Mẹmẹsunnu lẹ—Mì Do Sọgbe hẹ Gbigbọ bo Dovivẹnu Nado Pegan Na Azọngban!
Mẹmẹsunnu lẹ—Mì Do Sọgbe hẹ Gbigbọ bo Dovivẹnu Nado Pegan Na Azọngban!
“Ewọ he to didó sọgbe hẹ gbigbọ na gbẹ̀n ogbẹ̀ madopodo.”—GAL. 6:8.
1, 2. Nawẹ Matiu 9:37, 38 to hẹndi mọyi gbọn, podọ nuhudo tẹwẹ ehe fọndote to agun lẹ mẹ?
TO EGBEHE, mí to nujijọ he ma sọgan yin winwọn gbede lẹ mọ! Azọ́n he go Jesu Klisti dọhodo lọ to nukọnzindo po awuyiya po. “Ojijẹ lọ sù, ṣigba azọ́nwatọ lẹ ma sù,” wẹ Jesu dọ. “Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.” (Mat. 9:37, 38) Jehovah Jiwheyẹwhe to gblọndo na odẹ̀ mọnkọtọn lẹ to aliho ayidego tọn de mẹ. To owhe sinsẹ̀nzọn 2009 tọn mẹ, agun yọyọ 2 031 wẹ yin didoai lẹdo aihọn pé bọ sọha agun Kunnudetọ Jehovah tọn lẹ tọn jideji jẹ 105 298. Madozẹnzẹn gbẹtọ 757 tọn wẹ nọ yí baptẹm to gbèdopo!
2 Po jideji ehe po, nuhudo mẹmẹsunnu he pegan nado yin mẹplọntọ po lẹngbọhọtọ po tọn tin to agun lẹ mẹ. (Efe. 4:11) Na owhe susu lẹ, Jehovah ko de sunnu he pegan lẹ nado penukundo nuhudo lẹngbọ etọn lẹ tọn go, podọ mí deji dọ e na to mọwà zọnmii. Dọdai he tin to Mika 5:5 mẹ hẹn mí deji dọ to azán godo tọn lẹ mẹ, omẹ Jehovah tọn lẹ na tindo “lẹngbọhọtọ ṣinawe” po “ahọvi ṣinatọ̀n” po, he nọtena sunnu nugopetọ susu he na yin anadenanutọ to ṣẹnṣẹn yetọn.
3. Etẹwẹ e zẹẹmẹdo nado ‘do sọgbe hẹ gbigbọ’?
3 Eyin sunnu Kunnudetọ Jehovah tọn he ko yí baptẹm de wẹ hiẹ yin, etẹwẹ sọgan gọalọna we nado wleawuna ojlo lọ nado dovivẹnu bo pegan na lẹblanulọkẹyi sinsẹ̀nzọn tọn lẹ? Onú titengbe dopo wẹ yindọ a ni ‘do sọgbe hẹ gbigbọ.’ (Gal. 6:8) Mọwiwà zẹẹmẹdo gbẹninọ to aliho de mẹ he na dike gbigbọ wiwe Jiwheyẹwhe tọn ni yinuwa po awubibọ po to gbẹzan towe mẹ. Magbe ma nado ‘do sọgbe hẹ agbasalan.’ Ma dike gbẹzan fẹẹmẹninọ tọn po ayidedai po ni dekanpona ojlo towe nado yí dewe zan to sinsẹ̀nzọn Jiwheyẹwhe tọn mẹ blo. Klistiani lẹpo wẹ dona ‘do sọgbe hẹ gbigbọ,’ podọ dile ojlẹ to yìyì, e yọnbasi dọ sunnu he to mọwà lẹ na pegan na lẹblanulọkẹyi lẹ to agun mẹ. Na nuhudo devizọnwatọ lizọnyizọnwiwa tọn lẹ po mẹho agun tọn lẹ po tọn tin taun to egbehe wutu, hosọ ehe yin awuwlena titengbe na sunnu Klistiani lẹ. Enẹwutu, mẹmẹsunnu lẹ emi, mí dotuhomẹna mì nado gbadopọnna hosọ ehe po odẹ̀ po.
