Be A Nọ Mọ Ayajẹ to Biblu Hihia mẹ Ya?

“WHENUE n’jẹ Biblu hia ji to gbesisọ mẹ, n’mọ ẹn taidi nuhe vẹawu kakati nido yin awuvivinu. Na e ma nọ bọawuna mi nado mọnukunnujẹ e mẹ wutu, n’ma nọ saba na ayidonugo nuhe hia n’te,” wẹ Lorraine dọ.

Mẹdevo lẹ dọ dọ whenue emi lọsu jẹ Biblu hia ji, emi ma nọ mọ awuvivi to e mẹ. Etomọṣo, yé zindonukọn na yé yọnẹn dọ nuhe sọgbe wẹ e yin nado nọ hia Biblu. Marc dọmọ: “E bọawu nado dike ayihafẹsẹnamẹnu lẹ ni jántẹnna Biblu hihia po oplọn mẹdetiti tọn po. E biọ odẹ̀ vẹkuvẹku hihò po vivẹnu susu po to asi e nado hẹn Biblu hihia egbesọegbesọ zun apadewhe nuwiwa ṣie lẹ tọn.”

Etẹwẹ a sọgan wà nado wleawuna pinpẹn-nutọn-yinyọnẹn na Ohó Jiwheyẹwhe tọn dogọ? Nawẹ hiẹ sọgan mọ awuvivi to Biblu hihia mẹ gbọn? Lẹnnupọndo ayinamẹ ehelẹ ji.

Yanwle po Aliho Nupinplọn Tọn lẹ Po

Nọ hodẹ̀ whẹpo do bẹ Biblu hihia jẹeji bo nọ ze ayiha do nuhe hia a te ji. Nọ hodẹ̀ bo nọ biọ to Jehovah si nado gọalọna we nado wleawuna ojlo vẹkuvẹku na Ohó etọn pinplọn. Nọ biọ to e si dọ e ni hùn ayiha po ahun towe po na hiẹ nido mọnukunnujẹ nuyọnẹn etọn mẹ ganji. (Ps. 119:34) Eyin a ma nọ wàmọ, Biblu pinplọn sọgan yawu pé agbọ́ we, podọ a sọgan nọma tindo ojlo na nupinplọn ba. Lynn dọmọ: “To whedelẹnu, wehihia ṣie nọ yá sọmọ bọ nuagokun delẹ nọ gbọ go e pete. N’ma nọ saba mọnukunnujẹ linlẹn tangan lọ lẹ mẹ ganji. Ṣigba, n’nọ biọ to Jehovah si nado gọalọna mi nado do mẹplọnlọ dee go, podọ ehe nọ zọ́n bọ n’nọ ze ayiha do nuhe hia n’te ji.”

Nọ yọ́n pinpẹn nuhe plọn a te tọn. Flindọ eyin hiẹ mọnukunnujẹ nugbo Biblu tọn lẹ mẹ bo nọ yí yé do yizan mẹ, e na dekọtọn do ogbẹ̀ madopodo mẹ na we. Enẹwutu, nọ dovivẹnu vẹkuvẹku nado dín nuagokun he yọ́n-na-yizan na we lẹ mọ bo nọ yí yé do yizan mẹ. Chris dọmọ: “N’nọ dín nuagokun he sọgan gọalọna mi nado doayi walọ po mẹwhinwhàn ṣie he ma sọgbe lẹ po go. Dile etlẹ yindọ n’ma mọ wekantọ lọ lẹ pọ́n, awuvivinu de wẹ e nọ yin na mi nado mọdọ Biblu po susu to owe mítọn lẹ mẹ po bẹ nudọnamẹ he yọ́n-na-yizan na mi lẹ hẹn.”

Nọ ze yanwle he kọ̀n a sọgan jẹ lẹ dai. Nọ tẹnpọn nado plọn nuyọyọ de do mẹhe go Biblu donù lẹ ji. Eyin a nọ basi dodinnanu to owe Étude perspicace des Écritures kavi Index des publications Watch Tower mẹ, a na mọ ojlofọndotenamẹnu susu sọn apajlẹ mẹhe go Biblu donù lẹ tọn mẹ. Lehe hiẹ jẹakọ hẹ apajlẹ mẹhe go Biblu donù lẹ tọn sọ, mọ wẹ gbẹtọ-yinyin yetọn na yinuwado jiwe do niyẹn.

Nọ dín aliho yọyọ lẹ nado yihojlẹdohogo sọn Owe-wiwe lẹ mẹ. (Owalọ 17:2, 3) Sophia nọ plọnnu po yanwle enẹ po to ayiha mẹ. E dọmọ: “Ojlo ṣie wẹ nado plọn bosọ wleawuna aliho hoyijlẹdohogo tọn yọyọ he n’sọgan yizan to lizọnyizọn lọ mẹ lẹ podọ to ninọmẹ devo lẹ mẹ nado basi zẹẹmẹ he họnwun do nugbo Biblu tọn lẹ ji. Atọ̀họ̀-Nuhihọ́ lọ Tọn yin azọ́nwanu dagbe de nado jẹ yanwle enẹ kọ̀n.”—2 Tim. 2:15.

