Dejido Jehovah Go Dile Opodo lọ to Sisẹpọ
Dejido Jehovah Go Dile Opodo lọ to Sisẹpọ
‘Mì dejido OKLUNỌ go kakadoi.’—ISA. 26:4.
1. Vogbingbọn tẹwẹ tin to devizọnwatọ Jiwheyẹwhe tọn lẹ po aihọnmẹnu lẹ po ṣẹnṣẹn?
AIHỌN he mẹ gbẹtọ livi susu masọ yọ́n mẹhe kavi nuhe go yé na dejido ba de mẹ wẹ mí to gbẹnọ te, vlavo na whlasusu wẹ yé ko yin nuyiwa hẹ to aliho agọ̀ mẹ kavi yin hinhẹn jẹflumẹ wutu. Lehe ninọmẹ devizọnwatọ Jehovah tọn lẹ tọn gbọnvo do sọ! Na nuyọnẹn Jiwheyẹwhe tọn nọ deanana yé wutu, yé yọnẹn dọ mẹde tin he go yé sọgan dejido kakati nido yin aihọn kavi “ahọvi lẹ.” (Ps. 146:3) Yé nọ ze ogbẹ̀ po sọgodo yetọn po do alọ Jehovah tọn mẹ, na yé yọnẹn dọ ewọ yiwanna yé podọ Ohó etọn nọ mọ hẹndi janwẹ.—Lom. 3:4; 8:38, 39.
2. Etẹwẹ Jọṣua dọ he dohia dọ mí sọgan dejido Jiwheyẹwhe go?
2 Jọṣua hohowhenu tọn dekunnuna dọ mí sọgan dejido Jiwheyẹwhe go. Sẹpọ vivọnu gbẹzan etọn tọn, e dọna Islaelivi hatọ etọn lẹ dọmọ: “Mìwlẹ sọ yọnẹn to ayiha mìtọn lẹpo mẹ podọ to gbigbọ mìtọn lẹpo mẹ, dọ onú dopo ma gbòpò sọn nudagbe he OKLUNỌ Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì.”—Jọṣ. 23:14.
3. Etẹwẹ oyín Jiwheyẹwhe tọn dohia gando edetiti go?
3 E ma yindọ Jehovah nọ hẹn opagbe etọn lẹ di na e yiwanna devizọnwatọ etọn lẹ wutu poun wẹ gba, ṣigba titengbe na oyín etọn wutu. (Eks. 3:14; 1 Sam. 12:22) Homẹbibiọ The Emphasized Bible tọn he J.B. Rotherham kàn, basi zẹẹmẹ dọ oyín Jiwheyẹwhe tọn zẹẹmẹdo dọ Jiwheyẹwhe sọgan lẹzun nudepope nado hẹn opagbe etọn lẹ di. Eyin mí sè oyín etọn, enẹ nọ flin mí dọ e nọ hẹn nuhe e dọ lẹ di to whepoponu. E sọgan wà nuhe e jlo na wà to ojlẹ depope mẹ podọ to fidepope. Nude ma glo e. Jiwheyẹwhe nọ wanu sọgbe hẹ oyín etọn janwẹ.
4. (a) Etẹwẹ Isaia 26:4 dotuhomẹna mí nado wà? (b) Etẹlẹ wẹ mí na gbadopọnna to hosọ ehe mẹ?