Dovivẹnu Na Azọ́n Dagbe De
4, 5. (a) Lẹblanulọkẹyi tẹlẹ wẹ sunnu he ko yí baptẹm lẹ yin tudohomẹna nado dovivẹnu bo pegan na to agun mẹ? (b) Nawẹ mẹde sọgan dovivẹnu bo pegan na azọngban gbọn?
4 Sunnu Klistiani de ma nọ lẹzun nugopọntọ domọ poun gba. E dona dovivẹnu na “azọ́n dagbe” ehe. (1 Tim. 3:1) Mọwiwà bẹ devizọnwiwa do ota yisenọ hatọ lẹ tọn mẹ hẹn gbọn ahundopo yíyí do penukundo nuhudo yetọn lẹ go dali. (Hia Isaia 32:1, 2.) Eyin sunnu de yí mẹwhinwhàn dagbe do to vivẹnudo nado pegan na azọngban, be e ma yin ojlo zogbenọ. Kakatimọ, ojlo ṣejannabi matindo tọn wẹ to whinwhàn ẹn nado wà nuhe na hẹn ale wá na mẹdevo lẹ.
5 Sunnu he jlo nado pegan taidi devizọnwatọ lizọnyizọnwiwa tọn bo nasọ dovivẹnu na azọ́ntẹn nugopọntọ tọn dona tẹnpọn nado jẹ nubiọtomẹsi Owe-wiwe tọn lẹ kọ̀n. (1 Tim. 3:1-10, 12, 13; Titu 1:5-9) Eyin sunnu he ko klan ede do wiwe de wẹ hiẹ yin, kanse dewe dọ: ‘Be n’nọ tindo mahẹ gigọ́ to azọ́n yẹwhehodidọ tọn mẹ bosọ nọ gọalọna mẹdevo lẹ nado wàmọ ya? Be n’nọ jlọ sinsẹ̀n-basitọ hatọ ṣie lẹ dote gbọn ojlo nujọnu tọn tintindo to dagbemẹninọ yetọn mẹ dali ya? Be n’tindo aṣa lọ nado nọ plọn Ohó Jiwheyẹwhe tọn po sọwhiwhe po ya? Be n’nọ hẹn gblọndo ṣie lẹ pọnte dogọ ya? Be n’nọ penukundo azọngban he mẹho agun tọn lẹ zedo alọmẹ na mi lẹ go ganji ya? (2 Tim. 4:5) E jẹ dọ hiẹ ni yí sọwhiwhe do lẹnnupọndo kanbiọ ehelẹ ji.
6. Etẹwẹ yin onú titengbe he nọ hẹn mẹde pegan na azọngban lẹ to agun mẹ?
6 Aliho devo nado pegan na azọngban to agun mẹ wẹ nado ‘hẹn gbẹtọ he hiẹ yin to homẹ zun hlọnhlọnnọ gbọn huhlọn gbigbọ Jiwheyẹwhe tọn gblamẹ.’ (Efe. 3:16) Nado lẹzun devizọnwatọ lizọnyizọnwiwa tọn kavi mẹho to agun Klistiani tọn mẹ ma zẹẹmẹdo nado yin dide poun do otẹn azọngban tọn mẹ gba. Nukọnyiyi gbigbọmẹ tọn wẹ nọ hẹn mẹde nado jẹ lẹblanulọkẹyi ehe kọ̀n. Nawẹ mẹde nọ yinukọn to gbigbọ-liho gbọn? Aliho dopo wẹ nado “to zọnlinzin gbọn gbigbọ dali” bo wleawuna sinsẹ́n etọn. (Gal. 5:16, 22, 23) Dile hiẹ to awuwlena jẹhẹnu gbigbọmẹ tọn he na hẹn we penugo nado kẹalọyi azọngban susu lẹ dogọ, podọ dile a to ayinamẹ lẹ yí do yizan mẹ nado yinukọn to gbigbọ-liho, ‘nukọnyiyi towe na họnwun na gbẹtọ lẹpo.’—1 Tim. 4:15.
