Nukundagbe Jiwheyẹwhe Tọn Mimọyi Nọ Planmẹ Yì Ogbẹ̀ Madopodo Mẹ
Nukundagbe Jiwheyẹwhe Tọn Mimọyi Nọ Planmẹ Yì Ogbẹ̀ Madopodo Mẹ
“Na hiẹ, OKLUNỌ E, na dona dodonọ, nukundagbe wẹ hiẹ na yí lẹdo e pé di awọ̀yinu.”—PS. 5:12.
1, 2. Etẹwẹ Elija biọ to asuṣiọsi he nọ nọ̀ Zalefati lọ si, podọ jide tẹwẹ e na ẹn?
HUVẸ to nawe lọ po visunnu etọn po hù, podọ nudopolọ wẹ sọ to yẹwhegán Jiwheyẹwhe tọn wà. Dile asuṣiọsi he nọ nọ̀ Zalefati ehe to awuwle nado jẹ nudà ji, yẹwhegán Elija biọ to e si dọ ni na emi osin po akla po. Nawe lọ jlo nado na ẹn sin-nùnù, ṣigba núdùdù he pò to e si lẹpo wẹ “alọgogo linfin tọn de to odla lọ mẹ, po amì vude po to aboun lọ mẹ.” E mọdọ núdùdù he emi tindo ma sù sọmọ nado má hẹ yẹwhegán lọ, podọ e sọ dọ mọ na ẹn.—1 Ahọ. 17:8-12.
2 Elija sọ dọ hlan ẹn dọmọ: “Basi na mi sọn finẹ tọn mẹ akla hìhì de whẹ́, bo hẹn ẹn wá dè e, to enẹgodo basi na we podọ na visunnu towe. Na le wẹ OKLUNỌ, Jiwheyẹwhe Islaeli tọn dọ, odla linfin tọn lọ ma to na jẹvọ́, mọ aboun amì tọn lọ masọ to na hú.”—1 Ahọ. 17:13, 14.
3. Nudide titengbe tẹwẹ pannukọn dopodopo mítọn?
3 Nudide he asuṣiọsi lọ pannukọn sinyẹn hugan dide poun nado má núdùdù etọn pẹvide he pò hẹ mẹdevo. Be e na deji dọ Jehovah na whlẹn ẹn po visunnu etọn po ya, kavi be nuhudo agbasa tọn etọn lẹ na duahunmẹna ẹn hugan nukundagbe po họntọnjihẹmẹ Jiwheyẹwhe tọn po mimọyi ya? Nudide dopolọ wẹ pannukọn mímẹpo. Be nukundagbe Jehovah tọn mimọyi na duahunmẹna mí hugan hihọ́ he agbasanu lẹ nọ hẹnwa dindin ya? Mí tindo whẹwhinwhẹ́n lẹpo nado dejido Jiwheyẹwhe go bosọ sẹ̀n ẹn. Podọ afọdide delẹ tin he mí sọgan ze nado dín bo mọ nukundagbe etọn.
‘Hiẹ Wẹ Jẹ Nado Yin Sinsẹ̀n-Basina’
4. Naegbọn Jehovah do jẹna sinsẹ̀n-bibasi mítọn?
4 Jehovah tindo jlọjẹ lọ nado donukun dọ gbẹtọvi lẹ ni sẹ̀n emi to aliho he sọgbe mẹ. Pipli devizọnwatọ olọn mẹ tọn etọn de do nugbo ehe hia to pọmẹ dọmọ: “Jehovah, yèdọ Jiwheyẹwhe mítọn, hiẹ wẹ jẹ nado mọ gigo, gbégbò po huhlọn po yí, na hiẹ wẹ dá onú lẹpo, podọ to ojlo towe mẹ wẹ yé tin bosọ yin didá.” (Osọ. 4:11) Na Jehovah wẹ Mẹdatọ mítọn wutu, ewọ jẹna sinsẹ̀n-bibasi mítọn.