4 Kanse dewe dọ: ‘Be n’yọ́n Jehovah sọmọ bọ n’sọgan dejido ewọ go mlẹnmlẹn ya?’ Be n’nọ pọ́n sọgodo hlan po jidide po dọ Jiwheyẹwhe to anadena nulẹ to gigọ́ mẹ ya?’ Isaia 26:4 dọmọ: ‘Mì dejido OKLUNỌ go kakadoi: na OKLUNỌ Jehovah mẹ wẹ Osé madopodo lọ te.’ Nugbo wẹ dọ to egbehe, Jiwheyẹwhe masọ nọ dádo whẹho gbẹtọvi lẹ tọn mẹ to azọ́njiawu-liho kẹdẹdile e wà do to nujijọ delẹ mẹ to ojlẹ Biblu tọn lẹ mẹ ba. Etomọṣo, taidi ‘Osé madopodo lọ,’ mí sọgan dejido ewọ go ‘kakadoi.’ Nawẹ Jiwheyẹwhe mítọn he go mí sọgan dejido lọ nọ gọalọna sinsẹ̀n-basitọ nugbo etọn lẹ to egbehe gbọn? Mì gbọ mí ni gbadopọnna aliho atọ̀n: E nọ na mí huhlọn to whenue mí biọ alọgọ etọn nado nọavùnte sọta whlepọn, e nọ nọgodona mí to whenue mí pehẹ ojlo matindo kavi nukundiọsọmẹ tlọlọ, podọ e sọ nọ na mí huhlọn to whenue mí to pipehẹ magbọjẹ gbẹ̀mẹ tọn lẹ. Dile mí na to dogbapọnna adà ehelẹ, tẹnpọn nado lẹnnupọndo lehe a sọgan hẹn jidide towe do Jehovah go sinyẹn deji do ji.
Nọ Dejido Jiwheyẹwhe Go to Whenue A Yin Whiwhlepọn Nado Waylan
5. Whẹho tẹ mẹ wẹ jidide mítọn do Jiwheyẹwhe go sọgan kàn dẹpẹ biọ te?
5 Onú dopo wẹ nado dejido Jehovah go na nuhe dù opagbe etọn gando Paladisi kavi fọnsọnku go—yèdọ nuhe mí to jejeji na lẹ. Ṣigba, nudevo pete wẹ nado dejido ewọ go to whẹho walọyizan tọn lẹ mẹ, bo kudeji mlẹnmlẹn dọ tonusisena nujinọtedo etọn lẹ sọgbe bo nasọ hẹn ayajẹ daho hugan wá na mí. Ahọlu Sọlomọni basi kandai tudohomẹnamẹ ehe tọn dọmọ: “Yí ayiha towe do [dejido] OKLUNỌ go; a dẹ́ hlan dewe tọn dali blo. Yọnẹn to aliho towe lẹpo ji, ewọ nasọ jlọ omọ́ towe.” (Howh. 3:5, 6) Doayi hogbe lọ lẹ “aliho” po “omọ́” mítọn lẹ po go. Mọwẹ, gbẹzan mítọn blebu wẹ dona nọ dohia dọ mí dejido Jiwheyẹwhe go—e ma yin todido Klistiani tọn mítọn kẹdẹ gba. To whenue whlepọn lẹ fọ́n, nawẹ mí sọgan dohia dọ mí dejido Jiwheyẹwhe go gbọn?
6. Nawẹ mí sọgan hẹn gbemima mítọn nado gbẹ́ linlẹn ylankan lẹ dai sinyẹn deji gbọn?
6 Eyin mí na gbẹkọ oylan go, mí dona gbẹwanna ẹn sọn ayiha mẹ. (Hia Lomunu lẹ 8:5; Efesunu lẹ 2:3.) To whelọnu lo, nawẹ hiẹ sọgan hẹn gbemima towe sinyẹn deji nado gbẹ́ linlẹn ylankan lẹ dai gbọn? Gbọ mí ni gbadopọnna aliho atọ́n: 1. Nọ biọ alọgọ Jiwheyẹwhe tọn to odẹ̀ mẹ. (Mat. 6:9, 13) 2. Nọ lẹnayihamẹpọn do apajlẹ mẹhe nọgbẹ̀ to ojlẹ Biblu tọn mẹ bo vẹtolina Jehovah po mẹhe setonuna ẹn lẹ po tọn ji. Enẹgodo, doayi kọdetọn yetọn go. a (1 Kọl. 10:8-11) 3. Nọ lẹnnupọndo awugble he ylando sọgan hẹnwa hiẹ po mẹyiwanna towe lẹ po ji to apọ̀nmẹ podọ to numọtolanmẹ-liho. 4. Nọ lẹnayihamẹpọn do nuhe na yin numọtolanmẹ Jiwheyẹwhe tọn ji to whenue dopo to devizọnwatọ etọn lẹ mẹ jai jẹ ylando sinsinyẹn mẹ. (Hia Psalm 78:40, 41.) 5. Nọ lẹnnupọndo ayajẹ he Jehovah nọ tindo ji to whenue e mọdọ devizọnwatọ nugbonọ etọn de gbẹ́ oylan dai bo wà nuhe sọgbe to gbangba kavi to nuglọ. (Ps. 15:1, 2; Howh. 27:11) Hiẹ lọsu sọgan dohia dọ emi dejido Jehovah go.
