Yí Ahun Towe Lẹpo Do Yiwanna Dodowiwa
Yí Ahun Towe Lẹpo Do Yiwanna Dodowiwa
“Hiẹ yiwanna dodo.”—PS. 45:7.
1. Etẹwẹ na gọalọna mí nado hodo “ali dodo tọn”?
JEHOVAH nọ yí Ohó po gbigbọ wiwe etọn po zan nado deanana omẹ etọn lẹ gbọn “ali dodo tọn” ji. (Ps. 23:3) Ṣigba, na mí yin mapenọ wutu, mí nọ wá zẹ̀ sọn ali enẹ ji. E nọ biọ vivẹnudido vẹkuvẹku nado lẹkọ do nuhe sọgbe wiwà kọ̀n. Etẹwẹ na gọalọna mí nado tindo kọdetọn dagbe? Taidi Jesu, mí dona yiwanna nuhe sọgbe wiwà.—Hia Psalm 45:7.
2. Etẹwẹ “ali dodo tọn” nọtena?
2 Etẹwẹ “ali dodo tọn” ehe nọtena? Hogbe Heblu tọn he yin lilẹdo “ali” tofi dlẹnalọdo ali bibó he ji afọzọ̀ntọ lẹ sọgan gbọn. E nọtena aliho gbẹninọ tọn he sọgbe hẹ nujinọtedo dodo Jehovah tọn lẹ. To Heblugbe po Glẹkigbe po mẹ, hogbe lọ “dodowiwa” nọ dlẹnalọdo ‘nuhe sọgbe wiwà,’ bosọ bẹ nunọwhinnusẹ́n walọ dagbe tọn lẹ hihodo pẹkipẹki hẹn. To whenuena e yindọ “fininọ dodo tọn” wẹ Jehovah, homẹ nọ hùn sinsẹ̀n-basitọ etọn lẹ nado lẹhlan ewọ dè nado sọgan yọ́n aliho walọ dagbe tọn he yé dona hodo.—Jel. 50:7.
3. Nawẹ mí sọgan plọn nususu gando dodowiwa Jiwheyẹwhe tọn go gbọn?
3 Mí sọgan hẹn homẹ Jiwheyẹwhe tọn hùn to gigọ́ mẹ, kiki eyin mí nọ dovivẹnu ahundopo tọn nado nọgbẹ̀ sọgbe hẹ nujinọtedo dodo etọn lẹ. (Deut. 32:4) Mí nọ bẹ ehe wiwà jẹeji gbọn nuhe go mí pé lẹpo pinplọn gando Jehovah Jiwheyẹwhe go to Ohó etọn Biblu mẹ dali. Dile mí to nuplọn gando Jehovah go bo to dindọnsẹpọ ẹ egbesọegbesọ do, mọ wẹ mí na yiwanna dodowiwa etọn do niyẹn. (Jak. 4:8) Mí sọ dona nọ kẹalọyi anademẹ Ohó gbọdo Jiwheyẹwhe tọn to whenue mí jlo na basi nudide titengbe gbẹ̀mẹ tọn lẹ.
Nọ Dín Dodowiwa Jiwheyẹwhe Tọn
4. Etẹwẹ dodowiwa Jiwheyẹwhe tọn dindin bẹhẹn?
4 Hia Matiu 6:33. Dodowiwa Jiwheyẹwhe tọn dindin bẹ nususu hẹn hugan whenu mítọn yiyizan nado dọyẹwheho wẹndagbe Ahọluduta lọ tọn. Eyin Jehovah na kẹalọyi sinsẹ̀nzọn wiwe mítọn, walọyizan mítọn lẹ dona tin to kọndopọ mẹ hẹ nujinọtedo yiaga etọn lẹ. Etẹwẹ mẹhe to dodowiwa Jehovah tọn dín lẹpo dona wà? Yé dona “ze gbẹtọ-yinyin yọyọ lọ do, ehe yin didá sọgbe hẹ ojlo Jiwheyẹwhe tọn to dodowiwa nugbo po nugbonọ-yinyin po mẹ.”—Efe. 4:24.