E Biọ Gbigbọ Mẹde-Yido-Sanvọ́ Tọn
7. Etẹwẹ devizọnwiwa do mẹdevo lẹ tamẹ bẹhẹn?
7 Devizọnwiwa do mẹdevo lẹ tamẹ nọ bẹ azọ́n sinsinyẹn wiwà po gbigbọ mẹde-yido-sanvọ́ tọn po hẹn. Na Klistiani nugopọntọ lẹ yin lẹngbọhọtọ gbigbọmẹ tọn lẹ wutu, nuhahun apó lọ tọn lẹ nọ duahunmẹna yé sisosiso. Doayi lehe lẹblanulọkẹyi he Paulu tindo nado penukundo apó lọ go yinuwado e ji do go. E dọna yisenọ hatọ he tin to Kọlinti lẹ dọmọ: “To nukunbibia susu po awufiẹsa ahun mẹ tọn po mẹ wẹ yẹn kanwe ehe hlan mì po dasin susu po, e ma yin nado hẹn mì blawu gba, ṣigba, na taun tọn, dọ mì nido sọgan yọ́n owanyi sisosiso he yẹn tindo na mì.” (2 Kọl. 2:4) E họnwun dọ Paulu penukundo azọ́n etọn go po ahun lẹpo po.
8, 9. Na apajlẹ Biblu tọn delẹ he do lehe sunnu lẹ penukundo nuhudo mẹdevo lẹ tọn go do hia.
8 Sunnu he wazọ́n sinsinyẹn do ota devizọnwatọ Jehovah tọn lẹ tọn mẹ to hohowhenu lẹ nọ saba do gbigbọ mẹde-yido-sanvọ́ tọn hia. Di apajlẹ, e na vẹawuna mí nado lẹndọ Noa dọna mẹhe tin to whédo etọn mẹ lẹ dọ: ‘Eyin mì ko gbá aki lọ fó, mì dike ma yọnẹn na yẹnlọsu nido biọ e mẹ hẹ mì.’ Mose ma dọna Islaelivi lẹ to Egipti dọ: ‘N’na pé mì to Ohù Vẹẹ kọ̀n. Mì saa wà nuhe go mì pé lẹpo bo jẹ dọ́n.’ Jọṣua ma dọ: ‘Eyin adó Jẹliko tọn lẹ họ́, mì dike ma yọnẹn.’ Podọ Isaia ma dlẹnalọdo mẹdevo bo dọ dọ: ‘Ewọ niyẹn; do e hlan.’—Isa. 6:8.
9 Mẹhe dike gbigbọ Jiwheyẹwhe tọn ni yinuwado e ji bo ze apajlẹ dagbe hugan dai na mí wẹ Jesu Klisti. E kẹalọyi azọ́ndenamẹ etọn sọn ojlo mẹ wá nado wadevizọn taidi Mẹfligọtọ gbẹtọvi lẹ tọn. (Joh. 3:16) Be e ma jẹ dọ owanyi mẹde-yido-sanvọ́ tọn he Jesu dohia ni whàn mí nado wà nudopolọ ya? To whenue mẹho agun tọn numimọnọ de to numọtolanmẹ he e tindo gando apó lọ go dọ, e dọmọ: “Hogbe Jesu tọn na Pita dọ—nọ yìn lẹngbọ pẹvi ṣie lẹ—nọ whàn mi taun. Dile owhe lẹ to yìyì, n’wá mọnukunnujẹ lehe hogbe mẹtọnhopọn tọn kleun delẹ kavi nuyiwa homẹdagbe tọn kleun de sọgan na tuli mẹdevo do mẹ. N’nọ duvivi azọ́n lẹngbọhọtọ tọn taun.”—Joh. 21:16.