Nọ Dejido Jiwheyẹwhe Go to Whenue A Pehẹ Ojlo Matindo po Nukundiọsọmẹ Po
7. Whlepọn tẹlẹ wẹ Jelemia pehẹ, podọ etẹwẹ yin numọtolanmẹ etọn to whedelẹnu?
7 Susu mẹmẹsunnu mítọn lẹ tọn wẹ nọ dekunnu to aigba-denamẹ he kàn dẹpẹ biọ lẹ ji. Lẹdo mọnkọtọn mẹ wẹ yẹwhegán Jelemia wadevizọn te—enẹ wẹ to ahọluduta Juda tọn mẹ to azán godo tọn hunyanhunyan tọn tòdaho lọ tọn lẹ mẹ. Na e gbọn tonusise dali lá owẹ̀n whẹdida Jiwheyẹwhe tọn wutu, egbesọegbesọ wẹ jidide etọn do Jehovah go nọ yin whiwhlepọn. E tlẹ wá jọ bọ wekantọ nugbonọ etọn, Baluki wule, na apọ̀ ṣì i wutu. (Jel. 45:2, 3) Be Jelemia gbọjọ wẹ ya? Nado dọ hójọhó, e tindo ayimajai sinsinyẹn to nujijọ de whenu. “Dẹ̀hodo ni tin na azán he mẹ yè ji mi te,” wẹ e dawhá dọ. “Etẹwutu wẹ yẹn tọ́njẹgbonu wá sọn adọ̀mẹ nado to tuklajẹ po awubla po mọ, na azán ṣie lẹ nido yin vivasudo po winyan po?”—Jel. 20:14, 15, 18.
8, 9. Sọgbe hẹ Jelemia 17:7, 8 po Psalm 1:1-3 po, etẹwẹ mí dona wà nado to sinsẹ́n dagbe detọ́n zọnmii?
8 Etomọṣo, Jelemia ma jogbe. E gbẹ́ to jidedo Jehovah go janwẹ. Taidi kọdetọn de, yẹwhegán nugbonọ ehe tindo numimọ hogbe Jehovah tọn he tin to Jelemia 17:7, 8 mẹ tọn dọmọ: “Donanọ wẹ mẹlọ he [dejido] OKLUNỌ go, podọ [jidide] mẹhe tọn OKLUNỌ yin. Na ewọ na tin di atin yè do to osin lẹ dali de, podọ ehe dlẹn adọ̀ etọn lẹ jẹgbonu to otọ̀ dali bo ma na mọ whenuena yozò wá, ṣigba amà etọn na yin omú; bo ma na yin tuklanọ to owhè akúdido lọ tọn mẹ, mọ bo ma nasọ doalọte sọn sinsẹ́n [didetọn] mẹ.”