5. Naegbọn owanyi Jiwheyẹwhe tọn dona whàn mí nado sẹ̀n ẹn?
5 Whẹwhinwhẹ́n devo he wutu mí dona sẹ̀n Jehovah wẹ owanyi mayọnjlẹ he e tindo na mí. Biblu dọmọ: “Jiwheyẹwhe dá gbẹtọ to boṣiọ etọn titi mẹ, to boṣiọ Jiwheyẹwhe tọn mẹ wẹ e dá ẹ do: asu de asi de wẹ e dá yé.” (Gẹn. 1:27) Gbẹtọvi lẹ tindo mẹdekannujẹ nado basi nudide vlavo eyin yé na sẹ̀n Jiwheyẹwhe kavi lala, podọ yé sọ tindo nugopipe lọ nado basi nudide enẹ. Na Jehovah na mí ogbẹ̀ wutu, e lẹzun Otọ́ gbẹtọvi lẹpo tọn. (Luku 3:38) Dile otọ́ dagbe de nọ wà do, e ko wà nuhe go e pé lẹpo nado wleawuna nuhe visunnu po viyọnnu etọn lẹ po tindo nuhudo etọn nado sọgan duvivi ogbẹ̀ tọn. “E nọ hẹn owhè etọn zẹ̀” bosọ “nọ hẹn jikun ja,” na aigba nido de sinsẹ́n susu tọ́n na mí to lẹdo whanpẹnọ lẹ mẹ.—Mat. 5:45.
6, 7. (a) Awugble tẹwẹ Adam hẹnwa kúnkan etọn lẹpo ji? (b) Etẹwẹ avọ́sinsan Klisti tọn na wà na mẹhe nọ dín nukundagbe Jiwheyẹwhe tọn lẹ?
6 Jehovah sọ whlẹn mí sọn kọdetọn vẹadi ylando tọn lẹ si. To whenue Adam waylando, e taidi tatọ́-whẹndo tọn akọhotọ de he nọ fìn akuẹ whẹndo etọn tọn nado yì hòakọ. Gbọn atẹṣiṣi sọta Jehovah dali, Adam fìn todido ovi etọn lẹ tọn—yèdọ ayajẹ madopodo yetọn. Ṣejannabi etọn hẹn gbẹtọvi lẹ zun afanumẹ mape tọn. Enẹwutu wẹ gbẹtọvi lẹpo do nọ jẹazọ̀n, tindo numimọ awubla tọn lẹ, bo nọ kú to godo mẹ. E nọ biọ ahọsumẹ de nado hẹn afanumẹ de jẹ mẹdekannu, podọ Jehovah ko suahọ he sọgan whlẹn mí sọn kọdetọn ylankan enẹlẹ si. (Hia Lomunu lẹ 5:21.) To kọndopọ mẹ hẹ ojlo Otọ́ etọn tọn, Jesu Klisti ze “alindọn etọn jo taidi ofligọ de do ota mẹsusu tọn mẹ.” (Mat. 20:28) To madẹnmẹ, mẹhe mọ nukundagbe Jiwheyẹwhe tọn lẹ na mọaleyi sọn ofligọ enẹ mẹ to gigọ́ mẹ.
7 Mẹdatọ mítọn Jehovah, ko wà nususu hugan mẹdevo depope nado na mí gbẹzan ayajẹ tọn de he gọ́ na lẹndai. Eyin mí tindo nukundagbe etọn, mí na penugo nado mọ lehe e to azọ́nwa nado basi vọjlado na nuhe yin hinhẹngble to akọ̀ gbẹtọvi tọn go lẹpo do. Jehovah na zindonukọn nado do lehe ewọ yin “ahọsumẹtọ mẹhe to dindin in vẹkuvẹku lẹ tọn” do hia dopodopo mítọn.—Heb. 11:6.