10. Etẹwẹ sọgan whàn sunnu Klistiani lẹ nado hodo apajlẹ Jesu tọn nado wadevizọn do mẹdevo lẹ tamẹ?
10 Na nuhe dù apó Jiwheyẹwhe tọn, ayihaawe ma tin dọ sunnu he ko klan yede do wiwe to agun mẹ lẹ na jlo nado do pọndohlan Jesu tọn nkọ hia dọmọ: “Yẹn nasọ fakọna mì.” (Mat. 11:28) Yise tintindo to Jiwheyẹwhe mẹ po owanyi na agun lọ po nọ whàn sunnu Klistiani lẹ nado dovivẹnu bo pegan na azọ́n dagbe ehe, bo ma nọ tindo linlẹn lọ dọ nuhe e bẹhẹn lẹ sù gbau kavi pẹnagbanmẹ zẹjlẹgo. Ṣigba etẹwẹ mẹde sọgan wà, eyin e ma tindo ojlo depope nado dovivẹnu bo pegan na otẹn azọngban tọn? Be mẹmẹsunnu de sọgan wleawuna ojlo lọ nado wadevizọn to agun mẹ ya?
Wleawuna Ojlo lọ Nado Wadevizọn
11. Nawẹ mẹde sọgan wleawuna ojlo lọ nado wadevizọn do mẹdevo lẹ tamẹ gbọn?
11 Eyin numọtolanmẹ nugomape tọn wẹ glọnalina we ma nado dovivẹnu na otẹn azọngban tọn, nuhe sọgbe wẹ e yin dọ a ni hodẹ̀ bo biọ alọgọ gbigbọ wiwe tọn. (Luk. 11:13) Gbigbọ Jehovah tọn na gọalọna we nado duto numọtolanmẹ obu tọn depope he a tindo ji. Jiwheyẹwhe wẹ nọ hẹnmẹ tindo ojlo lọ nado wadevizọn, na gbigbọ Jehovah tọn wẹ nọ whàn mẹmẹsunnu de nado dovivẹnu bo pegan na azọngban podọ ewọ wẹ nọ namẹ huhlọn nado wà sinsẹ̀nzọn wiwe. (Flp. 2:13; 4:13) Enẹwutu, nuhe sọgbe wẹ e yin nado biọ to Jehovah si dọ ni gọalọna we nado wleawuna ojlo lọ nado kẹalọyi lẹblanulọkẹyi sinsẹ̀nzọn tọn lẹ.—Hia Psalm 25:4, 5.
12. Nawẹ mẹde sọgan tindo nuyọnẹn he pé nado penukundo azọngban he yin zizedo alọmẹ na ẹn lẹ go gbọn?
12 Klistiani de sọgan de ma nado dovivẹnu na otẹn azọngban tọn na e mọdọ nuhudo apó lọ tọn taidi nuhe vẹawu bo na biọ nususu to e si. Kavi e sọgan lẹndọ emi ma tindo nuyọnẹn sọmọ nado penukundo azọngban lọ lẹ go. Eyin mọ wẹ whẹho lọ yin, e yọnbasi dọ ni tindo nuyọnẹn gbọn Ohó Jiwheyẹwhe tọn po owe sinai do Biblu ji lẹ pinplọn po sọwhiwhe po dali. E sọgan kanse ede dọ, ‘Be n’nọ de whenu dovo nado plọn Ohó Jiwheyẹwhe tọn bosọ nọ biọ nuyọnẹn to odẹ̀ mẹ ya?’ Devi Jakọbu wlan dọmọ: “Eyin depope to mì mẹ gbọagba nuyọnẹn tọn, gbọ e ni nọ to bibiọ Jiwheyẹwhe zọnmii, na ewọ nọ yí alọtútlú do na mẹlẹpo matin whẹgbledomẹ; podọ e na yin nina ẹn.” (Jak. 1:5) Be hiẹ yí ohó gbọdo ehe sè ya? Nado na gblọndo odẹ̀ Sọlomọni tọn, Jiwheyẹwhe na ẹn “ayiha nuyọnẹn tọn de po [nukunnumọjẹnumẹ] tọn de po” he gọalọna ẹn nado yọ́n vogbingbọn to nuhe sọgbe po nuhe ma sọgbe po ṣẹnṣẹn gando whẹdida go. (1 Ahọ. 3:7-14) Nugbo wẹ dọ whẹho Sọlomọni tọn gbọnvo. Etomọṣo, mí sọgan deji dọ Jiwheyẹwhe na na nuyọnẹn sunnu he tindo azọngban to agun mẹ lẹ na yé nido sọgan penukundo lẹngbọ etọn lẹ go ganji.—Howh. 2:6.
