Naegbọn Mí Dona Nọ Gbògbéna Mẹhomẹ Lẹ?

DOPO to atin he gbẹtọ lẹ de fọto etọn hugan to aihọn lọ mẹ lẹ mẹ tin to huto Californie tọn to États-Unis. E nọ yin yiylọdọ Lone Cypress. Dile e yin didọ do, owhe atin ehe tọn ko lán to 250 ji. Na atin whanpẹnọ ehe pehẹ ninọmẹ sinsinyẹn taun wutu, gbẹtọ lẹ ko na ẹn ayidonugo to aliho voovo lẹ mẹ. Di apajlẹ, gbẹtọ lẹ ko sìn gànkàn lẹ lẹdo atin lọ go bo sìn yé do nudevo lẹ go bosọ tò zannu lẹ lẹdo dodonu etọn nado hẹn ẹn lodo dogọ.

Atin Lone Cypress sọgan hẹn mí flin Klistiani mẹhomẹ lẹ he tin to ṣẹnṣẹn mítọn he nọ do akọndonanu he jẹna ayidego hia. Aliho titengbe dopo he mẹ yé nọ wà ehe te wẹ gbọn wẹndagbe lọ lilá dali. Yẹwhegán Joẹli dọ dọdai dọ ‘yọnhonọ’ lẹ na lá owẹ̀n Biblu tọn. (Joẹ. 2:28-32; Owalọ 2:16-21) Yí nukun homẹ tọn do pọ́n gànhiho madosọha he omẹ mọnkọtọn lẹ nọ yizan po ahundopo po nado gọalọna mẹdevo lẹ nado plọnnu gando “wẹndagbe ahọluduta lọ tọn” go! (Mat. 24:14) Delẹ to mẹhomẹ he yin wẹnlatọ Ahọluduta tọn ehelẹ mẹ ko doakọnna homẹkẹn kavi pehẹ ninọmẹ sinsinyẹn lẹ na owhe susu. Eyin atin cypress doakọnnanu bọ gbẹtọ lẹ yọ́n pinpẹn etọn sọmọ bo yí gànkàn po zannu lẹ po do hẹn ẹn lodo, nẹmunẹmu wẹ mẹhomẹ he tin to ṣẹnṣẹn mítọn lẹ tọn bọ yé ma nado jẹna pinpẹn-nutọn-yinyọnẹn, yẹyi, po gbégbò po!

Jehovah Jiwheyẹwhe degbena omẹ etọn lẹ to hohowhenu dọmọ: “Hiẹ na fọnṣite to ota owhànọ lọ nukọn, bo gbògbéna nukunmẹ omẹ yọnhonọ lọ tọn.” (Lev. 19:32) To omẹ Jehovah tọn lẹ ṣẹnṣẹn to egbehe, mí nọ mọ apajlẹ dagbe mẹhe yin nugbonọ bo ko to ‘zọnlinzin po Jiwheyẹwhe po’ na owhe susu lẹ tọn. (Mika 6:8) Dile yé zindonukọn to  nunọwhinnusẹ́n Biblu tọn lẹ yiyizan mẹ, ota owhànọ yetọn na nugbo tọn nọ yin “jẹgbakun gigo tọn.”—Howh. 16:31.

Apọsteli Paulu na anademẹ jọja Timoti dọmọ: “A gbẹnuna sunnu mẹhomẹ de sinsinyẹn blo.” Kakatimọ, Timoti dona “nọ vẹ̀ ẹ taidi otọ́ de” podọ “yọnnu mẹhomẹ lẹ taidi onọ̀.” (1 Tim. 5:1, 2) Ehe zẹẹmẹdo dọ Timoti dona “fọnṣite” to ota owhànọ lọ nukọn. To whelọnu lo, e họnwun dọ Jehovah nọ donukun dọ aliho he mẹ mí nọ dọho te ni nọ do gbégbò mọnkọtọn hia.

Lomunu lẹ 12:10 dọmọ: “Mì yin nukọntọ to gbégbò didohia ode awetọ mẹ.” Na nugbo tọn, nugopọntọ he tin to agun lọ mẹ lẹ nọ do gbégbò hia Klistiani mẹhomẹ lẹ. Ṣigba, mímẹpo wẹ dona yin nukọntọ to gbégbò didohia ode awetọ mẹ.

Na taun tọn, hagbẹ whẹndo tọn lẹ tindo azọngban vonọtaun nado penukundo mẹjitọ gọna babadaho po onọ̀-daho yetọn lẹ po go. To whẹho atin Lone Cypress tọn mẹ, gbẹtọ lẹ dín aliho voovo lẹ nado hẹn ẹn dote podọ yé zindonukọn nado to mọwà. Enẹwutu, e họnwun dọ mí dona nọ dín aliho voovo lẹ nado nọ doyẹyigona mẹjitọ gọna babadaho po onọ̀-daho mítọn lẹ po. Di apajlẹ, eyin mí nọ dotoaina yé ganji, e na zọ́n bọ mí ma na nọ tẹkudeji dọ nulẹ ni nọ yin wiwà dile mí jlo do bo dovọ́na numọtolanmẹ yetọn lẹ.—Howh. 23:22; 1 Tim. 5:4.

Mẹhomẹ he tin to ṣẹnṣẹn mítọn lẹ họakuẹ taun to nukun Jehovah tọn mẹ. E ma nọ gbẹ́ yé dai. (Ps. 71:18) Na taun tọn, Jiwheyẹwhe nugbo lọ nọ vọ́ huhlọnna yé nado to sinsẹ̀n ẹn po nugbonọ-yinyin po zọnmii. Mì gbọ mílọsu ni zindonukọn nado nọ do godonọnamẹ po gbégbò po hia mẹhomẹ lẹ.

[Yẹdide to weda 7]

Dile atin Lone Cypress tindo nuhudo alọgọ tọn do, mẹhomẹ lẹ lọsu tindo nuhudo yẹyi po gbégbò po tọn

[Asisa Yẹdide Tọn]

American Spirit Images/age fotostock