5. Etẹwẹ na gọalọna mí nado duto gbigbọjọ ji?
5 Dile mí to vivẹnudo nado nọgbẹ̀ sọgbe hẹ nujinọtedo dodo Jiwheyẹwhe tọn lẹ, mí sọgan gbọjọ to whedelẹnu na awugbopo mítọn lẹ wutu. Etẹwẹ sọgan gọalọna mí nado duto gbigbọjọ sinsinyẹn ji bo plọn nado yiwanna bosọ nọ wà dodo? (Howh. 24:10) Mí dona nọ “yí ahun jijlọ” do dọnsẹpọ Jehovah to odẹ̀ mẹ to gbesisọ mẹ “po jidide mlẹnmlẹn yise tọn po.” (Heb. 10:19-22) Vlavo mí yin Klistiani yiamisisadode kavi tindo todido aigba ji tọn, mí nọ do yise hia to avọ́sinsan ofligọ Jesu Klisti tọn mẹ podọ to sinsẹ̀nzọn he wà e te taidi Yẹwhenọ Daho mítọn mẹ. (Lom. 5:8; Heb. 4:14-16) Apọsteli Johanu wlan dọmọ: “Ohùn Jesu . . . tọn nọ klọ́ mí wé sọn ylando lẹpo mẹ.” (1 Joh. 1:6, 7) Eyin ylando mítọn lẹ tlẹ “bia, yé na wé taidi kẹ́nsu,” wẹ Biblu dọ. Awuwledainanu jiawu nankọ die Jehovah basina mí gbọn avọ́sinsan ofligọ Visunnu vivẹ́ etọn tọn gblamẹ!—Isa. 1:18.
Nọ Gbeje Gbaja Gbigbọmẹ Tọn Towe Pọ́n
6. Naegbọn e do yin nujọnu dọ mí ni nọ gbeje gbaja gbigbọmẹ tọn mítọn pọ́n?
6 Mí dona nọ ze “tùnudo dodowiwa tọn” do to whelẹponu, na adà titengbe gbaja gbigbọmẹ tọn he wá sọn Jiwheyẹwhe dè de wẹ e yin. (Efe. 6:11, 14) Vlavo agọe wẹ mí basi klandowiwe mítọn na Jehovah kavi mí ko yí owhe susu zan to sinsẹ̀nzọn etọn mẹ, nujọnu wẹ e yin dọ mí ni nọ gbeje gbaja gbigbọmẹ tọn mítọn pọ́n egbesọegbesọ. Etẹwutu? Na Lẹgba po aovi etọn lẹ po ko yin yinyan hlan lẹdo aigba tọn mẹ. (Osọ. 12:7-12) Satani to adi ji na e yọnẹn dọ whenu gli de wẹ pò na emi. Abajọ e do hẹn mẹgbeyinyan etọn do omẹ Jiwheyẹwhe tọn lẹ ji sinyẹn dogọ. Be mí mọnukunnujẹ nuhewutu e do yin nujọnu dọ mí ni nọ ze “tùnudo dodowiwa tọn” do to whepoponu mẹ ya?
7. Nawẹ mí na nọ yinuwa gbọn eyin mí yọnẹn dọ mí tindo nuhudo “tùnudo dodowiwa tọn”?
7 Dile tùnudo de nọ basi hihọ́na ahun do, mọ wẹ dodowiwa nọ basi hihọ́na ahun yẹhiadonu tọn mítọn do niyẹn. Na mapenọ-yinyin mítọn wutu, ahun mítọn yin oklenọ podọ tupinpẹnnọ. (Jel. 17:9) To whenuena e yindọ nuhe ylan wẹ ahun mítọn nọ saba whàn mí nado wà, nujọnu wẹ e yin dọ mí ni nọ plọnazọ́n ẹn bo nọ do mẹplọnlọ e go. (Gẹn. 8:21) Eyin mí yọnẹn dọ mí tindo nuhudo “tùnudo dodowiwa tọn,” mí ma na nọ de e sẹ̀ na ojlẹ de gbọn ayidedai he nọ bẹ nuhe Jiwheyẹwhe gbẹwanna lẹ hẹn dide dali; mọjanwẹ mí ma na nọ lẹnnupọndo ylanwiwa ji do niyẹn. Mí ma na nọ hẹn whenu họakuẹ mítọn susu gú nado pọ́n televiziọn. Kakatimọ, mí na to vivẹnudo zọnmii nado wà nuhe nọ hẹn homẹ Jehovah tọn hùn lẹ. Eyin e tlẹ wá jọ bọ mí dahli gbọn awujijona nulinlẹnpọn agọ̀ to agbasa-liho na ojlẹ de dali, mí nasọ fọ́n whladopo dogọ po alọgọ Jehovah tọn po.—Hia Howhinwhẹn lẹ 24:16.