13, 14. (a) Nawẹ “owanyi he Klisti tindo” yinuwado Paulu ji gbọn? (b) Nawẹ “owanyi he Klisti tindo” dona nọ yinuwado mí ji gbọn?
13 Onú devo he na gọalọna mẹde nado wleawuna ojlo nado wadevizọn na mẹdevo lẹ wẹ nulinlẹnpọn sisosiso do nuhe Jehovah po Visunnu etọn po ko wà na mí lẹpo ji. Di apajlẹ, lẹnnupọndo 2 Kọlintinu lẹ 5:14, 15 ji. (Hia.) Nawẹ “owanyi he Klisti tindo nọ whàn mí” gbọn? Owanyi he Klisti dohia to whenue e yí ogbẹ̀ etọn do sanvọ́ do ota mítọn mẹ sọgbe hẹ ojlo Jiwheyẹwhe tọn jẹna ayidego, na e nọ yinuwado mí ji sisosiso dile nukunnumọjẹnumẹ po pinpẹn-nutọn-yinyọnẹn mítọn gando nuhe e wà na mí po go to jijideji. Owanyi Klisti tọn yinuwado Paulu ji. E hẹn ẹn ma nado yinuwa po ṣejannabi po bosọ gọalọna ẹn nado yí devizọnwiwa na Jiwheyẹwhe po mẹdevo lẹ po to agun mẹ podọ to gbonu agun lọ tọn do basi yanwle tangan etọn.
14 Ayihamẹlinlẹnpọn do owanyi he Klisti tindo na gbẹtọvi lẹ ji nọ whàn mí nado dopẹ́. Taidi kọdetọn de, mí mọnukunnujẹemẹ dọ e ma sọgbe paali nado nọ ‘do sọgbe hẹ agbasalan’ gbọn afọdidona yanwle ṣejannabi tọn podọ gbẹninọ nado hẹn pekọwana ojlo mídetiti tọn lẹ dali. Kakatimọ, mí nọ basi vọjlado lẹ nado ze azọ́n he Jiwheyẹwhe zedo alọmẹ na mí lọ do otẹn tintan mẹ. Mí nọ yin whinwhàn nado yin “afanumẹ” na mẹmẹsunnu mítọn lẹ na mí yiwanna yé wutu. (Hia Galatianu lẹ 5:13.) Eyin mí nọ pọ́n mídelẹ hlan taidi afanumẹ he yí whiwhẹ do to azọ́nwa do devizọnwatọ klandowiwe Jehovah tọn lẹ tamẹ, mí na nọ yí yẹyi po sisi po do yinuwa hẹ yé. Na nugbo tọn, mí ma na nọ mọhodọdomẹgo kavi dawhẹnamẹ dile Satani nọ wà do.—Osọ. 12:10.
Vivẹnudido to Pọmẹ Taidi Whẹndo De
15, 16. Adà tẹwẹ hagbẹ whẹndo tọn lẹ nọ yiwà eyin sunnu de na pegan nado yin pipà taidi devizọnwatọ lizọnyizọnwiwa tọn kavi mẹho agun tọn?