9 Taidi atin he “yè do to osin lẹ dali” kavi jipa atin-sinsẹ́n tọn he to osinwhín lẹ tó bo nọ de sinsẹ́n susu tọ́n de, mọ wẹ Jelemia ‘ma doalọte sọn sinsẹ́n didetọn mẹ’ do niyẹn. E ma dike mẹṣankotọ ylankan he lẹdo e lẹ ni yinuwado e ji. Kakatimọ, e tẹdo Asisa “osin” ogbẹ̀ tọn go bo hẹn nuhe Jehovah dọna ẹn lẹpo do ayiha mẹ. (Hia Psalm 1:1-3; Jel. 20:9) Apajlẹ dagbe nankọ die Jelemia zedai na mí, titengbe na mí mẹhe nọ dekunnu gando Jiwheyẹwhe go to aigba-denamẹ he kàn dẹpẹ biọ lẹ ji! Eyin ninọmẹ he mẹ a tin te niyẹn, zindonukọn nado ganjẹ Jehovah go, yèdọ mẹhe na na we akọndonanu nado “nọ basi gbeyiyi gbangba tọn na oyín etọn.”—Heb. 13:15.
10. Dona tẹlẹ wẹ tin-to-aimẹ na mí, podọ kanbiọ tẹwẹ mí dona kanse mídelẹ?
10 Jehovah ko wleawu onú gbigbọmẹ tọn susu he na gọalọna mí nado pehẹ nuhahun gbẹ̀mẹ tọn lẹ to azán godo tọn ehelẹ mẹ tọn dai na mí. Ohó Jiwheyẹwhe tọn blebu he to yinyin lilẹdo ogbè susu mẹ po gbesisọ po yin dopo to awuwledainanu ehelẹ mẹ. E nọ wleawu núdùdù gbigbọmẹ tọn susu he nọ wá do gànmẹ dai na mí gbọn hagbẹ afanumẹ nugbonọ podọ nuyọnẹntọ lọ gblamẹ. Humọ, e wleawu gbẹdohẹmẹtọ dagbe he yin pipli yisenọ hatọ lẹ tọn he nọ na mí tuli to opli po plidopọ lẹ po ji tọn dai na mí. Be a nọ duvivi awuwledainanu ehelẹ tọn to gigọ́ mẹ ya? Mẹhe nọ wàmọ lẹpo “na jihàn na homẹvivi ayiha tọn.” Ṣigba, mẹhe nọ vẹtolina Jiwheyẹwhe lẹ “na dawhá na awubla ayiha tọn, bosọ wẹnhun na awubla gbigbọ tọn.”—Isa. 65:13, 14.
Nọ Dejido Jiwheyẹwhe Go to Whenue A to Pipehẹ Magbọjẹ Gbẹ̀mẹ Tọn Lẹ
11, 12. Po nuhahun he gbẹtọvi lẹ to pipehẹ to aihọn lọ mẹ lẹ po, etẹwẹ nuyọnẹn nujọnu tọn biọ to mí si?
11 Dile dọdai lẹ ko dohia do, gbẹtọvi lẹ to pipehẹ dindọn kavi nuhahun he fọ́n bo to susudeji lẹ. (Mat. 24:6-8; Osọ. 12:12) To paa mẹ, eyin otọ̀ gọ́ bo gbànú to fide, gbẹtọ lẹ nọ họ̀n jẹ agé kavi hẹ họta—yèdọ fidepope he yiaga nado mọ hihọ́. Mọdopolọ, dile nuhahun aihọn tọn lẹ fọ́n bo to sinsinyẹn deji, livi susu gbẹtọ lẹ tọn nọ dín hihọ́ to fie yé nọ pọnhlan taidi fie yiaga lẹ mẹ—enẹ wẹ to akuẹ, tonudidọ kavi sinsẹ̀n gọna lẹnunnuyọnẹn po azọ́n nuyọnẹn wintinwintin tọn po mẹ. Ṣigba depope to onú ehelẹ mẹ ma nọ hẹn hihọ́ nujọnu tọn wá. (Jel. 17:5, 6) Na taun tọn, fibẹtado dejidego de tin na devizọnwatọ Jehovah tọn lẹ—enẹ wẹ ‘Osé madopodo lọ.’ (Isa. 26:4) Psalm-kantọ lọ dọmọ: “[Jehovah] wẹ osó ṣie po whlẹngán ṣie po; atọ̀họ̀ ṣie he yiaga.” (Hia Psalm 62:6-9.) Nawẹ mí sọgan dín fibẹtado to Osé ehe mẹ gbọn?