8. Naegbọn mí do tindo nuhudo “awọ̀yinu daho yise tọn”?
8 “Awọ̀yinu daho yise tọn” yin apadewhe gbaja gbigbọmẹ tọn mítọn. E nọ hẹn mí penugo nado “ṣimiyọ́n ogá miyọ́nnọ mẹylankan lọ tọn lẹpo.” (Efe. 6:16) Gbọnmọ dali, yise po owanyi ahundopo tọn po tintindo na Jehovah nọ gọalọna mí nado nọ wà dodo bo gbọṣi aliho ogbẹ̀ madopodo tọn lọ ji. Lehe mí plọn nado yiwanna Jehovah sọ, mọ wẹ mí na yọ́n pinpẹn dodowiwa etọn tọn do niyẹn. Ṣigba etẹwẹ dogbọn ayihadawhẹnamẹnu mítọn dali? Nawẹ e nọ gọalọna mí to vivẹnudido mítọn nado yiwanna dodowiwa mẹ gbọn?
Hẹn Ayihadawhẹnamẹnu Dagbe de Go
9. Ale tẹwẹ mí nọ mọyi sọn ayihadawhẹnamẹnu dagbe de go hinhẹn mẹ?
9 To baptẹm mítọn whenu, mí biọ “ayihadawhẹnamẹnu dagbe de” Jehovah. (1 Pita 3:21) Na mí do yise hia to ofligọ lọ mẹ wutu, ohùn Jesu tọn ṣinyọnnudo ylando mítọn lẹ podọ ehe zọ́n bọ mí tindo teninọ wiwe de to Jiwheyẹwhe nukọn. Ṣigba, nado hẹn teninọ wiwe enẹ go, mí dona hẹn ayihadawhẹnamẹnu dagbe de go. Eyin ayihadawhẹnamẹnu mítọn nọ gblewhẹdo mí, bo nọ na mí avase to whedelẹnu, mí dona dopẹ́ dọ e to azọ́nwa ganji. Nuflinmẹ mọnkọtọn lẹ dohia dọ ayihadawhẹnamẹnu mítọn ma ko kúatli gando aliho dodo Jehovah tọn lẹ go. (1 Tim. 4:2) Ṣigba nudevo tin he ayihadawhẹnamẹnu sọ sọgan wà na mẹhe jlo na yiwanna dodowiwa lẹ.
10, 11. (a) Dọ numimọ dopo he do nuhewutu mí dona nọ dotoaina ayihadawhẹnamẹnu mítọn he yin pinplọn gbọn Biblu dali hia. (b) Naegbọn wanyina dodowiwa sọgan hẹn ayajẹ daho wá na mí?
10 Eyin mí wà nuhe ma sọgbe, ayihadawhẹnamẹnu mítọn sọgan gblewhẹdo mí kavi dotukla mí. Di apajlẹ jọja de danbú sọn “ali dodo tọn” ji. E wá yí yẹdide fẹnnuwiwa tọn pinpọn do dó aṣa bo jẹ marijuana nù ji. E nọ tindo numọtolanmẹ whẹhuhu tọn to whenue e yì opli lẹ podọ e nọ mọ ede taidi yẹnuwatọ de eyin e to mahẹ tindo to sinsẹ̀nzọn kunnudegbe tọn mẹ, enẹwutu e doalọtena nuwiwa Klistiani tọn ehelẹ. E dọmọ: “N’ma tlẹ yọnẹn dọ ayihadawhẹnamẹnu ṣie na wá hẹn mi nado dogbè nuhe n’wà lẹ tọn.” E yidogọ dọmọ: “N’zan gbẹzan nulú tọn enẹ na nudi owhe ẹnẹ.” Enẹgodo, e jẹ nulẹnpọn ji nado lẹkọwa nugbo lọ mẹ. Dile e tlẹ lẹndọ Jehovah ma na sè odẹ̀ emitọn, e saa hodẹ̀ bo biọ jona. To nuhe ma pé nukunwhiwhe ao godo, onọ̀ etọn wá dla ẹ pọ́n bo na ẹn tuli nado gọ̀ opli lẹ bẹ. E yì Plitẹnhọ Ahọluduta tọn mẹ bo biọ to mẹho de si nado plọnnu hẹ ẹ. E yí baptẹm to ojlẹ kleun de godo, podọ e nọ dopẹna Jehovah na ewọ whlẹn ogbẹ̀ etọn.