15 Eyin mẹmẹsunnu de yin alọwlemẹ he tindo ovi lẹ, lehe ninọmẹ onú lẹ tọn te to whẹndo etọn mẹ nọ yin zizedo lẹnpọn mẹ nado yọnẹn eyin e pegan nado yin pipà taidi devizọnwatọ lizọnyizọnwiwa tọn kavi mẹho agun tọn. Na nugbo tọn, gbigbọnọ-yinyin po nukun he mẹdevo lẹ do nọ pọ́n whẹndo etọn po wẹ nọ dohia eyin e na yin pipà kavi lala. Ehe dohia dọ nujọnu wẹ e yin dọ whẹndo lọ ni nọgodona asu kavi otọ́ he to vivẹnudo lọ nado wadevizọn taidi devizọnwatọ lizọnyizọnwiwa tọn kavi mẹho to agun mẹ.—Hia 1 Timoti 3:4, 5, 12.
16 Homẹ Jehovah tọn nọ hùn eyin hagbẹ whẹndo Klistiani tọn lẹ nọ kọngbedopọ. (Efe. 3:14, 15) E nọ biọ jlẹkajininọ to tatọ́ whẹndo tọn de si nado hẹn azọngban agun tọn lẹ di bosọ penukundo whédo etọn titi go “to aliho dagbe mẹ.” Enẹwutu, nujọnu wẹ e yin dọ mẹho agun tọn kavi devizọnwatọ lizọnyizọnwiwa tọn de ni nọ plọn Biblu hẹ asi po ovi etọn lẹ po na yemẹpo nido sọgan mọaleyi sọn Sinsẹ̀n-Bibasi Whẹndo tọn mẹ to sẹmẹsẹmẹ. E dona nọ tọ́n hẹ yé to lizọnyizọn kunnudegbe tọn mẹ to gbesisọ mẹ. Mọdopolọ, nujọnu wẹ e yin dọ hagbẹ whẹndo tọn lẹ ni nọ kọngbedopọ hẹ vivẹnudido tatọ́ whẹndo lọ tọn lẹ.
Be Hiẹ Na Vọ́ Kẹalọyi Azọngban Whladopo Dogọ Ya?
17, 18. (a) Eyin mẹmẹsunnu de masọ pegan na azọngban ba, etẹwẹ e sọgan wà? (b) Pọndohlan tẹwẹ mẹmẹsunnu he sẹ̀n taidi mẹho agun tọn kavi devizọnwatọ lizọnyizọnwiwa tọn pọ́n sọgan tindo?
17 Vlavo hiẹ ko sẹ̀n taidi mẹho agun tọn kavi devizọnwatọ lizọnyizọnwiwa tọn to ojlẹ de mẹ wayi ṣigba bo masọ to mọwà todin ba. Na hiẹ yiwanna Jehovah wutu, a sọgan deji dọ e gbẹ́ to towe hòpọn. (1 Pita 5:6, 7) Be mẹho lẹ na we ayinamẹ dọ a dona basi vọjlado delẹ ya? Kẹalọyi nuṣiwa towe bo basi vọjlado po alọgọ Jiwheyẹwhe tọn po. Dapana adidudu. Yí nuyọnẹn zan bosọ nọ do pọndohlan dagbe hia. Mẹho agun tọn de he ko sẹ̀n na owhe susu ṣigba bo wá hẹn lẹblanulọkẹyi sinsẹ̀nzọn tọn etọn lẹ bu dọmọ: “N’magbe nado hẹn aṣa opli yìyì tọn, sinsẹ̀nzọn kunnudegbe tọn, po Biblu hihia po tọn ṣie go dile n’nọ basi do to whenue n’gbẹ́ yin mẹho agun tọn, podọ n’penugo nado jẹ yanwle ehe kọ̀n. N’plọn homẹfa na n’lẹndọ n’na vọ́ lẹblanulọkẹyi ṣie lẹ mọyi to owhe dopo kavi awe gblamẹ, ṣigba e diblayi owhe ṣinawe whẹpo n’do sọgan gọ̀ azọngban mẹho tọn yí. To ojlẹ enẹ mẹ, tulinamẹ lọ dọ agbọ́ ni ma pé mí blo ṣigba mí ni to vivẹnudo zọnmii gọalọna mi taun.”