“Gbẹtọ Towe lẹ Na Yin Ojlonọ”
8. Etẹwẹ apajlẹ Isaia tọn plọn mí gando Jiwheyẹwhe sinsẹ̀n go?
8 Nado mọ nukundagbe Jiwheyẹwhe tọn yí, e nọ biọ dọ mí ni yí mẹdekannujẹ nudide bibasi tọn mítọn zan ganji. Ehe yinmọ na Jehovah ma nọ hẹn mẹdepope po huhlọn po nado sẹ̀n ẹn. To azán Isaia tọn gbè, E kanse dọmọ: “Mẹnu wẹ yẹn na dohlan, mẹnu wẹ na yì na mí?” Jehovah doyẹyigona yẹwhegán lọ gbọn alọkikẹyi jlọjẹ etọn nado basi nudide dali. Yí nukun homẹ tọn do pọ́n pekọ he Isaia na ko tindo to whenue e yigbe dọmọ: “Yẹn die; do mi hlan.”—Isa. 6:8.
9, 10. (a) Etẹwẹ dona yin mẹwhinwhàn mítọn dile mí to Jiwheyẹwhe sẹ̀n? (b) Naegbọn e do sọgbe dọ mí ni sẹ̀n Jehovah po alindọn lẹpo po?
9 Gbẹtọvi lẹ vò nado sẹ̀n Jiwheyẹwhe kavi lala. Ṣigba, Jehovah jlo dọ mí ni sẹ̀n emi sọn ojlo mẹ. (Hia Jọṣua 24:15.) Mẹdepope he ma tindo ojlo nado sẹ̀n Jiwheyẹwhe ma sọgan hẹn homẹ etọn hùn; podọ ewọ ma nọ kẹalọyi sinsẹ̀n-bibasi mẹhe mẹwhinwhàn yetọn wẹ nado hẹn homẹ mẹdevo lẹ tọn hùn lẹ tọn. (Kọl. 3:22) Eyin mí nọ “dọngbàn” kavi whleawu to sinsẹ̀nzọn wiwe mítọn hlan Jiwheyẹwhe mẹ gbọn dotẹnmẹ nina yanwle aihọn tọn lẹ nado yitẹn to sinsẹ̀n-bibasi mítọn si dali, mí ma na mọ nukundagbe Jiwheyẹwhe tọn. (Eks. 22:29) Jehovah yọnẹn dọ mí na mọaleyi eyin mí sẹ̀n emi po alindọn lẹpo po. Mose dotuhomẹna Islaelivi lẹ ‘nado nọ yiwanna Jehovah Jiwheyẹwhe yetọn, nado nọ setonuna ogbè etọn, podọ nado nọ dọnsẹpọ ẹ.’—Deut. 30:19, 20.
10 Ahọlu Davidi Islaeli hohowhenu tọn jihàn hlan Jehovah dọmọ: “Gbẹtọ towe lẹ na yin ojlonọ to azán huhlọn towe tọn gbè; to whanpẹ walọ wiwe tọn mẹ, sọn adọ̀ afọnnu fuu tọn mẹ; hiẹ tindo ahun ovu whenu towe tọn.” (Ps. 110:3) To egbehe, mẹsusu nọ ze hihọ́ he akuẹ nọ hẹnwa po gbẹdudu po do otẹn tintan mẹ to gbẹzan yetọn mẹ. Ṣigba, na mẹhe yiwanna Jehovah lẹ, sinsẹ̀nzọn wiwe yetọn wẹ nọ tin to otẹn tintan mẹ na yé. Zohunhun he yé nọ yí do dọyẹwheho lọ nọ do nuhe yin yanwle tintan yetọn hia. Yé deji mlẹnmlẹn do nugopipe Jehovah tọn nado hẹn pekọ wá na nuhudo egbesọ tọn yetọn lẹ go.—Mat. 6:33, 34.