Nọ yí nukun homẹ tọn do pọ́n kandai Biblu tọn lẹ. “Ohó Jiwheyẹwhe tọn tin to ogbẹ̀,” wẹ Heblu lẹ 4:12 dọ. Dile hiẹ to Biblu hia, dike owẹ̀n Jiwheyẹwhe tọn ni gbọṣi ayiha towe mẹ gbọn nukun homẹ tọn yíyí do pọ́n nuhe mẹhe go Biblu donù lẹ mọ dali. Tẹnpọn nado sè nuhe yé sè bosọ tẹnpọn nado tindo numọtolanmẹ yetọn nkọ. Yí nuhe mẹ yé jugbọn  lẹ jlẹdo ninọmẹ tangan gbẹzan towe tọn lẹ go. Plọnnu sọn aliho he mẹ yé pehẹ ninọmẹ he mẹ yé jugbọn lẹ mẹ. Ehe na zọ́n bọ hiẹ na mọnukunnujẹ kandai Biblu tọn lẹ mẹ ganji podọ a ma na yawu wọn yé.

Nọ de whenu dovo na wefọ he gẹdẹ lẹ po zẹẹmẹ he yin bibasi do yé ji lẹ po na hiẹ nido sọgan mọnukunnujẹ yé mẹ ganji. Nọ de whenu susu dovo na nupinplọn. E yọnbasi dọ kanbiọ ojlofọndotenamẹ tọn he na biọ dodinnanu bibasi dogọ lẹ ni wá ayiha mẹ na we. Nọ dindona hogbe he gẹdẹ lẹ bo nọ yí nudọnamẹ odò tọn lẹ po todowhinnu hogbe Biblu tọn lẹ tọn po zan. Lehe hiẹ nọ mọnukunnujẹ nuhe hia a te lẹ mẹ bosọ nọ yí yé do yizan mẹ sọ, mọ wẹ hiẹ na nọ mọ awuvivi to Ohó Jiwheyẹwhe tọn mẹ do niyẹn. Taidi kọdetọn de, hiẹ na penugo nado dọ taidi psalm-kantọ lọ dọmọ: “Aṣẹdai towe [Jehovah tọn] lẹ wẹ yẹn yí na ogúigba de kakadoi: Na yé wẹ ayajijẹ ayiha ṣie tọn.”—Ps. 119:111.

Nọ whesọ do gbadopọnna nuhe hia a te. Yin lẹnpọn dagbenọ na nuhe dù whenu he hiẹ dedovo na oplọn mẹdetiti tọn. Nọ nọ̀ jlẹkaji na nuhe dù whenu he a dedovo na nupinplọn po whenu he a dedovo na awuwiwlena opli agun tọn lẹ po. Raquel dọmọ: “Apọ̀ nọ saba ṣì mi bọ n’ma nọ penugo nado ze ayiha do nuhe hia n’te ji. Enẹwutu, n’mọdọ e yọ́n hugan nado nọ plọnnu na ojlẹ kleun de. Mọwiwà nọ zọ́n bọ n’nọ duvivi nupinplọn tọn taun.” Chris dọmọ: “Eyin n’ma whesọ do plọnnu, ayihadawhẹnamẹnu ṣie nọ dotukla mi na onú vude poun wẹ n’nọ hẹn do ayiha mẹ wutu. Nuhe n’plọn ma nọ saba biọ ahun mẹ na mi.” Enẹwutu, nọ whesọ do plọnnu.

Nọ wleawuna ojlo vẹkuvẹku na ohó Jiwheyẹwhe tọn. Apọsteli Pita dọmọ: “Taidi viyẹyẹ he yè ṣẹṣẹ ji, mì wleawuna ojlo vẹkuvẹku na anọ́sin he ma yin fuflusọ ohó lọ tọn, na mì nido sọgan whẹ́n gbọn dali etọn jẹ whlẹngán kọ̀n.” (1 Pita 2:2) Ovivu lẹ ma nọ wleawuna ojlo vẹkuvẹku na anọ́sin gba. Jọwamọnu wẹ e yin. Ṣigba Owe-wiwe lẹ dohia dọ mí dona wleawuna ojlo vẹkuvẹku na ohó Jiwheyẹwhe tọn. Eyin hiẹ nọ hia weda Biblu tọn dopo poun egbesọegbesọ, e ma na dẹn bọ a na tindo ojlo vẹkuvẹku na Biblu hihia. Nuhe sọgan taidi nuhe vẹawu to bẹjẹeji na lẹzun awuvivinu to ojlẹ kleun de godo.

