Hodo Klisti, Nukọntọ Pipé Lọ

MẸHE nọ hodo aṣẹpatọ aihọn tọn lẹ nọ saba jẹflumẹ. Ṣigba, nuyiwadomẹji he nukọntọ-yinyin Klisti tọn nọ tindo do mẹhe litaina ẹn lẹ ji gbọnvo taun. Jesu dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na alindọn mìtọn lẹ.” (Mat. 11:28, 29) Nukọntọ-yinyin Jesu tọn nọ fakọnamẹ bo nọ jlọmẹdote. E nọ tindo ojlo nujọnu tọn to agbátọnọ po mẹhe to kọgbidinamẹ glọ lẹ po mẹ, bo nọ basi oylọna yé wá zẹgẹ etọn he bọawu glọ. Ṣigba, etẹwẹ e zẹẹmẹdo nado hodo nukọntọ-yinyin Jesu tọn?

Apọsteli Pita wlan dọmọ: “Na Klisti lọsu jiya na mì, bo ze apajlẹ de dai na mì, na mì nido hodo afọdòmẹ etọn lẹ pẹkipẹki.” (1 Pita 2:21) Nawẹ e yin nujọnu na mí nado nọ hodo afọdòmẹ Jesu tọn lẹ sọ? Mí ni dọ dọ hiẹ po hagbẹ towe lẹ po jlo na zinzọnlin gbọn fie bọmbu flinflin lẹ yin dìdì do aigba glọ te de bọ mẹdopo gee to mì mẹ wẹ yọ́n lehe mì sọgan gbọn finẹ awuyẹyẹ-afọyẹyẹ do. Be hiẹ ma na hodo e pẹkipẹki, vlavo bo tlẹ ze afọ do afọdò etọn lẹ mẹ ya? Mọdopolọ, eyin mí na mọ hihọ́ to sọgodo, enẹ sinai do lehe mí yí gbẹzan mítọn lẹpo do hodo apajlẹ Jesu tọn do ji. Mọwiwà biọ dọ mí ni nọ dotoai bo nọ setonuna ẹn bosọ nọ kọngbedopọ hẹ afọzedaitọ etọn lẹ.

Dotoai bo Setonu

Sẹpọ vivọnu Yẹwhehodidọ Osó ji tọn Jesu tọn, e dọmọ: “Mẹdepope he sè ohó he yẹn to didọ ehelẹ bo basi yé, na yin yiyijlẹdo dawe nuyọnẹntọ de go, he gbá ohọ̀ etọn do osé gángán ji. Podọ jikun sinsinyẹn ja bọ osin gọ́ bọ jẹhọn sọ yìn bo hò jẹ ohọ̀ lọ go, ṣigba e ma họ́jai, na e ko yin dido dó osé gángán ji wutu.”—Mat. 7:24, 25.

Gbọnmọ dali, Jesu ylọ dawe he dotoai bo setonuna hogbe etọn lẹ dọ “nuyọnẹntọ.” Be mí nọ dohia gbọn tonusise mlẹnmlẹn dali dọ mí nọ hodo apajlẹ Klisti tọn bo yọ́n pinpẹn etọn ya, kavi gbedide Jesu tọn he bọawu nado setonuna lẹ kẹdẹ wẹ mí tindo ayilinlẹn lọ nado nọ hodo? Jesu dọmọ: “Yẹn nọ wà nuhe nọ hẹn homẹhun [Jiwheyẹwhe] lẹ to whepoponu.” (Joh. 8:29) Mì gbọ mí ni dovivẹnu nado nọ hodo apajlẹ etọn.

To owhe kanweko tintan whenu, apọsteli lẹ ze apajlẹ dagbe dai na mí gbọn taliliaina nukọntọ-yinyin Klisti tọn dali. To gbèdopo, Pita dọna Jesu dọmọ: “Pọ́n! Míwlẹ jo onú lẹpo do bo to hihodo we.” (Malku 10:28) Na nugbo tọn, apọsteli lẹ pọ́n nukọntọ-yinyin Jesu tọn hlan taidi nuhọakuẹ sọmọ bọ yé desọn ojlo mẹ bo jo nulẹpo do nado hodo e.—Mat. 4:18-22.

Nọ Kọngbedopọ hẹ Afọzedaitọ Klisti Tọn Lẹ

Ojlẹ kleun de jẹnukọnna okú Jesu tọn, e donù aliho devo he mẹ mí sọgan hodo nukọntọ-yinyin etọn te go. E dọmọ: “Ewọ he yí mẹdepope he yẹn dohlan yí yẹnlọsu ga.” (Joh. 13:20) Na taun tọn, Jesu ylọ afọzedaitọ yiamisisadode etọn lẹ dọ “mẹmẹsunnu” etọn lẹ. (Mat. 25:40) To whenue Jesu yin finfọnsọnku yì olọn mẹ godo, “mẹmẹsunnu” etọn lẹ yin dide nado nọ yinuwa to “otẹn Klisti tọn mẹ” taidi afọzedaitọ etọn lẹ he to oylọ-basina mẹdevo lẹ nado gbọwhẹ hẹ Jehovah Jiwheyẹwhe. (2 Kọl. 5:18-20) Nukọntọ-yinyin Klisti tọn hihodo biọ dọ mí ni nọ litaina “mẹmẹsunnu” etọn lẹ.