11 Be mì ma mọdọ nuhe sọgbe wiwà sọgan hẹn ayajẹ daho wá na mí ya? Dile mí to pinplọn nado yiwanna bo nọ wà dodo to gigọ́ mẹ, mí na mọ ayajẹ susu to nuhe nọ hùnhomẹ na Otọ́ olọn mẹ tọn mítọn wiwà mẹ. Yí nukun homẹ tọn do pọ́n! Ojlẹ lọ ja to whenue ayihadawhẹnamẹnu gbẹtọvi lẹpo tọn na nọ hẹn ayajẹ kẹdẹ wá na yé bọ yé na do apajlẹ Jiwheyẹwhe tọn hia to pipé mẹ. Enẹwutu, mì gbọ mí ni dike wanyina dodowiwa ni doadọ̀do to ahun mítọn mẹ bo hẹn homẹ Jehovah tọn hùn.—Howh. 23:15, 16.
12, 13. Nawẹ mí sọgan plọn ayihadawhẹnamẹnu mítọn gbọn?
12 Etẹwẹ mí sọgan wà nado plọn ayihadawhẹnamẹnu mítọn? To whenue mí to Owe-wiwe po owe sinai do Biblu ji mítọn lẹ po plọn, nujọnu wẹ e yin nado nọ flindọ ‘ayiha dodonọ tọn nọ lẹnayihamẹpọn nado gblọn.’ (Howh. 15:28) Lẹnnupọndo lehe mí nọ mọaleyi sọn ehe mẹ do to whenue mí pehẹ whẹho he gando agbasazọ́n go lẹ ji. Eyin e họnwun dọ azọ́n de jẹagọdo nubiọtomẹsi Owe-Wiwe tọn lẹ, suhugan mítọn wẹ nọ yawu hodo anademẹ pipli afanumẹ nugbonọ podọ nuyọnẹntọ lọ tọn. Ṣigba, to whenue e ma họnwun na mí eyin agbasazọ́n de sọgbe nado kẹalọyi kavi lala, mí dona dín nunọwhinnusẹ́n Biblu tọn he gandego lẹ bo lẹnnupọndo yé ji to odẹ̀ mẹ. a Mí sọ dona lẹnnupọndo nunọwhinnusẹ́n delẹ ji taidi nuhudo lọ ma nado hẹn ayihadawhẹnamẹnu mẹdevo lẹ tọn hoapa. (1 Kọl. 10:31-33) Na taun tọn, nunọwhinnusẹ́n he gando haṣinṣan mítọn hẹ Jiwheyẹwhe go lẹ dona nọ duahunmẹna mí. Eyin Jehovah yin omẹ nujọnu tọn de na mí, onú tintan he mí dona kanse míde wẹ yindọ, ‘Be azọ́n ehe wiwà na hẹn homẹgble Jehovah bo hẹn awufiẹsa wá na ẹn wẹ ya?’—Ps. 78:40, 41.
13 To whenuena mí to awuwlena Oplọn Atọ̀họ̀-Nuhihọ́ lọ Tọn kavi Biblu Pinplọn Agun tọn, mí dona hẹn do ayiha mẹ dọ nujọnu wẹ e yin nado nọ lẹnayihamẹpọn do nudọnamẹ he yé bẹhẹn lẹ ji. Be mí nọ yawu zẹhù do gblọndo kanbiọ de tọn glọ bo nọ yì hukan devo ji wẹ ya? Awuwiwle to aliho mọnkọtọn mẹ ma sọgan hẹn owanyi mítọn na dodowiwa siso dogọ kavi hẹn ayihadawhẹnamẹnu mítọn do ogbẹ̀ gba. Eyin mí na yiwanna dodowiwa, mí dona nọ yí sọwhiwhe do plọnnu bo nọ lẹnayihamẹpọn do nuhe mí hia to Ohó Jiwheyẹwhe tọn mẹ lẹ ji. Pinplọn nado yiwanna dodowiwa po ahun mítọn lẹpo po nọ biọ vivẹnudido!