Nọ lẹnayihamẹpọn do wefọ Owe-wiwe tọn lẹ ji. Ayihamẹlinlẹnpọn do nuhe hia a te ji nasọ hẹn ale susu wá na we. Ehe na gọalọna we nado mọ kanṣiṣa he tin to hosọ he ji a basi dodinnanu do lẹ ṣẹnṣẹn. E ma na dẹn bọ hiẹ na tindo  nuyọnẹn họakuẹ gbigbọmẹ tọn susugege—yèdọ nutindo de he nọ hẹn awuvivi wá.—Ps. 19:14; Howh. 3:3.

Whenu Yiyizan Ganji

E nọ biọ vivẹnudido nado tẹdo aṣa dagbe nupinplọn tọn go, ṣigba ale he e nọ hẹnwa lẹ mayọnjlẹ. Nukunnumọjẹnumẹ towe do Biblu ji na siso dogọ. (Heb. 5:12-14) Zinzin gọna nuyọnẹn he a na wleawuna dile a to Biblu hia na hẹn we tindo ayajẹ, awuvivi po jijọho po. Nuyọnẹn he tin to Ohó gbọdo Jiwheyẹwhe tọn mẹ yin “atin ogbẹ̀ tọn” na mẹhe hẹn e go bosọ yí i do yizan mẹ lẹ.—Howh. 3:13-18.

Nupinplọn sisosiso gando Ohó Jiwheyẹwhe tọn go na gọalọna we nado tindo ayiha he zìn. (Howh. 15:14) Ehe na hẹn we penugo nado nọ na ayinamẹ ahundopo tọn he sinai do Biblu ji gligli. Eyin hiẹ nọ dike nuhe a hia to Biblu kavi owe “afanumẹ nugbonọ podọ nuyọnẹntọ lọ” tọn mẹ lẹ ni nọ deanana nudide towe lẹ, hiẹ na duvivi nuyiwadomẹji Ohó gbọdo Jehovah tọn he nọ jlọmẹdote bosọ nọ hẹnmẹ lodo tọn. (Mat. 24:45) Hiẹ na tindo pọndohlan dagbe podọ Biblu na nọ yinuwado linlẹn, nuyiwa po hodidọ towe po ji. Humọ, hiẹ na tindo kọdetọn dagbe to nuhe gando haṣinṣan towe hẹ Jiwheyẹwhe go lẹpo mẹ.—Ps. 1:2, 3.

Eyin a yiwanna Jiwheyẹwhe sọn ahun mẹ, enẹ na whàn we nado nọ má nuyise towe hẹ mẹdevo lẹ. Ehe lọsu sọgan hẹn ale susu wá. Sophia nọ tẹnpọn nado flin wefọ voovo he e sọgan yizan nado dọ̀n ayidonugo whétọ lẹ tọn bo gbọnmọ dali hẹn lizọnyizọn Klistiani tọn etọn yin kọdetọn dagbe tọn po awuvivi tọn po. E dọmọ: “Ayajẹnu wẹ e nọ yin nado mọ lehe nuhe Biblu dọ lẹ nọ yinuwado gbẹtọ lẹ ji do.”

Ṣigba, ale daho hugan he awuvivi mimọ sọn Biblu mẹ nọ hẹnwa wẹ haṣinṣan pẹkipẹki de tintindo hẹ Jehovah. Biblu pinplọn sọgan gọalọna we nado tunwun nujinọtedo etọn lẹ go bosọ yọ́n pinpẹn owanyi, alọtútlú po whẹdida dodo etọn tọn po. Nudepope ma nọ hẹn ale wá sọ Biblu pinplọn. Nọ dindonanu sisosiso do Biblu ji. Mọwiwà na dohia dọ a to whenu towe yizan ganji.—Ps. 19:7-11.

[Yẹdide/Apotin to weda 5]

OHÓ JIWHEYẸWHE TỌN HIHIA: YANWLE PO ALIHO NUPINPLỌN TỌN LẸ PO

▪ Nọ hodẹ̀ whẹpo do bẹ Biblu hihia jẹeji bo nọ ze ayiha do nuhe hia a te ji.

▪ Nọ yọ́n pinpẹn nuhe plọn a te tọn.

▪ Nọ ze yanwle he kọ̀n a sọgan jẹ lẹ dai.

▪ Nọ dín aliho yọyọ lẹ nado yihojlẹdohogo sọn Owe-wiwe lẹ mẹ.

▪ Nọ yí nukun homẹ tọn do pọ́n kandai Biblu tọn lẹ.

▪ Nọ de whenu dovo na wefọ he gẹdẹ lẹ po zẹẹmẹ he yin bibasi do yé ji lẹ po na hiẹ nido sọgan mọnukunnujẹ yé mẹ ganji.

▪ Nọ whesọ do gbadopọnna nuhe hia a te.

▪ Nọ wleawuna ojlo vẹkuvẹku na ohó Jiwheyẹwhe tọn.

▪ Nọ lẹnayihamẹpọn do wefọ Owe-wiwe tọn lẹ ji.

[Yẹdide to weda 4]

Eyin a to kandai Biblu tọn de hia, nọ ze dewe do ninọmẹ lọ mẹ