Avọ́sinsan He Jiwheyẹwhe Nọ Kẹalọyi Lẹ
11. Ale tẹwẹ Islaelivi lẹ nọ donukun nado mọyi dile yé to avọ́sinsan lẹ basi hlan Jehovah?
11 To alẹnu Osẹ́n tọn lọ glọ, omẹ Jiwheyẹwhe tọn lẹ nọ na avọ́nunina he ewọ kẹalọyi lẹ nado sọgan mọ nukundagbe etọn. Levitiku 19:5 dọmọ: “Whenuena mìwlẹ yí avọ́sannu avọ́nunina jijọho tọn de na hlan OKLUNỌ lọ, mìwlẹ na yí i na na mì nido yin mẹkealọyi.” To owe Biblu tọn dopolọ mẹ, mí hia dọmọ: “Whenuena mìwlẹ sanvọ́ opẹ́ tọn de hlan OKLUNỌ lọ, mìwlẹ na sán ẹn na mì nido yin [alọkẹyi].” (Lev. 22:29) Eyin Islaelivi lẹ basi avọ́sinsan kanlin tọn he sọgbe lẹ to agbà Jehovah tọn ji, azọ̀ he nọ tọ́n yì aga lọ nọ taidi “owán vivi de” hlan Jiwheyẹwhe nugbo lọ. (Lev. 1:9, 13) Dohia owanyi tọn enẹlẹ sọn omẹ etọn lẹ dè nọ hẹn homẹmimiọn po kọfanamẹ po wá na ẹn. (Gẹn. 8:21) To adà Osẹ́n lọ tọn ehelẹ mẹ, mí mọ nunọwhinnusẹ́n de he yọ́n-na-yizan to egbehe. Mẹhe nọ basi avọ́sinsan he Jehovah kẹalọyi lẹ nọ mọ nukundagbe etọn. Avọ́sinsan tẹlẹ wẹ ewọ nọ kẹalọyi? Mì gbọ mí ni gbadopọnna adà gbẹzan tọn awe: enẹ wẹ walọyizan po hodidọ mítọn po.
12. Walọyizan tẹlẹ wẹ na hẹn ‘agbasa mítọn yíyí do basi avọ́sinsan’ zun osùnú na Jiwheyẹwhe?
12 To wekanhlanmẹ etọn hlan Lomunu lẹ mẹ, apọsteli Paulu wlan dọmọ: “[Mì] yí agbasa mìtọn do basi avọ́sinsan he to ogbẹ̀, wiwe, he yin alọkẹyi na Jiwheyẹwhe, yèdọ sinsẹ̀nzọn wiwe he yin bibasi po huhlọn nulẹnpọn tọn mìtọn po.” (Lom. 12:1) Nado mọ nukundagbe Jiwheyẹwhe tọn nọ biọ dọ mí ni hẹn agbasa mítọn do ninọmẹ dagbe mẹ na e nido yin alọkẹyi na Jiwheyẹwhe. Eyin mẹde nọ yí taba, okún betẹli tọn, amasin-adínọ he ma sọgbe hẹ osẹ́n lẹ, kavi ahàn sinsinyẹn ṣiṣizan do hẹn ede flu, ovọ́ wẹ avọ́sinsan etọn na yin. (2 Kọl. 7:1) Humọ, to whenuena e yindọ mẹhe “nọ lọga to ylando wà do agbasa etọn titi go,” walọ mawé wunmẹ depope na hẹn avọ́sinsan etọn zun osùnú de na Jehovah. (1 Kọl. 6:18) Nado hẹn homẹ Jiwheyẹwhe tọn hùn, mí dona ‘lẹzun wiwe to walọyizan mítọn lẹpo mẹ.’—1 Pita 1:14-16.