12 Mí nọ tẹdo Jehovah go to whenue mí setonuna Ohó etọn he nọ saba gbọnvona nuyọnẹn gbẹtọ tọn. (Ps. 73:23, 24) Di apajlẹ, mẹhe nuyọnẹn gbẹtọ tọn nọ deanana lẹ nọ dọ dọ: ‘Ogbẹ̀ ma pé awe; dugbẹ towe do mẹwhenu.’ ‘Doafọna yanwle dagbe de.’ ‘Dín akuẹ.’ ‘Họ̀ ehe bo họ̀ dọ́n tọn.’ ‘Nọ tọ́nwhẹ̀n bo dugbẹ.’ Ṣigba, nuyọnẹn Jiwheyẹwhe tọn tin to kọndopọ mẹ hẹ ayinamẹ ehe dọmọ: “[Mì gbọ] mẹhe to aihọn lọ zan lẹ [ni] taidi mẹhe ma to zinzan ẹn to gigọ́ mẹ; na ninọmẹ aihọn ehe tọn to didiọ.” (1 Kọl. 7:31) Mọdopolọ, Jesu dotuhomẹna mí nado nọ ze Ahọluduta lọ do otẹn tintan mẹ to whepoponu bo gbọnmọ dali bẹ “adọkunnu lẹ pli na mìde do olọn mẹ,” fie yé ma na gble paali te.—Mat. 6:19, 20.
13. Sọgbe hẹ 1 Johanu 2:15-17, kanbiọ tẹlẹ wẹ mí dona kanse mídelẹ?
13 Be pọndohlan towe gando “aihọn” po “onú he tin to aihọn mẹ lẹ” po go nọ dohia dọ a dejido Jiwheyẹwhe go mlẹnmlẹn ya? (1 Joh. 2:15-17) Be gbigbọnu lẹ po lẹblanulọkẹyi sinsẹ̀nzọn tọn lẹ po họakuẹ kavi yin nujọnu na we hugan nuhe aihọn nọ zedonukọnnamẹ lẹ ya? (Flp. 3:8) Be a nọ tẹnpọn nado hẹn “nukun towe tin to fidopo” ya? (Mat. 6:22) Nugbo wẹ dọ Jiwheyẹwhe ma jlo dọ mí ni lẹzun vọdonanutọ, titengbe eyin mí tindo whẹndo he go mí dona penukundo. (1 Tim. 5:8) Ṣigba, ewọ biọ to devizọnwatọ etọn lẹ si nado dejido ewọ go mlẹnmlẹn kakati nido yin do aihọn Satani tọn he to kúkú jei ehe go.—Heb. 13:5.
14-16. Ale tẹlẹ wẹ mẹhe hẹn “nukun [yetọn] tin to fidopo” bo ze Ahọluduta lọ do otẹn tintan mẹ delẹ mọyi?
14 Lẹnnupọndo apajlẹ Richard po Ruth po tọn ji, yèdọ mẹjitọ he tindo ovi flinflin atọ̀n. Richard dọmọ: “N’nọ tindo numọtolanmẹ sinsinyẹn dọ n’sọgan wà susu dogọ na Jehovah. Onú pọnte na mi taun, ṣigba n’nọ mọdọ onú vude poun wẹ n’to wiwà na Jiwheyẹwhe. To whenue yẹn po asi ṣie Ruth po hodẹ̀ do whẹho lọ ji bo wá gbèta dopo kọ̀n godo, mí kọngbedopọ dọ n’na biọ to ogán ṣie si nado de azán ẹnẹ pò na mi to sẹmẹsẹmẹ—dile etlẹ yindọ nulẹ vẹahi taun to otò lọ mẹ. Ogán ṣie yigbe bọ n’bẹ azọ́n sọgbe hẹ tito yọyọ ṣie to osun dopo gblamẹ.” Etẹwẹ yin numọtolanmẹ Richard tọn todin?