Mẹhe Huvẹ po Nugbla Dodowiwa Tọn po to Hùhù Lẹ
14. Numọtolanmẹ tẹwẹ Jehovah Jiwheyẹwhe po Jesu Klisti po jlo dọ mí ni tindo gando sinsẹ̀nzọn wiwe mítọn go?
14 Jehovah Jiwheyẹwhe po Jesu Klisti po jlo dọ mí ni tindo ayajẹ dile mí to sinsẹ̀nzọn wiwe mítọn hẹndi. Etẹwẹ na yidogọna ayajẹ mítọn? Wanyina dodowiwa wẹ! To Yẹwhehodidọ Osó ji tọn lọ mẹ, Jesu dọmọ: “Ayajẹnọ wẹ mẹhe huvẹ po nugbla dodowiwa tọn po to hùhù lẹ, na yé na yin pekọhẹnwana.” (Mat. 5:6) Etẹwẹ hogbe ehelẹ zẹẹmẹdo na mẹhe yiwanna dodowiwa lẹ?
15, 16. Aliho tẹlẹ mẹ wẹ mẹhe huvẹ po nugbla gbigbọmẹ tọn po to hùhù lẹ na yin pekọhẹnwana te?
15 Mẹylankan lọ wẹ to anadena aihọn he mẹ mí to gbẹnọ te ehe. (1 Joh. 5:19) Eyin mí hia linlinwe de to otò depope mẹ, mí nọ mọ linlin kanyinylan po danuwiwa he sẹhundaga po tọn lẹ. Eyin dodonọ de mọ kanyinylan he gbẹtọvi lẹ nọ hẹnwa ode awetọ ji, e nọ dotukla ẹ. (Yẹwh. 8:9) Na mí mẹhe yiwanna Jehovah lẹ, mí yọnẹn dọ ewọ kẹdẹ wẹ sọgan hẹn pekọ wá na huvẹ po nugbla gbigbọmẹ tọn mẹhe jlo na plọn dodowiwa lẹ po tọn. Gbẹtọ jijọ-madi-Jiwheyẹwhe lẹ na yin didesẹ to madẹnmẹ, podọ mẹhe yiwanna dodowiwa lẹ ma nasọ tindo numimọ tukla tọn he nọ yin hinhẹnwa yé ji gbọn mẹhe nọ diọnukunsọ osẹ́n lẹ po nuyiwa ylankan yetọn lẹ po dali ba. (2 Pita 2:7, 8) Kọgbọ nankọ die enẹ na yin!
16 Taidi devizọnwatọ Jehovah tọn po hodotọ Jesu Klisti tọn lẹ po, mí yọnẹn dọ mẹhe huvẹ po nugbla dodowiwa tọn po to hùhù lẹ “na yin pekọhẹnwana.” Yé na yin pekọhẹnwana to gigọ́ mẹ gbọn tito Jiwheyẹwhe tọn gando olọn yọyọ lẹ po aigba yọyọ lọ po he mẹ “dodowiwa na nọ nọ̀” go gblamẹ. (2 Pita 3:13) Enẹwutu, mì dike kọgbidinamẹ po danuwiwa po he yitẹn to dodowiwa si to aihọn Satani tọn ehe mẹ ni paṣa mí kavi hẹn mí gbọjọ blo. (1 Sam. 26:23a) Jehovah Gigogán lọ, yọ́n nuhe to jijọ podọ ewọ nasọ whlẹn mẹhe yiwanna dodowiwa lẹ to madẹnmẹ.