13. Naegbọn e do sọgbe dọ mí ni nọ pà Jehovah?
13 Avọ́sinsan devo he sọ nọ hẹn homẹ Jehovah tọn hùn gando hodidọ mítọn go. Mẹhe yiwanna Jehovah lẹ nọ saba dọho etọn dagbe to gbangba podọ to whenue yé tin yedeṣo to whégbè. (Hia Psalm 34:1-3.) Hia Psalm 148-150 bo doayi whla nẹmu he psalm atọ̀n ehelẹ na mí tuli nado nọ pà Jehovah do go. Na nugbo tọn, “pipà jẹna tenọglinọ lẹ.” (Ps. 33:1) Humọ, Apajlẹnọ mítọn Jesu Klisti do lehe e yin nujọnu nado nọ pà Jiwheyẹwhe gbọn wẹndagbe lọ lilá dali do hia.—Luku 4:18, 43, 44.
14, 15. Avọ́sinsan tẹlẹ wẹ Hosea dotuhomẹna Islaelivi lẹ nado basi, podọ nawẹ Jehovah yinuwa hẹ yé gbọn?
14 Gbọn yẹwhehodidọ po zohunhun po dali, mí nọ dohia dọ mí yiwanna Jehovah bo jlo na mọ nukundagbe etọn. Di apajlẹ, pọ́n lehe yẹwhegán Hosea dotuhomẹna Islaelivi he doalọ to sinsẹ̀n-bibasi lalo mẹ bo hẹn nukundagbe Jiwheyẹwhe tọn bu lẹ do. (Hos. 13:1-3) Hosea dọna yé nado vẹ̀ Jehovah dọmọ: “De ylanwa lẹpo sẹ̀, bo kẹalọyi enẹ he yin dagbe: mọwẹ míwlẹ na gọ̀ avọ́nunina nùflo mítọn lẹ tọn jo.”—Hos. 14:1, 2.
15 “Avọ́nunina nùflo mítọn lẹ tọn” dlẹnalọdo ohó ahundopo tọn he yin awuwlena po sọwhiwhe po lẹ he mí do nọ pà Jiwheyẹwhe nugbo lọ. Nawẹ Jehovah yinuwa hẹ mẹhe basi avọ́sinsan mọnkọtọn lẹ gbọn? E dọmọ: “Yẹn na yiwanna yé vọnu.” (Hos. 14:4) Mẹhe nọ basi avọ́sinsan pipà tọn mọnkọtọn lẹ nọ duvivi jona, nukundagbe po họntọnjihẹmẹ Jehovah tọn po.
16, 17. Eyin yise to Jiwheyẹwhe mẹ whàn mẹde nado dọyẹwheho wẹndagbe lọ tọn, nawẹ Jehovah nọ kẹalọyi pipà etọn gbọn?
16 Jehovah pipà to gbangba yin adà titengbe de to sinsẹ̀n-bibasi nugbo mẹ. Gigopipana Jiwheyẹwhe nugbo lọ họakuẹ to nukun psalm-kantọ lọ tọn mẹ sọmọ bọ e vẹ̀ Jiwheyẹwhe dọmọ: “OKLUNỌ E, yẹn vẹ̀ we, yí avọ́ jijlo onù ṣie mẹ tọn lẹ.” (Ps. 119:108) Etẹwẹ dogbọn egbehe dali? To whenuena Isaia to hodọ gando gbẹtọgun daho de to ojlẹ mítọn mẹ go, e dọ dọdai dọmọ: “Yé na do pipà OKLUNỌ tọn hia do gbonu. . . . Yé [nunina yetọn lẹ] na hẹ agbà ṣie [Jiwheyẹwhe tọn] ji wá po alọkẹyi po.” (Isa. 60:6, 7) To hẹndi dọdai ehe tọn mẹ, gbẹtọ livi susu wẹ nọ basi “avọ́sinsan pipà tọn hlan Jiwheyẹwhe to whepoponu, enẹ wẹ, sinsẹ́n nùflo tọn he nọ basi gbeyiyi gbangba tọn na oyín etọn.”—Heb. 13:15.
