Kanbiọ lẹ sọn Wehiatọ lẹ Dè
Kanbiọ lẹ sọn Wehiatọ lẹ Dè
Naegbọn Mose gblehomẹ do visunnu Aalọn tọn Eleazali po Itamali po go to okú nọvisunnu yetọn Nadabi po Abihu po tọn godo, podọ etẹwẹ miọnhomẹna ẹn?—Lev. 10:16-20.
To whenue yẹwhenọduta lọ yin zizedai na sinsẹ̀nzọn to gòhọtúntún mẹ godo tlolo, Jehovah hù Nadabi po Abihu po na yé mẹ̀n nuyọnwan he ma sọgbe to Jiwheyẹwhe nukọn wutu. (Lev. 10:1, 2) Mose degbena visunnu Aalọn tọn he pò to ogbẹ̀ lẹ ma nado blawu na nọvisunnu yetọn he kú lẹ. E ma dẹn to enẹgodo bọ Mose gblehomẹ do Eleazali po Itamali po go na yé ma dù gbọgbọẹ avọ́nunina ylando tọn lọ. (Lev. 9:3) Naegbọn Mose yinuwa domọ?
Osẹ́n he Jehovah na Mose lẹ dohia dọ yẹwhenọ he basi avọ́sinsan ylando tọn de dona dù sọn e mẹ to awánu gòhọ opli tọn lọ tọn mẹ. Ehe wiwà nọ dohia dọ ylando mẹhe na avọ́nunina lọ tọn lẹ ko yin jijona. Ṣigba, eyin apadewhe ohùn kanlin he yè do sanvọ́ lọ tọn de yin hinhẹn biọ Fiwiwe lọ, yèdọ abò tintan gòhọ lọ tọn mẹ, avọ́nunina lọ ma dona yin dùdù; kakatimọ, e dona yin fifiọ.—Lev. 6:24-26, 30.
E taidi dọ to nujijọ ajiji azán enẹ gbè tọn lẹ godo, Mose mọdọ emi dona hẹn ẹn diun dọ gbedide Jehovah tọn lẹpo yin hihodo. To whenue Mose mọdọ gbọgbọẹ avọ́nunina ylando tọn lọ yin fifiọ, homẹgble e bọ e kanse Eleazali po Itamali po dọ naegbọn yé ma dù i dile e yin bibiọ do, na ohùn etọn ma ko yin hinhẹn yì Jehovah nukọn to Fiwiwe lọ mẹ wutu.—Lev. 10:17, 18.
Aalọn wẹ na gblọndo na kanbiọ Mose tọn, na e taidi dọ yẹwhenọ he pò to ogbẹ̀ lọ lẹ yinuwa sọgbe hẹ gbedide etọn. Na okú visunnu Aalọn tọn awe lọ lẹ tọn wutu, e sọgan ko to nuhà vlavo eyin ewọ po ovi etọn lẹ po tindo ayihadawhẹnamẹnu dagbe nado dù sọn avọ́nunina ylando tọn lọ mẹ to azán enẹ gbè. E sọgan ko lẹndọ Jehovah na gblehomẹ do yé go eyin yé dù sọn e mẹ, dile etlẹ yindọ yé ma tindo mahẹ tlọlọ to nuṣiwa Nadabi po Abihu po tọn mẹ.—Lev. 10:19.
Na taun tọn, Aalọn sọgan ko lẹndọ to azán he gbè hagbẹ whẹndo etọn tọn lẹ na hẹn azọngban yẹwhenọ tọn yetọn di te whla tintan, yé dona ko yinuwa po sọwhiwhe po tlala nado hẹn homẹ Jiwheyẹwhe tọn hùn etlẹ yin to onú pẹvi pete lẹ mẹ. Ṣigba, Nadabi po Abihu po kọnmasin do oyín Jehovah tọn go, podọ homẹgble Jiwheyẹwhe tọn wá yé ji. Enẹwutu Aalọn sọgan ko lẹndọ hagbẹ whédo yẹwhenọ tọn he mẹ ylando mọnkọtọn yin wiwà te lẹ tọn ma dona tindo mahẹ to avọ́nunina wiwe de mẹ.
E taidi dọ Mose kẹalọyi gblọndo mẹdaho etọn tọn na wefọ godo tọn lọ dọmọ: “Whenuena Mose sè ehe, e yin homẹhun dagbedagbe to nukun etọn mẹ.” (Lev. 10:20) E họnwun dọ, Jehovah lọsu kẹalọyi gblọndo Aalọn tọn.