Ale He Wanyina Dodowiwa Nọ Hẹnwa
17. Etẹwẹ yin delẹ to ale he nọ wá sọn wanyina dodowiwa mẹ lẹ mẹ?
17 Psalm 146:8 zinnudo ale titengbe he nọ wá sọn aliho dodowiwa tọn hihodo mẹ de ji. Psalm-kantọ lọ jihàn dọmọ: “OKLUNỌ yiwanna dodonọ lẹ.” Yí nukun homẹ tọn do pọ́n! Nupojipetọ wẹkẹ lọ tọn yiwanna mí na mí yiwanna dodowiwa wutu! Na owanyi he Jehovah tindo na mí wutu, mí deji dọ ewọ na penukundo nuhudo agbasa tọn mítọn lẹ go dile mí to nuhe gando Ahọluduta lọ go lẹ zedo otẹn tintan mẹ to gbẹzan mítọn mẹ. (Hia Psalm 37:25; Howhinwhẹn lẹ 10:3.) To godo mẹ, aigba lọ blebu na lẹzun mẹhe yiwanna dodowiwa lẹ tọn. (Howh. 13:22) Na suhugan omẹ Jiwheyẹwhe tọn lẹ tọn, yé na tindo ayajẹ mayọnjlẹ po ogbẹ̀ madopodo po to aigba whanpẹnọ paladisi tọn de ji taidi ahọsumẹ na dodowiwa yetọn. Etlẹ yin to alọnu din, mẹhe yiwanna dodowiwa Jiwheyẹwhe tọn lẹ nọ tindo jijọho ahun mẹ tọn he nọ yidogọna pọninọ to whẹndo yetọn mẹ podọ to agun yetọn mẹ.—Flp. 4:6, 7.
18. Etẹwẹ mí dona zindonukọn nado to wiwà dile mí to tenọpọn azán Jehovah tọn?
18 Dile mí to tenọpọn wiwá azán daho Jehovah tọn, mí dona to dodowiwa etọn dín zọnmii. (Zẹf. 2:2, 3) Enẹwutu, mì gbọ mí ni nọ do owanyi ahundopo tọn hia na aliho jijlọ Jehovah Jiwheyẹwhe tọn lẹ. Enẹ biọ dọ mí ni nọ do “tùnudo dodowiwa tọn” mítọn ganji to whepoponu nado sọgan basi hihọ́na ahun yẹhiadonu tọn mítọn. Mí sọ dona hẹn ayihadawhẹnamẹnu dagbe de go—ehe na hẹn ayajẹ wá na mí bo na hẹn homẹ Jiwheyẹwhe tọn hùn.—Howh. 27:11.
19. Etẹwẹ mí dona magbe nado wà, podọ etẹwẹ mí na gbadopọnna to hosọ he bọdego mẹ?
19 “Nukun [Jehovah] tọn lẹ to godo po nukọn po yì lẹdo aigba lẹpo pete, nado do ede hia huhlọnnọ na ayiha yé mẹhe tọn yin pipé hlan e dè lẹ tọn wutu.” (2 Otan. 16:9) Lehe hogbe ehelẹ yin homẹmiọnnamẹnu na mí dile mí to nuhe sọgbe wà to aihọn ylankan he mẹ hunyanhunyan, danuwiwa po kanyinylan po to jijideji te ehe mẹ do sọ! Na nugbo tọn, dodowiwa mítọn sọgan nọ paṣa susu mẹhe jẹla sọn Jiwheyẹwhe dè lẹ tọn. Ṣigba, mí nọ mọ ale susu yí gbọn dodowiwa Jehovah tọn hihodo pẹkipẹki dali. (Isa. 48:17; 1 Pita 4:4) Enẹwutu, mì gbọ mí ni magbe nado zindonukọn to wanyina dodowiwa po ahun mítọn lẹpo po mẹ bo nọ do e hia to walọyizan mítọn mẹ, ehe na hẹn ayajẹ wá na mí. Ṣigba, ahundopo tintindo sọ nọ biọ dọ mí ni gbẹwanna sẹ́nhẹngba. Hosọ he bọdego na do nuhe ehe zẹẹmẹdo hia mí.
[Nudọnamẹ odò tọn]
a Na nudọnamẹ dogọ do nunọwhinnusẹ́n Biblu tọn he gando whẹho agbasazọ́n tọn lẹ go ji, pọ́n Atọ̀họ̀-Nuhihọ́ lọ Tọn 15 avril 1999, weda 28-30.
Nawẹ Hiẹ Na Na Gblọndo Gbọn?
• Eyin mí na yiwanna dodowiwa, naegbọn e do yin dandannu dọ mí ni yọ́n pinpẹn ofligọ lọ tọn?
• Naegbọn e do yin nujọnu dọ mí ni nọ do “tùnudo dodowiwa tọn”?
• Nawẹ mí sọgan plọn ayihadawhẹnamẹnu mítọn gbọn?
[Kanbiọ Oplọn tọn lẹ]
[Yẹdide to weda 26]
Ayihadawhẹnamẹnu he yin pinplọn ganji nọ gọalọna mí nado didẹ whẹho he gando agbasazọ́n go lẹ
