn. To whenue azọ́n yin didena Mose nado yì Falo dè podọ nado de Islaelivi lẹ sọn Egipti, Jehovah de Aalọn nado hodo Mose bo yin hoyidọtọ etọn. (Eks. 4:10-16) Dawe awe ehelẹ yí nugbonọ-yinyin do yì ahọlu Egipti tọn dè whlasusu, bo doakọnna tasinsinyẹn Falo tọn. Enẹwutu, dile Aalọn gbẹ́ pò to Egipti, e wleawuna kandai sinsẹ̀nzọn nugbonọ-yinyin tọn hlan Jehovah.—Eks. 4:21.

Sọ lẹnnupọndo nujijọ he wá aimẹ whẹpo Aalọn do basi oyìnvu sika tọn lọ ji. Mose nọ Osó Sinai ji na azán 40. To “whenuena gbẹtọ lẹ lọ mọdọ Mose dẹn nado jẹte wá sọn osó lọ ji,” yé diọlinlẹnna Aalọn nado basi boṣiọ de na yé. Aalọn kọngbedopọ bo basi oyìnvu kinkọ̀n de. (Eks. 32:1-6) Ṣigba, nuyiwa Aalọn tọn to godo mẹ dohia dọ e ma yí ahun lẹpo do nọgodona boṣiọ-sinsẹ̀n mọnkọtọn. E họnwun dọ e joawuna kọgbidinamẹ wẹ. Di apajlẹ, to whenuena Mose ze afọdide godo tọn gando whẹho boṣiọ-sinsẹ̀n tọn ehe go, visunnu Levi tọn lẹpo—he mẹ Aalọn tin te—basi nudide nujikudo tọn nado nọ adà Jehovah tọn mẹ. Gbẹtọ fọtọ́n donu atọ̀n he yin tọ́ntlọ́ngbọ́n to nuyiwa boṣiọ-sinsẹ̀n tọn ehe mẹ lẹ yin hùhù.—Eks. 32:25-29.

To enẹgodo, Mose dọna gbẹtọ lọ lẹ dọmọ: “Mì ko waylando ylando daho de.” (Eks. 32:30) Enẹwutu, e ma yin Aalọn kẹdẹ wẹ hùwhẹ to ylanwiwa lọ mẹ gba. Ewọ po akọta lọ po wẹ mọaleyi sọn lẹblanu daho Jehovah tọn mẹ.

To nujijọ he gando oyìnvu sika tọn lọ go godo, Jehovah degbè dọ Aalọn ni yin dide taidi yẹwhenọ daho. Jiwheyẹwhe dọna Mose dọmọ: “Hiẹ na yí awù wiwe lẹ lọ do Aalọn ji; hiẹ bo na sá amisisa na ẹn, bo hẹn ẹn zun wiwe, na e nido wadevizọn hlan mi to azọ́nhọ yẹwhenọ tọn lọ mẹ.” (Eks. 40:12, 13) Ayihaawe matin dọ, Jehovah jona awugbopo Aalọn tọn. To ahun Aalọn tọn mẹ, e yin avùnlọyitọ nugbonọ na sinsẹ̀n-bibasi nugbo, e ma yin atẹṣitọ boṣiọ-sẹ̀ntọ de gba.