17 Etẹwẹ dogbọn hiẹ dali? Be hiẹ to avọ́sinsan he Jiwheyẹwhe kẹalọyi lẹ basi ya? Eyin e ma yinmọ, be hiẹ na basi diọdo he jẹ lẹ bo jẹ gigopana Jehovah ji to gbangba ya? Eyin yise whàn we nado bẹ yẹwheho wẹndagbe lọ tọn didọ jẹeji, avọ́sinsan towe na “hẹn homẹ OKLUNỌ tọn hùn hú oyìnsú sisá.” (Hia Psalm 69:30, 31.) Deji dọ ‘owán vivi’ avọ́sinsan pipà tọn towe na yì Jehovah dè podọ ewọ na do nukundagbe etọn hia we. (Ezek. 20:41) Taidi kọdetọn de, a na tindo ayajẹ mayọnjlẹ de.
‘Jehovah Na Dona Dodonọ’
18, 19. (a) Nukun tẹwẹ gbẹtọ lẹ nọ yí do pọ́n Jiwheyẹwhe sinsẹ̀n to egbehe? (b) Etẹ mẹ wẹ nukundagbe Jiwheyẹwhe tọn hinhẹnbu nọ dekọtọn do?
18 To egbehe, mẹsusu nọ wá tadona dopolọ kọ̀n dile mẹdelẹ wà do to ojlẹ Malaki tọn mẹ bo nọ dọ dọ: “Ovọ́ wẹ e yin nado nọ sẹ̀n Jiwheyẹwhe: podọ ale tẹ e yin dọ míwlẹ ko yìn aṣẹ etọn?” (Mal. 3:14) Gbọn awujijona ojlo agbasanu bibẹpli tọn dali, yé nọ pọ́n lẹndai Jiwheyẹwhe tọn taidi nuhe kọ̀n yè ma sọgan jẹ podọ osẹ́n etọn lẹ taidi nuhe masọ yọ́n-na-yizan ba. To nukun yetọn mẹ, yẹwheho wẹndagbe lọ tọn didọ yin whenu hinhẹngú podọ asisa apọṣimẹ tọn.
19 Jipa Edẹni tọn mẹ wẹ ayilinlẹn mọnkọtọn bẹjẹeji sọn. Satani wẹ diọlinlẹnna Evi nado yí nukunpẹvi do pọ́n lehe ogbẹ̀ jiawu he Jehovah na ẹn lọ họakuẹ sọ podọ nado dovọ́na nukundagbe Etọn. To egbehe, Satani to vivẹnudo nado diọlinlẹnna gbẹtọ lẹ nado yise dọ ale de ma tin to ojlo Jiwheyẹwhe tọn wiwà mẹ. Ṣigba, Evi po asu etọn po wá mọ to nukọn mẹ dọ nukundagbe Jiwheyẹwhe tọn hinhẹnbu zẹẹmẹdo ogbẹ̀ yetọn hinhẹnbu. Mẹhe to apajlẹ ylankan yetọn hodo to egbehe lẹ lọsu na wá mọnukunnujẹ nugbo ehe mẹ to madẹnmẹ.—Gẹn. 3:1-7, 17-19.
20, 21. (a) Etẹwẹ asuṣiọsi Zalefati tọn lọ wà, podọ nawẹ nulẹ wá yì do na ẹn? (b) Naegbọn mí dona hodo apajlẹ asuṣiọsi Zalefati tọn lọ tọn, podọ gbọnna?
20 Lẹnnupọndo vogbingbọn he tin to kọdetọn ylankan he Adam po Evi po wá tindo gọna kọdetọn nujijọ he yin nùdego to bẹjẹeji gando Elija po asuṣiọsi Zalefati tọn lọ po go ṣẹnṣẹn ji. To whenue nawe lọ sè hogbe tulinamẹ tọn Elija tọn lẹ godo, e jẹ nudà ji bo na akla yẹwhegán lọ whẹ́, dile etlẹ yindọ núdùdù pẹvide wẹ e tindo. Enẹgodo, Jehovah hẹn opagbe he e do gbọn Elija gblamẹ lọ di. Kandai lọ dọmọ: “Ewọ, po e po, po owhé etọn po to dùdù azán susu. Odla linfin tọn lọ ma jẹvọ́, kavi aboun amì tọn lọ, kẹdẹdi ohó OKLUNỌ tọn, he e dọ gbọn Elija dè.”—1 Ahọ. 17:15, 16.