18 Eyin mẹmẹsunnu de wẹ a yin bo tin to ninọmẹ he ṣẹṣẹ yin nùdego ehe mẹ, ma gbọjọ blo. Lẹnnupọndo lehe Jehovah to didona lizọnyizọn towe po whẹndo towe po do ji. Nọ jlọ whẹndo towe dote to gbigbọ-liho, nọ dla mẹhe to azọ̀njẹ lẹ pọ́n, bo nọ na tuli mẹhe gbọjọ lẹ. Hú popolẹpo, ylọ lẹblanulọkẹyi towe nado pà Jiwheyẹwhe po wẹndagbe Ahọluduta lọ tọn lilá po taidi dopo to Kunnudetọ Jehovah tọn lẹ mẹ dọ nujọnu. a—Ps. 145:1, 2; Isa. 43:10-12.
Vọ́ Ninọmẹ Towe Gbeje Pọ́n
19, 20. (a) Etẹwẹ sunnu he ko yí baptẹm lẹpo yin tudohomẹna nado wà? (b) Etẹwẹ mí na gbadopọnna to hosọ he bọdego mẹ?
19 Nuhudo nugopọntọ po devizọnwatọ lizọnyizọnwiwa tọn lẹ tọn po tin taun to egbehe. Enẹwutu, mí na tuli sunnu he ko yí baptẹm lẹpo nado vọ́ ninọmẹ yetọn lẹ gbeje pọ́n bo kanse yede dọ, ‘Eyin n’ma ko yin devizọnwatọ lizọnyizọnwiwa tọn kavi mẹho agun tọn, be n’sọgan dọ nuhewutu n’ma to sinsẹ̀n to otẹn azọngban tọn ehelẹ depope mẹ ya?’ Dike gbigbọ Jiwheyẹwhe tọn ni gọalọna we nado tindo pọndohlan he sọgbe do whẹho tangan ehe ji.
20 Hagbẹ agun lọ tọn lẹpo wẹ na mọaleyi sọn vivẹnudido gbigbọ mẹde-yido-sanvọ́ tọn yisenọ hatọ yetọn lẹ tọn mẹ. Eyin mí yinuwa po homẹdagbe po bo ma yin ṣejannabinọ, mí na duvivi ayajẹ he nọ wá sọn devizọnwiwa do mẹdevo lẹ tamẹ po didó sọgbe hẹ gbigbọ po mẹ. Ṣigba, dile hosọ he bọdego na dohia do, mí ma dona nọ hẹn homẹgble gbigbọ wiwe Jiwheyẹwhe tọn. Nawẹ mí sọgan dapana enẹ gbọn?
[Nudọnamẹ odò tọn]
a Pọ́n Atọ̀họ̀-Nuhihọ́ lọ Tọn Atọ̀họ̀-Nuhihọ́ lọ Tọn 15 août 2009, weda 30-32.
Nawẹ Hiẹ Na Na Gblọndo Gbọn?
• Jide tẹwẹ dọdai he tin to Mika 5:5 mẹ na mí?
• Etẹwẹ gbigbọ mẹde-yido-sanvọ́ tọn bẹhẹn?
• Nawẹ mẹde sọgan wleawuna ojlo lọ nado wadevizọn do mẹdevo lẹ tamẹ gbọn?
• Nawẹ gbekọndopọ whẹndo tọn yin nujọnu sọ eyin sunnu de na pegan nado yin devizọnwatọ kavi mẹho agun tọn?
[Kanbiọ Oplọn tọn lẹ]
[Yẹdide to weda 25]
Etẹwẹ hiẹ sọgan wà nado pegan na azọngban?