Pọ́n Yinkọ lọ to Agbàdo lọ Mẹ

SAINT-MORITZ. Be a jẹakọ hẹ yinkọ enẹ ya? E sọgan yinmọ, na hùnwhẹ whedudu tọn he diyin taun to Agbàdo Engadine tọn mẹ to Suisse de wẹ e yin. Ṣigba, sọn ojlẹ dindẹn die gbọ́n wẹ nọtẹn Saint-Moritz tọn nọ dọ̀n gbẹtọ lẹ wá agbàdo whanpẹnọ he tin to Osó he osin-agó nọ ṣinyọ́n lẹ ṣẹnṣẹn mẹ to hùwaji-whèzẹtẹn Suisse tọn sẹpọ dogbó Italie tọn. Humọ, finẹ wẹ Jipa Suisse tọn he bẹ atin gọna kanlin wunmẹwunmẹ he nọ pagigona Mẹdatọ Daho mítọn, Jehovah hẹn lẹ tin te. (Ps. 148:7-10) Nudopolọ wẹ gando aṣa de go, he tin to lẹdo lọ mẹ sọn gblagbla owhe kanweko 17tọ tọn mẹ gbọ́n.

Nukinkan vonọtaun he tin to ohọ̀ susu go to agbàdo ehe mẹ sọgan dọ̀n ayidonugo towe. Tòmẹnu lọ lẹ tindo aṣa lọ nado nọ kàn oyín Jiwheyẹwhe tọn do nukọnna ohọ̀ yetọn lẹ, titengbe to ohọ̀n nukọn tọn go. To owhe kanweko susu lẹ die, mẹhe to lẹdo lọ mẹ lẹ tindo aṣa lọ nado nọ yí nukinkan do doaṣọ́na owhé yetọn lẹ to gbangba,  vlavo po osẹ̀n po kavi gbọn nukinkan do adó go kavi do zannu go dali. Apajlẹ nukinkan enẹ tọn dopo wẹ yin yẹdide ohọ̀ he mọ a te tofi tọn to gbétatò Bever tọn mẹ. Lẹdogbedevomẹ nukinkan lọ tọn wẹ: “Ohọ̀ lọ yin gbigbá to owhe 1715. Jehovah wẹ bẹjẹeji, podọ Jehovah wẹ vivọnu. Jiwheyẹwhe pé nulẹpo go, podọ matin ewọ nudepope ma sọgan yin wiwà.” Mọwẹ, whla awe wẹ oyín Jiwheyẹwhe tọn sọawuhia to nukinkan he ko dohó lọ mẹ.

Hiẹ sọgan mọ nukinkan he tlẹ dohó hugan enẹ de to gbétatò Madulain tọn mẹ. Nukinkan ehe dọ dọ: “Psalm 127. Adavo Jehovah do ohọ̀ lọ, yé he to dido e lẹ to tuklajẹ yaya. Lucius Rumedius. To owhe 1654.”

Naegbọn oyín Jiwheyẹwhe tọn do sọawuhia to nọtẹn gbangba tọn lẹ mẹ to agbàdo ehe mẹ? To ojlẹ Nuvọjlado tọn lẹ mẹ, Biblu yin zinzinjẹgbonu to Romansh mẹ, yèdọ Latin-gbè de he nọ yin dido to Engadine. Na nugbo tọn, owe tintan he yin lilẹdo ogbè enẹ mẹ niyẹn. Na nuhe omẹ lẹdo lọ tọn lẹ mọ hia to Ohó Jiwheyẹwhe tọn mẹ whàn yé wutu, susu yetọn kàn yinkọ yetọn po wefọ Biblu tọn he bẹ oyín Jiwheyẹwhe tọn hẹn lẹ po do nukọn owhé yetọn lẹ tọn.

Mọwẹ, kakajẹ egbé, nukinkan ehelẹ gbẹ́ pò to oyín Jehovah tọn lá bosọ to gigopana ẹn dile etlẹ yindọ owhe susu lẹ die wẹ yé yin kinkan do owhé lẹ nukọn. Mí to oylọ-basina jonọ po tòvi he tin to agbàdo ehe mẹ lẹ po nado wá plọn nususu gando Jiwheyẹwhe jiawu lọ, Jehovah go, gbọn dlapọn bibasi wá ohọ̀ devo he ji oyín etọn yin kinkan do dali—enẹ wẹ Plitẹnhọ Ahọluduta tọn Kunnudetọ Jehovah tọn lẹ tọn to Bever.

[Asisa Yẹdide tọn to weda 7]

© Stähli Rolf A/age fotostock