21 Asuṣiọsi Zalefati tọn lọ wà nude he omẹ vude poun to gbẹtọ liva susu he to gbẹnọ todin lẹ mẹ wẹ tindo ojlo nado wà. E deji mlẹnmlẹn do Jiwheyẹwhe whlẹngán tọn lọ go, podọ Jiwheyẹwhe sọ gọalọna ẹn. Kandai Biblu tọn ehe po devo lẹ po dohia dọ nuhe sọgbe wẹ e yin nado dejido Jehovah go. (Hia Jọṣua 21:43-45; 23:14.) Numimọ Kunnudetọ Jehovah tọn egbezangbe tọn lẹ tọn dohia yinukọn dogọ dọ ewọ ma na gbẹ́ mẹhe tindo nukundagbe etọn lẹ dai gbede.—Ps. 34:6, 7, 17-19. a
22. Naegbọn e do yin whẹho niyaniya tọn nado dín nukundagbe Jiwheyẹwhe tọn madọngbàn?
22 Azán whẹdida Jiwheyẹwhe tọn he na “wá mẹlẹpo he nọ nọ̀ nukunmẹ aigba tọn lẹpo ji” ko sẹpọ pete. (Luku 21:34, 35) Mẹdepope ma sọgan dapana ẹn. To ojlẹ enẹ mẹ, adọkunnu kavi hihọ́ he agbasanu lẹ nọ hẹnwa depope ma sọgan họakuẹ sọ oylọ-basinamẹ Whẹdatọ dide Jiwheyẹwhe tọn lọ tọn dọmọ: “Mì wá, mì mẹhe Otọ́ ṣie ko dona lẹ, mì dugu ahọluduta lọ tọn he ko yin awú etọn wle dai na mì.” (Mat. 25:34) Mọwẹ, ‘Jehovah na dona dodonọ, nukundagbe wẹ ewọ na yí lẹdo e pé di awọ̀yinu.’ (Ps. 5:12) Be e ma jẹ dọ mí ni dín nukundagbe Jiwheyẹwhe tọn ya?
[Nudọnamẹ odò tọn]
a Pọ́n Atọ̀họ̀-Nuhihọ́ lọ Tọn, 15 mars 2005, weda 13, hukan 15; Atọ̀họ̀-Nuhihọ́ lọ Tọn [Flansegbe] 1er août 1997, weda 20-25.
Be Hiẹ Flin Ya?
• Naegbọn Jehovah do jẹna sinsẹ̀n-bibasi ahundopo tọn mítọn?
• Avọ́sinsan tẹlẹ wẹ Jehovah nọ kẹalọyi to egbehe?
• Etẹwẹ hogbe lọ “avọ́nunina nùflo mítọn lẹ tọn” dlẹnalọdo, podọ naegbọn mí dona nọ na yé hlan Jehovah?
• Naegbọn mí dona dín nukundagbe Jiwheyẹwhe tọn?
[Kanbiọ Oplọn tọn lẹ]
[Yẹdide to weda 13]
Nudide titengbe tẹwẹ yẹwhegán Jiwheyẹwhe tọn zedonukọnna nawe agbátọnọ de?
[Yẹdide to weda 15]
Ale tẹwẹ avọ́sinsan pipà tọn bibasi hlan Jehovah nọ hẹnwa na mí?
[Yẹdide to weda 17]
Eyin a deji mlẹnmlẹn do Jehovah go, a ma na jẹflumẹ gbede