15 E dọmọ: “Sunmẹ-kuẹ ṣie yí whla 20 do whè hugan dehe n’ko nọ dù dai, ṣigba n’mọ azán 50 dogọ to whemẹwhemẹ nado nọ nọpọ́ hẹ whẹndo ṣie bo plọnnu hẹ ovi ṣie lẹ. Ehe gọalọna mi bọ ojlẹ he n’nọ yizan nado tọ́n na sinsẹ̀nzọn kunnudegbe tọn jideji whla awe hugan dai tọn bọ plọnmẹ Biblu ṣie lẹ yí whla atọ̀n do hugan dehe n’tindo dai, humọ n’didá azọngban pinpẹn lẹ to agun mẹ. Podọ, na n’tindo whenu susu dogọ todin nado gọalọna ovi mítọn lẹ wutu, Ruth nọ penugo nado basi gbehosọnalitọ alọgọtọ tọn sọn ojlẹ de mẹ jẹ devo mẹ. Gbemima ṣie wẹ nado hẹn tito ehe go na ojlẹ dindẹn dile e na yọnbasi do.”
16 Roy po Petina po he viyọnnu yetọn dopo gbẹ́ pò to whégbè hẹ yé, de azán he yé do nọ wà agbasazọ́n pò, na yé nido sọgan tindo mahẹ to lizọnyizọn whenu-gigọ́ tọn lọ mẹ. Roy dọ dọ: “Azán atọ̀n wẹ n’do nọ wazọ́n to sẹmẹsẹmẹ podọ Petina nọ wazọ́n na azán awe. Humọ, mí sẹtẹn sọn ohọ̀ he mẹ mí nọ nọ̀ yì ohọ̀ devo he bọawuna mí nado penukundego de mẹ. Whẹpo mí do ji visunnu po viyọnnu mítọn po wẹ mí penugo nado basi gbehosọnalitọ, podọ mí ma hẹn ojlo he mí tindo na gbehosọnalitọ bibasi bu pọ́n gbede. Enẹwutu, to whenue ovi mítọn lẹ whẹ́n, mí vọ́ lizọnyizọn whenu-gigọ́ tọn bẹjẹeji. Mahopọnna lehe akuẹ na tlẹ sù sọ, e ma sọgan yin yiyijlẹdo dona he mí mọyi lẹ go.”
Dike “Jijọho Jiwheyẹwhe Tọn” Ni Họ́ Ahun Towe
17. Na mí ma yọ́n nuhe osọ na hẹnwa wutu, nawẹ Owe-wiwe lẹ miọnhomẹna mí gbọn?
17 Depope to mí mẹ ma yọ́n nuhe osọ na hẹnwa, na “ojlẹ po kosọ po” mẹ wẹ onú te na mímẹpo. (Yẹwh. 9:11) Etomọṣo, mí ma dona dike enẹ ni hò jijọho ahun mẹ tọn mítọn yí sọn mí si dile e nọ saba yin do na mẹhe ma tindo haṣinṣan pẹkipẹki de hẹ Jiwheyẹwhe lẹ. (Mat. 6:34) Apọsteli Paulu wlan dọmọ: “Mì yin magbọjẹnọ na nudepope blo, ṣigba to onú lẹpo mẹ, mì nọ yí odẹ̀, ovẹ̀, po pẹdido po do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan linlẹn lẹpo nasọ họ́ ahun mìtọn po nugopipe apọ̀nmẹ tọn mìtọn po.”—Flp. 4:6, 7.
18, 19. Aliho tẹlẹ mẹ wẹ Jiwheyẹwhe nọ miọnhomẹna mí te? Na apajlẹ.