 Mí na wà dagbe nado nọ gbeje míde pọ́n nado yọnẹn eyin mí nọ setonuna ayinamẹ Owe-wiwe tọn he wá do gànmẹ bo tin to owe mítọn lẹ mẹ. Gbọn Owe-wiwe lẹ pinplọn po opli lẹ yìyì po dali, mí nọ mọ nuflinmẹ gando nuhe Klisti dọ lẹ go. (2 Pita 3:1, 2) Mí nọ dohia dọ mí yọ́n pinpẹn núdùdù gbigbọmẹ tọn he nọ yin awuwlena ehe tọn taun gbọn mahẹ gbesisọ tọn tintindo to e mẹ dali. Ṣigba, nawẹ mí dona nọ yinuwa gbọn eyin ayinamẹ tangan de nọ yin nina sọn ojlẹ de mẹ jẹ devo mẹ? Di apajlẹ, Ohó Jiwheyẹwhe tọn na ayinamẹ Klistiani lẹ nado wlealọ “to Oklunọ mẹ kẹdẹ.” (1 Kọl. 7:39) E ko lán to owhe kanweko ji he whẹho ehe ko nọ yin hodọdeji sọn ojlẹ de mẹ jẹ devo mẹ to Atọ̀họ̀-Nuhihọ́ lọ Tọn mẹ. Ayihaawe ma tin dọ mẹmẹsunnu Klisti tọn lẹ nọ do mẹtọnhopọn owanyinọ hia na dagbemẹninọ gbigbọmẹ tọn mítọn gbọn hosọ ehe nkọ lẹ po ayinamẹ gbọdo devo lẹ zinzinjẹgbonu po dali. Dopo to aliho he mẹ mí sọgan dohia dọ mí to Nukọntọ pipé mítọn Jesu Klisti hodo te lẹ mẹ wẹ nado nọ payi nuflinmẹ ehelẹ go.

“Omọ́ nugbonọ tọn taidi hinhọ́n he sẹ́, he to sisẹ́ yinukọn kakajẹ okle,” wẹ Howhinwhẹn lẹ 4:18 dọ. Mọwẹ, nukọntọ-yinyin Jesu tọn to nukọnzindo, e ma nọte gún ún to fidopo gba. Aliho devo nado nọ kọngbedopọ hẹ “mẹmẹsunnu” Klisti tọn lẹ wẹ nado tindo pọndohlan dagbe gando vọjlado depope he nọ yin bibasi do nukunnumọjẹnumẹ mítọn do nugbo Owe-wiwe tọn ji he “afanumẹ nugbonọ podọ nuyọnẹntọ lọ” nọ zinjẹgbonu lẹ go.—Mat. 24:45.

Mí sọ nọ do taliliai hia “mẹmẹsunnu” Klisti tọn lẹ gbọn gbekinkọndopọ hẹ nugopọntọ dide he tin to agun Klistiani tọn mẹ lẹ dali. Apọsteli Paulu dọmọ: “Mì nọ setonuna mẹhe to anadenanu to ṣẹnṣẹn mìtọn lẹ bo nọ litai, na yewlẹ to alindọn mìtọn họ́.” (Heb. 13:17) Di apajlẹ, mẹho de sọgan na mí tuli gando nujọnu-yinyin sinsẹ̀n-bibasi whẹndo tọn go kavi na mí ayinamẹ do adà lizọnyizọn mítọn tọn delẹ ji. Nugopọntọ tomẹyitọ de sọgan na mí ayinamẹ dagbe Owe-wiwe tọn delẹ gando adà gbẹzan Klistiani tọn mítọn tangan de go. Eyin mí nọ hodo ayinamẹ mọnkọtọn sọn ojlo mẹ wá, enẹ na dohia dọ mí to Jesu Nukọntọ mítọn hodo.

Aihọn lọ tindo nuhudo nukọntọ dagbe de tọn badabada. Ṣigba, lehe e yin homẹmiọnnamẹnu nado hodo nukọntọ-yinyin owanyinọ Klisti tọn do sọ! Mì gbọ mí ni wà nuhe go mí pé lẹpo nado nọ setonuna Nukọntọ mítọn bo kọngbedopọ hẹ mẹhe yizan e te to egbehe lẹ.

[Yẹdide to weda 27]

Be a nọ kẹalọyi ayinamẹ Biblu tọn ma nado biọ zẹgẹ de glọ hẹ mayisenọ de ya?