18 Jehovah na jijọho ahun mẹ tọn mẹmẹsunnu gọna mẹmẹyọnnu susu he to ninọmẹ sinsinyẹn lẹ mẹ jugbọn. Mẹmẹyọnnu de dọmọ: “Whlasusu wẹ doto mẹzẹtọ de vannukundo mi nado kẹalọyi hùndido. ‘Dopo to onú tintan he e nọ wà to whenue e mọ mi lẹ mẹ wẹ nado bẹ mi fú, na n’gbẹ́ ma nado dohùn wutu.’ Enẹwutu to whedevonu he n’lẹkọyi, n’hodẹ̀ hlan Jehovah do ahun mẹ podọ ehe na mi jijọho ahun mẹ tọn bọ n’sọ tindo huhlọn taun. Dile etlẹ yindọ ohùn whè do mi bọ n’ma dogán sọmọ, n’penugo nado basi zẹẹmẹ Owe-wiwe tọn na ẹn hezeheze gando teninọ ṣie go.”
19 Jiwheyẹwhe sọgan wleawu nuhe mí tindo nuhudo etọn lẹ tọn gbọn yisenọ hatọ de kavi núdùdù gbigbọmẹ tọn he nọ wá do gànmẹ bo nọ miọnhomẹnamẹ de dali. A sọgan ko sè pọ́n bọ mẹmẹsunnu kavi mẹmẹyọnnu de dọ dọ: “Hosọ ehe wá do gànmẹ pẹpẹ. E taidi dọ yẹn wẹ yè kàn ẹn na nkọ!” Mọwẹ, mahopọnna ninọmẹ kavi nuhudo depope he mẹ mí te, Jehovah na do owanyi etọn hia mí eyin mí dejido ewọ go. Hú popolẹpo, “lẹngbọ” etọn lẹ wẹ mí yin, bọ oyín etọn sọ to ota na mí.—Ps. 100:3; Joh. 10:16; Owalọ 15:14, 17.
20. Naegbọn devizọnwatọ Jehovah tọn lẹ na tin ma hanú to whenue aihọn Satani tọn na yin vivasudo?
20 To “azán homẹgble OKLUNỌ tọn” he to dindọnsẹpọ po awuyiya po lọ whenu, nuhe go aihọn Satani tọn ze jidide etọn do lẹpo wẹ na yin vivasudo. Sika, fataka po nuhọakuẹ devo lẹ po ma na penugo nado basi hihọ́ depope namẹ. (Zẹf. 1:18; Howh. 11:4) Fibẹtado dopo gee he mí na tindo to whenẹnu wẹ ‘Osé madopodo’ mítọn. (Isa. 26:4) Enẹwutu, mì gbọ mí ni dejido Jehovah go mlẹnmlẹn gbọn tonusisena nujinọtedo dodo tọn etọn lẹ, gbọn owẹ̀n Ahọluduta lọ tọn lilá mahopọnna ojlo matindo kavi nukundiọsọmẹ he mí na pehẹ po magbọjẹ mítọn lẹpo bibẹ do alọ etọn mẹ po dali. Eyin mí wà onú ehelẹ, mí “na tin ma hanú, bo nasọ nọ blẹo matin budi oylan tọn” depope.—Howh. 1:33.
[Nudọnamẹ odò tọn]
a Pọ́n owe lọ Mì Gbọṣi Owanyi Jiwheyẹwhe Tọn Mẹ, weda 102-106.
Be Hiẹ Sọgan Na Gblọndo Ya?
Nawẹ mí sọgan dejido Jiwheyẹwhe go gbọn?
• to whenue mí yin whiwhlepọn nado waylan
• to whenue mí pehẹ ojlo matindo kavi nukundiọsọmẹ
• to whenue mí to pipehẹ magbọjẹ gbẹ̀mẹ tọn lẹ
[Kanbiọ Oplọn tọn lẹ]
[Yẹdide to weda 13]
Nujinọtedo Jiwheyẹwhe tọn lẹ go titẹdo nọ hẹn ayajẹ wá
[Yẹdide to weda 15]
‘Jehovah wẹ Osé madopodo lọ’
